“Kisannla finn arrivé konn pensée Jéhovah?”

“‘Kisannla finn arrivé konn pensée Jéhovah, pou ki li enseigne Li?’ Mais nou, nou ena pensée Christ.”—1 COR. 2:16.

1, 2. (a) Ki difficulté beaucoup dimoune gagné? (b) Ki nou bizin rappel concernant nou pensée ek pensée Jéhovah?

ESKI ou finn deja trouve sa difficile pou comprend fason pensé enn lot dimoune? Kitfois ou finn fek marié, ek ou ena l’impression ki ou pena okenn moyen pou arrivé comprend bien tou seki ou conjoint pensé. En realité, bann zom ek bann femme pense ek mem koz dan enn fason different. Oui, dan certain culture, bann zom ek bann femme koz different dialecte ki sorti dan enn sel langue! En plus, bann difference ki ena dan bann culture ek bann langue kapav amenn bann dimoune pou pense ek pou agir dan different fason. Selman, plus ou aprann pou konn lezot, plus ou gagne l’occasion pou commence comprend zot fason pensé.

² Alors, fodé pa nou etonné ki nou fason pensé bien different ar fason pensé Jéhovah. Par so prophete Isaïe, Jéhovah ti dire bann Israélite: “Zot bann pensée pa mo bann pensée, ek mo bann fason agir pa zot bann fason agir.” Apré, Li ti donne enn l’exemple pou explik sa: “Parski, pareil couma le ciel pli haute ki la terre, mo bann fason agir pli haute ki zot bann fason agir, ek mo bann pensée pli haute ki zot bann pensée.”—Is. 55:8, 9.

 3. Cite deux fason couma nou kapav faire zeffort pou vinn “proche ar [Jéhovah].”

³ Mais eski sa vedir ki nou pa bizin mem essaye comprend fason pensé Jéhovah? Non. Mem si jamais nou pa pou reussi comprend net bann pensée Jéhovah, malgré sa, la Bible encourage nou pou vinn “proche ar [Jéhovah].” (Lire Psaume 25:14; Proverbes 3:32.) Enn fason ki nou kapav vinn pli proche ar Jéhovah c’est kan nou montré respé ek prend compte tou seki Jéhovah inn faire, pareil couma nou kapav lire dan so Parole, la Bible. (Ps. 28:5) Enn lot fason c’est kan nou aprann pou konn “pensée Christ,” ki “reflet Bondié ki invisible.” (1 Cor. 2:16; Col. 1:15) Kan nou prend le temps pou etudié bann recit ki ena dan la Bible ek pou medite lor la, nou kapav commence comprend bann qualité Jéhovah ek so fason pensé.

Faire attention ar enn mauvais tendance

4, 5. (a) Ki mauvais tendance nou bizin rejeté? Expliké. (b) Ki mauvais fason pensé bann Israélite ti’nn developpé?

⁴ Kan nou medite lor bann action Jéhovah, nou bizin rejette tendance pou juge Bondié dapré bann principe ki bann humain inn etabli. Seki Jéhovah dire dan Psaume 50:21 faire reference ar sa tendance-la: “To ti pensé ki mo pou vinn vrai-mem pareil couma toi.” C’est pareil couma enn specialiste lor la Bible ti dire ena plus ki 175 an: “Dimoune ena tendance pou juge Bondié dapré zot prop principe ek zot croire ki Bondié limité par mem principe ki zot pensé bann dimoune bizin suive.”

⁵ Nou bizin faire bien attention pou nou pa adapté fason ki nou considere Jéhovah dapré nou prop principe ek nou bann desir. Kifer c’est enn kitsoz important? Parski, maniere ki nou trouve bann kitsoz, li limité ek imparfait, alors kan nou etudié la Bible, kitfois nou trouve certain kitsoz ki Jéhovah inn faire ki pa parette juste. Bann Israélite dan le passé ti pense coumsa ek ti tire enn mauvais conclusion lor fason ki Jéhovah ti agir avek zot. Guetté ki Jéhovah ti dire zot: “Vrai-mem zot pou dire: ‘Fason agir Jéhovah pa bien reglé.’ Ecouté, s’il vous plait, lakaz Israël. Eski c’est mo fason agir ki pa bien reglé? Eski c’est pa zot, zot fason agir ki pa bien reglé?”—Ézék. 18:25.

