Eski To’nn Pare pou Pran Batem?

 1. Ki enn dimounn bizin fer avan ki li aranz enn lakaz?

ESEY mazinn enn dimounn ki’nn desid pou aranz enn lakaz. Li kone ki kalite lakaz li anvi aranze. Eski deswit li pou al aste bann materyo ek koumans aranz lakaz-la? Non. Avan ki li koumanse, li bizin fer enn kitsoz bien inportan. Li bizin kalkile komie sa pou kout li. Kifer? Pou kone si li pou ena ase kas pou fini aranz so lakaz. Si alavans li fini kalkile komie sa pou kout li, li ena plis sans pou terminn konstriksion so lakaz.

 2. Dapre Lik 14:27-30, lor ki kitsoz to bizin bien reflesi avan ki to pran batem?

² Eski to pe pans pou pran batem parski to kontan Zeova ek to rekonesan anver Li? Si wi, to desizion li parey kouma sa misie ki anvi aranz enn lakaz la. Kifer nou dir sa? Reflesi lor bann parol ki Zezi ti dir dan Lik 14:27-30, NW.b (Lir.) Zezi ti pe explike ki savedir vinn so disip. Si nou anvi swiv Zezi, nou bizin aksepte seki “sa pou koute,” setadir aksepte bann difikilte ek bann sakrifis ki sa desizion-la pou amene. (Lik 9:23-26, NW; 12:51-53) Alor, avan ki to pran batem, to bizin reflesi bien lor tou seki sa desizion-la inplike. Lerla, to pou bien prepare pou kontign servi Zeova avek fidelite apre to batem.

 3. Ki nou pou examine dan sa lartik-la?

³ Eski li vo lapenn vinn enn disip Zezi malgre bann difikilte ek bann sakrifis ki to bizin fer? Biensir! Enn kikenn ki pran batem pou gagn boukou benediksion asterla ek dan lavenir. Anou examinn sertin kestion inportan lor batem. Lerla, to pou kone si to’nn pare pou pran batem.

 4. (a) Ki savedir vwe nou lavi ar Zeova? (b) Dapre Matie 16:24, ki savedir “renie” noumem?

⁴ Ki savedir vwe to lavi ar Zeova? Avan ki to pran batem, to bizin vwe to lavi ar Zeova. Kan to vwe to lavi ar Zeova, to priye Li ar tou to leker ek to dir Li ki to pou servi Li toutlong to lavi. Kan to vwe to lavi ar Bondie, to “renie” tomem. (Lir Matie 16:24, NW.c) Savedir ki to donn Zeova tou drwa lor twa ek to vinn pou Zeova. Sa li enn gran privilez! (Rom. 14:8) Apartir sa moman-la, to dir Zeova ki to priorite dan lavi se servi Li olie ki to fer tomem plezir. Kan to vwe to lavi ar Bondie, se enn promes bien serye ki to fer ar Bondie. Zeova pa fors nou pou fer sa promes-la. Me kan nou fer sa promes-la, Li atann ki nou tini li.​—Ps. 116:12, 14.

 5. Ki lien ena ant vwe to lavi ar Zeova ek pran batem?

⁵ Ki lien ena ant vwe to lavi ar Zeova ek pran batem? Kan to vwe to lavi ar Zeova, se enn kitsoz prive ki zis ant twa ek Zeova. Parkont, batem se enn kitsoz ki piblik. Kan enn kikenn pran batem, li fer sa devan lezot dimounn, bien souvan dan enn lasanble sirkonskripsion ouswa rezional. Kan to pran batem, to montre lezot ki to’nn fini vwe to lavi ar Zeova.d Sa zour-la, to montre lezot ki to kontan Zeova avek tou to leker, tou to nam, tou to lespri ek tou to lafors, ek ki to bien deside pou servi Li toutlong to lavi.​—Mark 12:30.

6-7. Dapre 1 Pier 3:18-22, sit de rezon kifer batem inportan.

