Rwayom Bondie​—Kifer Li Inportan pou Jésus?

Parey kouma nou’nn trouve dan lartik avan, seki ti pli inportan dan lavi Jésus, se ‘prese ek anons bon nouvel lor Rwayom Bondie.’ (Luc 8:1) Li ti donn limem afon kan li ti mars plizir kilomet atraver Israël pou ansegn bann dimounn lor sa Rwayom-la. Nou kapav lir lor minister Jésus dan kat Levanzil ki ena dan Labib, kot plis ki 100 fwa fer mansion Rwayom Bondie. Laplipar plas kot fer mansion sa Rwayom-la, se dan bann parol Jésus, ek pourtan sa reprezant zis enn parti seki li’nn dir lor Rwayom Bondie!​—Jean 21:25.

Kifer Rwayom Bondie ti ena enn gran linportans pou Jésus kan li ti lor later? Enn rezon, se parski Jésus ti kone ki Bondie ti’nn swazir li pou vinn Dirizan sa Rwayom-la. (Isaïe 9:6; Luc 22:28-30) Me Jésus pa ti ena lobzektif pou gagn pouvwar ouswa laglwar. (Matthieu 11:29; Marc 10:17, 18) Ni li ti fer konn sa Rwayom-la pou so prop lavantaz. Jésus ti interese ek ankor touzour interese ar Rwayom Bondie,a sirtou akoz seki sa Rwayom-la pou fer pou bann ki li kontan​—so Papa ki dan lesiel ek so bann disip fidel.

Jésus ena enn gran lafeksion pou so Papa ki dan lesiel. (Proverbes 8:30; Jean 14:31) Li admir bann kalite atiran ki so Papa ena, kouma par exanp So lamour, So konpasion, ek So zistis. (Deutéronome 32:4; Isaïe 49:15; 1 Jean 4:8) Alor, pena dout ki Jésus deteste bann mansonz ki pe fane lor so Papa, kouma par exanp, Bondie pa pran kont soufrans bann dimounn ek Li anvi ki nou soufer. Se enn rezon kifer Jésus ti bien anvi anons “bon nouvel lor Rwayom Bondie”​—li ti kone ki avek letan, sa Rwayom-la pou tir tou bann foste ki bann dimounn inn dir lor so Papa. (Matthieu 4:23; 6:9, 10) Kouma sa Rwayom-la pou fer sa?

Atraver sa Rwayom-la, Jéhovah pou fer bann gran sanzman ki pou fer bann dimounn gagn bann bienfe. “Li pou souy tou larm” bann dimounn ki fidel. Jéhovah pou eliminn tou kitsoz ki fer zot plore ek Li pou fer sir ki “lamor pou nepli existe. Dimounn pou nepli an-dey, zot pou nepli plore ek pou nepli ena douler.” (Révélation 21:3, 4) Par mwayin so Rwayom, Bondie pou tir tou soufrans bann dimounn.b

Li pa etonan ki Jésus ti bien anvi koz lor Rwayom Bondie avek bann dimounn! Li ti kone ki sa Rwayom-la pou montre ki kantite pwisans ek konpasion so Papa vremem ena. (Jacques 5:11) Jésus ti kone osi ki sa Rwayom-la pou fer bann dimounn fidel ki li kontan gagn bann bienfe.

Bien avan ki li ti vinn lor later, Jésus ti viv dan lesiel avek so Papa. Papa-la ti servi so Garson pou ed Li kree tou kitsoz​—lesiel ki extra gran ek ki ranpli ar bann zetwal ek bann galaxi ki pa kapav konte, nou zoli planet ek bann kreatir ki viv lor la. (Colossiens 1:15, 16) Me malgre tousala, Jésus “ti sirtou bien atase” avek bann dimounn.​—Proverbes 8:31.

Jésus so minister montre bien lamour ki li ena pou bann dimounn. Depi koumansman mem, li ti bien fer konpran ki li ti vinn lor later pou “anons bann bon nouvel” ar bann ki ti bizin led. (Luc 4:18) Me Jésus pa ti zis dir ki li pou ed bann dimounn. Plizir fwa, li ti montre ki li kontan bann dimounn. Par exanp, kan enn gran lafoul ti rasanble pou ekout li, Jésus “ti ena pitie pou zot, ek li ti geri bann dimounn malad.” (Matthieu 14:14) Ti ena enn misie ki ti pe bien soufer akoz so maladi. Kan sa misie-la ti exprim so lafwa ki Jésus ti pou kapav geri li si li vremem anvi, sa ti pous Jésus pou montre lamour pou sa misie-la. Li ti geri misie-la, ek ti dir li avek konpasion: “Wi, mo anvi! Mo pirifie twa.” (Luc 5:12, 13) Kan Jésus ti trouv so kamarad Marie pe plor lamor so frer Lazare, li “ti pous enn soupir an limem,” li “ti trouble,” ek li “ti plore.” (Jean 11:32-36) Apre sa, Jésus ti fer enn kitsoz ki zame personn pa ti pou krwar​—li ti resisit Lazare, mem si ti fini gagn kat zour depi ki li ti mor!​—Jean 11:38-44.

