Ki Nou Kapav Aprann ar De Let Lapot Pier?

 1. Avan ki Pier mor, ki responsabilite Zeova ti donn li?

LAPOT Pier inn servi Zeova avek fidelite pandan plizir lane. Li’nn prese ansam ar Zezi, li’nn koumans predikasion ar bann non-Zwif, ek apre sa li’nn vinn enn manb komite santral. Mem si Pier ti pre pou mor, Zeova ti donn li ankor plis travay pou fer. Ver 62-64 Nou Lepok, Zeova ti fer li ekrir de let, premie ek deziem liv Pier. Pier ti anvi ki sa de let-la ed so bann frer ek ser apre so lamor.—2 Pier 1:​12-15.

 2. Kifer Pier ti ekrir so de let dan bon moman?

² Lepok ki Pier ti ekrir so de let, bann Kretien ti bien “tris akoz diferan leprev.” (1 Pier 1:6) Sertin ti pe fann bann fos lansegnman dan lasanble Kretien, ek zot ti pe ankouraz bann frer ek ser pou ena enn kondwit imoral. (2 Pier 2:​1, 2, 14) Anplis, bann Kretien ki ti res Zerizalem biento ti pou trouv “lafin tou kitsoz,” setadir destriksion Zerizalem ek so tanp par larme Romin. (1 Pier 4:7) Alor, nou kapav sir ki bann let Pier ti ed bann Kretien pou andir bann difikilte, ek sa ti osi prepar zot pou bann leprev ki zot ti pou gagne dan lavenir.b

 3. Kifer nou bizin etidie bann let lapot Pier?

³ Mem si Pier inn ekrir sa de let-la pou bann Kretien dan premie siek, Zeova inn fer met zot dan Labib. Alor, nou tou nou kapav gagn bann bienfe ar sa de let-la. (Rom. 15:4) Parey kouma bann Kretien dan premie siek, nou pe viv dan enn lemond ki bien imoral, ek bann serviter Zeova pe bizin fer fas ar boukou leprev. Anplis, kan gran soufrans pou arive, nou pou gagn pli boukou leprev ki bann Zwif ti gagne kan ti detrir Zerizalem. Alor, bann leson ki ena dan bann let lapot Pier kapav bien itil pou nou. Zot pou ed nou pou kontign atann zour Zeova, pou sirmont laper bann dimounn, ek pou ogmant nou lamour pou nou bann frer ek ser. Zot pou osi rapel bann ansien kouma zot kapav pran swin troupo Bondie.

 4. Dapre 2 Pier 3:​3, 4, ki kitsoz kapav diminie nou lafwa?

⁴ Nou antoure ar bann dimounn ki pa krwar dan bann profesi ki ena dan Labib. Sertin kitfwa boufonn nou parski sa fer plizir lane ki nou pe dir ki lafin pe arive. Ena lezot ki dir ki lafin zame pa pou vini. (Lir 2 Pier 3:​3, 4.) Si nou tann bann dimounn dir bann kitsoz koumsa kan nou prese, ouswa si nou tann bann kamarad travay ouswa bann fami dir sa bann kitsoz-la, kitfwa sa kapav diminie nou lafwa. Anou gete kouma bann let lapot Pier kapav ed nou.

 5. Ki kitsoz kapav ed nou pou atann lafin avek pasians? (2 Pier 3:​8, 9)

⁵ Sertin kapav panse ki Zeova pe tarde pou amenn lafin. Seki lapot Pier inn ekrir kapav ed nou, parski li rapel nou ki Zeova pa konsider letan parey kouma nou. (Lir 2 Pier 3:​8, 9.) Pou Zeova, mil an li koumadir enn zour. Zeova ena pasians ek Li pa anvi ki personn detrir. Kan zour Zeova pou arive, Li pou detrir sa move lemond-la. Se vremem enn gran privilez pou servi letan ki reste pou pres ar bann dimounn partou lor later!

