Laverite Pa Amenn “Lape, me Lepe”

1, 2. (a) Ki lape nou kapav ena azordi? (b) Kifer nou pa kapav ena enn lape konple asterla? (Get zimaz dan koumansman lartik.)

NOU tou nou anvi viv anpe san okenn traka. Akoz sa nou ena rekonesans ki Zeova donn nou “lape Bondie.” Sa lape-la ed nou pou gard nou kalm ek li kapav protez nou kont bann panse ek bann santiman ki fatig nou. (Filipien 4:6, 7, NW.) Parski nou’nn vwe nou lavi ar Zeova, nou ena osi “lape avek Bondie.” Savedir ki nou ena enn bon relasion avek Li.​—Romin 5:1.

² Selman, pankor ariv ler pou ki Bondie amenn enn lape konple lor later. Nou pe viv dan bann dernie zour. Alor, ena boukou problem ki fer nou trakase. Nou antoure ar bann move dimounn. (2 Timote 3:1-4) Nou bizin osi lager kont Satan ek bann fos lansegnman ki li fane partou. (2 Korintien 10:4, 5) Me seki kapav fer nou plis trakase, se kan nou gagn lopozision ar bann manb nou fami ki pa servi Zeova. Sertin kitfwa boufonn nou bann krwayans ouswa dir ki nou pe kree divizion dan lafami. Kitfwa zot dir osi ki nou nepli kapav form parti dan lafami tanki nou pa aret servi Zeova. Kouma nou bizin konsider bann lopozision ki nou gagne avek nou fami? Ek kouma nou kapav sirmont bann difikilte ki nou gagne akoz sa bann lopozision-la?

3, 4. (a) Ki lefe lansegnman Zezi ena? (b) Kan eski li pli difisil pou swiv Zezi?

³ Zezi ti kone ki pa tou dimounn ki pou aksepte so lansegnman. Li ti kone osi ki so bann disip ti pou bizin ena kouraz parski zot ti pou gagn lopozision avek sertin. Sa lopozision-la ti kapav afekte lape dan zot fami. Zezi ti dir: “Pa panse ki mo finn vini pou amenn lape lor later; mo pa finn vini pou amenn lape, me lepe. Mo finn vinn separ enn garson avek so papa, tifi ek so mama, belfi ek belmer. To lennmi pou dan to prop fami.”​—Matie 10:34-36.

⁴ Kan Zezi ti dir: “Pa panse ki mo finn vini pou amenn lape”, ki li ti pe rod dir? Li ti anvi ki bann dimounn kone ki pou ena bann konsekans si zot vinn so bann disip. Li vre ki Zezi ti vini pou ansegn bann dimounn laverite lor Bondie, pa pou diviz bann fami. (Zan 18:37) Me selman, so bann disip ti bizin kone ki li pa pou touletan fasil pou swiv li, sirtou si zot bann kamarad ek zot bann fami pros pa aksepte laverite.

 5. Ki difikilte bann disip Zezi ti gagne?

⁵ Zezi ti dir ki enn bann difikilte ki so bann disip pou bizin aksepte siporte, se lopozision avek zot fami. (Matie 10:38, NW.) Pou fer Zezi plezir, bann disip ti kontign andire kan zot fami ti boufonn zot ouswa ti rezet zot. Me zot ti gagn plis ki seki zot ti perdi.​—Lir Mark 10:29, 30.

 6. Si nou gagn lopozision ar nou fami, ki nou bizin rapel?

⁶ Mem si nou pe gagn lopozision avek bann manb nou fami parski nou pe servi Zeova, nou bizin kontign kontan zot. Me selman, nou bizin rapel ki nou lamour pou Bondie ek Zezi bizin pli for ki nou lamour pou ninport kisannla. (Matie 10:37, NW.) Fode pa nou bliye osi ki Satan kapav servi lamour ki nou ena pou nou fami pou fer nou vinn infidel anver Zeova. Anou get sertin difikilte ki nou kapav gagne ek anou gete kouma nou kapav sirmont sa bann difikilte-la.

