‘Ah, profondeur sagesse Bondié!’

“Ah, bann benediction Bondié, zot grand, so sagesse ek so connaissance, zot bien profond! Kisannla ki kapav explik so bann jugement ek comprend so bann chemin!”​—ROM. 11:33.

 1. Ki pli grand privilege bann chretien baptisé ena?

KI PLI grand privilege ou finn deja gagné? Kitfois, ou kapav pense certain privilege ki ou finn gagné dan congregation ou-soit enn recompense ki ou finn gagné dan travail ou-soit dan lekol. Selman, pou nou bann chretien baptisé, pli grand privilege ki nou’nn gagné, c’est pou ena bann bon relation avek sel vrai Bondié, Jéhovah. Sa finn faire Li ‘konn nou.’​—1 Cor. 8:3; Gal. 4:9.

 2. Kifer c’est enn grand privilege ki nou konn Jéhovah ek ki Li konn nou?

² Kifer eski c’est enn grand privilege ki nou konn Jéhovah ek ki Li konn nou? Parski Li-mem pli grand Personnage dan l’univers, mais aussi parski Li protege tou bann ki Li content. Bondié ti inspire prophete Nahoum pou ecrire: “Jéhovah Li bon, Li enn forteresse dan jour detresse. Ek Li konn bann ki rod so protection.” (Nah. 1:7; Ps. 1:6) En realité, nou l’espoir pou gagne la vie eternel depann si nou pé aprann pou konn vrai Bondié ek so garson Jésus Christ.​—Jean 17:3.

 3. Ki sa impliké konn Bondié?

³ Konn Bondié vedir plus ki zis konn so nom. Nou bizin aprann konn Li couma enn Camarade, koné seki Li content ek seki Li pa content. Vive en accord avek sa connaissance-la c’est aussi enn kitsoz important ki montré ki nou finn aprann konn Bondié bien. (1 Jean 2:4) Mais ena enn lot kitsoz encore ki nou bizin faire si nou vrai-mem envie konn Jéhovah. Nou bizin pa zis koné seki Li’nn faire, mais aussi couma Li finn faire sa ek kifer. Plus nou comprend bann projet Jéhovah, plus sa pou pousse-nou pou exprime nou l’admiration pou ‘profondeur sagesse Bondié.’​—Rom. 11:33.

Enn Bondié ki ena enn projet

4, 5. (a) Kan la Bible servi mot “projet,” sa faire reference ar ki kitsoz? (b) Donne enn l’exemple pou montré couma kapav realise enn projet dan plus ki enn fason.

⁴ Jéhovah Li enn Bondié ki ena enn projet, ek la Bible koz lor so “projet eternel.” (Éph. 3:10, 11) Ki sa l’expression-la vrai-mem vedir? Kan la Bible servi mot “projet,” sa faire reference ar enn but precis ou-soit enn l’objectif ki kapav realisé dan plus ki enn fason.

⁵ Anou prend enn l’exemple: enn dimoune kitfois envie voyagé pou al dan enn l’endroit precis. Alors, al dan sa l’endroit-la vinn so l’objectif, ou-soit so projet. Pou faire sa voyage-la, kitfois li kapav choisir different moyen transport ek li kapav prend different la route. Pendant ki li pé voyagé lor la route ki li finn choisir, li possible ki li bizin faire face ar bann situation ki li pa attann, couma par exemple mauvais le temps, embouteillage, enn chemin ki’nn fermé, ek sa oblige li pou prend enn lot la route. Pourtant, n’importe ki changement ki li bizin faire, li pou kan-mem reussi realise so l’objectif kan li arrive dan l’endroit kot li pé allé.

 6. Couma Jéhovah ti montré ki Li kapav faire n’importe ki changement pou realise so projet?

⁶ Jéhovah aussi pareil, Li finn faire bann grand changement pou Li kapav realise so projet eternel. Li prend en consideration liberté ki so bann creature intelligent ena pou choisir ek Li disposé pou change desuite fason ki Li realise so projet. Par exemple, anou guetté couma Jéhovah ti realise so projet kan Li ti promette ki pou ena enn Descendance ki pou vini. Au commencement, Jéhovah ti dire premier couple humain: “Gagne beaucoup zenfant, multiplié, rempli la terre ek ena controle lor li.” (Gen. 1:28) Eski rebellion ki ti ena dan jardin Éden ti arrete sa projet ki Jéhovah ti ena-la? Non, pa ditou! Jéhovah pa ti tardé pou reagir dan sa nouveau situation-la kan Li ti prend enn lot “la route” pou realise so projet. Li ti annoncé ki enn “descendance” pou vini pou repare tou bann degat ki sa bann rebelle-la ti’nn faire.​—Gen. 3:15; Héb. 2:14-17; 1 Jean 3:8.

