Fer Zeova ek Zezi Konfians—Pa Krwar Satan

1. Ki taktik Satan servi pou esey fer nou aret servi Zeova?

DEPI zour ki nou’nn desid pou servi Zeova, Satan ek so bann demon inn vinn nou bann lennmi. Satan anvi fer nou aret servi Zeova. Selman, li kone ki li pa pou kapav fer sa tanki nou res pros ar Zeova ek ki nou gagn So soutien. Akoz sa, li esey fer tou seki li kapav pou ki nou aret kontan Zeova, ek si sa arive, Zeova pou aret soutenir nou. Enn taktik ki li servi pou fer sa, se ki li esey fer nou krwar ki Zeova ek Zezi pa vremem gagn nou traka.—2 Kor. 11:14; Zak 1:6.

2. Kifer li inportan ki nou fer Zeova ek Zezi konfians?

² Kan ena enn lager, bann solda bizin fer konfians sef zot larme. Selman, si zot perdi konfians dan zot sef, zot pou rod fer dapre zot latet, ek sa kapav bien danzere pou zot parski zot kapav perdi zot lavi. Nou osi azordi, nou koumadir bann solda parski nou pe bizin lit kont “bann move lespri.” (Efe. 6:12) Satan kone ki, si nou aret fer Zeova ek Zezi konfians, nou pou aret obeir zot. Akoz sa, li fer tou seki li kapav pou ki nou aret fer Zeova ek Zezi konfians. Dan sa lartik-la, nou pou gete kouma Satan ti servi sa taktik-la dan lepase, ek kouma li ankor pe servi sa azordi. Apre sa, nou pou gete seki nou bizin fer pou ki nou pa krwar Satan. Ek dan prosin lartik, nou pou examinn de taktik ki Satan servi pou esey fer nou aret servi Zeova.a

SATAN TI KOZ MANTI LOR ZEOVA EK ZEZI

3. Ki kitsoz Satan ti dir Ev pou ki li aret fer Zeova konfians?

³ Inpe apre ki Zeova ti kree Adan ek Ev, Satan ti anvi ki zot dezobeir Zeova. Li ti dir Ev: “Eski vremem Bondie inn dir zot ki fode pa zot manz frwi tou bann pie ki ena dan zardin?” (Zen. 3:1-5) Satan ti anvi fer Ev krwar ki Zeova pa ti pe donn li ek so misie tou seki zot ti bizin. Selman, Satan ti pe koz manti, ek Ev ti krwar li. Malerezman, Ev ek Adan toule-de ti fer seki Satan ti anvi. Mem si Zeova ti kree zot ek ti donn zot tou seki zot ti ena, zot ti dezobeir Li.—Zen. 3:6.

4. Dan lepok Zob, ki bann fos kitsoz Satan ti rod fer Zob krwar lor Zeova?

⁴ Depi lepok Adan ek Ev, Satan pa’nn aret koz manti lor Zeova. Par exanp, Satan ti servi trwa zom, ki ti swadizan bann kamarad Zob, pou dir Zob bann fos kitsoz lor Zeova. Satan ti anvi fer Zob krwar ki Zeova pa kontan li ek ki so fidelite pena valer pou Li. (Zob 22:1-3) Satan ti osi fer Zob bien soufer. Li ti panse ki Zob ti pou dir ki Zeova responsab so bann soufrans ek ki li ti pou aret servi Li. Selman, mem si Zob ti soufer boukou akoz Satan, li ti res fidel ar So kamarad, Zeova.—Zob 27:1, 5.

5. Kouma Satan ti anpes bann dimounn swiv Zezi? (Matie 11:19)

⁵ Bann santenn lane apre, kan Zezi ti vinn lor later, Satan ti esey anpes bann dimounn swiv Zezi. Enn fason ki li ti fer sa, se kan li ti servi bann sef relizie ek bann lezot dimounn ki ti ena laenn pou Zezi, pou koz manti lor li. Boukou dimounn ti krwar sa bann foste-la. Zot ti dir ki Zezi ti enn kriminel, ek zot ti touy li.—Lir Matie 11:19; 27:27-31; Mark 14:55, 56; Zan 8:41-45.

