LARTIK LETID 24
Zeova—Pli Gran Lexanp Konsernan Pardon
“Segner, to ranpli ar bonte ek pardon; to lamour infini peyna born pou dimoun ki kriye twa.”—PS. 86:5.
KANTIK 42 Lapriyer Bann Serviter Bondie
REZIMEa
1. Dan Ekleziast 7:20, ki verite Lerwa Salomon ti dir?
LERWA Salomon ti dir: “Lor sa later-la, pena enn zom ki drwat, ki touletan fer seki bon ek ki zame pa fer pese.” (Ekle. 7:20) Sa bann parol-la bien vre! Nou tou nou fer pese. (1 Zan 1:8) Alor, nou tou nou bizin ki Bondie ek bann dimounn pardonn nou.
2. Ki nou resanti kan enn kamarad pardonn nou?
2 Kitfwa to rapel enn moman kot to ti ofans to kamarad. Ek sirman to’nn demann li pardon, parski to ti anvi res kamarad avek li. Ki to’nn resanti kan li’nn pardonn twa? Sirman to ti soulaze ek to ti bien kontan osi!
3. Ki nou pou examine dan sa lartik-la?
3 Nou anvi ki Zeova vinn nou pli bon Kamarad. Me parfwa, nou pou dir ouswa nou pou fer bann kitsoz ki pou ofans Li. Kifer nou kapav sir ki Zeova anvi pardonn nou? Ki diferans ena ant pardon Zeova ek fason ki nou nou pardonn enn kikenn? Ek kisannla Zeova pardone?
ZEOVA PRE POU PARDONE
4. Kifer nou kapav sir ki Zeova pre pou pardone?
4 Labib ansegn nou ki Zeova pre pou pardone. Lor Montagn Sinai, kan Zeova ti dekrir Limem avek Moiz, Li ti servi enn anz pou dir: “Zeova, Zeova, enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans, ki montre lamour fidel anver bann milye dimounn, ki pardonn bann erer, bann fot, ek bann pese.” (Ex. 34:6, 7) Zeova Li enn Bondie ki bon ek ki ena mizerikord, ek Li touletan pre pou pardonn bann peser ki repanti.—Ne. 9:17; Ps. 86:15.
Zeova konn bann lexperyans ki nou’nn fer, ki finn form nou personalite (Get paragraf 5)
5. Dapre Psom 103:13, 14, ki kitsoz Zeova fer parski Li konn bien bann dimounn?
5 Zeova Li nou Kreater, alor Li konn tou kitsoz lor nou. Li extraordiner kan nou mazine ki Zeova konn tou kitsoz lor tou dimounn! (Ps. 139:15-17) Li konn tou bann defo ki nou’nn erite ar nou bann paran. Li konn osi bann lexperyans ki nou’nn fer dan nou lavi ek ki finn form nou personalite. Zeova vremem konn nou bien! Alor, ki sa finn pous Li pou fer? Sa finn pous Li pou montre mizerikord anver nou.—Ps. 78:39; lir Psom 103:13, 14.
6. Ki prev montre ki Zeova vremem anvi pardonn nou?
6 Zeova inn donn bann prev ki Li vremem anvi pardonn nou. Li konpran ki, akoz Adan, nou tou nou fer pese ek nou mor. (Rom. 5:12) Ek nou pa kapav fer nanye pou lit kont pese ek lamor. (Ps. 49:7-9) Selman, nou Bondie ki ena lamour ek konpasion, inn pran bann dispozision pou liber nou ar pese ek lamor. Kouma Li’nn fer sa? Zan 3:16 explik nou ki Zeova inn avoy so sel Garson lor later pou ki li donn so lavi pou nou. (Mat. 20:28; Rom. 5:19) Zezi inn mor dan nou plas, pou ki tou bann ki ena lafwa an li kapav libere ar pese ek lamor. (Ebre 2:9) Zeova inn bien soufer kan Li’nn trouv so Garson ki Li bien kontan, soufer ek mor kouma enn kriminel! Li kler ki Zeova pa ti pou les so Garson mor si Li pa ti anvi pardonn nou!
