LARTIK LETID 6
Gard To Lintegrite!
“Ziska mo mor, mo pa pou abandonn mo lintegrite!”—ZOB 27:5.
KANTIK 34 Mars ar Lintegrite
REZIMEa
1. Kouma sa trwa Temwin ki mansione dan sa paragraf-la finn res fidel anver Zeova?
IMAZINN sa trwa senn-la ki inplik bann Temwin Zeova. (1) Enn zennfi dan lekol ek so profeser demann tou bann zelev dan klas pou partisip dan enn fet. Tifi-la kone ki sa fet-la pa fer Zeova plezir, alor avek respe li refiz pou partisipe. (2) Enn garson timid pe prese lakaz-lakaz. Li realize ki enn zelev ki al mem lekol ar li res dan prosin lakaz, ek ki sa zelev-la finn deza boufonn bann Temwin Zeova. Me kanmem sa, sa zenn-la al tap so laport. (3) Enn misie pe travay dir pou donn so fami seki zot bizin, ek enn zour so patron demann li pou fer enn kitsoz malonet ouswa ilegal. Mem si li kapav perdi so travay, li explik so patron ki li bizin onet ek obeir lalwa parski Bondie atann ki so bann serviter fer sa.—Rom. 13:1-4; Ebre 13:18.
2. Ki bann kestion nou pou examine, ek kifer?
2 Ki bann kalite sa trwa Temwin-la finn manifeste? Kitfwa to finn remark plizir, kouma par exanp kouraz ek lonette. Me ena enn kalite ki zot tou finn montre ek ki bien inportan, se lintegrite. Toule trwa finn montre zot fidelite anver Zeova. Zot finn refiz pou al kont bann prinsip Zeova. Se lintegrite ki finn pous zot pou azir koumsa. Pena dout ki Zeova fier parski sakenn parmi zot finn montre sa kalite-la. Nou osi nou anvi fer nou Papa ki dan lesiel fier. Alor, anou examinn sa bann kestion-la: Ki ete lintegrite? Kifer nou bizin manifeste lintegrite? Ek kouma nou kapav fortifie noumem pou gard nou lintegrite dan bann moman difisil?
KI ETE LINTEGRITE?
3. (a) Ki ete lintegrite? (b) Ki bann lexanp kapav ed nou pou konpran seki savedir lintegrite?
3 Kan sa aplik ar nou, bann serviter Bondie, lintegrite vedir kontan Zeova avek tou nou leker, res atase ar Li, setadir fer so volonte pas avan nou bann desizion. Anou get sertin linformasion ki pou ed nou konpran seki lintegrite vedir dan Labib. Dan Labib, mo Ebre ki’nn tradir par “lintegrite” vedir konple, san defo, ouswa antie. Par exanp, kan bann Izraelit ti ofer Zeova bann zanimo an sakrifis, Lalwa ti dir ki sa bann zanimo-la ti bizin san defo.b (Lev. 22:21, 22) Pep Bondie pa ti gagn drwa ofer enn zanimo ki ti mank enn lapat, enn zorey, ouswa enn lizie; zot pa ti kapav osi ofer enn zanimo malad. Li ti inportan pou Zeova ki sa zanimo-la ti konple, san defo, ouswa antie. (Mal. 1:6-9) Nou konpran kifer konple ek san defo ena linportans pou Zeova. Noumem kan nou aste enn kitsoz, ki li enn frwi, enn liv ouswa enn zouti, nou pa pou rod enn ki ena bann parti ki manke ouswa ki abime. Nou pou anvi enn ki konple, san defo, ouswa antie. Zeova resanti mem kitsoz kan sa konsern nou lamour ek nou fidelite anver Li. Li anvi ki zot konple, san defo, ouswa antie.
4. (a) Kifer enn dimounn inparfe kapav manifeste lintegrite? (b) Dapre Psom 103:12-14, ki Zeova atann nou fer?
