Marche avek Bondié dan sa lepok difficile-la

“Hénok ti contigne marche avek vrai Bondié. Apré, li’nn arrete existé, parski Bondié ti prend li.”—GENÈSE 5:24.

 1. Ki bann kitsoz dan nou lepok rann la vie difficile?

ENN lepok difficile! Sa bann parole-la decrire bien period troublé ek violent ki le monde finn koné depuis ki Royaume Bondié finn prend pouvoir en 1914. Depuis sa l’année-la, bann dimoune pé vive dan “dernier jour.” Bann malheur couma la famine, maladie, tremblement de terre, ek la guerre finn affecté la vie bann dimoune dan enn fason ki jamais pa finn ena avant. (2 Timothée 3:1; Révélation 6:1-8) Bann serviteur Jéhovah aussi finn affecté par sa bann malheur-la. Dan enn fason ou dan enn lot, nou tou nou bizin faire face ar bann problem ek bann tracas ki ena dan nou lepok. Bann problem financier, politik, crime ek maladie, faire partie parmi bann kitsoz ki rann la vie bien difficile.

 2. Ar ki difficulté bann serviteur Jéhovah bizin faire face?

² En plus, beaucoup serviteur Jéhovah finn konn bann grand persecution enn derriere lot, parski Satan pé contigne faire la guerre kont bann dimoune “ki suive bann commandement Bondié ek ki ena sa travail-la: rann temoignage lor Jésus.” (Révélation 12:17) Mem si nou tou, nou pa finn konn bann persecution direct, tou bann vrai chrétien bizin lutte kont Satan le Diable ek l’esprit ki li pé encouragé parmi bann dimoune. (Éphésiens 2:2; 6:12) Pou nou pa influencé par sa l’esprit-la, nou bizin reste toujours lor nou garde, parski li existé dan travail, dan lekol, ek partout kot nou bizin gagne contact avek bann dimoune ki pa interessé avek l’adoration Jéhovah.

Marche avek Bondié, pa avek bann nation

3, 4. Dan ki fason eski bann chrétien different avek le monde?

³ Deja, dan premier siecle, bann chrétien ti bizin lutté pou resisté kont l’esprit sa lé-monde-la, ek sa ti faire zot bien different avek bann dimoune ki ti en dehors congregation. Paul ti montré sa difference-la, kan li ecrire: “Ala seki mo pé dire, ek mo pé rann temoignage dan [le] Seigneur, c’est ki zot nepli pé marche pareil couma bann nation, ki pé marche avek enn l’esprit ki pa pé amenn zot okenn part; alors ki zot dan noirté spirituel, ek ki zot bien loin ar la vie ki Bondié offert, parski zot pa oulé koné, parski zot leker dur. Parski zot inn perdi tou zot sens moral, zot inn laisse-zot tombe dan enn conduite devergondé pou pratik tout sorte qualité impureté, sans ki zot control zot-mem.”—Éphésiens 4:17-19.

⁴ Sa bann parole-la decrire bien ki quantité le monde dan lepok Paul ek dan nou lepok aussi finn enfoncé dan noirté spirituel ek moral! Pareil couma dan premier siecle, bann chrétien zordi pa “marche pareil couma bann nation.” Au contraire, zot profite privilege extraordinaire ki zot ena pou marche avek Bondié. Certain dimoune kapav demandé si li raisonnable pou dire ki bann dimoune ordinaire, ki imparfait kapav marche avek Jéhovah. Pourtant, la Bible dire ki zot kapav faire sa. En plus, Jéhovah attann ki zot faire sa. Dan huitieme siecle avant nou lepok, prophete Mika ti inspiré par Bondié pou ecrire sa bann parole-la: “Ki Jéhovah pé demann toi, sinon pou pratik la justice, pou content la bonté, ek pou marche dan enn fason modeste avek to Bondié?”—Mika 6:8.

Couma ek kifer nou bizin marche avek Bondié?