 7. Ki nou aprann lor description ki Jéhovah ti faire lor Li-mem dan Exode 3:14?

⁷ Capacité ki Jéhovah ena pou adapté ar bann nouveau situation pendant ki Li pé realise so projet, li en accord avek enn description ki Li ti faire lor Li-mem. Kan Moïse ti dire Jéhovah ki bann difficulté ki li ti pou kapav gagné avek mission ki Jéhovah ti’nn confié li, Jéhovah ti donne Moïse sa l’assurance-la: “‘Mo pou vinn seki mo pou vini.’ Ek Li finn ajouté: ‘Sa-mem seki to bizin dire bann garson Israël, “Mo pou vini finn envoye moi vers zot.”’” (Ex. 3:14) Oui, Jéhovah kapav vinn tou seki Li bizin vini, pou Li kapav realise so projet net! L’apotre Paul ti servi enn joli l’exemple pou koz lor la dan Romains chapitre 11. Dan sa chapitre-la, li koz lor enn pié zolive symbolik. Si nou examine sa l’exemple-la, sa pou augmente nou l’appreciation pou profondeur sagesse Jéhovah, ki nou ena l’esperance pou al dan le ciel ou-soit pou vive pou touletan ici lor la terre.

Projet Jéhovah concernant Descendance ki Li ti annoncé

8, 9. (a) Ki quatre kitsoz fondamental aide nou pou comprend l’exemple pié zolive? (b) Reponse ki question montré ki Jéhovah kapav adapté-Li ar n’importe ki situation pou realise so projet?

⁸ Avant ki nou kapav comprend l’exemple sa pié zolive-la, nou bizin konn quatre kitsoz concernant realisation projet Jéhovah en rapport avek descendance ki Li ti annoncé. Premierement, Jéhovah ti promette Abraham ki “tou bann nation lor la terre [ti] pou vrai-mem attire benediction lor zot” par moyen so descendance. (Gen. 22:17, 18) Deuxiemement, nation Israël ki ti bann descendant Abraham, ti gagne privilege pou produire “enn royaume bann pretre.” (Ex. 19:5, 6) Troisiemement, kan majorité Israélite charnel pa ti accepté le Messie, Jéhovah ti prend lezot disposition pou produire “enn royaume bann pretre.” (Mat. 21:43; Rom. 9:27-29) Finalement, mem si Jésus li partie principal descendance Abraham, lezot dimoune gagne privilege pou forme partie dan sa descendance-la.​—Gal. 3:16, 29.

⁹ En plus sa quatre kitsoz fondamental-la, nou aprann dan livre Révélation ki en tou, 144,000 dimoune pou regne avek Jésus couma bann le roi ek bann pretre dan le ciel. (Rév. 14:1-4) La Bible appel zot aussi “bann garson Israël.” (Rév. 7:4-8) Mais, eski tou sa 144,000-la, zot bann Israélite charnel, setadir bann Juif? Reponse sa question-la montré couma Jéhovah kapav adapté-Li ar n’importe ki situation pou realise so projet. Asterla, anou guetté couma lettre ki l’apotre Paul ti ecrire bann Romains aide nou pou trouve sa reponse-la.

“Enn royaume bann pretre”

10. Ki privilege zis nation Israël ti ena?

¹⁰ Couma nou finn mentionné avant, zis nation Israël ti ena privilege pou produire bann membre ki ti pou vinn “enn royaume bann pretre ek enn nation saint.” (Lire Romains 9:4, 5.) Mais, ki ti pou arrivé kan sa Descendance ki Bondié ti promette-la ti pou vini? Eski nation Israël ti pou produire tou bann 144,000 Israélite spirituel ki ti pou vinn partie secondaire descendance Abraham?

11, 12. (a) Kan eski ti commence choisir bann ki ti pou forme partie dan Royaume ki dan le ciel, ek couma la plupart bann Juif ki ti vive dan sa lepok-la ti reagir? (b) Couma Jéhovah ti complete “nombre” bann ki ti pou vinn descendance Abraham?

¹¹ Lire Romains 11:7-10. En tant ki enn nation, bann Juif dan premier siecle ti rejette Jésus. A cause sa, zot ti nepli sel nation ki ti ena privilege pou produire descendance Abraham. Selman, a partir la Pentecôte l’an 33 nou lepok, kan ti commence choisir bann ki ti pou al forme enn “royaume bann pretre” dan le ciel, ti ena certain Juif sincere ki ti accepté sa l’invitation-la. Zot ti plusieurs millier, mais kan nou compare zot avek nation juif en entier, zot ti pareil couma “enn reste.”​—Rom. 11:5.