6-7. Kouma eski Satan ti esey anpes bann disip Zezi pou pres bon nouvel?

⁶ Apre lamor Zezi, Satan ti esey dekouraz bann disip ek li ti anpes zot pres bon nouvel lor Zezi. Satan pa ti anvi ki bann dimounn krwar ki Bondie ti resisit Zezi. Alor, li ti servi sertin dimounn pou koz manti ek pou fer krwar ki bann disip Zezi ti kokin so lekor. (Mat. 28:11-15) Apre sa, Satan ti fer bann sef relizie ek politik persekit bann disip Zezi. Satan ti anvi ki bann disip telman per, ki zot aret fer travay ki Zezi ti donn zot lord pou fer.—Zist. 7:57–8:1; 12:1-3; 28:22.

⁷ Sertin Kretien ti telman per ki zot ti aret prese. Selman, laplipar ti res fidel ek zot ti kontign pres bon nouvel lor Zezi. Zot ti konpran ki zot bann vre lennmi, se Satan ek so bann demon. (Zist. 4:18-20; 1 Pier 5:8) Azordi osi, Satan esey anpes nou servi Zeova. Anou gete kouma li fer sa.

SATAN PE KONTIGN KOZ MANTI LOR ZEOVA EK ZEZI

8. Kouma Satan servi fos relizion pou fann bann foste lor Zeova ek Zezi?

⁸ Azordi, taktik prinsipal ki Satan servi se li kasiet laverite lor Zeova ek Zezi. Satan, li “papa bann manter” ek li servi fos relizion pou fann bann foste lor Zeova ek Zezi. (Zan 8:44) Li’nn “avegle” bann dimounn pou ki zot pa kone kisann-la Zeova ek Zezi ete vremem. (2 Kor. 4:3, 4) Par exanp, sertin sef relizie ansegne ki Zezi ek so Papa zot egal. Akoz sa, bann dimounn pa kone ki Bondie apel Zeova. Alor, zot priye Zezi olie ki zot priye Zeova. Selman, Zeova ek Zezi toule-de pa aksepte sa kalite ladorasion-la. (Mat. 4:10; Zan 4:23) Malerezman, boukou dimounn krwar sa lansegnman-la. Akoz sa, zot pa ekout nou kan nou esey montre zot laverite, ek parfwa, zot mem opoz ar nou kan nou pres ar zot.

9. Kouma Satan inn servi fos relizion pou anpes bann dimounn konn Zeova? (Zeremi 23:26, 27)

⁹ Si nou anvi vinn kamarad avek enn kikenn, li inportan ki nou konn so nom. Labib dir ki si nou konn nom Zeova ek ki nou fer Li konfians, Li pou protez nou. (Prov. 18:10) Selman, Satan pa anvi ki bann dimounn konn Zeova ek ki zot vinn so kamarad. Sa fer plizir lane ki Satan pe servi fos relizion pou anpes bann dimounn konn nom Zeova. (Lir Zeremi 23:26, 27.) Par exanp, li’nn fer an-sort ki tir nom Bondie dan boukou tradiksion Labib. Satan inn osi servi fos relizion pou fer bann dimounn krwar ki se akoz Bondie ki nou soufer. Akoz sa, boukou dimounn per Bondie, ek zot panse ki zot pa kapav vinn so kamarad. (Zak 4:8) Satan fer boukou zefor osi pou fer bann serviter Zeova aret servi Li.