⁶ Eski li vremem inportan ki to pran batem? Reflesi lor bann parol ki ena dan 1 Pier 3:18-22. (Lir.) Lars ki Noe ti aranze ti montre bann dimounn ki li ti ena lafwa dan Bondie. Dan mem fason, to batem montre bann dimounn ki to finn vwe to lavi ar Zeova. Me eski batem li vremem inportan? Wi. Lapot Pier ti explike kifer. Premierman, batem “sov” twa. Batem kapav sov nou si nou montre par nou bann aksion ki nou ena lafwa dan Zezi, nou krwar ki li’nn mor pou nou, ki li’nn resisite dan lesiel, ek ki asterla li “dan kote drwat Bondie.”

⁷ Deziemman, batem fer nou gagn “enn konsians prop.” Kan nou vwe nou lavi ar Bondie ek nou pran batem, nou koumans ena enn relasion spesial avek Li. Parski nou finn vremem repanti ek nou ena lafwa dan laranson, Bondie pardonn nou bann pese. Alor, sa permet nou pou ena enn bon konsians devan Li.

 8. Ki kitsoz bizin motiv twa pou pran batem?

⁸ Ki kitsoz bizin motiv twa pou pran batem? Kan to’nn etidie Labib, to’nn aprann boukou kitsoz lor Zeova, lor so personalite, ek lor so fason panse ek azir. Seki to’nn aprann lor Li finn tous to leker ek sa finn motiv twa pou kontan Li. Rezon prinsipal ki bizin motiv twa pou pran batem se to lamour pou Zeova.

 9. Dan Matie 28:19, 20, ki savedir batize ‘lor nom Papa, lor nom Garson e lor nom Lespri Sin’?

⁹ Enn lot rezon ki bizin motiv twa pou pran batem se bann verite Biblik ki to’nn aprann ek ki to’nn aksepte asterla. Reflesi lor seki Zezi ti dir kan li ti donn lord pou fer bann disip. (Lir Matie 28:19, 20.) Dapre Zezi, bann dimounn ki pran batem zot bizin fer sa ‘lor nom Papa, lor nom Garson e lor nom Lespri Sin.’ Ki sa vedir? Avek tou to leker, to bizin krwar bann verite Biblik konsernan Zeova, so garson Zezi, ek lespri sin. Sa bann verite-la bien pwisan ek zot kapav al dan fon to leker. (Ebre 4:12) Anou reget sertin parmi zot.

10-11. Ki bann verite konsernan nou Papa to finn aprann ek aksepte?

¹⁰ Mazinn seki to ti resanti kan to ti aprann sa bann verite-la lor nou Papa: Li “apel Zeova,” Li “Treo lor later antie,” ek Li tousel “vre Bondie.” (Ps. 83:18, NW; Iza. 37:16) Li nou Kreater, ek Li “amenn delivrans.” (Ps. 3:8; 36:9) Li’nn pran bann dispozision pou sap nou dan pese ek lamor, ek Li’nn donn nou lesperans pou viv pou touletan. (Zan 17:3) Kan to vwe to lavi ar Zeova ek to pran batem, to montre ki to enn Temwin Zeova. (Iza. 43:10-12) Lerla, to form parti enn fami internasional bann serviter Zeova ki fier pou port so nom ek pou fer lezot konn sa nom-la.​—Ps. 86:12.

¹¹ Se vremem enn gran privilez pou konpran seki Labib ansegn nou lor nou Papa! Kan to aksepte sa bann verite ki ena boukou valer la, to leker pou pous twa pou vwe to lavi ar Zeova ek pou pran batem.

12-13. Ki bann verite konsernan Garson Bondie to finn aprann ek aksepte?

