Kifer Nou Vinn Vie ek Mor?

Bondie ti dir Adan ki ‘zour li manz frwi sa pie-la, vremem li pou mor.’ (Zenez 2:17) Sa komannman-la pa ti pou ena okenn sans, si Adan ti bizin vinn vie ek mor. Adan ti kone ki si li pa ti manz frwi sa pie-la li pa ti pou mor.

Pou ki Adan ek Ev kontign viv zot pa ti bizin manz frwi sa pie-la, parski zardin-la ti ranpli ar lezot pie ki ti donn bann frwi. (Zenez 2:9) Ki sa ti pou montre si premie koup pa ti manz frwi sa pie-la? Sa ti pou montre zot lobeisans anver sa Kikenn ki ti donn zot lavi la. Ek ki zot rekonet ki Bondie ena drwa pou dir zot seki zot bizin fer.

Pou konpran kifer Adan ek Ev ti mor, nou bizin reget enn konversasion ki’nn afekte nou tou. Satan Lediab ti servi enn serpan pou dir enn mansonz ki ti pou fer boukou ditor. Labib dir: “Serpan ti zanimo pli pridan parmi tou bann zanimo sovaz ki Bondie Zeova ti kree. Li ti dir fam-la: ‘Eski vremem Bondie finn dir ki fode pa zot manz frwi tou bann pie ki ena dan zardin?’”​—Zenez 3:1.

Ev ti reponn: “Nou kapav manz frwi bann pie ki ena dan zardin. Me konsernan frwi sa pie ki omilie zardin la, Bondie finn dir: ‘Fode pa zot manz so frwi, non fode pa zot tous li; sinon zot pou mor.’” Me serpan-la dir li: “Non, vremem zot pa pou mor. Parski Bondie kone ki zour zot manz sa frwi-la, zot lizie pou ouver, ek zot pou vinn kouma Bondie, zot pou konn seki bon ek seki pa bon.” Alor, Satan ti dir ki Zeova enn manter ek ki Li ti pe priv Adan ek Ev ar enn kitsoz ki bon.​—Zenez 3:2-5.

Ev ti krwar seki li ti tande. Li ti get pie-la, ek frwi-la ti paret bien zoli, enn kitsoz ki fer anvi! Lerla, li ti pran frwi-la, ek li ti manze. Labib dir: “Apre li’nn donn sa so mari kan li ti avek li, ek li osi li’nn manze.”​—Zenez 3:6.

Sa ti vremem fer leker Bondie fermal kan Li’nn trouv so bann zanfan ki Li bien kontan dezobeir Li volonterman! Ki Li ti fer? Zeova ti dir Adan: “To pou . . . retourn dan later, parski se ladan ki to finn sorti. To finn fer avek lapousier ek to pou retourn lapousier.” (Zenez 3:17-19) Akoz sa, “Adan ti viv 930 an, ek apre li’nn mor.” (Zenez 5:5) Adan pa ti kontign viv dan enn lot plas, kouma par exanp dan lesiel. Avan ki Zeova ti kree li avek lapousier li pa ti existe. Alor kan li ti mor, li pa ti ena lavi parey kouma lapousier pena lavi. Li ti aret existe. Sa vremem tris, pa vre?

Adan ek Ev ti nepli parfe ek ti perdi posibilite pou viv pou touletan parski zot ti dezobeir Bondie volonterman. Zot ti sanze lor plan fizik, setadir zot ti nepli parfe ek zot ti vinn bann dimounn ki fer pese. Kan zot ti fer sa, zot ti fer enn pese kont Bondie ek sa pa ti afekte zis zot tousel. Akoz zot, tou zot bann desandan pa ti pou parfe ek ti pou fer pese. Romin 5:12 dir: “Par enn zom [Adan] pese finn vinn dan lemonn, e lamor finn rantre par pese, e lamor finn tous tou dimoun, parski tou finn fer pese.”

Labib dekrir pese ek lamor kouma enn “latwal ki pe anvlop tou bann pep ek vwal ki’nn tise lor tou bann nasion.” (Izai 25:7) Sa latwal-la anvlop limanite kouma enn brouyar toxik kot personn pa gagn sape. Vremem, “tou bann dimoun mor parski zot lie ar Adam.” (1 Korintien 15:22) Me sa soulev enn kestion. Enn kestion ki lapot Pol ti demande: “Ki sannla pou sap mwa dan sa lekor ki pe antrenn mwa ver lamor la?” Eski ena enn kikenn ki kapav?​—Romin 7:24.