7. Kisannla Zeova inn pardone?
7 Labib koz lor boukou dimounn ki Zeova inn pardone. (Efe. 4:32) Kisannla sa fer twa mazine? Kitfwa to pe pans Lerwa Manase. Manase ti enn zom bien move ek li ti fer bann gran pese devan Zeova. Li ti ador bann fos bondie, ek li ti ankouraz lezot pou fer parey kouma li. Li ti touy so prop zanfan ek li ti ofer zot kouma sakrifis pou bann fos bondie. Li ti mem met enn zidol dan tanp Zeova. Kan Labib koz lor Manase, li dir: “Li ti fer boukou move kitsoz devan lizie Zeova, pou ofans Li.” (2 Kro. 33:2-7) Selman, kan Manase ti montre ki li ti vremem repanti, Zeova ti pardonn li. Zeova ti mem fer li revinn lerwa. (2 Kro. 33:12, 13) Kitfwa to pe pans Lerwa David osi. Li ti fer bann pese bien grav devan Zeova. Par exanp, li ti komet ladilter ek li ti fer touy enn kikenn. Selman, kan David ti rekonet so bann erer ek li ti repanti, Zeova ti pardonn li osi. (2 Sam. 12:9, 10, 13, 14) Wi, nou kapav sir ki Zeova vremem anvi pardonn nou. Ek kouma nou pou trouve, ena enn diferans ant pardon Zeova ek fason ki nou nou pardonn enn kikenn.
PARDON ZEOVA LI EXTRAORDINER
8. Ki lien ena ant pardon Zeova ek so fonksion antan ki Ziz?
8 Zeova Li “Ziz lor later antie.” (Zen. 18:25) Enn bon ziz bizin bien konpran lalwa. Zeova Li nou Ziz, me Li osi konpran bann lalwa, parski se Li ki’nn etabli sa bann lalwa-la. (Iza. 33:22) Pena personn ki konn fer diferans ant lebien ek lemal parey kouma Zeova. Ki kitsoz ankor enn bon ziz bizin kone? Li bizin konn tou bann linformasion lor enn case avan ki li pran enn desizion. Zeova Li meyer Ziz ki ena, parski Li touletan konn tou bann linformasion.
9. Ki linformasion Zeova ena kan Li bizin deside si Li pou pardonn enn kikenn ouswa non?
9 Zeova pa parey kouma bann ziz imin, parski dan ninport ki case ki vinn devan Li, Zeova ena deza tou bann linformasion lor la. (Zen. 18:20, 21; Ps. 90:8) Zeova pa parey kouma bann dimounn ki baz zot desizion zis lor seki zot tande ek trouve. Li konpran ki bann aksion enn kikenn, li inflianse par bann kalite ek karakter ki sa dimounn-la inn erite ar so bann paran, ar ledikasion ki li’nn gagne, landrwa kot li reste, ek osi par so lasante mantal ek emosionel. Zeova kapav osi lir dan leker bann dimounn. Li trouv motivasion, lintansion, ek dezir sak dimounn. Pena nanye ki kasiet devan lizie Zeova. (Ebre 4:13) Alor, kan Zeova pardonn enn kikenn, Li pardonn li parski Li ena tou bann linformasion lor so sitiasion.
Zeova Li zis, drwat, ek Li pa get de lizie. Li pa pran bribe (Get paragraf 10)
10. Kifer nou kapav dir ki Zeova touletan ziz dan enn fason zis ek drwat? (Deteronom 32:4)
10 Zeova touletan ziz dan enn fason zis ek drwat. Li pa get de lizie. Kan Zeova pardonn enn kikenn, Li pa fer sa parski sa dimounn-la li zoli, li ris, li inportan, ouswa li ena boukou talan. (1 Sam. 16:7; Zak 2:1-4) Personn pa kapav met presion lor Zeova, ek Zeova pa pran bribe. (2 Kro. 19:7) Li pa les so lemosion inflians so bann desizion. (Ex. 34:7) Zeova pli bon ziz ki ena, parski Li konpran nou ek Li konpran nou sitiasion.—Lir Deteronom 32:4.
