Eski To’nn Pare pou Donn To Lavi Zeova?

1-2. Ki kitsoz enn dimounn bizin fer avan ki li pran batem?

SA SINK dernie lane-la, plis ki enn milyon dimounn inn pran batem ek inn vinn bann Temwin Zeova. Boukou parmi zot inn konn laverite “depi ti-baba,” parey kouma Timote. (2 Tim. 3:14, 15) Ek lezot inn aprann konn Zeova kan zot ti bann adilt. Sertin parmi zot ti mem bien vie kan zot inn konn laverite. Par exanp, enn madam ki ti etidie Labib avek bann Temwin Zeova ti pran batem laz 97 an.

² Si to enn etidian Labib, ouswa si to’nn grandi dan laverite, eski to pe pans pou pran batem? Se enn zoli lobzektif! Selman, avan ki to pran batem, to bizin donn to lavi Zeova. Me ki savedir donn to lavi Zeova? Si to santi ki to pre pou fer sa, kifer fode pa to ezite? Dan sa lartik-la, nou pou reponn sa bann kestion-la.

KI SAVEDIR DONN TO LAVI ZEOVA?

 3. Donn lexanp bann dimounn ki zot lavi ti pou Zeova.

³ Dan Labib, kan enn kikenn so lavi pou Zeova, savedir ki’nn swazir li ouswa inn rezerv li pou enn servis ki spesial. Parmi tou bann nasion, Zeova ti rezerv nasion Izrael zis pou Li. Zeova ti mem swazir sertin Izraelit pou servi Li dan enn fason spesial. Par exanp, Aaron ti ena enn plak an-or lor so latet. Sa plak-la ti montre ki ti rezerv li pou enn servis spesial, setadir pou servi kouma gran pret pou nasion Izrael. (Lev. 8:9) Bann Nazireen osi ti dan enn servis spesial pou Zeova. Mo “Nazireen” sorti dan mo Ebre nazirʹ, ki vedir ‘enn kikenn ki’nn swazir,’ ouswa ‘enn kikenn ki fer promes pou fer enn kitsoz ki spesial.’ Dan Lalwa Moiz, ti ena bann lalwa ki zis bann Nazireen ti bizin obeir.—Nonb 6:2-8.

 4. (a) Kan to donn to lavi Zeova, ki kitsoz vinn pli inportan pou twa? (b) Ki savedir “aret viv” pou tomem? (Get zimaz osi.)

⁴ Kan to donn to lavi Zeova, to pran desizion pou vinn enn disip Zezi ek pou fer volonte Zeova vinn kitsoz pli inportan dan to lavi. Ki to bizin fer kan to donn to lavi Zeova? Zezi ti dir: “Si enn kikenn anvi swiv mwa, li bizin aret viv pou limem.” (Mat. 16:24) Kan enn kikenn donn so lavi Zeova, li bizin rezet bann kitsoz ki pa an-akor ar volonte Zeova. (2 Kor. 5:14, 15) Parmi sa bann kitsoz-la, ena “bann aksion lekor inparfe,” kouma limoralite sexiel. (Gal. 5:19-21; 1 Kor. 6:18) Kan nou obeir bann lalwa Zeova, eski sa rann nou lavi difisil? Non. Nou kontan Zeova, akoz sa nou sir ki so bann lalwa bon pou nou. (Ps. 119:97; Iza. 48:17, 18) Pou explik sa lide-la, enn frer ki apel Nicholas ti dir: “To kapav swa trouv bann lalwa Zeova kouma bann baro enn prizon, ki pe anpes twa fer seki to anvi, ouswa kouma bann baro ki pe protez twa kont bann lion ki pe anvi devor twa.”

 5. (a) Kouma eski enn kikenn donn so lavi Zeova? (b) Ki diferans ena ant moman ki nou donn nou lavi Zeova ek batem? (Get zimaz osi.)

⁵ Kouma eski enn kikenn donn so lavi Zeova? Pou to donn to lavi Zeova, to bizin fer enn lapriyer ek promet Li ki to pou ador zis Li tousel ek ki to pou fer so volonte pas an premie dan to lavi. Savedir ki to pe promet Zeova ki to pou kontign kontan Li “avek tou to leker, avek tou to lavi, avek tou to lespri ek avek tou to lafors.” (Mark 12:30) Kan to priye pou donn to lavi Zeova, se enn kitsoz ki prive; se ant twa ek Zeova. Parkont, kan to pran batem, se enn kitsoz ki piblik. Sa montre tou dimounn ki to’nn donn to lavi Zeova. Kan to promet Zeova ki to pou donn Li to lavi, se enn promes bien serye, ek Zeova atann ki to tini to promes.—Ekle. 5:4, 5.

KIFER TO BIZIN DONN TO LAVI ZEOVA?

