Nou Bien Kontan Nou Papa Zeova

1-2. Kifer ek kouma Zeova inn pran bann dispozision pou ki nou form parti dan so fami?

ZEOVA finn invit nou pou form parti dan so fami. Se enn linvitasion extraordiner! Sa fami-la se bann dimounn ki’nn vwe zot lavi ar Bondie ek ki ena lafwa dan sakrifis so Garson. Nou form parti enn fami ki ere. Depi asterla mem, nou lavi ena enn sans, ek nou zwaye parski nou ena lespwar pou viv pou touletan, ki li dan lesiel ouswa dan Paradi lor later.

² Zeova inn pran bann dispozision pou ki nou form parti dan so fami parski Li extra kontan nou. Me sa ti inplik enn gran sakrifis pou Li. (Zan 3:16) Zeova “finn pey enn gro pri pou aste” nou. (1 Kor. 6:20) Gras-a laranson, nou kapav vinn pros ar Zeova. Nou kapav apel Zeova ki pli gran Personaz dan liniver, nou Papa. Anplis, kouma nou finn trouve dan lartik avan, Zeova se meyer Papa ki ena.

 3. Ki bann kestion nou kapav poz noumem? (Get osi lankadre “Eski Zeova Remark Mwa?”)

³ Parey kouma enn ekrivin Labib, kitfwa nou poz noumem sa kestion-la: “Ki bon kiksoz mo kapav donn LESEGNER [“Zeova,” NW] pou remersie li pou tou so bienfe?” (Ps. 116:12) An realite, zame nou pa pou kapav rann Zeova tou seki Li’nn fer pou nou. Me kanmem sa, lamour ki Li ena pou nou motiv nou pou kontan Li an retour. Lapot Zan ti ekrir: “Nou ena lamour, parski Li finn kontan nou an premie.” (1 Zan 4:19, NW) Dan ki fason nou kapav montre nou Papa ki dan lesiel ki nou kontan Li?

 4. Dapre Zak 4:8, kifer nou bizin fer zefor pou vinn pros ar Zeova?

⁴ Zeova anvi ki nou vinn pros ar Li ek ki nou kominik avek Li. (Lir Zak 4:8.) Li demann nou pou “persevere dan lapriyer,” ek Li ekout nou touletan. (Rom. 12:12, NW) Zame Li tro okipe ouswa tro fatige pou ekout nou. An retour, nou bizin ekout Li kan nou lir so Parol, Labib, ek bann piblikasion ki ed nou pou konpran Labib. Nou ekout Li osi kan nou swiv bien pandan bann renion. Parey kouma enn bon kominikasion ed bann zanfan pou res pros ar zot paran, kan nou kominik souvan ar Zeova, nou res pros ar Li.

 5. Kouma nou kapav amelior nou bann lapriyer?

⁵ Reflesi lor fason ki to priye. Zeova anvi ki nou devid nou leker ar Li dan lapriyer. (Ps. 62:8) Alor, poz tomem sa kestion-la: ‘Eski mo fer bann lapriyer anler-anler, koumadir bann fotokopi? Ouswa eski mo lapriyer sorti dan fon mo leker, koumadir enn let personel ki mo’nn ekrir ar mo lame?’ Pena dout ki to bien kontan Zeova, ek ki to anvi vinn bien pros ar Li. Alor, to bizin kominik regilierman avek to Papa ki dan lesiel. Partaz to bann santiman avek Li. Partaz to lazwa ek to lapenn. Pa ezite pou al ver Li pou demann Li so led.