11. Kifer pardon Zeova li bien diferan ar fason ki bann dimounn pardonn zot kamarad?
11 Bann ekrivin bann Lekritir Ebre ti konpran ki, fason ki Zeova pardonn enn kikenn, li bien diferan ar fason ki bann dimounn pardonn zot kamarad. Dan sertin sitiasion, zot ti servi enn mo an Ebre, ki servi zis pou dekrir fason ki Zeova pardonn bann peser. Sa mo-la zame dekrir fason ki enn dimounn pardonn so kamarad, parski bann dimounn pa kapav pardonn san poursan, parey kouma Zeova. Se zis Zeova tousel ki ena kapasite pou pardonn net enn peser ki’nn repanti. Ki arive kan Zeova pardonn nou?
12-13. (a) Kan Zeova pardonn enn kikenn, ki bienfe sa dimounn-la gagne? (b) Ki arive apre ki Zeova pardonn enn kikenn?
12 Kan nou aksepte ki Zeova inn pardonn nou, nou gagn bann “letan rekonfor,” setadir lape lespri ek enn konsians kler. Se zis Zeova ki kapav donn sa kalite pardon-la. (Zist. 3:19, 20) Kan Zeova pardonn nou, Li les nou revinn so kamarad, ek se koumadir zame nou pa ti fer pese.
13 Apre ki Zeova inn pardonn nou, Li pa pou revinn lor sa pese-la ankor ek Li pa pou re-pini nou pou sa. (Iza. 43:25; Zer. 31:34) Zeova “separ nou ar nou pese parey kouma distans ki ant soley leve ek soley kouse.”b (Ps. 103:12) Kan nou reflesi lor Zeova so pardon, nou leker ranpli ar respe ek rekonesans. (Ps. 130:4) Me kisannla Zeova pardone?
KISANNLA ZEOVA PARDONE?
14. Ziska ler, ki nou’nn aprann lor pardon Zeova?
14 Nou’nn trouve ki, kan Zeova desid pou pardonn enn kikenn, Li pa gete si pese-la li gran ouswa li tipti. Nou’nn trouve osi ki Zeova Li nou Kreater, nou Ziz, ek ki Li etabli bann lalwa. Li servi sa konesans-la pou deside si Li pou pardonn enn kikenn. Alor, ki kitsoz Zeova pran an konsiderasion kan Li bizin deside si Li pou pardonn enn kikenn?
15. Dapre Lik 12:47, 48, sit enn kitsoz ki Zeova pran an konsiderasion kan Li bizin deside si Li pou pardonn enn kikenn.
15 Kan enn kikenn fer enn pese, enn kitsoz ki Zeova pran an konsiderasion se eski sa dimounn-la ti kone ki li pe fer enn move kitsoz. Zezi ti explik sa dan Lik 12:47, 48. (Lir.) Kan enn kikenn prevwar pou fer enn move kitsoz, ki li kone Bondie pa kontan, me ki li fer li kanmem, li fer enn pese bien grav. Zeova kapav desid pou pa pardonn sa dimounn-la. (Mark 3:29; Zan 9:41) Selman, nou bizin rekonet ki parfwa nou bien kone kan nou’nn fer enn move kitsoz. Dan sa ka-la, eski nou kapav gagn pardon Zeova? Wi, parski ena enn lot kitsoz ki Zeova pran an konsiderasion kan Li bizin deside si Li pou pardonn enn kikenn.
Nou kapav sir ki Zeova pou pardonn nou si nou vremem repanti (Get paragraf 16-17)
16. Ki savedir repanti, ek kifer li inportan ki nou repanti si nou anvi ki Zeova pardonn nou?
16 Enn lot kitsoz ki Zeova pran an konsiderasion, se si sa dimounn-la inn vremem repanti. Ki savedir repanti? Kan enn kikenn repanti, savedir ki li’nn sanz so fason panse, li’nn sanz so latitid, ek li bien deside pou pa refer sa pese-la ankor. Savedir osi ki li vremem regret seki li’nn fer, ouswa ki li vremem regrete ki li pa’nn azir dan enn bon fason. Enn kikenn ki repanti, li bien sagrin parski li’nn fer bann move kitsoz. Li sagrin osi parski li’nn les so relasion avek Zeova gate, ek se akoz sa ki li’nn fer bann move kitsoz. Lerwa Manase ek Lerwa David toulede ti fer bann pese bien grav. Me kanmem sa, Zeova ti pardonn zot parski zot ti vremem repanti. (1 Ler. 14:8) Wi, pou ki Zeova pardonn enn kikenn, Li bizin trouv bann prev ki sa dimounn-la inn vremem repanti. Me li pa ase ki nou zis sagrin ki nou’nn fer enn pese. Nou bizin azir.c Ek sa se enn lot kitsoz ki Zeova pran an konsiderasion.