 6. Kouma nou kapav “kontign gard dan [nou] lespri” zour Zeova? (2 Pier 3:​11, 12)

⁶ Lapot Pier ankouraz nou pou “kontign gard dan [nou] lespri” zour Zeova. (Lir 2 Pier 3:​11, 12.) Kouma nou kapav fer sa? Nou bizin reflesi, si posib toulezour, lor bann benediksion ki nou pou gagne dan lemond nouvo. Esey mazinn twa dan lemond nouvo: To pe respir enn ler fre, to pe manz enn bon manze, to pe akeyir bann ki’nn resisite, ki kitfwa inn mor depi plizir santenn lane, ek to pe ansegn zot bann profesi ki’nn realize. Kan to reflesi lor bann kitsoz koumsa, sa pou ed twa pou atann avek pasians zour Zeova, ek sa pou konvink twa ki lafin bien pre. Anplis, parski nou kone alavans seki pou arive dan lavenir, nou pa pou “les [nou] antrene” par bann fos lansegnman.—2 Pier 3:17.

 7. Ki kapav arive kan nou ena laper bann dimounn?

⁷ Nou kone ki zour Zeova bien pre. Akoz sa, nou anvi fer nou maximum pou pres bon nouvel ar lezot. Selman, dan sertin sitiasion, li kapav arive ki nou ezite pou prese. Kifer? Parski kitfwa dan sa ler-la, nou kapav gagn per seki bann dimounn pou panse lor nou. Lapot Pier osi ti pas dan sa sitiasion-la. Lanwit avan lamor Zezi, plizir fwa Pier ti dir ki li pa ti konn Zezi ek ki li pa ti so disip! (Mat. 26:​69-75) Me apre, Pier ti reisi sirmont so laper, ek li ti dir: “Pa bizin per seki lezot per, ni gagn traka.” (1 Pier 3:14) Bann parol lapot Pier montre nou ki nou osi nou kapav sirmont laper bann dimounn.

 8. Ki kitsoz kapav ed nou pou sirmont laper bann dimounn? (1 Pier 3:15)

⁸ Ki kitsoz kapav ed nou pou sirmont laper bann dimounn? Lapot Pier dir ki nou bizin “sanktifie Lekris kouma Segner dan [nou] leker.” (Lir 1 Pier 3:15.) Savedir ki nou bizin reflesi lor pozision ek pouvwar ki nou Segner ek Lerwa Zezi Kris ena. Si nou strese ouswa nou gagn per pou prese kan enn lokazion prezant devan nou, mazinn nou Lerwa. Mazine ki li pe regne dan lesiel ek ki li antoure ar bann milyon anz. Mazine osi ki li ena “tou lotorite dan lesiel ek lor later,” ek ki li pou avek nou “toulezour ziska peryod lafin sa lemond-la.” (Mat. 28:​18-20) Lapot Pier dir nou ki nou bizin “touzour pre” pou defann nou lafwa. Eski to anvi prese dan travay, dan lekol, ouswa dan lezot fason informel? Alor, reflesi alavans kan eski to kapav fer sa, ek prepar osi seki to pou dir. Priye Zeova pou gagn kouraz ek fer Li konfians, parski Li pou ed twa pou sirmont to laper.—Zist. 4:29.

 9. Dan ki sitiasion Pier pa ti montre lamour? (Get zimaz osi.)

⁹ Lapot Pier ti aprann kouma pou montre lamour. Li ti la kan Zezi ti dir: “Mo pe donn zot enn nouvo komannman: kontan sakenn zot kamarad; parey kouma mo’nn kontan zot, zot osi kontan sakenn zot kamarad.” (Zan 13:34) Selman apre sa, Pier ti les li inflianse par lezot, ek li pa ti manz ar so bann frer ek ser non-Zwif. Kan li ti trouv sa, lapot Pol ti dir ki Pier enn “ipokrit.” (Gal. 2:​11-14) Pier ti aksepte ki Pol koriz li ek li ti tir bann leson. Dan so de let, Pier dir ki fode pa nou zis ena lamour pou nou bann frer ek ser, me nou bizin montre sa lamour-la.