4 Eski savedir nou bizin parfe pou ki nou kapav manifeste lintegrite? Apre tou, nou kapav panse ki nou ena boukou defo ek nou fer boukou erer. Anou get de rezon kifer fode pa nou per. Premierman, Zeova pa aret Li lor nou bann defo. So Parol dir nou: “SEGNER [“Zeova,” NW], si to ti gard enn lalis tou nou pese, kisannla ti pou kapav res dan to prezans?” (Ps. 130:3) Li kone ki nou inparfe, nou fer pese, ek Li pardonn nou avek tou so leker. (Ps. 86:5) Deziemman, Zeova konn nou bann limit, ek Li pa atann ki nou fer plis ki seki nou kapav. (Lir Psom 103:12-14, NW.c) Alor, dan ki fason nou kapav konple, san defo, ek antie devan so lizie?
5. Kifer bann serviter Bondie bizin ena lamour pou ki zot manifeste lintegrite?
5 Pou ki bann serviter Zeova manifeste lintegrite, zot bizin ena lamour. Nou lamour pou Bondie ek nou latasman anver nou Papa ki dan lesiel, bizin touletan konple, san defo, ouswa antie. Si nou lamour res intak mem kan nou pas par bann leprev, lerla nou montre ki nou ena lintegrite. (1 Kro. 28:9; Mat. 22:37) Anou re-examinn sa trwa Temwin ki nou ti mansione dan koumansman lartik-la. Kifer zot finn azir koumsa? Eski sa tifi-la pa kontan pas enn bon moman dan lekol, ouswa eski sa garson-la anvi gagn onte devan enn laport, ouswa sa sef fami la anvi perdi so travay? Pena dout ki zot pa anvi sa. Okontrer, zot kone ki Zeova ena bann prinsip ki zis, ek zot lespri fixe lor seki fer plezir zot Papa ki dan lesiel. Zot lamour pou Zeova pous zot pou touletan pans Li avan ki zot pran enn desizion. Dan sa fason-la zot montre ki zot ena lintegrite.
KIFER NOU BIZIN MANIFESTE LINTEGRITE?
6. (a) Kifer to bizin ena lintegrite? (b) Kifer Adan ek Ev pa ti reisi manifeste lintegrite?
6 Kifer nou tou nou bizin ena lintegrite? To bizin ena lintegrite parski Satan finn defie Zeova, ek li finn defie twa osi. Sa anz rebel la finn fer limem vinn Satan, ouswa “Opozan,” depi dan zardin Edenn. Li finn gat repitasion Zeova kan li finn dir ki Bondie Li enn dirizan move, egois, ek malonet. Malerezman, Adan ek Ev ti soutenir Satan, ek zot finn rebel kont Zeova. (Zen. 3:1-6) Kan zot ti dan zardin Edenn zot ti gagn boukou lokazion pou ogmant zot lamour pou Zeova. Me kan Satan ti defie Zeova, zot lamour pa ti konple, san defo, ouswa antie. Enn lot kestion ti souleve plitar: Eski pou ena bann dimounn ki pou res fidel anver Zeova parski zot kontan Li? Setadir, eski bann dimounn kapav manifeste lintegrite? Sa kestion-la ti souleve dan ka Zob.
7. Dapre Zob 1:8-11, ki Zeova ek Satan ti panse lor lintegrite Zob?
7 Zob ti viv dan lepok kot bann Izraelit ti dan Lezip. Personn pa ti ena enn lintegrite kouma li. Li ti inparfe parey kouma nou. Li ti fer bann erer. Selman, Zeova ti kontan Zob pou so lintegrite. Li paret ki Satan ti’nn deza provok Zeova konsernan lintegrite bann dimounn. Alor Zeova ti atir latansion Satan lor so serviter Zob. Lavi sa zom-la finn montre ki Satan enn manter! Satan ti demann Zeova permision pou teste lintegrite Zob. Zeova ti fer konfians so kamarad Zob, ek Li ti les Satan teste Zob.—Lir Zob 1:8-11.d
