Zot bann administrateur ki fidele!

 1. En general, ki bann dimoune pensé lor l’esclavage?

TI ENA apepré 2,500 an, enn ecrivain grec ti ecrire ki personne pa choisir par li-mem pou vinn enn esclave. Beaucoup dimoune zordi d’accord avek sa. L’esclavage faire nou pense bann dimoune ki zot la vie controlé ek dominé dan enn fason cruel par lezot dimoune. Zot pa gagne okenn bienfait ar travail ek sacrifice ki zot faire, mais c’est zot proprietaire ki domine zot, ki gagne sa bann bienfait-la.

2, 3. (a) Couma Jésus considere bann ki choisir pou vinn so bann esclave? (b) Ki bann question lor responsabilité enn administrateur nou pou examiné?

² Pourtant, Jésus ti dire ki so bann disciple pou vinn bann serviteur humble, ou-soit bann esclave. Mais, en tant ki esclave, bann vrai chretien pa senti-zot abaissé ou-soit pensé ki pé faire dominere ar zot. Sa bann esclave-la gagne l’honneur, confiance ek respé. Anou considere par exemple seki Jésus ti dire avant so la mort, concernant enn “esclave.” Jésus Christ ti annoncé ki li ti pou confié bann responsabilité enn “esclave fidele et avisé.”​—Mat. 24:45-47.

³ Nou remarké ki dan so l’Evangile, Luc ti appel sa esclave-la, enn “administrateur.” (Lire Luc 12:42-44.) Zordi, la plupart chretien pa forme parti dan sa groupe administrateur fidele-la. Mais la Bible dire ki tou bann ki servi Bondié, zot bann administrateur. Ki bann responsabilité nou ena dan service Bondié? Couma nou bizin considere sa bann responsabilité-la? Pou nou gagne bann reponse, anou examine role ki bann administrateur ti ena dan le passé.

4, 5. Dan le passé ki responsabilité bann administrateur ti ena? Donne bann l’exemple.

⁴ Dan le passé, enn administrateur ti souvent enn esclave ki so maitre ti faire confiance ek ki li ti etabli couma enn responsable dan so lakaz ou-soit lor so business. Souvent, bann administrateur ti ena enn grand l’autorité ek zot ti en charge di-bien ek l’argent zot maitre, ek aussi lezot serviteur. Nou kapav trouve sa dan cas Éliézer ki Abraham ti etabli responsable lor so bann di-bien. C’est kitfois Éliézer ki Abraham ti envoye Mésopotamie pou al choisir enn madame pou so garson Isaac. Sa ti vrai-mem enn grand responsabilité!​—Gen. 13:2; 15:2; 24:2-4.

⁵ Joseph, arriere-ti-zenfant Abraham, ti responsable dan lakaz Potiphar. (Gen. 39:1, 2) Avek le temps, Joseph li-mem ti ena so prop administrateur ki ti ‘en charge dan so lakaz.’ Sa administrateur-la ti accueillir dix frere Joseph ek ti prend zot soin. Lor l’ordre Joseph, sa administrateur-la ti faire tou l’arrangement pou testé bann frere Joseph avek enn coupe en argent. Li clair ki bann maitre ti ena enn grand confiance dan zot administrateur.​—Gen. 43:19-25; 44:1-12.

 6. Ki different responsabilité bann ancien ena?

⁶ Plusieurs siecle plitar, l’apotre Paul ti ecrire ki bann ancien, zot bann “administrateur Bondié.” (Tite 1:7) Bann ancien ki’nn etabli pou prend soin “troupeau Bondié” prend la tête dan bann congregation. (1 Pierre 5:1, 2) Bien sur, bann ancien ena different responsabilité. Par exemple, zordi la plupart ancien ena responsabilité pou prend soin enn congregation. Bann surveillant circonscription ena responsabilité pou prend soin plusieurs congregation. Ek bann membre Comité filiale prend soin tou bann congregation ki ena dan enn pays. Mais, tou bann ancien bizin contigne assume zot responsabilité avek fidelité, zot tou pou bizin “rann compte” ar Bondié.​—Héb. 13:17.