 5. Couma enn dimoune imparfait kapav marche avek Bondié?

⁵ Couma nou kapav marche avek enn Bondié ki invisible ek Tout-Puissant? Bien-sur, pa dan mem fason ki nou marche avek bann dimoune. Dan la Bible, mot “marché” kapav vedir ‘suive enn certaine conduite.’a Alors sa faire nou comprend ki enn kikenn ki marche avek Bondié, li amenn enn conduite ki approuvé par Bondié ek ki faire Li plaisir. Sa qualité conduite-la rann nou different avek la plupart dimoune ki tout autour nou. Pourtant, pou enn chrétien, zis sa choix-la ki bon. Kifer? Pou plusieurs raison.

6, 7. Kifer pena enn pli bon fason vive ki marche avek Bondié?

⁶ Enn premier raison c’est parski Jéhovah Li nou Createur, Li’nn donne nou la vie ek Li donne nou tou seki nou bizin pou vive. (Révélation 4:11) Sa vedir ki Li tousel gagne droit dire nou couma nou bizin marché. En plus, pena nanyin ki kapav faire nou gagne plus bienfait ki marche avek Bondié. Jéhovah finn prend bann disposition pou pardonne peché bann dimoune ki marche avek Li, ek Li donne zot enn l’esperance sur—l’esperance pou vive pou touletan. Nou Papa ki dan le ciel, ena enn grand l’amour pou bann dimoune ki marche avek Li. Li donne zot bann bon conseil ki aide zot pou reussi zot la-vie asterla-mem, malgré ki zot imparfait ek ki zot pé vive dan enn lé-monde ki dirigé par Satan. (Jean 3:16; 2 Timothée 3:15, 16; 1 Jean 1:8; 2:25; 5:19) Enn lot raison kifer nou bizin marche avek Bondié, c’est parski kan nou faire sa, nou favorise la paix ek l’unité dan la congregation.—Colossiens 3:15, 16.

⁷ Enn dernier raison, ki pli important ki tou, c’est ki, kan nou marche avek Bondié, nou pé montré nou position en rapport avek question ki ti soulevé dan jardin Éden—eski Bondié ena droit pou dirigé? (Genèse 3:1-6) Nou montré par nou conduite ki nou dan coté Jéhovah, ek nou pa peur pou faire koné ki Li tousel gagne droit dirige l’humanité. (Psaume 83:18) Lerla, nou agir en accord avek la priere ki nou faire kan nou demandé ki nom Bondié sanctifié, ek ki so volonté faire lor la terre. (Matthieu 6:9, 10) Oui, bann ki finn choisir pou marche avek Bondié, zot vrai-mem ena la sagesse! Zot kapav sur ki zot pé al dan enn bon direction, parski zis Jéhovah “tousel ki sage.” Jamais Li pa faire erreur.—Romains 16:27.

 8. Couma lepok Hénok ek Noé ti ressemblé nou lepok?

⁸ Mais, couma eski li possible pou vive couma bann chrétien bizin vive, alors ki nou dan enn lepok difficile ek la plupart dimoune pena okenn desir pou servi Jéhovah? Nou gagne la reponse kan nou examine la vie bann fidel serviteur Jéhovah ki ti vive dan le passé ek ki ti garde zot fidelité dan bann moment difficile. Parmi zot, ti ena Hénok ek Noé. Toulé-deux ti vive dan bann lepok ki ressemblé nou lepok. Ti ena la mechanceté partout. Dan lepok Noé, la terre ti rempli ar violence ek l’immoralité. Pourtant, Hénok ek Noé ti resisté kont l’esprit le monde sa lepok-la ek zot ti marche avek Jéhovah. Couma zot ti faire? Pou reponn sa question-la, dan sa lartik-la, nou pou examine l’exemple Hénok, ek dan prochain lartik, l’exemple Noé.