8. Kouma Satan ti atak Zob?
8 Satan li kriel, ek li enn kriminel. Li ti pran tou seki Zob ti ena, li ti touy so bann serviter, ek ti gat so repitasion. Li ti atak fami Zob, ek ti touy so dis zanfan ki li ti bien kontan. Apre sa, li ti atak Zob, li ti fer li perdi so lasante kan li ti fer li gagn bann koulou depi so latet ziska so lipie ek sa ti pe fer Zob soufer. Zob so madam ti dezespere ek ti bien sagrin; li ti sipliy Zob pou abandone, pou modi Bondie ek pou mor. Zob limem ti pe anvi mor, me kanmem sa li ti gard so lintegrite. Lerla Satan ti servi enn lot metod. Li ti servi trwa zom ki ti bann konpagnon Zob. Sa bann zom-la ti vizit Zob pandan plizir zour, me zot pa ti donn li okenn konsolasion. Okontrer, zot ti fer li enn sermon ek zot ti kritik li dan enn fason kriel. Zot ti pretann ki Bondie ti deryer tou so bann problem ek ki Bondie pa ti interese ar so lintegrite. Zot ti mem dir ki Zob ti enn move dimounn ek ki li ti merit sa bann move kitsoz ki ti pe ariv li la!—Zob 1:13-22; 2:7-11; 15:4, 5; 22:3-6; 25:4-6.
9. Malgre bann difikilte, ki Zob ti refiz fer?
9 Kouma Zob ti reazir devan tou sa bann difikilte-la? Li pa ti parfe. Avek koler li ti koriz fason panse sa bann fos konsolater-la, ek li ti dir bann kitsoz ki plitar li ti rekonet ti bann parol san reflesi. Li ti plis defann so lazistis ki lazistis Bondie. (Zob 6:3; 13:4, 5; 32:2; 34:5) Selman, mem dan so bann moman bien difisil, Zob ti refiz tourn so ledo ar Zeova. Li ti refiz krwar bann foste ki so bann fos kamarad ti dir li. Li ti dir: “Zame sa pa pou vinn dan mo lespri pou dir ki zot ena rezon! Ziska mo mor, mo pa pou abandonn mo lintegrite!” (Zob 27:5) Sa bann parol-la montre ki Zob ti bien determine pou gard so lintegrite, mem si ariv li ninport ki kitsoz. Zob ti refiz pou abandone; nou osi nou kapav fer parey.
10. Kouma kestion ki Satan ti souleve lor Zob konsern twa?
10 Satan finn met mem lakizasion lor sakenn parmi nou. Kouma sa konsern twa? Ofet, li dir ki to pa vremem kontan Zeova, ki to pou aret servi Li pou sap to lavi, ek ki to pa pou gard to lintegrite! (Zob 2:4, 5; Rev. 12:10) Ki to resanti kan to tann sa? Li blesan, pa vre? Selman, reflesi lor la: Zeova fer twa ase konfians pou donn twa enn lokazion extraordiner. Zeova pe les Satan teste to lintegrite. Zeova ena konfians ki to kapav gard to lintegrite ek prouve ki Satan enn manter. Ek Li promet ki Li pou ed twa pou fer sa. (Ebre 13:6) Se vremem enn gran privilez ki Souverin liniver fer nou konfians! Eski to trouve kifer lintegrite li vremem inportan? Sa ed nou pou prouve ki Satan koz manti, pou defann repitasion nou Papa ek pou soutenir so fason dirize. Ki nou kapav fer pou gard nou lintegrite?
KOUMA NOU KAPAV GARD NOU LINTEGRITE AZORDI?
11. Ki nou aprann ar Zob?
11 Satan pe ogmant so bann latak lor pep Bondie dan sa “bann dernie tan” difisil la. (2 Tim. 3:1) Dan sa bann moman-la, kouma nou kapav fortifie noumem ek gard nou lintegrite? Ankor enn fwa, nou aprann boukou ar Zob. Mem avan ki li ti pas par bann test, Zob ti’nn deza montre so lintegrite anver Zeova. Anou get trwa leson ki nou kapav aprann ar li ki pou fortifie nou ek ed nou gard nou lintegrite.
Dan ki diferan fason nou kapav fortifie noumem pou gard nou lintegrite? (Get paragraf 12)g
12. (a) Dapre Zob 26:7, 8, 14, kouma Zob ti devlop ladmirasion ek respe pou Zeova? (b) Kouma nou osi nou kapav devlop enn profon ladmirasion pou Bondie?