10. Ki kitsoz kapav fer enn Kretien ankoler ar Zeova?

¹⁰ Kan nou gagn bann problem, Satan anvi fer nou krwar ki Zeova pa gagn nou traka. Ek si sa fer inpe letan ki nou pe soufer, Satan anvi ki nou ankoler ar Zeova parski Li pa pe rezoud nou bann problem. (Prov. 19:3) Si nou ankoler ar Zeova, kitfwa nou kapav pans koumsa: ‘Eski li vo lapenn ki mo kontign obeir bann lalwa ek bann prinsip Zeova?’ Selman, si nou pans koumsa, nou pou fer seki Satan anvi ek pa seki Zeova anvi.

11. Kouma Satan fer nou ena bann dout lor bann prinsip Zeova? (Get zimaz osi.)

¹¹ Satan servi bann kitsoz, kouma par exanp bann rezo sosio, pou fer nou ena bann dout lor bann prinsip Zeova. Lor bann rezo sosio, boukou dimounn exprim zot lopinion ek zot dir ki bann prinsip Labib konsernan moralite zot demode, ki bann dimounn pa bizin Bondie, ek ki zot kapav swiv zot prop prinsip. Satan, li “sef sa lemond-la,” ek li’nn reisi anbet bann dimounn ek fer zot krwar “ki seki bon li move ek seki move li bon.”—Zan 14:30; Iza. 5:20; 1 Tim. 4:1, 2.

12. Kifer fode pa nou ekout bann foste ki Satan fane?

¹² Si nou ekout bann foste ki Satan fane, sa kapav fer nou al lwin ar Zeova. Enn zenn ser, ki apel Shannonb dir: “Pandan inpe letan, mo pa ti rann mwa kont ki seki mo ti pe aprann dan lekol ek bann dimounn ki mo ti pe frekante, ti pe sanz mo fason panse. Mo ti koumans kontan bann kitsoz ki Zeova deteste. Plis mo ti pas letan lor bann rezo sosio, plis mo ti anvi fer parey kouma sa bann dimounn-la. Tigit-tigit, mo ti koumans al lwin ar Zeova, ar mo fami, ek ar mo bann frer ek ser dan lasanble.” Erezman, plitar Shannon ti fer bann sanzman, ek li ti revinn pros ar so Papa Zeova. Gras-a sa, li ti nepli les Satan inflians so fason panse. Ki kitsoz ti ed li?

13. Ki kitsoz to’nn aprann ar lexanp Shannon?

¹³ Shannon ti konpran ki li ti bizin fer bann sanzman pou ki li kontign res kamarad ar Zeova ek Zezi. Li dir: “Mo ti priye Zeova pou ki Li ed mwa gagn bann bon kamarad, ek mo ti osi fer bann resers dan nou bann piblikasion. Mo ti osi get video Les jeunes s’interrogent . . . Comment se faire de vrais amis ?, ek sa ti ed mwa boukou.c Dan sa video-la, sa zenn ser-la ti fer fas ar bann mem problem ki mo ti gagne. Selman, li ti ena limilite ek li ti al rod led so bann paran. Alor, mo ti desid pou swiv so lexanp. Mo bann paran, bann ansien, ek bann ser ki ena lexperyans ti ed mwa pou deteste bann kitsoz ki Zeova deteste ek pou swazir bann kamarad ki kontan Li. Mo ti konpran ki li pa ase ki mo zis al renion ek obeir mo bann paran pou ki mo vremem fer Zeova plezir. Mo ti bizin vremem krwar seki Zeova dir dan Labib, ek mo ti bizin fer zefor pou ena enn bon lamitie avek Li.”