 7. Kouma to bizin konsider to sitiasion si to konzwin pa Temwin Zeova?

⁷ Labib averti nou ki bann dimounn ki marye “pou fer fas enn kantite difikilte,” ouswa problem. (1 Korintien 7:28) Si to konzwin pa Temwin Zeova, kitfwa sa kapav ogmant stres ek traka dan zot maryaz. Selman, li inportan ki to trouv to sitiasion parey kouma Zeova. Zeova dir ki nou pa kapav kit nou konzwin ouswa divors ar li zis parski li pa pe servi Zeova. (1 Korintien 7:12-16) Si to mari pa pe servi Zeova ek pa pe okip bann kitsoz ki konsern vre ladorasion, kanmem sa to bizin respekte li parski li sef lafami. Si to madam pa pe servi Zeova, kanmem sa to bizin kontan li ek pran li swin.​—Efezien 5:22, 23, 28, 29, NW.

 8. Si to konzwin esey met bann restriksion dan to servis pou Zeova, ki bann kestion to kapav demann tomem?

⁸ Ki to pou fer si to konzwin esey met bann restriksion dan to servis pou Zeova? Par exanp, enn ser so mari ti dir li ki li kapav sorti predikasion zis sertin zour dan lasemenn. Si to dan sa sitiasion-la, demann tomem: ‘Eski mo konzwin pe demann mwa pou aret servi Zeova net? Si non, eski mo kapav fer seki mo konzwin pe demann mwa?’ Si to rezonab, to pou gagn mwins problem dan to maryaz.​—Filipien 4:5, NW.

 9. Kouma to kapav form to bann zanfan pou respekte zot paran ki pa Temwin Zeova?

⁹ Parfwa li pa fasil pou form to bann zanfan kan to konzwin pa Temwin Zeova. Par exanp, to bizin ansegn to bann zanfan pou obeir komannman Biblik ki dir: “Ena respe pou to papa ek to mama.” (Efezien 6:1-3) Me ki to pou fer si to konzwin pa swiv bann prinsip Labib? To kapav donn to bann zanfan enn bon lexanp kan tomem to respekte to konzwin. Panse ki bann bon kalite to konzwin ena, ek dir li ki to apresie tou bann bon kitsoz ki li fer. Pa dir bann kitsoz negatif lor to konzwin devan to bann zanfan. Okontrer, explik zot ki sak dimounn bizin deside par limem si li pou servi Zeova ouswa non. Si to form to bann zanfan pou respekte zot paran ki pa Temwin Zeova, zot bon kondwit kapav pous to konzwin pou anvi konn Zeova.

10. Kouma bann paran Kretien kapav ansegn zot bann zanfan pou kontan Zeova?

¹⁰ Sertin konzwin ki pa Temwin kitfwa pou anvi ki zot zanfan fer bann fet ki pa Kretien ouswa aprann bann lansegnman fos relizion. Sertin mari ki pa Temwin kitfwa osi anpes zot madam pou ansegn zot zanfan lor Labib. Mem dan sa bann sitiasion-la, enn fam pou fer seki li kapav pou ansegn so zanfan lor laverite. (Zistwar Bann Apot 16:1; 2 Timote 3:14, 15, NW.) Par exanp, enn mari ki pa Temwin kitfwa pa pou anvi ki so madam fer enn letid Labib avek zot bann zanfan ouswa amenn zot renion. Ser-la pou respekte desizion so misie, me kanmem sa li kapav koz lor so krwayans avek so bann zanfan tanki posib. Koumsa, bann zanfan-la kapav aprann konn Zeova ek so bann prinsip konsernan seki bon ek seki pa bon. (Zistwar Bann Apot 4:19, 20) Alafin, bann zanfan-la pou deside si zot pou servi Zeova ouswa non.a (Get not.)​—Deteronom 30:19, 20.

