Lettre la filiale

Cher proclamateur:

Pendant l’année service 2006 nou finn konn l’epidemie Chikungunya. Mem si sa finn bien affecté nou bann frere ek soeur, sa finn donne beaucoup parmi zot l’occasion pou montré zot la-foi ek zot zèle, mem si zot ti malade. Nou finn gagne dé-trois chiffre record. Dan Maurice, nou finn gagne deux nouveau maximum: en octobre 2005 finn ena 1542 proclamateur ek 1470 l’etude biblik. Sa mem mois-la, dan Mayotte, preské 40 pour cent proclamateur ti faire pionnier ek nou finn gagne enn record dan bann nouvelle visite (994) ek en novembre, nou finn gagne enn record dan bann l’etude biblik (129). En décembre, finn ena enn maximum 81 proclamateur. Dan Seychelles, pou premier fois finn gagne enn maximum 24 pionnier auxiliaire.

Surement zot pou content pou koné ki nou finn inaugure trois la-Salle du Royaume alors ki l’année service 2006 ti pé al fini. Deux ladan trouve dan Seychelles, enn la Digue ek enn Anse Royal, ek troisieme-la trouve dan Maurice, Pamplemousses. Nou sur ki sa bann joli la-salle du Royaume-la, mem si zot simple, pou permette progré contigné dan sa bann territoire-la. Nou profite sa l’occasion-la pou remercié tou bann ki finn donne enn bon coup-de-main dan construction sa bann la-salle-la.—1 Thess. 5:18.

Nou koné ki jamais Jéhovah pa envoye nou pou faire so travail sans ki Li forme nou avant. Alors zot pou content pou aprann ki finn ena deux Lekol pionnier pendant mois juin ek juillet dan Maurice. Couma ti annoncé, mem bann pionnier ki ti deja suive sa cours-la avant, ti invité pou assisté sa cours-la avek enn nouveau version livre pou bann pionnier. Pou ena encore deux Lekol pionnier la Réunion commencement sa nouveau l’année service-la.—Is. 54:13.

Nou koné ki ou content nou Papa ki dan le ciel, ek ki ou envie faire so volonté. Rassure-ou ki nou bien content ou, ek ki ici dan Béthel, pena enn jour kot nou pa prié pou sakenn parmi zot. Nou content pou aide zot pou ki zot kapav loué nou Createur. Nou souhaité ki Jéhovah contigne beni zot zèle, zot fidelité, zot l’endurance dan bann l’epreuve ek l’amour ki zot ena pou Li!

Zot bann frere,

Béthel Maurice