 6. Ki kitsoz bizin motiv enn dimounn pou donn so lavi Zeova?

⁶ Rezon prinsipal kifer to bizin donn to lavi Zeova se parski to kontan Li. Sa lamour-la, se pa zis enn lemosion. Kifer? Parski gras-a bann kitsoz ki to’nn aprann lor Zeova, to’nn gagn enn “konesans exakt” ek “kapasite pou konpran bann kitsoz spiritiel.” Lerla, to lamour pou Li inn grandi. (Kol. 1:9) Gras-a to letid Labib, to’nn sir (1) ki Zeova Li vremem existe, (2) ki Labib se so Parol, ek (3) ki Li servi so lorganizasion pou fer so volonte.

 7. Ki kitsoz enn kikenn bizin fer avan ki li donn so lavi Zeova?

⁷ Avan ki enn kikenn donn so lavi Zeova, li bizin konn bann lansegnman inportan ki ena dan Labib, ek li bizin viv an-akor ar sa bann lansegnman-la. Li bizin osi fer so maximum pou partaz ar lezot seki li’nn aprann dan Labib. (Mat. 28:19, 20) So lamour pou Zeova telman for, ki li anvi servi zis Li tousel. Si to kontan Zeova ar tou to leker, to pou donn Li to lavi ek to pou pran batem, pa parski to anvi fer to ansegnan Labib, to bann kamarad, ouswa to bann paran plezir, me parski to anvi fer Zeova plezir.

 8. Pou to donn to lavi Zeova, kifer rekonesans bien inportan? (Psom 116:12-14)

⁸ Kan to reflesi lor tou seki Zeova inn fer pou twa, sa pou ogmant to rekonesans anver Li. Ek plis to rekonesan anver Zeova, plis to pou anvi donn Li to lavi.(Lir Psom 116:12-14.) Labib dir ki se Zeova ki donn “tou zoli don ek tou kado parfe.” (Zak 1:17) Pli zoli kado ki Li’nn donn nou se sakrifis so Garson, Zezi. Gras-a laranson, to kapav vinn pros ar Zeova ek to kapav viv pou touletan. (1 Zan 4:9, 10, 19) Laranson se pli gran prev lamour ki Zeova inn donn nou! Alor, kan to donn to lavi Zeova, to montre ki to vremem rekonesan anver Li pou sa zoli kado-la ek osi pou tou bann lezot kitsoz ki Li’nn donn twa. (Det. 16:17; 2 Kor. 5:15) Dan liv Viv Ere pou Touletan! leson 46, pwin 4, ena video Ofer Bondie Zot Bann Kado. Sa video-la pou montre twa kouma to kapav montre to rekonesans anver Zeova.

ESKI TO’NN PARE POU DONN TO LAVI ZEOVA EK POU PRAN BATEM?

 9. Kifer fode pa to konpar twa ar lezot?

⁹ Kitfwa to panse ki to pankor pre pou donn to lavi Zeova ek pou pran batem. Kitfwa to ankor ena bann sanzman pou fer dan to lavi, ouswa kitfwa to bizin plis letan pou ogmant to lafwa dan Zeova. (Kol. 2:6, 7) Tou bann etidian Labib pa progrese mem vites, ek tou bann zenn ki’nn grandi dan laverite pa pran batem mem laz. Alor, fode pa ki to konpar twa ar lezot. Okontrer, kontign fer to maximum pou fer bann sanzman ki bizin ek kontign progrese.—Gal. 6:4, 5.

10. Ki to kapav fer si to trouve ki to pankor pre pou pran batem? (Get osi lankadre “Pou Bann Ki’nn Grandi dan Laverite.”)

¹⁰ Si to trouve ki to pankor pre pou pran batem, kontign fer zefor pou realiz sa lobzektif-la. Priye Zeova pou Li beni to bann zefor, pou to kapav fer bann sanzman ki bizin. (Fil. 2:13; 3:16) To kapav sir ki Li pou tann to bann lapriyer ek ki Li pou reponn twa.—1 Zan 5:14.

KIFER SERTIN EZITE POU DONN ZOT LAVI ZEOVA EK POU PRAN BATEM?

11. Kouma Zeova ed nou pou res fidel anver Li?

¹¹ Mem si zot pre, sertin ezite pou donn zot lavi Zeova ek pou pran batem. Kifer? Parski zot per tansion zot fer enn pese grav ek ki zot exkli. Si to pans koumsa, pa bliye ki Zeova kapav donn twa tou seki to bizin pou ki to “mars dan enn fason ki dign devan [li], pou fer li plezir.” (Kol. 1:10) Li pou osi donn twa lafors pou fer seki drwat. Li’nn deza ed boukou dimounn pou fer seki drwat. (1 Kor. 10:13) Se akoz sa ki dan lasanble, bien tigit dimounn exkli. To kapav sir ki Zeova ed so bann serviter pou zot res fidel anver Li.