 7. Couma nou koné ki, dan enn certain sens, tou bann chretien zot bann administrateur?

⁷ Alors, ki nou kapav dire lor beaucoup chretien fidele ki pa ancien? L’apotre Pierre ti ecrire enn lettre pou bann chretien en general, li ti dire: “Pareil couma sakenn inn gagne enn don, servi sa pou aide sakenn so camarade couma bann bon administrateur faveur Bondié, faveur ki personne pa merité ek ki manifesté dan different fason.” (1 Pierre 1:1; 4:10) Bondié inn manifesté so faveur envers nou kan Li’nn donne nou tou, bann don, bann kitsoz materiel, bann capacité ou-soit bann talent ki nou kapav servi pou aide nou bann frere. A cause sa, tou bann ki servi Bondié zot bann administrateur. Bondié faire zot confiance, respecté zot ek attann ki zot servi bien seki Li’nn donne zot.

 8. Cite enn principe important ki nou bizin rappel.

⁸ Asterla, nou pou examine trois principe ki nou bizin rappel en tant ki bann administrateur. Premier principe: Bondié nou proprietaire ek nou ena compte pou rann-Li. Paul ti ecrire: “Zot pa zot prop proprietaire, parski finn acheté zot pou enn prix,” di-sang sacrifice Jésus. (1 Cor. 6:19, 20) Parski Jéhovah nou proprietaire, nou obligé obeir so bann commandement, ki pa lourd. (Rom. 14:8; 1 Jean 5:3) Nou vinn aussi bann esclave Christ. Pareil couma bann administrateur dan le passé, nou ena beaucoup liberté​—mais nou liberté ena bann limite. Nou bizin assume nou bann responsabilité dapré bann instruction. N’importe ki privilege nou kapav ena, nou reste toujours bann serviteur Bondié ek Jésus Christ.

 9. Ki l’exemple Jésus ti donné pou montré relation ki ena entre enn maitre ek so esclave?

⁹ Jésus aide nou pou comprend relation ki ena entre enn maitre ek so esclave. Enn jour li ti raconte so bann disciple enn zistoire lor enn esclave ki ti retourne lakaz apré enn journée travail. Eski maitre-la ti pou dire so esclave: “Degazé vinn a table pou mangé?” Non, li ti dire li: “Prepare enn kitsoz pou mo mangé, mette enn tablier ek servi moi ziska ki mo’nn fini mangé ek boire, apré sa to kapav mangé ek boire.” Couma Jésus ti applik sa l’exemple-la? “Alors, zot aussi, kan zot finn fini faire tou seki finn donne zot pou faire, zot bizin dire: ‘Nou bann esclave bon nanyé. Seki nou’nn faire, c’est seki nou ti bizin faire.’”​—Luc 17:7-10.

10. Ki kitsoz montré ki Jéhovah apprecié tou seki nou faire pou servi Li?

¹⁰ Bien sur, Jéhovah apprecié tou seki nou faire pou servi Li. La Bible donne nou l’assurance: “Bondié pa injuste pou blié seki zot inn faire ek l’amour ki zot finn montré pou so nom.” (Héb. 6:10) Jamais Jéhovah demande nou pou faire seki nou pa kapav. En plus, tou seki Li demande nou pou faire, li dan nou l’interet ek li jamais trop lourd. Mais pareil couma Jésus ti enseigné, enn esclave pa faire li-mem plaisir ek pa mette so prop l’interet en premier. Point ki nou bizin rappel c’est, kan nou voué nou la vie ar Bondié, nou choisir pou mette so l’interet en premier. Eski ou pa d’accord avek sa?

11, 12. En tant ki bann administrateur, ki qualité nou bizin manifesté, ek ki kitsoz nou bizin evité?

¹¹ Second principe: En tant ki bann administrateur, nou tou nou obeir mem principe. Li vrai ki zis enn tigit dimoune ki ena certain privilege dan congregation. Mais, nou tou nou ena mem responsabilité devant Bondié. Par exemple, en tant ki disciple Christ ek Témoins de Jéhovah, nou finn gagne l’ordre pou content sakenn nou camarade. Jésus ti dire ki dimoune pou koné ki nou bann vrai chretien si nou ena l’amour entre nou. (Jean 13:35) Nou l’amour, li pa zis pou nou bann frere, mais li al encore pli loin. Nou faire zeffort pou montré nou l’amour pou bann ki pena mem la foi ki nou. Nou tou nou kapav faire sa ek nou bizin faire sa.