17. Ki savedir konverti, ek kifer li bien inportan ki nou pa refer bann mem pese ki nou ti fer dan lepase? (Izai 55:7)
17 Enn lot kitsoz ki Zeova pran an konsiderasion, se si sa dimounn-la inn konverti. Konverti vedir rezet seki pa bon ek “tourn” ver Zeova. Kan enn kikenn konverti, savedir ki li bizin sanz so lavi, aret fer bann move kitsoz ki li ti pe fer, ek swiv bann prinsip Zeova. (Lir Izai 55:7.d) Sa dimounn-la bizin sanz so fason panse pou ki lespri Zeova kapav azir lor li. (Rom. 12:2; Efe. 4:23) Li bizin fer zefor pou aret pans ek azir dan enn move fason. (Kol. 3:7-10, NW) Biensir, se gras-a nou lafwa dan sakrifis Zezi ki Zeova pou kapav pardonn nou ek efas nou bann pese. Ek Li pou kapav fer sa si Li trouve ki nou pe fer bann gro zefor pou sanze.—1 Zan 1:7.
ENA KONFIANS KI ZEOVA POU PARDONN TWA
18. Ki nou’nn aprann lor pardon Zeova?
18 Anou reget sertin pwin inportan ki nou’nn examine dan sa lartik-la. Zeova vremem pli gran lexanp konsernan pardon. Kifer nou kapav dir sa? Premierman, Li touletan pre pou pardone. Deziemman, Li konn tou kitsoz lor nou, ek Li ena kapasite pou kone si nou’nn vremem repanti. Trwaziemman, kan Zeova pardonn nou, Li vremem pardonn nou. Pou Li, se koumadir zame nou pa ti fer sa pese-la. Gras-a sa, nou kapav ena enn konsians kler ek gagn so faver.
19. Mem si nou inparfe ek ki nou pou kontign fer pese, kifer nou kapav ere?
19 Biensir, tanki nou inparfe, nou pou kontign fer pese. Selman, nou kapav gagn rekonfor ar bann parol ki trouv dan liv Étude perspicace des Écritures, Volim 2, paz 765. Li dir: “Zeova ena mizerikord ek Li kone ki so bann serviter ena bann febles. Alor, fode pa zot kontign ena bann remor pou bann erer ki zot inn fer akoz zot inparfe. (Ps 103:8-14; 130:3) Si zot pe fer zot maximum pou swiv bann prinsip Zeova, zot kapav ere. (Fil 4:4-6; 1 Zan 3:19-22).” Sa vremem ankourazan, pa vre!
20. Ki nou pou examine dan prosin lartik?
20 Nou bien rekonesan ki Zeova pre pou pardonn nou kan nou vremem repanti pou bann pese ki nou’nn fer. Me kouma nou kapav imit pardon Zeova? Dan ki sans nou pardon li parey kouma pardon Zeova, ek dan ki sans li diferan? Kifer li inportan ki nou konpran sa diferans-la? Dan prosin lartik, nou pou reponn sa bann kestion-la.
KANTIK 45 Meditasion Mo leker
a Dan so Parol, Labib, Zeova rasir nou ki Li dispoze pou pardonn bann peser ki vremem repanti. Me parfwa, kitfwa nou panse ki nou pa merit so pardon. Dan sa lartik-la, nou pou gete kifer nou kapav sir ki nou Bondie Li touletan pre pou pardonn nou si nou vremem regret bann pese ki nou’nn fer.
c EXPRESION KI’NN EXPLIKE: “Repanti” vedir sanz nou fason panse ek vremem regret lavi ki nou ti pe amene, bann move kitsoz ki nou’nn fer, ouswa bann kitsoz ki nou pa’nn reisi fer. Kan enn kikenn vremem repanti, li fer bann kitsoz ki montre ki li’nn vremem sanze.