12. Ki nou bizin fer pou ki nou pa fer enn pese grav?

¹² Akoz nou inparfe, nou tou nou gagn tantasion pou fer seki pa bon. (Zak 1:14) Selman, kan to gagn enn tantasion, se twa ki deside kouma to pou reazir. Se twa ki ena kontrol lor to lavi. Sertin dimounn dir ki zot pa kapav kontrol zot santiman ek zot bann aksion. Me sa li fos! To kapav aprann kontrol to bann move dezir. Lerla, kan to gagn enn tantasion, to kapav desid pou pa fer seki move. Me pou to reisi fer sa, to bizin priye Zeova toulezour. To bizin fer to letid personel regilierman. To bizin osi asiste bann renion, ek to bizin sorti predikasion. Sa bann bon labitid spiritiel la pou donn twa lafors pou to kapav tini promes ki to’nn fer Zeova. Pa bliye osi ki Zeova pou ed twa pou to tini to promes!—Gal. 5:16.

13. Ki bon lexanp Zozef inn donn nou?

¹³ Li pou pli fasil pou to res fidel ar Zeova, si to deside alavans kouma to pou reazir si to gagn enn tantasion. Labib koz lor plizir dimounn ki ti fer sa, ek mem si zot ti inparfe, zot ti reisi res fidel ar Zeova. Par exanp, Potifar so madam plizir fwa ti esey tant Zozef. Me Zozef ti deza kone seki li ti bizin fer. Labib dir nou ki li “ti refize,” ek ki li ti dir: “Kouma mo kapav fer enn move kitsoz koumsa ek vremem fer pese kont Bondie?” (Zen. 39:8-10) Li kler ki Zozef ti fini reflesi alavans lor kouma li ti pou reazir si li ti gagn enn tantasion. Gras-a sa, sa ti pli fasil pou li rezet sa tantasion-la.

14. Kouma to kapav aprann pou rezet bann kitsoz ki Zeova deteste?

¹⁴ Kouma to kapav swiv lexanp Zozef? To kapav fer sa kan to reflesi alavans lor seki to pou fer si to gagn enn tantasion. Depi aster-la mem, to bizin aprann pou rezet bann kitsoz ki Zeova deteste, ek fode pa to mem pans sa bann kitsoz-la. (Ps. 97:10; 119:165) Si to fer sa, to pou res fidel ar Zeova kan to gagn enn tantasion, parski to pou fini kone seki to bizin fer.

15. Kouma enn kikenn montre ki li pe fer bann “gran zefor pou rod” Zeova? (Ebre 11:6)

¹⁵ To kone ki to dan laverite, ek sirman to anvi servi Zeova ar tou to leker. Selman, kitfwa to santi ki to pankor pre pou pran batem. Si to dan sa sitiasion-la, fer parey kouma Lerwa David. Li ti sipliy Zeova ek li ti dir: “A Bondie, examinn mwa bien ek konn mo leker. Examinn mwa ek konn bann panse ki pe fatig mwa. Gete si dan mwa pena okenn dezir pou swiv enn move semin, ek kondir mwa dan semin leternite.” (Ps. 139:23, 24) Zeova beni bann dimounn ki fer bann “gran zefor pou rod li.” Si to pe fer zefor pou donn Li to lavi ek pou pran batem, to kapav sir ki Li pe trouv to bann zefor!—Lir Ebre 11:6.

KONTIGN FER ZEFOR POU VINN PROS AR ZEOVA

16-17. Si to’nn grandi dan laverite, kouma Zeova trouv twa? (Zan 6:44)

¹⁶ Zezi ti dir ki se Zeova ki atir bann dimounn ver Li. (Lir Zan 6:44.) Reflesi lor seki sa vedir ek lor kouma sa konsern twa personelman! Zeova trouv seki bon dan sak dimounn ki Li atir ver Li. Pou Li, zot koumadir so “dibien spesial,” savedir ki zot ena valer pou Li. (Det. 7:6.) Se koumsa ki Zeova trouv twa!

¹⁷ Aster-la, si to’nn grandi dan laverite, kitfwa to panse ki to pe servi Zeova zis parski to paran dan laverite, ek ki Zeova pa’nn atir twa personelman ver Li. Selman, pa bliye ki Labib dir: “Vinn pros ar Bondie, ek li pou vinn pros ar zot.” (Zak 4:8; 1 Kro. 28:9) Alor, si to fer zefor pou vinn pros ar Zeova, Li osi Li pou vinn pros ar twa. Kan Zeova get twa, Li pa trouv to fami; se twa personelman ki Li trouve. Zeova atir sak dimounn ver Li, mem bann ki’nn grandi dan laverite. Kan enn kikenn fer zefor pou vinn pros ar Li, Zeova vinn pros ar sa dimounn-la, parey kouma Zak 4:8 dir.—Konpar ar 2 Tesalonisien 2:13.

18. Ki nou pou examine dan prosin lartik? (Psom 40:8)

¹⁸ Kan to donn to lavi Zeova ek to pran batem, to swiv lexanp Zezi. Zezi ti aksepte pou fer tou seki so Papa ti demann li. (Lir Psom 40:8; Ebre 10:7) Dan prosin lartik, nou pou trouv bann kitsoz ki kapav ed twa pou to kontign servi Zeova avek fidelite apre to batem.