11. Ki kitsoz kapav kree bann problem ant twa ek to fami?

¹¹ Kan nou fek koumans etidie Labib avek bann Temwin Zeova, kitfwa nou pa dir sa nou fami. Me amezir nou lafwa vinn pli for, nou konpran ki nou bizin dir zot ki nou anvi servi Zeova. (Mark 8:38) Parski to fidel anver Bondie, kitfwa sa kapav kree bann problem ant twa ek to fami. Anou get sertin kitsoz ki to kapav fer pou gard lape ek anmemtan res fidel anver Zeova.

12. Pou ki rezon kitfwa nou bann fami opoze ar nou, me kouma nou kapav montre ki nou konpran zot santiman?

¹² Esey konpran santiman to bann fami ki pa Temwin. Nou bien kontan ki nou’nn konn laverite ki ena dan Labib. Selman, nou fami kapav panse ki lezot finn anbet nou ouswa ki nou’nn rant dan enn relizion bizar. Kitfwa zot panse osi ki nou nepli kontan zot parski nou nepli fer bann fet avek zot. Kitfwa zot mem per tansion enn move kitsoz ariv nou apre nou lamor. Nou bizin esey konpran zot santiman ek ekout bien seki zot dir nou pou kone kifer zot pe gagn nou traka. (Proverb 20:5) Lapot Pol ti esey konpran “tou sort kalite dimounn” pou ki li kapav ansegn zot bonn nouvel. Si nou esey konpran bann manb nou fami, sa kapav ed nou pou kone kouma pou ansegn zot laverite.​—1 Korintien 9:19-23, NW.

13. Kouma nou bizin koz avek nou bann fami ki pa Temwin Zeova?

¹³ Koz avek douser. Labib dir: “Ki zot parol touzour bienveyan.” (Kolosien 4:6) Kitfwa li pa fasil pou fer sa. Nou kapav demann Zeova so lespri sin pou ed nou koz avek douser ek bonte avek nou bann fami. Fode pa nou diskit avek zot lor zot bann fos krwayans. Si zot dir ouswa fer kitsoz ki bles nou, nou kapav imit lexanp bann zapot. Pol ti dir: “Kan dimoun insilte nou, nou pronons benediksion; kan dimoun persekit nou, nou siport sa. Kan rakont foste lor nou, nou pa reponn brit.”​—1 Korintien 4:12, 13.

14. Ki lefe nou bon kondwit kapav ena?

¹⁴ Gard enn bon kondwit. Kifer sa li inportan? Kan nou koz avek douser, sa kapav ed nou pou viv anpe avek nou fami. Me kan nou ena enn bon kondwit, sa kapav ena enn pli gran lefe. (Lir 1 Pier 3:1, 2, 16, NW.) Atraver to lexanp, to kapav ed to fami pou trouve ki bann Temwin Zeova ena enn lavi maryaz ere, zot pran swin zot bann zanfan, zot swiv bann prinsip Labib, ek zot lavi ena enn sans. Mem si nou fami zame pa aksepte laverite, kan nou kone ki nou kondwit fer Zeova plezir, sa fer nou kontan.

15. Kan nou prepar nou alavans, kouma sa kapav ed nou pou evit bann dezakor avek nou fami?

¹⁵ Prepar twa alavans. Reflesi lor bann sitiasion ki kapav kree bann dezakor ant twa ek to fami. Apre sa, deside ki to pou fer. (Proverb 12:16, 23) Enn ser dan l’Australie ti fer sa. So boper ti bien opoze ar laverite. Alor, avan ki zot ti telefonn li, ser-la ek so mari ti demann Zeova pou ed zot pou ki zot pa reponn li dan enn fason brit. Zot ti reflesi lor bann size interesan ki zot kapav koze. Ek pou evit bann long konversasion ki ti kapav fer zot gagn diskision lor larelizion, zot ti fixe kantite letan ki zot ti koz avek li.

