Enseigne ou bann zenfant

Jérémie pa ti baisse lé-bras

ESKI to’nn deja senti-toi tellement decouragé ki to envie laisse tou tombé?—a Beaucoup ena sa sentiment-la. Jeune Jérémie aussi ti passe par la. Mais selman, li pa ti laisse seki lezot ti dire ou-soit ti faire, amenn li pou abandonne so service. Anou guetté, couma Jérémie ti enn kikenn special pou Bondié, mem si parfois li ti envie laisse tou tombé.

Avant ki Jérémie né, vrai Bondié, Jéhovah, ti choisir li pou vinn enn prophete pou ki li dire bann dimoune ki zot pa ti pé faire bann kitsoz ki faire Jéhovah content. Eski to koné ki Jérémie ti dire Jéhovah plusieurs l’année plitar?— “Mo pa mem koné couma pou kozé, parski mo encore enn jeune garson.”

Couma to pensé Jéhovah ti reponn Jérémie?— Avek bonté mais aussi dan enn fason ferme, Li ti dire: “Pa dire: ‘Mo encore enn jeune garson.’ Mais vers tou bann ki mo pou envoye toi, to pou bizin allé; ek tou seki mo pou donne toi l’ordre pou dire, to pou bizin dire. Pa peur.” Kifer Jérémie pa ti bizin peur? Jéhovah ti dire: “Mo avek toi pou delivré toi.”—Jérémie 1:4-8.

Malgré sa, couma nou’nn trouvé avant, plitar Jérémie ti decouragé. Sa ti arrivé parski lezot ti pé bouffonne li a cause li ti pé servi Bondié. Li ti dire: ‘Tout longue la journée tou dimoune pé riye moi ek pé bouffonne moi.’ Alors li ti decide pou laisse tou tombé. Li ti dire: “Mo pa pou koz lor [Jéhovah], ek mo pou arrete koz pou so nom.” Mais eski li ti vrai-mem arrete dire Parole Jéhovah?

Jérémie ti dire: “Dan mo leker, sa ti couma enn difé ki ti bloké dan mo bann lezo; ek mo ti fatigué tini li.” (Jérémie 20:7-9) Mem si parfois Jérémie ti peur, so l’amour pou Jéhovah ti empeche li baisse lé-bras. Ek parski li pa ti baisse lé-bras, anou guetté couma Jéhovah ti protege li.

Jéhovah ti demann Jérémie pou dire bann ki ti reste dan Jérusalem ki si zot pa change zot mauvais conduite, Jérusalem ti pou detruire. Kan Jérémie ti donne sa l’avertissement-la, bann dimoune ti en colere ek ti dire: “Sa zom-la merite la mort.” Mais selman, Jérémie ti suppliye zot pou “obeir la voix Jéhovah.” Apré sa li ti dire: ‘Zot bizin koné ki si zot mette moi a mort, zot pé touye enn zom innocent, parski Bondié finn envoye moi pou koz ar zot.’ Eski to koné ki finn arrivé?—

La Bible dire: “Bann prince ek le peuple en entier ti dire bann pretre ek bann prophete: ‘Sa zom-la pa merite la mort, parski c’est au nom Jéhovah nou Bondié ki li ti koz ar nou.’ ” Nou trouvé ki Jéhovah ti protege Jérémie, parski li pa ti laisse la peur faire li abandonne so service. Asterla, anou guetté ki ti arrive Ouriya, enn lot prophete Jéhovah, ki pa ti agir pareil couma Jérémie.

La Bible dire ki ‘Ouriya ti pé prophetise kont Jérusalem ek li ti dire bann mem parole ki Jérémie.’ Mais kan le roi Yehoïaqim ti en colere avek Ouriya, eski to koné ki Ouriya ti faire?— Li ti gagne peur, li ti arrete faire volonté Bondié, ek li ti sauvé li ti al en Égypte. Alors le roi ti envoye bann zom la-bas pou rod li ek pou faire li retourné. Kan zot ti faire sa, eski to koné ki sa mauvais le roi-la ti faire?— Li ti touye Ouriya avek enn l’epée!—Jérémie 26:8-24.

Dapré toi, kifer Jérémie ti gagne protection Jéhovah, mais pa Ouriya?— C’est parski, mem si Jérémie ti gagne peur, pareil couma Ouriya, li pa ti arrete servi Jéhovah ek li pa ti sauvé. Li pa ti laisse tou tombé. Ki leson to pensé nou kapav aprann ar l’exemple Jérémie?— Mem si parfois nou kapav trouve sa difficile pou faire seki Jéhovah dire, nou bizin toujours faire Li confiance ek obeir Li.

[Note]

Bann question:

○ Ki travail Bondié ti choisir pou Jérémie?

○ Kifer Jérémie ti envie laisse tou tombé?

○ Kifer Jéhovah ti protege Jérémie, mais pa Ouriya?

○ Ki to finn aprann ar l’exemple Jérémie?