 6. Ki leson Job ti aprann, ek couma nou kapav tire profit ar so l’experience?

⁶ Enn kitsoz bien important ki kapav aide nou pou evité faire erreur pou juge Jéhovah dapré nou prop principe, c’est kan nou reconette ki nou fason pou trouve kitsoz li limité ek parfois mem bien mauvais. Job ti bizin aprann sa leson-la. Pendant ki li ti pé souffert, Job ti pé lutte kont desespoir, ek li ti fixé so l’esprit enn tipé trop lor li-mem ek sa ti amenn li pou blié bann question ki ti pli important. Mais avek amour, Jéhovah ti aide li pou ena enn fason pensé pli ouvert. Kan Li ti demann Job plus ki 70 question, ki Job pa ti kapav reponn, Jéhovah ti montré ki Job limité dan so fason pou comprend certain kitsoz. Job ti reagir avek humilité, li ti change so fason pensé.—Lire Job 42:1-6.

Gagne “pensée Christ”

 7. Kifer si nou examine seki Jésus ti faire sa pou aide nou comprend fason pensé Jéhovah?

⁷ Dan tou seki li ti dire ek faire, Jésus ti imite so Papa dan enn fason parfait. (Jean 14:9) Sa vedir ki, kan nou examine seki Jésus ti faire, sa aide nou pou comprend fason pensé Jéhovah. (Rom. 15:5; Phil. 2:5) Alors, anou examine deux recit ki sorti dan bann l’Evangile ki pou aide nou.

8, 9. Dapré Jean 6:1-5, ki situation ti amenn Jésus pou pose Philippe enn question, ek kifer Jésus ti pose sa question-la?

⁸ Mazinn sa scene-la. Sa ti passé zis avant Pâque l’an 32 nou lepok. Bann zapotre Jésus ti fek fini faire enn grand travail predication a travers Galilée. Zot ti fatigué apré tou seki zot ti faire, alors Jésus ti amenn zot dan enn l’endroit isolé lor enn la plage dan nord-est la mer Galilée. Selman, plusieurs millier dimoune ti suive zot la-bas. Apré ki Jésus ti gueri sa la foule-la ek ti enseigne zot beaucoup kitsoz, enn probleme ti levé. Couma tou sa bann dimoune-la ti pou gagne kitsoz pou mangé dan sa l’endroit isolé-la? Kan Jésus ti remark sa, li ti demann Philippe, ki ti reste dan sa l’endroit-la: “Kot sa nou pou acheté di-pain pou ki bannla mangé?”—Jean 6:1-5.

⁹ Kifer Jésus ti pose Philippe sa question-la? Eski Jésus ti tracassé concernant seki ti bizin faire? Non. Ki Jésus ti pé pensé vrai-mem? L’apotre Jean, ki ti la li aussi, donne nou sa l’explication-la: “[Jésus] ti pé dire sa pou testé li, parski li, li ti koné seki li ti pou al faire.” (Jean 6:6) Par sa question-la, Jésus ti pé testé progré spirituel so bann disciple. Kan Jésus ti pose sa question-la, li ti faire zot reflechi ek li ti donne zot l’occasion pou montré zot la foi dan seki li, li ti pou kapav faire. Mais, zot pa ti saisi sa l’occasion-la ek zot ti montré ki zot fason pensé ti vrai-mem bien limité. (Lire Jean 6:7-9.) Lerla, Jésus ti montré ki li ti kapav faire enn kitsoz ki zot pa ti’nn mem maziné. Li ti faire enn mirak pou nourri sa la foule environ cinq mille dimoune ki ti pé faim-la.—Jean 6:10-13.

10-12. (a) Pou ki raison kitfois Jésus pa ti donne sa madame grec-la seki li ti demandé desuite? Expliké. (b) Ki nou pou examiné asterla?

¹⁰ Sa recit-la kapav aide nou pou comprend fason pensé Jésus dan enn lot l’occasion. Enn tipé apré ki li ti nourri enn grand la foule dimoune, Jésus ek so bann zapotre ti voyagé pou al dan le nord, en dehors frontiere Israël, pré kot Tyr ek Sidon. Kan zot ti la-bas, zot ti joinde enn femme grec ki ti suppliye Jésus pou gueri so tifi. Premier coup, Jésus pa ti prend li compte. Mais kan li ti contigne insisté, Jésus ti dire li: “Avant, laisse bann zenfant rassasié-zot, parski li pa bon prend di-pain bann zenfant ek jette sa ar bann ti li-chien.”—Marc 7:24-27.