10. Ki kitsoz kapav ed nou pou “ena enn lafeksion fraternel ki pa ipokrit”? Explike. (1 Pier 1:22)

¹⁰ Lapot Pier dir ki nou bizin “ena enn lafeksion fraternel ki pa ipokrit” pou nou bann frer ek ser. (Lir 1 Pier 1:22.) Pou nou ena sa lafeksion fraternel la, nou bizin vremem obeir tou bann lansegnman ki nou’nn aprann dan “laverite.” Parmi sa bann lansegnman-la, ena lansegnman ki “Bondie pa fer preferans.” (Zist. 10:​34, 35) Nou pa pou reisi obeir “nouvo komannman” ki Zezi ti donn so bann disip, si nou kontan zis sertin dan lasanble ek nou pa kontan lezot. Parey kouma Zezi, nou kapav santi nou pli pros ar sertin dan lasanble. (Zan 13:23; 20:2) Selman, Pier rapel nou ki nou bizin fer zefor pou kontan tou nou bann frer ek ser, parski zot tou form parti nou fami.—1 Pier 2:17.

11. Ki savedir ‘kontan sakenn nou kamarad avek enn gran lamour’?

¹¹ Lapot Pier ankouraz nou pou ‘kontan sakenn nou kamarad avek enn gran lamour avek tou nou leker.’ Dan sa verse-la, lexpresion ena “enn gran lamour” vedir fer zefor pou kontan enn kikenn, mem si sa difisil pou montre lamour anver li. Par exanp, si enn frer inn bles nou ouswa inn ofans nou, nou pou ena plis tandans pou tret li parey kouma li’nn tret nou, olie ki nou montre lamour anver li. Selman, Pier ti aprann ar Zezi ki kan enn kikenn azir koumsa, sa pa fer Bondie plezir. (Zan 18:​10, 11) Akoz sa, Pier ti dir: “Pa rann lemal pou lemal, ek pa insilte bann ki insilte zot. Okontrer, an-retour donn enn benediksion.” (1 Pier 3:9) Alor, kan nou ena “enn gran lamour” pou lezot, nou pou zanti avek zot ek nou pou tret zot dan enn bon fason, mem kan zot bles nou.

12. (a) Ki kitsoz ankor enn “lamour profon” pou motiv nou pou fer? (b) Dapre video Protez sa Kado Ki Ena Gran Valer-la: Linite, ki zefor nou bizin fer?

¹² Dan so premie let, Pier servi lexpresion “lamour profon.” Sa kalite lamour-la pa pardonn zis de-trwa pese, me li pardonn “enn kantite pese.” (1 Pier 4:8) Kitfwa Pier ti rapel leson ki Zezi ti ansegn li lor pardon, de-trwa lane avan. Sa lepok-la, kitfwa Pier ti panse ki li ti bien zenere kan li ti dir ki li pou pardonn so frer “ziska set fwa.” Selman, Zezi ti ansegn li, ek nou osi, ki nou bizin pardonn “ziska 77 fwa,” setadir ki nou bizin pa konte ki kantite fwa nou pardone, me nou bizin kontign pardone. (Mat. 18:​21, 22) Si to gagn difikilte pou pardonn lezot, fode pa to dekouraze! Nou tou nou inparfe, ek nou tou parfwa nou gagn difikilte pou pardonn lezot. Selman, seki pli inportan aster-la, se ki to fer tou seki to kapav pou pardonn lezot, ek ki to fer lape avek zot.c

13. Ki difikilte bann ansien kapav gagne pou pran swin zot bann frer ek ser?

¹³ Apre ki li ti resisite, Zezi ti dir Pier: “Pran swin mo bann ti mouton.” (Zan 21:16) Kitfwa Pier zame pa’nn bliye sa bann parol-la! Si to enn ansien, to kone ki twa osi to bizin obeir sa lord-la. Selman, li kapav arive ki enn ansien gagn difikilte pou trouv letan pou okip so bann frer ek ser. Bann ansien bizin an premie okip zot prop fami lor plan fizik, emosionel, ek spiritiel. Zot bizin osi aktif dan predikasion, ek zot bizin osi prepar zot bann size pou bann renion ek bann lasanble. Sertin ansien servi osi dan Komite Liezon Ospitalie, ouswa dan Departman Lokal Devlopman/Konstriksion. Bann ansien, zot vremem bien okipe!