 6. Ki nou bizin fer pou res pros ar nou Papa ki dan lesiel?

⁶ Pou ki nou res pros ar nou Papa ki dan lesiel, nou bizin touletan ena rekonesans anver Li. Nou dakor avek seki sa ekrivin psom-la ti dir: “Zot vremem boukou, SEGNER [“Zeova,” NW], mo Bondie, bann mirak ek bann mervey ki to finn fer pou nou. Peyna to segon! Mo anvi rakonte, rakonte mem, me konte fini, ankor ena mervey pou rakonte.” (Ps. 40:5) Nou pa zis ena rekonesans; nou montre Zeova nou rekonesans par nou bann parol ek nou bann aksion. Kan nou fer sa, nou montre ki nou bien diferan ar boukou dimounn azordi. Nou pe viv dan enn lemond kot boukou dimounn pena rekonesans pou tou seki Bondie inn fer pou zot. An realite, enn kitsoz ki montre ki nou pe viv dan “bann dernie tan” se ki bann dimounn zot ingra. (2 Tim. 3:1, 2) Fode zame ki nou ena sa latitid-la!

 7. Ki Zeova anvi nou fer, ek kifer?

⁷ Bann paran pa kontan kan zot zanfan lager ant zot, me zot anvi ki bannla vinn kamarad. Dan mem fason, Zeova anvi ki tou so bann zanfan vinn kamarad. An realite, lamour ki nou ena ant nou prouve ki nou bann vre Kretien. (Zan 13:35) Nou dakor avek seki sa ekrivin psom-la ti dir: “Ala li zoli la! Sa ki enn plezir sa! Lepep Bondie viv dan larmoni ek lakorite!” (Ps. 133:1) Kan nou kontan nou bann frer ek ser, nou montre Zeova ki nou kontan Li. (1 Zan 4:20) Li vremem extraordiner pou form parti dan enn fami bann frer ek ser ki “ena bonte ek boukou lafeksion”!​—Efe. 4:32.

 8. Dapre 1 Zan 5:3, pou ki rezon prinsipal nou obeir Zeova?

⁸ Parey kouma Zeova anvi ki bann zanfan obeir zot paran, Li anvi ki nou obeir Li. (Efe. 6:1) Li merite ki nou obeir Li parski Li nou Kreater, Li donn nou seki nou bizin pou viv, ek Li pli saz ki ninport ki paran imin. Selman, rezon prinsipal kifer nou obeir Zeova se parski nou kontan Li. (Lir 1 Zan 5:3.) Mem si nou ena boukou rezon pou obeir Zeova, Li pa fors nou pou obeir Li. Zeova finn donn nou liberte pou swazir, alor Li kontan kan nou swazir pou obeir Li parski nou kontan Li.

9-10. Kifer li inportan ki nou konn bann prinsip Zeova ek ki nou viv an-akor avek zot?

⁹ Bann paran anvi ki zot zanfan an sekirite. Se pou sa rezon-la ki zot etabli bann reg ki bon pou zot zanfan ek ki protez zot. Kan bann zanfan obeir sa bann reg-la, zot montre ki zot fer zot paran konfians ek ki zot respekte bannla. Alor, li bien inportan ki nou konn bann prinsip ki Zeova inn etabli ek ki nou obeir zot. Kan nou fer sa, nou montre Zeova ki nou kontan Li ek respekte Li. Anplis, nou osi nou gagn bann bienfe. (Iza. 48:17, 18) Parkont, bann dimounn ki rezet Zeova ek so bann prinsip, zot fer zotmem ditor.​—Gal. 6:7, 8.

¹⁰ Kan nou viv dan enn fason ki fer Zeova plezir, sa protez nou kont bann kitsoz ki kapav fer nou ditor lor plan fizik ek emosionel ouswa ki kapav gat nou relasion avek Li. Zeova kone ki kitsoz pli bon pou nou. Aurora, ki res l’États-Unis, dir: “Mo sir ki kan nou obeir Zeova, nou pou ena meyer lavi ki ena.” Ek sa li vre pou nou tou. Ki bienfe twa to’nn gagne kan to’nn obeir bann prinsip Zeova ki ranpli ar lamour?