¹¹ Kifer premier coup, Jésus ti refuse pou aide sa madame-la? Eski Jésus ti pé testé li, pareil couma li ti faire avek Philippe, pou guetté couma li pou reagir, ek donne li l’occasion pou montré so la foi? Ton la voix ki Jésus ti kozé, mem si la Bible pa dire nanyin lor la, pa ti decourage sa madame-la. Jésus ti servi l’expression “ti li-chien” pou pa trop offense sa madame-la. Alors, kitfois Jésus ti pé agir couma enn parent ki ena l’intention pou donne so zenfant seki li pé demandé, mais li pa montré desuite ki li ena sa l’intention-la, pou testé si vrai-mem zenfant-la envie gagne seki li pé demandé. Mais n’importe ki raison Jésus ti ena, enn fois ki madame-la ti montré so la foi, sans hesité Jésus ti donne li seki li ti pé demandé.—Lire Marc 7:28-30.

¹² Sa deux recit ki trouve dan bann l’Evangile-la faire nou comprend bien “pensée Christ.” Asterla, anou guetté couma sa bann recit-la kapav aide nou pou comprend pli bien pensée Jéhovah.

Fason ki Jéhovah ti agir avek Moïse

13. Couma, kan nou comprend bien fason pensé Jésus sa aide nou?

¹³ Kan nou comprend bien fason pensé Jésus, sa aide nou pou comprend bann passage la Bible ki kapav difficile pou comprend. Par exemple, anou guette seki Jéhovah ti dire Moïse apré ki bann Israélite ti faire enn veau en or pou zot adoré. Bondié ti dire li: “Mo finn guette sa peuple-la ek c’est enn peuple ki ena enn licou raide. Alors asterla, laisse moi faire: ki mo colere enflammé kont zot ek ki mo detruire zot net, ek ki mo faire toi vinn enn grand nation.”—Ex. 32:9, 10.

14. Couma Moïse ti reagir ar bann parole Jéhovah?

¹⁴ Sa recit-la contigné: “Moïse ti commence calmé colere Jéhovah so Bondié ek ti dire: ‘Kifer, o Jéhovah, to colere bizin enflammé kont to peuple ki to’nn faire sorti dan pays l’Égypte avek enn grand puissance ek avek enn la main fort? Kifer bann Égyptien pou bizin dire: “C’est avek enn mauvais l’intention ki Li’nn faire zot sorti pou touye zot dan bann montagne ek pou detruire zot net lor la terre”? Detourne-toi ar to grand colere ek ena regret pou di-tort ki to envie faire to peuple. Rappel Abraham, Isaac ek Israël, to bann serviteur, ar ki to finn faire enn serment par to-mem, kan to ti dire zot: “Mo pou multiplié zot descendance pareil couma bann zetoile ki dan le ciel, ek tou sa pays ki mo ti montré-la mo pou donne sa zot descendance, pou ki vrai-mem zot prend sa pou zot, pou touletan.” ’ Alors Jéhovah ti commence ena regret concernant sa di-tort ki Li ti dire Li pou faire so peuple-la.”—Ex. 32:11-14.a

15, 16. (a) Seki Jéhovah ti dire, ti donne Moïse ki l’occasion? (b) Dan ki sens Jéhovah ti “ena regret”?

¹⁵ Eski Moïse ti vrai-mem bizin corrige fason pensé Jéhovah? Non, jamais! Mem si Jéhovah ti dire seki Li ti ena l’intention pou faire, sa pa ti so jugement final. En realité, ici Jéhovah ti pé testé Moïse, pareil couma Jésus plitar ti testé Philippe ek sa femme-grec-la. Moïse ti gagne l’occasion pou dire seki li ti pensé.b Jéhovah ti etabli Moïse couma enn mediateur entre Israël ek Li-mem, ek Jéhovah ti envie respecté sa disposition ki Li ti etabli-la. En plus, ti ena bann kitsoz ki Jéhovah ti envie koné: Eski Moïse ti pou laisse la colere influence so bann action? Eski li ti pou saisi l’occasion pou encourage Jéhovah pou blié nation Israël ek pou faire so prop descendant vinn enn nation puissant?

¹⁶ Fason ki Moïse ti reponn, ti montré so la foi ek so confiance dan justice Jéhovah. So reaction ti montré ki li pa ti guette so prop l’interet, mais li ti tracassé pou nom Jéhovah. Li pa ti envie ki jette deshonneur lor sa nom-la. Coumsa, Moïse ti montré ki li ti comprend “pensée Jéhovah” concernant sa question-la. (1 Cor. 2:16) Ki resultat sa ti ena? Parski Jéhovah pa ti vrai-mem fini decidé ki Li ti pou faire, la Bible dire ki Li “ti commence ena regret.” En hébreu, sa l’expression-la kapav zis vedir ki Jéhovah pa ti amenn sa malheur ki Li ti dire Li ti ena l’intention pou amené lor nation Israël en entier.