14. Ki kitsoz bizin motiv bann ansien pou pran swin troupo Bondie? (1 Pier 5:​1-4)

¹⁴ Pier ti ankouraz bann ansien pou “pran swin troupo Bondie.” (Lir 1 Pier 5:​1-4.) Si to enn ansien, nou kone ki to kontan to bann frer ek ser, ek ki to anvi pran zot swin. Selman, kitfwa parfwa to tro okipe, ouswa to telman fatige ki to pa reisi pran zot swin kouma bizin. Ki kitsoz to kapav fer? Devid to leker ar Zeova. Pier ti dir: “Si enn kikenn servi lezot, ki li kont lor lafors ki Bondie done pou li fer sa.” (1 Pier 4:11) To bann frer ek ser kitfwa pe fer fas ar bann difikilte ki zis lemond nouvo pou kapav regle. Ek pa bliye ki Zezi Kris, “sef bann berze,” kapav ed zot pli bien ki ninport kisann-la. Li kapav fer sa depi azordi, ek li pou fer li dan lemond nouvo. Seki Zeova demann bann ansien azordi, se pou kontan zot bann frer ek ser, pou pran zot swin, ek pou vinn “bann lexanp pou troupo-la.”

15. Kouma enn ansien pran swin so bann frer ek ser? (Get zimaz osi.)

¹⁵ William, enn frer ki ansien depi lontan, inn konpran ki li bien inportan ki bann ansien pran swin zot bann frer ek ser. Kan pandemi COVID-19 ti koumanse, li ek bann lezot ansien ti fer zot maximum pou kontakte sak manb zot group, sak semenn. Kifer zot ti fer sa? William dir: “Boukou frer ek ser ti lakaz tousel kot zot, ek bien vit zot ti kapav koumans pans bann kitsoz negatif.” Kan enn kikenn ena enn problem, William pran letan pou ekout li bien. Sa ed li pou konpran seki pe trakas sa dimounn-la ek seki li vremem bizin. Apre sa, li rod bann piblikasion ouswa bann video lor nou sit Internet, ki li kapav servi pou ankouraz sa dimounn-la. William dir: “Plis letan pase, plis li vinn inportan pou pran swin nou bann frer ek ser. Nou fer boukou zefor pou ed bann dimounn pou aprann konn Zeova. Alor, li normal ki nou bizin fer boukou zefor osi pou pran swin nou bann frer ek ser, pou nou ed zot pou res dan laverite.”

16. Dan ki domenn nou kapav met an pratik bann leson ki nou’nn aprann dan bann let lapot Pier?

¹⁶ Dan sa lartik-la, nou’nn examinn zis de-trwa leson dan de let ki lapot Pier ti ekrir. Kitfwa to’nn remark enn kitsoz ki to bizin ameliore. Par exanp, kitfwa to ti pou kontan reflesi pli souvan lor bann benediksion ki nou pou gagne dan lemond nouvo. Kitfwa to ti pou kontan fixe lobzektif pou prese dan travay, dan lekol, ouswa dan lezot fason informel. Kitfwa to ti pou kontan rod bann lokazion pou to kapav montre plis lamour anver to bann frer ek ser. Ansien, kitfwa to plis determine pou pran swin troupo Bondie. Nou bizin onet ar nou-mem, ek nou bizin gete ki kitsoz nou kapav ameliore. Fode pa osi ki nou dekouraze. Pa bliye ki “Lesegner li bon,” ek Li pou ed nou pou ameliore. (1 Pier 2:3) Lapot Pier donn nou sa lasirans-la: “Bondie . . . limem li pou fini zot formasion. Li pou fer zot vinn ferm, li pou fer zot vinn for, li pou met zot lor enn fondasion ki solid.”—1 Pier 5:10.

17. Ki pou arive si nou kontign persevere ek nou les Zeova form nou?

¹⁷ O-koumansman, Pier pa ti santi li dign pou li ansam ar Zezi. (Lik 5:8) Me avek led Zeova ek Zezi, Pier ti persevere, ek li ti kontign swiv Zezi avek fidelite. Akoz sa, Zeova ti les Pier rant “dan Rwayom eternel nou Segner ek Sover Zezi Kris.” (2 Pier 1:11) Se enn rekonpans extraordiner, pa vre! Si to kontign persevere parey kouma Pier, ek to les Zeova form twa, twa osi to pou gagn lavi eternel. To pou gagn ‘rekonpans pou to lafwa, setadir to delivrans.’—1 Pier 1:9.