¹² Mazine kouma to ti reazir kan to ti aprann sa bann verite-la lor Garson Bondie: Zezi limem deziem personaz pli inportan dan liniver. Li’nn aksepte donn so lavi an ranson pou nou. Kan nou montre par nou bann aksion ki nou ena lafwa dan laranson, nou kapav gagn pardon nou bann pese, vinn kamarad Bondie, ek gagn lavi eternel. (Zan 3:16) Zezi li nou Gran Pret. Li anvi ed nou pou gagn bann bienfe gras-a laranson ek pou vinn pros ar Bondie. (Ebre 4:15; 7:24, 25) Zezi li Lerwa dan Rwayom Bondie ek Zeova pou servi li pou sanktifie So nom, pou tir tou bann move kitsoz, ek pou fer bann dimounn gagn bann benediksion dan Paradi. (Mat. 6:9, 10; Rev. 11:15) Nou bizin swiv lexanp Zezi. (1 Pier 2:21) Li’nn donn nou enn bon lexanp kan li’nn fer volonte Bondie pas an premie dan so lavi.​—Zan 4:34.

¹³ Zeova bien kontan so Garson, ek kan to aksepte seki Labib ansegne lor Zezi, sa pous twa pou kontan Zezi twa osi. Sa lamour-la pou motiv twa pou fer volonte Bondie pas an premie dan to lavi, parey kouma Zezi. Lerla, to pou anvi vwe to lavi ar Zeova ek pran batem.

14-15. Ki bann verite konsernan lespri sin to finn aprann ek aksepte?

¹⁴ Mazinn seki to ti resanti kan to ti aprann sa bann verite-la lor lespri sin: Li pa enn bondie me li lafors aktif Bondie. Zeova ti servi so lespri sin pou gid bann zom ki’nn ekrir Labib. Lespri sin ed nou pou konpran ek pou met an pratik seki nou lir dan Labib. (Zan 14:26; 2 Pier 1:21) Gras-a so lespri sin, Zeova kapav donn nou enn “pwisans extraordiner.” (2 Kor. 4:7) Lespri sin donn nou lafors pou pres bonn nouvel, pou lit kont bann tantasion, pou sirmont dekourazman, ek pou andir bann leprev. Li ed nou pou manifeste bann zoli kalite ki form parti ‘fri Lespri.’ (Gal. 5:22) San ezite, Bondie kontan pou donn so lespri sin bann dimounn ki demann Li ek ki fer Li konfians.​—Lik 11:13.

¹⁵ Kan nou kone ki nou kapav kont lor lespri sin pou ed nou servi Zeova, sa vremem rekonfort nou, pa vre! Kan to aksepte bann verite ki to’nn aprann lor lespri sin, sa pou pous twa pou vwe to lavi ar Bondie ek pou pran batem.

16. Ki nou finn examine ziska ler?

¹⁶ Kan to desid pou vwe to lavi ar Zeova ek pran batem, se enn desizion bien inportan ki to pe pran. Kouma nou finn trouve, to bizin aksepte seki “sa pou koute,” setadir aksepte bann difikilte ek bann sakrifis ki sa desizion-la pou amene. Me bann benediksion ki to pou gagne zot boukou plis ki bann sakrifis ki to pou bizin fer. Batem kapav sov twa ek fer twa gagn enn bon konsians devan Bondie. Rezon prinsipal ki bizin motiv twa pou pran batem se to lamour pou Zeova. To bizin osi aksepte avek tou to leker bann verite ki to finn aprann lor Zeova, Zezi, ek lespri sin. Alor, apre tou seki nou finn examine ziska ler, ki to panse: “Eski to’nn pare pou pran batem?”