16. Ki to kapav fer si to santi twa koupab ek to panse ki to pa pe fer to fami plezir?

¹⁶ Li vre ki to pa pou kapav evit tou diskision avek to bann fami ki pa Temwin. Kan ena bann dezakor, kitfwa to santi twa koupab parski to kontan to fami ek to anvi fer zot plezir. Me pa bliye ki to lamour pou Zeova bizin pli for ki to lamour pou to fami. Kan to fami pou trouv sa, kitfwa zot pou konpran ki servi Zeova se enn kitsoz bien inportan. To pa kapav fors personn pou aksepte laverite. Selman, to kapav fer lezot trouve kouma sa ed twa kan to swiv bann konsey Zeova. Zeova donn zot mem posibilite ki Li donn nou, setadir, swazir pou servi Li.​—Izai 48:17, 18.

17, 18. Ki kapav ed twa si enn manb to fami kit Zeova?

¹⁷ Kan enn manb to fami exkli ouswa retir li dan kongregasion, kitfwa sa li bien difisil pou twa. Sa telman difisil ki koumadir kikenn pe donn twa kout lepe. Kouma to kapav sirmont sa soufrans-la?

¹⁸ Res konsantre lor to servis pou Zeova. Dan sa bann sitiasion-la, to bizin fortifie to prop lafwa. Lir Labib regilierman, prepar ek al to bann renion, kontign prese, ek priye Zeova pou gagn lafors pou andire. (Zid 20, 21, NW.) Me ki to pou fer, si malgre ki to pe fer tousala, douler-la ankor lamem? Pa bes lebra! Res konsantre lor to servis pou Zeova. Avek letan, sa pou ed twa kontrol to bann panse ek to bann santiman. Se samem ki ti ariv ekrivin Psom 73. Enn moman dan so lavi, li pa ti pe arive kontrol so bann panse ek so bann santiman. Me li’nn kontign ador Zeova, ek sa finn ed li pou koriz so fason panse. (Psom 73:16, 17) Twa osi to kapav fer parey.

19. Kouma to kapav respekte fason ki Zeova disiplinn so pep?

¹⁹ Respekte disiplinn Zeova. Bondie kone ki so disiplinn kapav fer sa dimounn ki’nn exkli la ek lezot osi dibien. Li vre ki sa li bien dir kan enn dimounn ki nou kontan gagn disiplinn, me sa kapav ed li pou retourn ver Zeova dan lavenir. (Lir Ebre 12:11.) Antretan, nou bizin swiv konsey Zeova pou “aret frekant enn kikenn” ki’nn exkli. (1 Korintien 5:11-13, NW.) Sa li pa fasil. Me nou bizin evit gagn kontak avek zot lor telefonn, par mesaz, let, e-mail, ouswa lor bann rezo sosial.

20. Ki nou bizin kontign espere?

²⁰ Pa perdi lespwar! Lamour “esper tou,” alor nou bizin kontign espere ki bann dimounn ki nou kontan retourn ver Zeova. (1 Korintien 13:7, NW.) Si to trouve ki enn fami pros pe fer bann sanzman, to kapav priye pou li pou ki li gagn lafors atraver Labib ek aksepte linvitasion Zeova: “Retourn ver mwa.”​—Izai 44:22.

21. Ki to bizin fer si to pe gagn lopozision avek to fami parski to pe swiv Zezi?

²¹ Zezi ti dir ki nou bizin kontan li plis ki nou kontan ninport ki dimounn. Li ti sir ki so bann disip ti pou gagn kouraz pou res fidel anver li malgre lopozision ki zot ti pou gagne avek zot fami. Alor, si to fami pa kontan parski to pe swiv Zezi, fer Zeova konfians. Demann Li pou ed twa pou andire. (Izai 41:10, 13) Kan to kone ki to pe fer Zeova ek Zezi plezir ek ki zot pou rekonpans twa pou to fidelite, sa pou ed twa gard to lazwa.