Biensir, Jésus ti kone ki sa soulazman-la ti pou zis pou enn sertenn letan. Li ti konsian ki to-ou-tar, tou bann ki li ti geri ti pou retom malad ek bann ki li ti resisite ti pou remor. Selman, Jésus ti kone osi ki Rwayom Bondie pou eliminn sa bann problem-la pou touletan. Se akoz sa ki Jésus pa ti zis fer bann mirak, me ti osi pres “bon nouvel lor Rwayom” avek zel. (Matthieu 9:35) So bann mirak ti enn avangou lor seki Rwayom Bondie biento pou fer partou lor later. Get seki Labib promet pou arive.

• 

  Pou nepli ena maladi.

  “Sa lepok-la lizie sa kikenn ki aveg la pou ouver, ek zorey sa kikenn ki sourd la pou debouse. Sa lepok-la seki bwate pou sote kouma enn serf, ek lalang enn kikenn ki pa kapav koze pou kriye avek lazwa.” Anplis, “okenn abitan pa pou dir: ‘Mo malad.’”​—Isaïe 33:24; 35:5, 6.

• 

  Pou nepli ena lamor.

  “Bann dimounn zis pou posed later, ek zot pou res lor la pou touletan.”​—Psaume 37:29.

  “Li pou fer lamor disparet pou touletan, ek Souverin Segner Jéhovah pou souy larm lor tou bann figir.”​—Isaïe 25:8.

• Bann ki’nn mor pou regagn lavi.

  “Tou seki dan bann tom souvenir pou tann so lavwa ek pou sorti.”​—Jean 5:28, 29.

  “Pou ena enn rezireksion.”​—Actes 24:15.

• 

  Pou nepli ena somaz ek tou dimounn pou ena enn lakaz.

  “Zot pou ranz bann lakaz ek zot pou res ladan; zot pou plant bann karo rezin ek zot pou manz zot bann frwi. Zot pa pou ranze pou ki enn lot reste, ni zot pou plante pou ki enn lot manze. . . . Bann ki mo’nn swazir pou profit maximum tou travay zot lame.”​—Isaïe 65:21, 22.

• 

  Pou nepli ena lager.

  “Li fer bann lager arete partou lor later.”​—Psaume 46:9.

  “Enn nasion pa pou lev lepe kont enn lot nasion, ek zot pou nepli aprann lager.”​—Isaïe 2:4.

• 

  Pou nepli mank manze.

  “Later pou donn so rekolt; Bondie, nou Bondie, pou beni nou.”​—Psaume 67:6.

  “Pou ena lagrin sereal an-abondans lor later; ek lao lor bann montagn, pou ena enn gran labondans.”​—Psaume 72:16.

• Pou nepli ena lamizer.

  “Pou nepli bliye enn dimounn mizer pou touletan.”​—Psaume 9:18.

  “Li pou sap sa dimounn mizer ki kriye o-sekour la, ek osi sa dimounn ki dan gran sagrin la, ek ninport kisannla ki pena personn pou ed li. Li pou ena pitie pou bann ti-dimounn ek pou bann pov, ek li pou sap lavi bann pov.”​—Psaume 72:12, 13.

Kan ou get sa bann promes ki konsern Rwayom Bondie la, eski ou trouve kifer sa Rwayom-la ti ena enn gran linportans pou Jésus? Kan li ti lor later, Jésus ti bien kontan koz lor Rwayom Bondie ar ninport kisannla ki ti pou ekout li, parski li ti kone ki sa Rwayom-la pou tir tou bann problem ki nou pe trouve azordi.

Eski bann promes ki Labib fer konsernan Rwayom Bondie atir ou? Si wi, kouma ou kapav aprann plis lor sa Rwayom-la? Ek ki ou kapav fer pou vremem profit bann benediksion ki li pou amene? Dernie lartik dan sa seri-la pou reponn sa bann kestion-la.