Hénok ti marche avek Bondié dan enn lepok difficile

 9. Ki bann renseignement nou ena lor Hénok?

⁹ Premier dimoune ki la Bible dire finn marche avek Bondié, c’est Hénok. La Bible dire: “Apré ki li’nn vinn papa Methoushélah, Hénok ti contigne marche avek vrai Bondié.” (Genèse 5:22) Lerla, la Bible faire nou koné comié lé-temps Hénok ti vive—kan nou compare so l’age avek l’age ki bann dimoune dan nou lepok vive, li ti vive bien longtemps, mais comparé avek bann dimoune dan so lepok, so la-vie ti bien courte. Apré la Bible dire: “Hénok ti contigne marche avek vrai Bondié. Apré, li’nn arrete existé, parski Bondié ti prend li.” (Genèse 5:24) Nou comprend par la ki Bondié ti “transfere” Hénok, setadir Li ti tire li dan le monde bann vivant, pou faire li al dormi dan la mort, avant ki so bann l’ennemi ti kapav faire li di-tort. (Hébreux 11:5, 13) Apart sa bann verset-la, la Bible pa koz beaucoup lor Hénok. Seulement, avek bann renseignement ki nou ena dan sa bann verset-la, ek dan lezot aussi, nou koné ki Hénok ti pé vive dan enn lepok difficile.

10, 11. (a) Couma la corruption finn fané apré rebellion Adam? (b) Ki prophetie Hénok ti annoncé, ek ki reaction surement bann dimoune ti ena?

¹⁰ Anou guette par exemple avek ki vitesse corruption finn fané partout apré peché Adam. La Bible dire nou ki Caïn, premier garson Adam, ti vinn premier criminel kan li ti touye so frere, Abel. (Genèse 4:8-10) Apré ki Abel ti mort dan enn fason violent, Adam ek Ève ti gagne enn lot garson ki ti appel Seth. La Bible dire nou lor Seth: “Seth aussi ti gagne enn garson; li ti appel li Énosh. Dan sa lepok-la, dimoune ti commence servi nom Jéhovah.” (Genèse 4:25, 26) Malheureusement, zot pa ti pé servi nom Jéhovah dan enn bon fason. Li possible ki zot ti pé donne nom Jéhovah bann lezot dimoune, ou-soit bann zidole, ki zot ti pé adoré, au lieu ki zot ti adore vrai Bondié.b Plusieurs l’année apré naissance Énosh, enn descendant Caïn, ki ti appel Lamek, ti compose enn chanté pou so deux madame, ek ladan li ti dire ki li finn touye enn jeune homme ki ti blesse li. Li ti aussi donne sa l’avertissement-la: “Si bizin tire vengeance pou Caïn sept fois, alors pou Lamek, soixante-dix fois ek sept.”—Genèse 4:10, 19, 23, 24.

¹¹ Sa bann ti renseignement-la montré couma corruption ki Satan ti’nn commencé dan jardin Éden, finn fane bien vite parmi bann descendant Adam. Dan enn lé-monde coumsa, Hénok ti enn prophete Jéhovah ki ti dire bann parole bien puissant, ek so bann parole encore ena enn signification pou nou lepok zordi. Jude dire seki Hénok ti prophetisé: “Guetté! Jéhovah inn vini avek plusieurs million ange ki saint, pou applik so jugement lor zot tou, ek pou condamne tou bann mauvais dimoune concernant tou bann mauvais kitsoz ki zot inn faire dan enn fason ki montré zot desobeissance envers Bondié, ek concernant tou bann kitsoz choquant ki bann dimoune rebelle finn dire kont Li.” (Jude 14, 15) Sa bann parole-la pou ena enn realisation final a Har–Maguédôn. (Révélation 16:14, 16) Kan-mem, nou kapav sur ki dan lepok Hénok, ti ena beaucoup “dimoune rebelle” ki ti agacé kan zot ti tann sa bann parole-la. Jéhovah finn vrai-mem manifesté so l’amour, kan Li finn tire Hénok parmi zot, avant ki zot faire li di-tort.