¹² Mais couma Jéhovah ti pou complete “nombre” bann ki ti pou vinn descendance Abraham? (Rom. 11:12, 25) Guette reponse ki l’apotre Paul ti donné: “C’est pa coumadir parole Bondié pa’nn realisé. Parski, pa tou seki sorti dan Israël [charnel] ki vrai-mem ‘Israël’. Ek aussi, c’est pa parski zot descendance Abraham ki zot tou zot bann zenfant [ki forme partie dan descendance ki Bondié ti promette Abraham] . . . Setadir, bann zenfant charnel zot pa vrai-mem bann zenfant Bondié, mais bann zenfant sa promesse-la zot, zot compté couma sa descendance-la.” (Rom. 9:6-8) Alors, pou enn dimoune forme partie dan descendance ki Bondié ti promette, li pa ti necessaire ki li ti enn descendant Abraham.

Pié zolive symbolik

13. Donne signification (a) pié zolive, (b) so racine, (c) so tronc, ek (d) so bann branche.

¹³ L’apotre Paul ti compare bann ki ti pou forme partie dan descendance Abraham ar bann branche enn pié zolive symbolik, ki ti’nn planté dan enn jardin.a (Rom. 11:21) Sa pié zolive-la represente realisation projet Bondié en rapport avek l’alliance ki Li ti faire avek Abraham. Racine sa pié-la, li saint, ek li represente Jéhovah, sa Kikenn ki donne la vie Israël spirituel-la. (Is. 10:20; Rom. 11:16) Tronc sa pié-la represente Jésus en tant ki partie principal descendance Abraham. Tou bann branche represente “nombre complet,” bann ki forme partie secondaire descendance Abraham.

14, 15. Ki bann ki ‘ti’nn rassé’ lor sa pié zolive ki ti’nn planté dan jardin-la, ek ki bann ki ti’nn greffé lor-la?

¹⁴ Dan l’exemple pié zolive, bann Juif charnel ki ti rejette Jésus ti pareil couma bann branche ki ‘ti’nn rassé.’ (Rom. 11:17) A cause sa, zot ti perdi privilege pou forme partie dan descendance Abraham. Mais kisannla ki ti pou remplace zot? Pou bann Juif charnel ki ti bien fiere parski zot ti bann descendant Abraham, jamais zot ti pou pensé ki enn jour ti pou remplace zot par bann dimoune lezot nation. Mais Jean le Baptiste ti’nn deja averti zot ki, si Jéhovah ti envie, Li ti pou kapav produire bann zenfant pou Abraham a partir bann roche.​—Luc 3:8.

¹⁵ Alors, ki Jéhovah ti faire pou realise so projet? Paul expliké ki ti’nn greffe bann branche enn pié zolive sauvage lor sa pié zolive ki ti’nn planté dan enn jardin-la, pou remplace bann branche ki ti’nn rassé. (Lire Romains 11:17, 18.) Alors, bann chretien oint ki sorti dan bann nation, pareil couma certain ki ti dan congregation Rome, ti’nn coumadir greffé, lor sa pié zolive symbolik-la. Dan sa fason-la, zot ti forme partie dan descendance Abraham. Avant, zot ti pareil couma bann branche enn pié zolive sauvage, ki pa ti ena okenn possibilité pou forme partie dan sa l’alliance special-la. Mais Jéhovah ti donne zot possibilité pou vinn bann Juif spirituel.​—Rom. 2:28, 29.

16. Couma l’apotre Pierre ti explik formation sa nouveau nation spirituel-la?

¹⁶ L’apotre Pierre explik sa situation-la dan sa fason-la: “Alors, c’est pou zot [bann Israélite spirituel, parmi ti ena bann chretien non-juif], ki li [Jésus Christ] ena valeur, parski zot bann croyant; mais pou bann ki pa croire, ‘sa mem roche ki bann constructeur finn rejeté-la finn vinn roche principal,’ ek ‘enn roche ki kapav faire tombé ek enn gros roche ki faire scandale.’ . . . Mais zot, zot ‘enn race ki Bondié finn choisir, enn groupe pretre ki pou vinn le roi, enn nation saint, enn peuple ki pou vinn enn di-bien special, pou ki zot annonce bann grand qualité’ sa kikenn ki finn appel zot pou tire zot dan noirté-la ek finn faire zot vinn dan so la lumiere extraordinaire. Parski avant, zot pa ti enn peuple, mais asterla zot peuple Bondié; c’est envers zot ki pa finn manifesté misericorde, mais asterla, c’est envers zot ki finn manifesté misericorde.”​—1 Pierre 2:7-10.

