Kisannla Larkanz Misel?

Misel, ki sertin relizion apel osi “Sin Misel,” se nom ki finn donn Zezi avan ek apre so lavi lor later.a Misel ti gagn enn diskision avek Satan apre lamor Moiz. Li ti osi ed enn anz pou transmet mesaz ki Bondie ti ena pou profet Daniel. (Daniel 10:13, 21; Zid 9) Misel so nom vedir, “Kisannla Ki Parey Kouma Bondie?” Li viv an-akor avek so nom parski li defann drwa ki Bondie ena pou dirize ek li lager kont bann lennmi Bondie.​—Daniel 12:1; Revelasion 12:7, NTKM.

Anou gete kifer nou kapav vremem krwar ki Zezi limem larkanz Misel.

• Misel limem “larkanz.” (Zid 9, NTKM) Tit “larkanz,” vedir “sef bann anz,” ek li aparet zis dan de verse ki ena dan Labib. Dan toulede ka, inn servi enn mo singilie, setadir ki fer referans ar enn sel kitsoz, alor savedir ki ena zis enn sel anz ki ena sa tit-la. Enn parmi sa bann verse-la koz lor Zezi ki’nn resisite ek dir: “Kan zot pou tann lavwa arkanz, tronpet pou sone, Lesegner limem pou desann.” (1 Tesalonisien 4:16) Zezi ena enn “lavwa arkanz,” savedir ki se limem ki larkanz, Misel.

• Misel, li sef enn larme anz. “Misel ek so bann anz ti konbat kont dragon,” setadir Satan. (Revelasion 12:7, NTKM) Misel ena enn gran lotorite dan lesiel, parski Labib dir ki li “enn parmi bann pli gran prins” ek “gran prins.” (Daniel 10:13, 21; 12:1) Dapre David E. Aune, enn spesialis lor Nouvo Testaman, sa bann tit-la montre ki Misel, limem “sef bann anz.”

  Labib koz zis lor enn lot nom ki ena ankor enn gran lotorite lor enn larme anz. Li dir ki “kan Lesegner Zezi retourne depi dan lesiel avek so bann anz bien pwisan, zot pou vini avek enn laflam dife” pou tir vanzans. (2 Tesalonisien 1:7, 8, NTKM; Matie 16:27, NTKM) Li dir osi ki Zezi “finn al dan lesiel . . .la kot li pe regne lor bann anz ek lezot pwisans ek lotorite lesiel.” (1 Pier 3:21, 22, NTKM) Li pa ti pou lozik ki Bondie etabli Zezi ek Misel kouma bann sef rival lor bann anz. Okontrer, li pli lozik pou krwar ki sa de nom-la, Zezi ek Misel, fer referans ar mem dimounn.

• Misel “pou leve” pandan enn “lepok detres kouma zame finn ena” avan. (Daniel 12:1) Dan liv Daniel, souvan servi lexpresion “leve” pou fer referans ar enn lerwa ki leve pou azir dan enn fason spesial. (Daniel 11:2-4, 21) Zezi Kris, ki Labib apel “Parol Bondie,” pou azir dan enn fason spesial antan ki “Lerwa bann lerwa” pou detrir tou bann lennmi Bondie ek protez pep Bondie. (Revelasion 19:11-16, NTKM) Li pou fer sa pandan lepok kot “pou ena pli boukou soufrans ki lemonn finn deza kone depi so lexistans.”​—Matie 24:21, 42, NTKM.