TO BIZIN SIR KI ZEOVA EK ZEZI ZOT TO BANN KAMARAD

14. Kouma nou kapav anpes Satan afebli nou lafwa? (Get zimaz osi.)

¹⁴ Pou ki nou kontign res kamarad avek Zeova, nou bizin swazir bann kamarad ki kontan Li. (Zak 4:4) Fode pa nou krwar tou seki nou lir ek tou seki nou tande. Par exanp, nou kapav lir ouswa tann enn linformasion ki an parti vre, ouswa ki fos net. Si nou kontign lir ouswa ekout sa bann kitsoz-la, nou kapav panse ki sa bann linformasion-la zot vre, alor ki an realite zot fos. Parkont, si nou etidie Labib, nou etidie bann piblikasion, nou asiste bann renion, ek nou pas letan ar bann kamarad ki kontan Zeova, nou pa pou les Satan anbet nou par bann fos linformasion ek afebli nou lafwa.—Prov. 13:20; Zist. 17:11.

15. Kifer nou kapav sir ki Zeova ek Zezi zot kontan nou ek zot anvi ki nou ere?

¹⁵ Kan nou etidie Labib ek nou aprann konn Zeova ek Zezi bien, nou pena okenn dout ki zot vremem anvi ki nou ere. (Prov. 22:19) Labib koz lor bann zom ek bann fam ki ti fer Zeova ek Zezi konfians. Kan nou lir ek reflesi lor kouma Zeova ek Zezi inn pran zot swin, nou lafwa vinn pli for. Dan Labib, ena osi boukou lexanp ki montre ki kantite Zeova ek Zezi kontan nou. Par exanp, Zeova dir ki lamour ki Li ena pou so bann serviter pli for ki lamour ki enn mama ena pou so zanfan. (Iza. 49:15) Li ti dir osi ki bann dimounn ki kontan so nom, zot ena telman valer pou Li ki zot koumadir enn “dibien spesial.” (Mal. 3:16, 17) Nou trouve osi ki kantite Zezi kontan nou kan nou lir dan Labib kouma li’nn aksepte pou donn so lavi pou nou.—Zan 15:12, 13.

16. Kifer li bon ki nou reflesi lor kouma Zeova inn ed nou ek lezot dan lepase? (Psom 118:5, 6)

¹⁶ Si nou reflesi lor kouma Zeova ek Zezi inn ed nou dan nou lavi, nou pa pou ena okenn dout ki Zeova kontan nou. Kitfwa nou kapav reflesi lor kouma Zeova inn reponn nou lapriyer, ouswa lor kouma Li ti ed nou kan nou ti bizin so led. Kan nou rapel kouma Zeova inn pran nou swin dan sa bann moman-la, sa pou rasir nou ki Zeova pou kontign pran nou swin. Nou kapav osi demann nou bann frer ek ser kouma Zeova inn ed zot. (Prov. 22:17) Kan nou fer sa, nou kapav sir ki Zeova ek Zezi pou touletan donn nou led ki nou bizin.—Lir Psom 118:5, 6.

17. Ki promes Zezi inn fer tou bann dimounn ki kontign kontan li ek so Papa? (Zan 10:29)

¹⁷ Nou tou nou bizin kontign fer zefor pou res kamarad ar Zeova ek Zezi. Selman, tanki Zeova pa detrir Satan ek so bann demon, zot pou kontign fer tou seki zot kapav pou afebli nou lafwa. (Rev. 20:1-3, 10) Pou nou reziste kont zot, nou bizin ena enn bon lamitie avek Zeova, ek nou bizin sir ki Zeova ek Zezi kontan nou ek ki nou ena boukou valer pou zot. Lerla, parey kouma Zezi ti dir, personn pa pou kapav “ras [nou] dan lame [so] Papa.”—Lir Zan 10:29; Zak 4:7.

18. Ki nou pou examine dan prosin lartik?

¹⁸ Dan prosin lartik, nou pou examinn de lezot taktik ki Satan servi pou kas nou lamitie avek Zeova. (1) Li esey kas lamitie ki nou ena ar nou bann frer ek ser, ek (2) li esey inflians bann dimounn pou persekit nou. Nou pou gete osi kouma nou kapav res fidel ar Zeova, mem si Satan fer sa bann kitsoz-la.