Kestion Bann Lekter

Kan misie-la re-marye, lasanble pou konsider so ansien maryaz kouma enn maryaz ki nepli valid, ek zot pou konsider so nouvo maryaz, kouma enn maryaz ki valid. Pou nou konpran kifer, anou gete seki Zezi ti dir lor divors ek re-maryaz.

Dan Matie 19:9 (NW), Zezi explik sel rezon Biblik ki kapav kas enn maryaz. Li dir: “Si kikenn divors avek so fam, exsepte dan ka limoralite sexiel, ek marye avek enn lot dimounn, li komet ladilter.” Dan bann parol Zezi, nou aprann (1) ki limoralite sexiel se sel rezon Biblik kot enn kikenn kapav divors avek so konzwin, ek (2) si enn zom divors ar so fam san sa rezon Biblik la ek ki li re-marye ar enn lot fam, li komet ladilter.a

Eski Zezi ti pe rod dir ki enn zom ki komet limoralite sexiel ek ki divors avek so fam, li lib pou re-marye dapre Labib? Pa neseserman. Kan enn misie komet ladilter, konzwin inosan-la, setadir so madam, kapav deside si li pou pardonn so mari ouswa non. Si li desid pou pa pardonn li ek ki zot divorse, toulede lib pou re-marye apre ki zot fini divorse.

Parkont, li posib ki konzwin inosan-la anvi res marye ar so mari, ek li dir so mari ki li dispoze pou pardonn li. Selman, ki pou arive si mari-la pa anvi retourn ar so fam ek ki li demann divors? Parski madam-la ti dispoze pou pardonn so misie ek pou res marye avek li, dapre Labib, misie-la pa pou lib pou re-marye. Si li desid pou re-marye, mem si li pa lib pou fer sa, li pou re-komet ladilter ankor enn fwa. Lerla, bann ansien so lasanble pou bizin form enn lot komite disiplinn relizie akoz seki li’nn fer.​—1 Kor. 5:1, 2; 6:9, 10.

Kan enn zom ki pa lib pou re-marye, li re-marye, kouma lasanble bizin konsider so ansien maryaz ek so nouvo maryaz? Dapre Labib, eski so ansien maryaz ankor valid? Eski konzwin inosan la ankor bizin deside si li pou pardonn ouswa rezet so ansien mari? Eski lasanble pou konsider sa nouvo maryaz-la kouma enn maryaz adilter?

Dan lepase, lasanble ti konsider sa nouvo maryaz-la kouma enn maryaz ki adilter tanki sa konzwin inosan la ankor vivan, tanki li pa re-marye, ouswa tanki ki li pa koupab enn pese limoralite sexiel. Selman, kan Zezi ti koz lor divors ek maryaz, li pa ti koz lor konzwin inosan la. Li ti explike ki enn zom ki divors ar so fam, san rezon Biblik, ek ki re-marye ar enn lot fam, li komet ladilter. Alor, parski sa zom-la inn divorse ek re-marye (seki Zezi konpar ar enn ladilter) savedir ki so ansien maryaz nepli valid.

Kan enn zom divors ar so fam ek li re-marye, li nepli posib ki so ansien fam, setadir konzwin inosan-la, pardonn li ouswa rezet li. Alor, fam-la nepli bizin pran desizion pou pardonn ouswa rezet so ansien mari. Anplis, mem si konzwin inosan-la ankor vivan, li re-marye, ouswa li komet limoralite sexiel, sa pa pou sanz fason ki lasanble bizin konsider sa nouvo maryaz-la.b

Dan lexanp ki mansione lao, koup-la finn divorse parski mari-la finn komet ladilter. Me ki ti pou arive si mari-la pa ti komet ladilter, me ki li ti divorse kanmem ek ki li ti re-marye? Ouswa, ki ti pou arive si mari-la pa ti komet limoralite sexiel avan zot divors, me ki li ti fer sa apre zot divors ek ki li ti re-marye ar enn lot madam, mem si so madam ti dispoze pou pardonn li? Dan tou sa bann lexanp-la, mari-la inn divorse ek inn re-marye, savedir ki li’nn komet ladilter, ek ki so ansien maryaz nepli valid. Se so nouvo maryaz ki valid. Kouma Latour Degard 15 Fevriye 1980, an Franse, dir: “Asterla ki li’nn re-marye, li pa kapav kas sa maryaz-la pou retourn kouma avan; so ansien maryaz nepli valid parski li’nn divorse, li’nn komet ladilter, ek li’nn re-marye.”

Mem si nou finn sanz fason ki nou konpran sa kalite maryaz-la, sa pa vedir ki maryaz nepli enn kitsoz ki sakre, ouswa ki ladilter nepli enn pese grav. Enn zom ki divors ar so fam, san rezon Biblik, ek ki re-marye, mem si dapre Labib, li pa lib pou re-marye, bann ansien pou bizin form enn komite disiplinn relizie parski li’nn komet ladilter. (Si fam ki pe marye ar li la enn Kretien, li osi li pou bizin pas dan enn komite disiplinn relizie, parski li’nn komet ladilter.) Mem si lasanble pa pou konsider sa nouvo maryaz-la kouma enn maryaz adilter, sa misie-la pa pou gagn bann privilez spesial dan lasanble pandan boukou lane. Fode ki bann dimounn nepli soke par seki li’nn fer ouswa ki li re-gagn zot respe. Avan ki bann ansien donn li ninport ki privilez, zot pou reflesi osi lor sitiasion so ansien madam, ki li’nn trayir, ek bann zanfan miner, ki kitfwa li’nn abandone.​—Mal. 2:14-16.

Kan zot reflesi lor tou seki enn divors ki pa Biblik ek enn re-maryaz inplike, bann Kretien ki ena sazes pou imit Zeova ek zot pou konsider maryaz kouma enn kitsoz ki sakre.​—Ekle. 5:4, 5; Ebre 13:4.