Fason ki Jéhovah ti agir avek Abraham

17. Couma Jéhovah ti montré enn grand patience kan Li ti ecoute seki ti pé tracasse Abraham?

¹⁷ Enn lot l’exemple ki montré couma Jéhovah donne so bann serviteur l’occasion pou montré zot la foi ek zot confiance, c’est kan Abraham ti faire enn demann concernant Sodome. Dan sa recit-la, Jéhovah ti montré enn grand patience kan Li ti laisse Abraham pose Li enn serie huit question. Enn certain moment, Abraham ti faire sa supplication bien sincere-la: “Non vrai-mem, pa kapav pense enn kitsoz coumsa lor toi, ki to pou agir dan sa fason-la. Eski to pou touye enn dimoune juste ensam avek enn mauvais dimoune, pou ki lerla arrive mem kitsoz dimoune juste-la ek mauvais dimoune-la? Non vrai-mem, pa kapav pense enn kitsoz coumsa lor toi! Eski sa Juge lor la terre entier-la pa pou faire seki droite?”—Gen. 18:22-33.

18. Ki nou aprann ar fason ki Jéhovah ti agir avek Abraham?

¹⁸ Kan nou lire sa recit-la, ki nou kapav aprann lor pensée Jéhovah? Eski vrai-mem Jéhovah ti bizin ki Abraham raisonne avek Li pou Li kapav prend enn bon decision? Non. Bien sur, au commencement-mem Jéhovah ti kapav zis dire pou ki raison Li ti prend so decision. Mais, par sa bann question ki Abraham ti posé-la, Jéhovah ti donne li le temps pou li accepté So decision ek pou comprend So fason pensé. Sa ti aussi permette Abraham pou comprend profondeur compassion ek justice Jéhovah. Oui, Jéhovah ti agir avek Abraham pareil couma avek enn camarade.—Is. 41:8; Jacq. 2:23.

Bann leson pou nou

19. Couma nou kapav imite Job?

¹⁹ Ki nou finn aprann lor “pensée Jéhovah”? Nou bizin laisse Parole Bondié forme fason ki nou comprend bann pensée Jéhovah. Fodé jamais nou juge Jéhovah dapré nou fason pou trouve bann kitsoz, ki limité, dapré nou prop principe ek nou prop pensée. Job ti dire: “[Bondié] pa enn zom couma moi pou ki mo reponn Li, pou ki nou toulé-deux ensam passe en jugement.”(Job 9:32) Pareil couma Job, kan nou commence comprend pensée Jéhovah, sa pousse nou pou dire: “Guetté! Sa c’est zis bann bord so fason agir, ek vrai-mem, nou’nn tann zis enn ti son lor Li! Mais concernant so gros l’orage, kisannla ki kapav montré ki li comprend sa?”—Job 26:14.

20. Ki nou bizin faire si nou lire enn passage dan la Bible ki difficile pou comprend?

²⁰ Kan nou lire la Bible, ki nou pou faire si nou trouve enn passage ki difficile pou comprend, surtout si li en rapport avek pensée Jéhovah? Si apré ki nou finn faire bann recherche lor la, kan-mem nou pa gagne enn reponse clair, nou kapav considere sa couma enn test lor nou confiance en Jéhovah. Rappel ki parfois certain declaration donne nou enn l’occasion pou montré nou la foi dan bann qualité Jéhovah. Anou reconette avek humilité ki nou pa comprend tou seki Jéhovah faire. (Eccl. 11:5) Coumsa, nou pou plus kapav d’accord avek sa bann parole l’apotre Paul-la: “Ah, sa quantité bon kitsoz ki Bondié donné-la, so sagesse, ek so connaissance, zot pa fini jamais! Kisannla ki kapav explik so bann jugement ek comprend so bann chemin? Parski ‘kisannla ki finn arrivé konn pensée Jéhovah, ou-soit kisannla ki finn vinn so conseiller?’ Ou-soit: ‘Kisannla ki finn donne Li en premier, pou ki bizin paye li en retour?’ Parski c’est ar Li, ek par Li ek pou Li ki tou kitsoz existé. Ki Li gagne la gloire touletan. Amen.”—Rom. 11:33-36.

[Notes]

Eski ou rappel?

• Ki pou aide nou pou rejette tendance pou juge Jéhovah dapré nou prop principe?

• Couma, kan nou comprend bann action Jésus, sa kapav aide nou pou vinn ‘proche ar Jéhovah’?

• Ki bann leson ou finn aprann ar conversation ki Jéhovah ti gagné ar Moïse ek ar Abraham?

[Zimage page 13]

Ki nou aprann lor pensée Jéhovah ar fason ki Li’nn agir avek Moïse ek Abraham?