12 Zob ti ogmant so lamour pou Bondie kan li ti devlop enn ladmirasion pou Zeova. Zob ti pas letan pou admir bann kitsoz extraordiner ki Zeova inn kree. (Lir Zob 26:7, 8, 14.e) Li ti inpresione kan li ti admir later, lesiel, bann niaz, ek loraz. Me kanmem sa, li ti rekonet ki li konn bien tigit lor tou seki Zeova finn kree. Li ti osi akord enn gran valer ar seki Zeova dir. Get seki Zob ti dir konsernan bann parol Bondie: “Mo’nn akord enn gran linportans so bann parol.” (Zob 23:12) Ladmirasion ek respe ki Zob ti ena pou Zeova ti pous li pou kontan Li ek li ti anvi fer Li plezir. Ek sa ti fer li plis determine pou gard so lintegrite. Nou osi nou bizin fer parey kouma Zob. Nou konn pli boukou kitsoz lor kreasion Zeova ki bann dimounn dan lepok Zob. Ek nou ena Labib an-antie ki ed nou pou kone kouma Zeova ete vremem. Tou seki nou aprann kapav ed nou pou ena plis respe ek ladmirasion pou Zeova. An retour, sa pous nou pou kontan ek obeir Li ek ogmant nou dezir pou gard nou lintegrite.—Zob 28:28.
Nou fortifie noumem pou gard nou lintegrite kan nou rezet pornografi (Get paragraf 13)h
13-14. (a) Dapre Zob 31:1, kouma Zob ti montre so lobeisans? (b) Kouma nou kapav swiv lexanp Zob?
13 Zob ti reisi gard so lintegrite parski li ti obeir Zeova dan tou kitsoz. Zob ti kone ki pou gard so lintegrite, li ti bizin obeir Zeova. Ofet, sak fwa nou obeir Zeova, sa ogmant nou determinasion pou gard nou lintegrite. Zob ti fer boukou zefor pou obeir Bondie dan so lavi toulezour. Par exanp, li ti fer atansion lor so konportman avek bann madam. (Lir Zob 31:1.f) Zob ti enn zom marye, alor li ti kone ki li pa bon ki li devlop bann santiman pou enn lot madam. Azordi, nou pe viv dan enn lemond ki bonbard nou ar bann tantasion lor plan sexiel. Parey kouma Zob, eski nou pou refiz get avek enn move lintansion enn kikenn ki pa nou konzwin? Eski nou pou osi refiz get bann zimaz indesan ouswa pornografi? (Mat. 5:28) Si toulezour nou fer zefor pou kontrol noumem dan sa domenn-la, nou pou reisi gard nou lintegrite.
Nou fortifie noumem pou gard nou lintegrite kan nou ena enn fason panse ekilibre lor bann kitsoz materyel (Get paragraf 14)i
14 Zob ti osi obeir Zeova dan fason ki li ti konsider bann kitsoz materyel. Zob ti konpran ki si li met so konfians dan bann kitsoz ki li ena, li ti pou fer enn pese grav ek li ti pou merit enn pinision. (Zob 31:24, 25, 28) Azordi, nou pe viv dan enn lemond bien materyalis. Si nou devlop enn fason panse ekilibre lor larzan ek bann kitsoz materyel, parey kouma Labib ankouraz nou pou fer, nou pou reisi gard nou lintegrite.—Prov. 30:8, 9; Mat. 6:19-21.
Nou fortifie noumem pou gard nou lintegrite kan nou gard nou lesperans vivan (Get paragraf 15)j
15. (a) Ki ti ed Zob pou gard so lintegrite? (b) Kifer sa kapav ed nou kan nou rapel lesperans ki Zeova ofer nou?
15 Zob ti gard so lintegrite parski li ti fixe so latansion lor rekonpans ki Bondie ti pou donn li. Li ti sir ki pou Zeova so lintegrite ti ena valer. (Zob 31:6) Malgre so bann leprev, Zob ti ena konfians ki alafin Bondie ti pou rekonpans li. Pena dout ki sa konfians-la finn ed li pou gard so lintegrite. Zeova ti telman kontan ki Zob ti gard so lintegrite ki Li ti rekonpans li alor ki li ti ankor enn zom inparfe! (Zob 42:12-17; Zak 5:11) Ek ena bann pli gran rekonpans ki pe atann Zob. Eski to ena full konfians ki Zeova pou rekonpans twa pou to lintegrite? Nou Bondie pa’nn sanze. (Mal. 3:6) Si nou rapel ki nou lintegrite ena valer pou Li, nou kapav gard nou lespwar pou sa zoli lavenir-la bien vivan dan nou lespri.—1 Tes. 5:8, 9.