¹² Nou bizin aussi ena enn bon conduite. Nou evité ena enn conduite ek enn maniere vive ki la Bible condamné. Paul ti ecrire: “Ni bann ki pratik fornication, ni bann ki pratik l’idolatrie, ni bann adultere, ni bann zom ki gardé pou bann pratik kont nature, ni bann zom ki gagne relation avek bann zom, ni bann voleur, ni bann dimoune ki toujours envie gagne plus, ni bann soulard, ni bann ki insulté lezot, ni bann ki trompe dimoune pou tire l’argent, pa pou herite royaume Bondié.” (1 Cor. 6:9, 10) Nou bizin reconette ki sa demann zeffort pou vive en accord avek bann principe juste ki Bondié inn etabli. Pourtant, li vaut la peine ki nou faire sa bann zeffort-la, parski sa faire nou gagne beaucoup bienfait. Par exemple, sa maniere vive-la faire nou reste en bonne santé, ena bann bon relation avek lezot, ek gagne faveur Bondié.​—Lire Isaïe 48:17, 18.

13, 14. Ki responsabilité tou bann chretien inn gagné, ek couma nou bizin considere sa?

¹³ Pa blié aussi ki enn administrateur ena enn travail pou faire. Nou aussi pareil. Bondié inn donne nou enn don ki ena enn grand valeur. Li’nn faire nou konn la verité. Bondié attann ki nou partage sa connaissance-la avek lezot dimoune. (Mat. 28:19, 20) Paul ti ecrire: “Alors, laisse bann dimoune considere nou couma bann serviteur Christ ek bann administrateur saint secret Bondié.” (1 Cor. 4:1) Paul ti koné ki, en tant ki enn administrateur, li ti bizin prend bien soin bann “saint secret” Bondié, ek aussi partage sa ar lezot, pareil couma so Maitre, Jésus Christ ti donne l’ordre.​—1 Cor. 9:16.

¹⁴ Kan nou enseigne lezot dimoune la verité, nou montré ki nou content zot. Bien sur, tou bann chretien pa dan mem situation. Pa nou tou ki kapav faire mem quantité dan predication. Jéhovah comprend sa. Seki important, seki nou faire tou seki nou kapav personnellement. Dan sa fason-la, nou montré ki nou ena enn l’amour ki pa egoïste pou Bondié ek pou nou prochain.

15-17. (a) Kifer li bien important ki enn administrateur, li fidele? (b) Couma Jésus ti montré bann consequence ki nou gagné kan nou pa fidele?

¹⁵ Enn troisieme principe ki ena enn rapport avek deux principe ki nou finn examiné avant, c’est: Nou bizin fidele ek bizin kapav faire nou confiance. Kitfois, enn administrateur ena beaucoup bon qualité ek capacité, pourtant, sa pa pou servi nanyé si li pa enn kikenn ki responsable ou-soit si li pa fidele envers so maitre. Fidelité c’est enn qualité bien important pou ki enn administrateur vinn efficace ek reussi dan so travail. Rappel seki Paul ti ecrire: “Bondié attann ki bann administrateur montré ki zot fidele.”​—1 Cor. 4:2.

¹⁶ Si nou fidele, nou kapav sur ki nou pou gagne enn recompense. Mais si nou pa fidele, nou pou perdi faveur Bondié. Nou kapav trouve sa principe-la dan parabole ki Jésus ti donné lor bann talent. Bann esclave ki “ti faire business” avek l’argent zot maitre ti gagne bann felicitation ek li ti bien recompense zot. Mais maitre-la ti qualifié sa esclave ki pa ti montré-li responsable-la, couma enn kikenn ki “mauvais,” “paresse,” ek “bon nanyé.” Li ti faire reprend talent ki li ti donne sa esclave-la, ek ti faire jette li dehors.​—Lire Matthieu 25:14-18, 23, 26, 28-30.

¹⁷ Dan enn lot l’occasion, Jésus ti montré bann consequence ki nou gagné kan nou pa fidele. Li ti dire: “Enn certain zom ti riche ek li ti ena enn administrateur; ek bann dimoune ti accuse sa administrateur-la ki li ti pé gaspille bann di-bien so maitre. Alors, so maitre ti appel li ek ti dire li: ‘Ki mo pé tendé lor toi? Faire enn rapport lor tou bann travail ki to finn faire, parski to nepli pou en charge mo lakaz.’” (Luc 16:1, 2) Sa administrateur-la ti gaspille bann di-bien so maitre, alors maitre-la ti mette li dehors. C’est enn grand leson pou nou, pa vrai? Fodé jamais nou vinn infidele concernant seki Bondié demann nou pou faire.