17. Ki bann kitsoz enn kikenn bizin fer avan ki li pran batem?

¹⁷ Si to panse ki to’nn pare pou pran batem, pena dout ki to’nn fer plizir kitsoz pou ena enn bon relasion avek Zeova.e Gras-a to letid Labib, to’nn aprann boukou kitsoz lor Zeova ek Zezi. Asterla, to ena lafwa an Zeova. (Ebre 11:6) To ena foul konfians dan bann promes ki trouv dan Labib, ek to sir ki to lafwa dan sakrifis Zezi kapav sov twa ar pese ek lamor. To’nn repanti pou to bann pese, savedir ki to vremem regret bann move kitsoz ki to ti fer, ek to’nn demann Zeova pardon. To’nn “retourne,” setadir to’nn sanz to lavi ek to’nn koumans viv dan enn fason ki fer Zeova plezir. (Zist. 3:19, NW) To kontan partaz to lafwa ar lezot. To’nn ranpli bann kondision pou vinn enn proklamater ki pa batize ek to’nn koumans prese ansam avek bann frer ek ser to lasanble. (Mat. 24:14) Zeova bien fier parski to’nn fer sa bann kitsoz inportan la. To’nn fer so leker kontan.​—Prov. 27:11.

18. Ki kitsoz ankor to bizin fer avan ki to kapav pran batem?

¹⁸ Avan ki to kapav pran batem, ena de-trwa kitsoz ankor ki to bizin fer. Kouma nou’nn trouve, to bizin vwe to lavi ar Zeova. Avek tou to leker, priye Zeova an prive ek promet Li ki to pou fer so volonte toutlong to lavi. (1 Pier 4:2) Me apre sa, to bizin fer kordinater komite bann ansien kone ki to anvi pran batem. Li pou demann sertin ansien pou pran randevou avek twa. Fode pa to per pou koz avek zot. Pa bliye ki sa bann frer-la konn twa ek kontan twa. Zot pou examinn avek twa bann lansegnman prinsipal ki to finn aprann dan Labib. Zot anvi fer sir ki to’nn konpran sa bann lansegnman-la ek ki to konpran seki sa inplike pou vwe to lavi ar Zeova ek pran batem. Si zot trouve ki to’nn pare, zot pou fer twa kone ki to kapav pran batem prosin lasanble ki pou ena.

19-20. Ki to pou bizin fer apre to batem, ek kouma to kapav fer sa?

¹⁹ Apre ki to’nn pran batem, ki to pou bizin fer?f Pa bliye ki to’nn fer enn promes ar Zeova kan to’nn vwe to lavi ar Li ek ki Zeova atann ki to tini sa promes-la. Alor, apre to batem to bizin viv an-akor avek sa promes-la. Kouma to kapav fer sa?

²⁰ Res pros ar bann frer ek ser to lasanble. Asterla ki to’nn pran batem, to form parti enn fami “bann frer e ser dan lafwa.” (1 Pier 2:17) To bann frer ek ser zot kouma to fami. Kan to asiste bann renion regilierman, sa pou fer to lamitie avek zot vinn pli for. Lir ek medit lor Parol Bondie toulezour. (Ps. 1:1, 2) Apre ki to lir Labib, pran letan pou reflesi lor seki to’nn lir. Lerla, sa pou desann dan fon to leker. Ek kontign “priye.” (Mat. 26:41) To bann lapriyer sinser pou fer twa vinn pli pros ar Zeova. “Avan tou kitsoz, kontign rod Rwayom Bondie.” (Mat. 6:33, NW) To fer sa kan to fer predikasion vinn enn kitsoz inportan dan to lavi. Kan to prese regilierman, to lafwa pou vinn for, ek to pou ed lezot pou gagn lavi eternel.​—1 Tim. 4:16.

21. Ki bienfe to pou gagne kan to pran batem?

²¹ Dan to lavi, desizion pli inportan ki to kapav pran se vwe to lavi ar Zeova ek pran batem. Li vre ki sa desizion-la pou ‘kout’ twa kitsoz. Me eski li vo lapenn? Biensir! Ninport ki difikilte to pou fer fas dan sa vie lemond-la, li “tanporer.” (2 Kor. 4:17) Parkont, kan to pran batem, to pou ena enn lavi ere depi asterla mem ek dan lavenir to pou gagn “vre lavi.” (1 Tim. 6:19) Alor, priye Zeova ek reflesi bien lor sa kestion-la: “Eski mo’nn pare pou pran batem?”