11. Kouma lapriyer ed nou?

¹¹ Lapriyer ed nou pou obeir Zeova, mem kan nou gagn difikilte pou fer sa. Akoz nou inparfe, parfwa nou trouv sa difisil pou obeir Zeova, me nou bizin touletan fer zefor pou pa dezobeir Li. Enn ekrivin psom ti sipliy Bondie ek ti dir: ‘Donn mwa enn lespri lobeisans.’ (Ps. 51:12) Enn pionie permanan ki apel Denise dir: “Si mo trouv sa difisil pou obeir enn komannman Zeova, mo priye pou demann Li lafors pou fer seki drwat.” Nou kapav sir ki Zeova pou touletan reponn bann lapriyer koumsa.​—Lik 11:9-13.

12. Dapre Efezien 5:1, ki nou bizin fer?

¹² Lir Efezien 5:1. Antan ki “bann zanfan ki Bondie kontan,” nou fer nou maximum pou imit Zeova. Nou imit so bann kalite kan nou ena lamour, bonte, ek kan nou pardonn lezot. Kan bann dimounn ki pa konn Bondie trouv nou “bon kondwit,” sa kapav motiv zot pou aprann konn Zeova plis. (1 Pier 2:12) Bann paran Kretien bizin pran kont zot zanfan dan mem fason ki Zeova pran nou kont. Kan bann paran imit Zeova, kitfwa zot zanfan osi pou anvi vinn kamarad Zeova.

13. Ki nou bizin fer pou gagn kouraz?

¹³ An zeneral, enn zanfan li fier so papa ek li kontan pou koz lor li. Li parey, nou fier nou Papa ki dan lesiel, ek nou anvi ki lezot aprann konn Li. Dan nou leker, nou ena mem santiman ki Lerwa David, ki ti dir: “Mo pou fier akoz Zeova.” (Ps. 34:2, NW) Me ki nou pou fer si nou per pou koz lor Zeova? Kouma nou kapav gagn kouraz? Nou gagn kouraz kan nou reflesi lor lazwa ki Zeova pou ena si nou koz lor Li. Nou gagn kouraz osi kan nou mazinn bann bienfe ki bann dimounn gagne kan zot aprann konn Bondie. Zeova pou donn nou kouraz ki nou bizin. Li ti ed bann Kretien dan premie siek pou gagn kouraz, ek Li pou ed nou osi.​—1 Tes. 2:2.

14. Kifer li inportan ki nou fer bann disip?

¹⁴ Zeova pa fer preferans, alor Li kontan kan Li trouv nou montre lamour anver lezot, ninport kotsa zot sorti. (Zist. 10:34, 35) Enn parmi bann meyer fason ki nou montre nou lamour pou lezot se kan nou pres bonn nouvel. (Mat. 28:19, 20) Ki rezilta sa travay-la ena? Bann dimounn ki ekout nou kapav amelior zot lavi depi asterla mem, ek zot gagn lespwar pou viv pou touletan dan lavenir.​—1 Tim. 4:16.

15-16. Ki bann rezon nou ena pou zwaye?

¹⁵ Zeova enn Papa ki ranpli ar lamour, alor Li anvi ki so fami ere. (Iza. 65:14) Nou ena boukou rezon pou zwaye asterla, mem si kitfwa nou pe pas par bann difikilte. Par exanp, nou sir ki nou Papa ki dan lesiel bien kontan nou. Nou ena osi enn konesans exakt lor so Parol, Labib. (Zer. 15:16) Ek nou form parti dan enn fami kot tou dimounn kontan Zeova, kontan so bann prinsip, ek kontan sakenn zot kamarad.​—Ps. 106:4, 5.

¹⁶ Anplis, nou sir ki nou lavi pou ameliore dan lavenir ek sa ed nou pou res zwaye. Nou kone ki biento Zeova pou tir tou seki move ek Li pou fer later vinn enn paradi gras-a so Rwayom. Nou ena osi lesperans extraordiner pou retrouv bann dimounn ki’nn mor. Zot pou resisite ek zot pou retrouv bann dimounn ki zot kontan. (Zan 5:28, 29) Sa pou vremem extraordiner! Me pli inportan, nou kapav sir ki biento tou bann ki dan lesiel ek lor later pou donn nou Papa loner, laglwar, ek ladorasion ki Li merite.