16. Ki nou bizin determine pou fer?
16 Anou bien determine pou gard nou lintegrite! Parfwa, to kapav santi ki se zis to tousel ki pe gard to lintegrite, me zame to pou tousel. To pou retrouv twa parmi bann milyon dimounn ki pe gard zot lintegrite avek fidelite dan lemond antie. To pou osi trouv twa parmi bann zom ek fam fidel dan lepase ki ti gard zot lintegrite, mem devan lamor. (Ebre 11:36-38; 12:1) Anou determine pou gard nou lintegrite parey kouma Zob, ki ti dir: “Mo pa pou abandonn mo lintegrite!” Ek ki nou lintegrite glorifie Zeova pou touletan!
KANTIK 124 Touzour Fidel
a Ki ete lintegrite? Kifer Zeova kontan kan so bann serviter manifeste sa kalite-la? Kifer li inportan ki sakenn parmi nou manifeste lintegrite? Sa lartik-la pou ed nou trouv sa bann repons-la dan Labib. Li pou osi ed nou pou trouve dan enn fason kler kouma nou kapav fortifie noumem pou gard nou lintegrite sak zour. Kan nou fer sa nou pou gagn boukou benediksion.
b Mo Ebre ki’nn servi pou “san defo” konsernan enn zanimo ena enn lien avek mo “lintegrite” ki servi pou bann dimounn.
c Psom 103:12-14: “12 Parey kouma landrwa kot soley leve li bien lwin ar landrwa kot soley kouse, parey osi Li finn met nou bann pese bien lwin ar nou. 13 Parey kouma enn papa montre mizerikord anver so bann garson, Zeova osi montre mizerikord anver bann ki ena lakrint pou Li. 14 Parski Li konn bien kouma nou finn forme, Li rapel ki nou finn fer ar lapousier.”
d Zob 1:8-11: “8 Lerla Zeova dir Satan: ‘Eski to’nn remark mo serviter Zob? Pena personn kouma li lor later. Li enn dimounn drwat ek ki san repros. Li ena lakrint pou Bondie ek li res lwin ar lemal.’ 9 Me Satan ti reponn Zeova: ‘Eski pou nanye ki Zob finn ena lakrint pou Bondie? 10 Eski to pa finn mont enn baraz otour li, otour so lakaz ek otour tou seki li ena, pou protez li? To finn beni tou seki li fer, ek so bann troupo finn ogmante partou dan pei. 11 Me pou sanze, avoy to lame, ek detrir tou seki li ena, ek vremem li pou modi twa dan to figir.’”
e Zob 26:7, 8, 14: “7 Li etal lesiel lor lespas ki vid, Li sispann later dan vid. 8 Li anvlop delo dan so bann niaz, dan enn fason ki bann niaz pa eklate anba sa pwa-la; 14 Gete! Sa se zis rebor so bann aksion, ek vremem, nou finn tann zis enn ti son lor Li! Alor kisannla kapav konpran so gran loraz?”
f Zob 31:1: “Mo’nn fer enn lalians avek mo lizie. Alor, kouma mo kapav get enn vierz avek enn move lintansion?”
g DESKRIPSION ZIMAZ: Nou trouv Zob antan ki enn zenn papa pe ansegn sertin so bann zanfan bann kitsoz extraordiner ki Zeova inn kree.
h DESKRIPSION ZIMAZ: Enn frer pe refiz get pornografi avek so bann koleg travay.
i DESKRIPSION ZIMAZ: Enn frer pe reziste lanvi pou aste enn gran televizion ki li pa bizin ek ki li pa pou kapav peye.
j DESKRIPSION ZIMAZ: Enn frer dan lapriyer pran letan pou medit lor lesperans ki li ena pou viv dan Paradi.