Couma Hénok ti gagne la force pou marche avek Bondié?

12. Kifer Hénok ti different avek bann dimoune dan so lepok?

¹² Dan jardin Éden, Adam ek Ève ti ecoute Satan, ek Adam ti rebellé kont Jéhovah. (Genèse 3:1-6) Abel, zot garson, ti suive enn lot chemin, ek Jéhovah ti ‘accepté’ li. (Genèse 4:3, 4) Malheureusement, la plupart descendant Adam pa ti couma Abel. Mais Hénok, ki ti né plusieurs centaine l’année plitar, ti couma Abel. Ki difference ti ena entre Hénok, ek bann lezot descendant Adam? L’apotre Paul ti reponn sa question-la, li ti dire: “Par la foi, Hénok ti transferé pou ki li pa trouve la mort, ek personne pa ti trouve li okenn place, parski Bondié ti’nn transfere li; ek avant so transfert, li ti gagne temoignage ki li ti faire Bondié plaisir.” (Hébreux 11:5) Hénok ti forme partie parmi enn grand “nuage temoin” ki ti vive avant lepok bann chrétien, ek ki ti donne enn bon l’exemple concernant la foi. (Hébreux 12:1) C’est la foi ki ti permette Hénok pou garde enn bon conduite pendant plus ki 300 an—enn la-vie plus ki trois fois pli longue ki la vie la plupart parmi nou zordi!

13. Ki qualité la foi, Hénok ti ena?

¹³ Paul ti decrire la foi ki Hénok ek lezot temoin ti ena, kan li ti ecrire: “La foi, c’est kan nou sur ki seki nou pé attann pou arrivé, li enn preuve sur ki bann kitsoz ki pourtant nou pa trouvé, zot enn realité.” (Hébreux 11:1) Oui, la foi c’est l’esperance certain, basé lor bann promesse sur, ki bann kitsoz ki nou pé attann pou realisé. Nou tellement sur seki nou pé attann, ki sa influence bann priorité ki nou ena dan nou la-vie. Sa qualité la-foi-la ti faire Hénok marche avek Bondié mem si bann dimoune tout autour li pa ti faire sa.

14. Lor ki connaissance exact, li possible ki la foi Hénok ti basé?

¹⁴ Vrai la-foi basé lor enn connaissance exact. Ki connaissance eski Hénok ti ena? (Romains 10:14, 17; 1 Timothée 2:4) Sans doute li ti koné seki ti passé en Éden. Kitfois li ti’nn aussi tann dire couma la vie ti été dan jardin Éden—li possible ki sa jardin-la ti encore existé, mem si bann dimoune pa ti gagne droit rente ladan. (Genèse 3:23, 24) Ek li ti koné ki Bondié ti ena projet ki bann descendant Adam ti pou rempli la terre, ek faire sa vinn pareil couma sa Paradi ki Bondié ti faire au commencement-la. (Genèse 1:28) En plus, Hénok ti surement accorde enn grand valeur ar promesse ki Jéhovah ti faire pou produire enn semence ki pou crase la tête Satan, ek ki pou tire bann malheur ki finn arrivé parski Satan finn koz menti. (Genèse 3:15) Avredir, prophetie ki Hénok ti gagné par inspiration, ek ki trouve dan livre Jude, annonce destruction semence Satan. Parski Hénok ti ena la foi, li ti koné ki Jéhovah, so Bondié, Li enn Kikenn “ki recompense bann ki rod Li vrai-mem.” (Hébreux 11:6) Nou comprend ki, mem si Hénok pa ti ena tou sa connaissance ki nou ena zordi-la, seki li ti koné ti assez pou faire li ena enn la-foi solid. Sa la-foi-la ti aide li pou garde so fidelité dan enn lepok difficile.