17. Couma seki Jéhovah ti faire, ti “kont nature”?

¹⁷ Jéhovah ti faire enn kitsoz ki beaucoup jamais pa ti pou attann. Paul decrire seki ti arrivé couma enn kitsoz “kont nature.” (Rom. 11:24) Couma sa ti possible? Sa ti pou parette enn kitsoz ki normalement pa faire, ki mem pa naturel pou greffe enn branche sauvage lor enn pié ki ti’nn planté dan enn jardin; pourtant c’est seki certain planteur ti faire dan premier siecle.b Dan mem fason, Jéhovah ti faire enn kitsoz extraordinaire. Pou bann Juif, li ti impossible pou bann non-Juif produire bann bon fruit. Selman, Jéhovah ti faire sa bann non-Juif-la forme partie dan “enn nation” ki ti produire bann fruit Royaume Bondié. (Mat. 21:43) Corneille ti oint ar l’esprit saint​—li-mem premier non-Juif ki ti vinn croyant en l’an 36 nou lepok. Depuis sa, bann non-Juif ki pa ti circonci ti gagne possibilité ki Bondié greffe zot lor sa pié zolive symbolik-la.​—Actes 10:44-48.c

18. Ki possibilité bann Juif charnel ti ena apré l’an 36 nou lepok?

¹⁸ Eski sa vedir ki apré l’an 36 nou lepok, bann Juif charnel ti nepli ena okenn possibilité pou forme partie dan descendance Abraham? Non. Paul donne sa l’explication-la: “Sa bannla [bann Juif charnel] aussi, si zot pa contigné mank la foi, pou greffe zot; parski Bondié kapav greffe zot encore enn fois. Si finn coupe toi dan sa pié zolive ki sauvage par nature-la ek finn greffe toi kont nature lor pié zolive ki’nn planté dan enn jardin, alors comié plus, sa bann branche ki naturel-la pou greffé lor zot prop pié zolive!”d​—Rom. 11:23, 24.

“Tou Israël pou sauvé”

19, 20. Ki Jéhovah finn realisé, pareil couma l’exemple pié zolive symbolik montré nou?

¹⁹ Oui, projet Jéhovah concernant “Israël Bondié” pé realisé dan enn fason extraordinaire. (Gal. 6:16) Pareil couma Paul ti dire: “Tou Israël pou sauvé.” (Rom. 11:26) Dan ler ki Jéhovah inn fixé, “tou Israël”​—setadir nombre complet bann Israélite spirituel pou servi couma bann le roi ek bann pretre dan le ciel. Nanyin pa kapav empeche projet Jéhovah realisé!

²⁰ Pareil couma ti annoncé, descendance Abraham, setadir Jésus Christ ensam avek bann 144,000, pou amenn bann benediction lor “bann dimoune dan bann nation.” (Rom. 11:12; Gen. 22:18) Dan sa fason-la, tou bann serviteur Bondié pou gagne bann bienfait ar sa disposition-la. Oui, a mesure ki nou trouvé couma projet eternel Jéhovah pé realisé, nou rann-nou compte ki quantité “bann benediction Bondié, zot grand, so sagesse ek so connaissance, zot bien profond.”​—Rom. 11:33.

[Notes]

Eski ou rappel?

• Ki nou aprann lor Jéhovah ar fason ki Li realise so projet?

• Dan Romains chapitre 11, donne signification . . .

pié zolive.

so racine.

so tronc.

so bann branche.

• Kifer sa greffe ki ti faire-la ti “kont nature”?

[L’encadré/​Zimage page 26]

Greffe bann branche enn pié zolive sauvage​—Kifer?

▪ Lucius Junius Moderatus Columella ti enn soldat Romain ek enn planteur ki ti vive dan premier siecle nou lepok. Bann dimoune konn li surtout parski li ti ecrire 12 livre ki koz lor la vie dan la campagne ek lor plantation.

Dan so cinquieme livre, li ti cite sa ancien proverbe-la: “Enn kikenn ki travail la terre kot ena enn plantation zolive, demann [sa plantation zolive-la] fruit; enn kikenn ki mette fumier ladan, suppliye li pou gagne fruit; enn kikenn ki coupe so bann branche, force li pou gagne fruit.”

Apré ki li ti koz lor bann bon pié mais ki pa ti rapporte fruit, li ti conseil so bann lecteur pou suive sa methode-la: “Li bon ki ou faire enn trou avek enn zouti [dan sa bann pié-la] ek dan sa trou-la, ou mette enn branche vert ki ou finn prend dan enn pié zolive sauvage. Ki resultat ou pou gagné? Parski ou finn mette enn branche ki kapav rapporte bann fruit dan pié-la, li pou rapporte pli beaucoup fruit.”