18. Kifer fodé pa nou compare-nou avek lezot?

¹⁸ Sakenn parmi nou kapav demann li-mem: ‘Ki qualité administrateur mo été?’ Li pa bon ki nou compare-nou avek lezot. La Bible donne nou sa conseil-la: “Laisse sakenn examine seki li pé faire, lerla li pou ena enn raison pou glorifié li-mem kan li guette seki li’nn faire, sans ki li compare-li avek enn lot.” (Gal. 6:4) Au lieu ki nou compare seki nou faire ar seki lezot faire, nou bizin arrete-nou lor seki nou kapav faire personnellement. Sa pou protege nou, nou pa pou rempli ar l’orgueil ek nou pa pou decouragé. Kan nou examine nou-mem, nou bizin reconette ki nou situation pa touletan pareil. Kitfois a cause enn mauvais la santé, l’age ou-soit different responsabilité, nou nepli kapav faire pareil couma longtemps. De lot coté, kitfois nou kapav faire plus ki seki nou pé faire asterla. Si nou remark sa, kifer nou pa essaye ameliore-nou?

19. Kifer fodé pa nou decouragé si nou pa gagne enn certain privilege?

¹⁹ Enn lot kitsoz ki nou kapav prend en consideration, c’est privilege ki nou ena ou-soit ki nou bien envie gagné. Par exemple, kitfois enn frere envie servi couma enn ancien dan congregation ou-soit gagne enn participation dan l’assemblée. Li bon ki bann frere travail dur pou gagne sa bann privilege-la, mais selman fodé pa zot decouragé si zot pa gagne bann privilege dan moment ki zot pé attann. Kitfois pou bann raison ki zot pa trop comprend asterla, zot pou bizin attann inpé pli longtemps ki zot ti pensé. Pa blié, Moïse ti pensé ki li ti’nn paré pou faire bann Israélite sorti dan l’Égypte, mais li ti bizin attann 40 an avant ki li ti faire sa. Sa ti donne li assez le temps pou developpe bann qualité ki li ti bizin pou guide enn peuple teti ek rebelle.​—Actes 7:22-25, 30-34.

20. Ki nou kapav aprann ar l’exemple Yonathân?

²⁰ Li kapav arrivé aussi ki jamais nou pou gagne enn certain privilege. Sa ti arrivé dan cas Yonathân. Li ti garson Saül ek alors, li ti pou kapav vinn le roi lor nation Israël. Selman, Bondié ti choisir David, enn kikenn ki ti pli jeune, pou vinn le roi. Couma Yonathân ti reagir? Li ti accepté sa decision-la ek li ti soutenir David, ziska mem riské so prop la vie pou li. Li ti dire David: “Toi, to pou vinn le roi lor Israël, ek moi, mo pou vinn deuxieme apré toi.” (1 Sam. 23:17) Ki nou kapav aprann ar l’exemple Yonathân? Yonathân ti accepté so situation, ek li pa ti jaloux David pareil couma so papa. Au lieu ki nou jaloux bann privilege ki lezot gagné, nou bizin faire tou pou rempli bien bann responsabilité ki nou ena. Pena doute ki dan le monde nouveau, Jéhovah pou realise bann bon desir tou so bann serviteur.

21. Couma nou bizin considere responsabilité ki nou ena en tant ki bann administrateur?

²¹ Anou touletan rappel ki en tant ki bann administrateur Bondié, nou pa bann esclave enn maitre ki dominere ek cruel. Au contraire, Bondié faire nou enn grand l’honneur, Li finn confié nou enn travail ki jamais pa pou ré-faire encore, setadir preche la bonne nouvelle pendant bann dernier jour sa systeme-la. Ek Li finn donne nou enn grand liberté dan fason ki nou rempli nou bann responsabilité. Alors, montré ki nou bann administrateur fidele, ek anou apprecié privilege ki nou ena pou servi Jéhovah, pli grand Personnage dan tou l’univers.