Imite l’exemple Hénok

15, 16. Couma nou kapav suive l’exemple Hénok?

¹⁵ Pareil couma Hénok, nou aussi nou envie faire Jéhovah plaisir dan nou lepok difficile, alors, anou suive l’exemple Hénok. Pou sa, nou bizin gagne enn connaissance exact lor Jéhovah ek lor so bann projet, ek nou bizin garde sa connaissance-la. Mais nou bizin faire plus ki sa. Nou bizin laisse sa connaissance-la dirige nou la-vie. (Psaume 119:101; 2 Pierre 1:19) Nou bizin laisse bann pensée Bondié guide nou, ek nou bizin faire tou pou faire Li plaisir dan tou seki nou faire ek tou seki nou pensée.

¹⁶ Nou pa koné kisannla encore ti pé servi Jéhovah dan lepok Hénok. Soit li ti tousel, ou-soit li ti parmi enn minorité dimoune ki ti ena mem la foi ki li. Nou aussi, nou bien tigit pou servi Jéhovah dan le monde, mais sa pa decourage nou. N’importe kisannla ki kapav opposé ar nou, Jéhovah pou soutenir nou. (Romains 8:31) Avek courage, Hénok ti annonce destruction bann mauvais dimoune. Nou aussi, avek courage nou preche ‘la bonne nouvelle lor Royaume Bondié’ mem si dimoune bouffonne nou, opposé ar nou, ek persecute nou. (Matthieu 24:14) Hénok pa ti vive aussi longtemps ki la plupart bann dimoune dan so lepok. Mais li pa ti mette so l’espoir dan sa lé-monde-la. Li ti garde so lizié fixé lor enn kitsoz beaucoup pli grand. (Hébreux 11:10, 35) Nou aussi, nou garde nou lizié fixé lor realisation bann projet Jéhovah. C’est pou sa ki nou pa rod profite tou seki ena dan sa lé-monde-la. (1 Corinthiens 7:31) Au contraire, nou servi nou la-force ek bann kitsoz materiel ki nou ena surtout dan service Jéhovah.

17. Ki connaissance nou ena ki Hénok pa ti ena, ek ki sa bizin pousse nou pou faire?

¹⁷ Hénok ti ena la foi ki la semence ki Jéhovah ti promette pou arrivé dan lepok ki Jéhovah ti pou decidé. Zordi, sa faire preské 2,000 an depuis ki sa semence-la, setadir Jésus Christ, inn apparette ek inn donne so la-vie couma enn ranson. Li’nn donne nou, ek aussi bann fidel temoin dan le passé couma Hénok, possibilité pou gagne la vie eternel. Zordi sa semence-la inn vinn le Roi dan Royaume Bondié. Li finn tire Satan depuis le ciel ek finn jette li lor la terre; c’est a cause sa ki nou trouve sa quantité malheur-la tout autour nou. (Révélation 12:12) Oui, zordi nou ena beaucoup plus connaissance ki Hénok. Alors, anou ena enn la-foi solid pareil couma Hénok. Anou laisse nou confiance dan realisation bann promesse Jéhovah influence tou seki nou faire. Alors, couma Hénok, anou marche avek Bondié, mem si nou pé vive dan enn lepok difficile!

[Note]

Couma ou pou reponn?

• Ki sa vedir marche avek Bondié?

• Kifer pena enn pli bon fason vive ki marche avek Bondié?

• Couma Hénok ti reussi marche avek Bondié mem si li ti vive dan enn lepok bien difficile?

• Couma eski nou kapav imite Hénok?

[Zimage, page 25]

Par la foi, “Hénok ti contigne marche avek vrai Bondié”

[Zimage, page 26]

Nou sur ki bann promesse Jéhovah pou realisé

[Remerciement photo page 23]

Femme, a droite completement: photo FAO/B. Imevbore; enn batiment ki pé crasé: San Hong R-C Picture Company