Zeova Promet Nou ki Li Pou Fer Later Vinn enn Paradi

 1. Ki kitsoz profet Izai ti pe rod fer bann Izraelit konpran?

PROFET Izai dir ki Zeova Li “Bondie laverite.” Mo ki’nn servi pou tradir “laverite” vedir osi “amen.” (Iza. 65:16) Mo “amen” vedir “ki sa realize,” ouswa “wi, mo dakor.” Dan Labib, kan mo “amen” ena enn lien ar Zeova ek Zezi, se enn garanti ki enn kitsoz li vre. Alor, Izai ti pe rod fer bann Izraelit konpran ki, kan Zeova predir enn kitsoz, sa touletan realize. An realite, Zeova inn touletan tini so bann promes.

 2. Kifer nou sir ki Zeova pou tini so bann promes konsernan lavenir, ek ki kestion nou pou reponn dan sa lartik-la?

² Eski nou osi nou kapav sir ki Zeova pou tini so bann promes konsernan lavenir? Apepre 800 an apre lepok Izai, lapot Pol ti explike kifer nou kapav sir ki bann promes Bondie touletan realize. Li ti dir: “Li inposib pou Bondie koz manti.” (Ebre 6:18) Parey kouma enn lasours delo pa kapav donn delo dou ek delo sale toule-de, Zeova Li Lasours laverite ek Li pa kapav koz manti. Alor, nou kapav ena foul konfians dan tou seki Zeova dir, mem dan so bann promes konsernan lavenir. Dan sa lartik-la, nou pou reponn sa de kestion-la: Ki kitsoz Zeova inn promet konsernan lavenir? Ek ki garanti Zeova inn donn nou ki Li pou tini so promes?

 3. (a) Ki promes bann serviter Zeova bien kontan? (Revelasion 21:​3, 4) (b) Kouma sertin dimounn reazir kan nou partaz sa promes-la avek zot?

³ Bann serviter Zeova bien kontan sa promes ki nou pou examine la. (Lir Revelasion 21:​3, 4.) Zeova promet ki dan lavenir, “lamor pou nepli existe, pou nepli ena ni dey, ni plore, ni douler.” Dan predikasion, boukou parmi nou servi sa bann verse-la pou rekonfort bann dimounn ek pou montre zot kouma lavi pou ete dan Paradi. Kouma sertin dimounn reazir kan nou partaz sa promes-la avek zot? Kitfwa zot dir, “Se enn zoli promes, me mo pa krwar ki sa pou arive.”

 4. (a) Ki kitsoz Zeova ti kone ti pou arive dan nou lepok? (b) Apart ki Li’nn fer enn promes, ki kitsoz ankor Zeova inn fer?

⁴ Kan Zeova ti fer lapot Zan ekrir sa promes-la, Li ti kone ki nou ti pou partaz sa lesperans-la ar lezot dan predikasion. Li ti kone osi ki boukou dimounn ti pou trouv sa difisil pou krwar. (Iza. 42:9; 60:2; 2 Kor. 4:​3, 4) Alor, kouma nou kapav ed lezot pou ki zot sir ki promes ki ena dan Revelasion 21:​3, 4 pou realize? Ek kouma nou kapav ena plis konfians dan Zeova ek so bann promes? Zeova inn donn nou bann bon rezon ki montre ki Li pou tini so promes. Anou get sa bann rezon-la.

 5. Ki bann rezon nou ena pou krwar dan promes Zeova, ek kotsa nou trouv zot?

⁵ Dan bann verse apre, nou trouv bann rezon kifer nou kapav sir ki Zeova pou fer later vinn enn paradi. Sa bann verse-la dir: “Sa Kikenn ki ti pe asize lor tronn la ti dir: ‘Gete! Mo pe fer tou kitsoz nouvo.’ Li dir osi: ‘Ekrir, parski sa bann parol-la zot fidel ek vre.’ Ek li ti dir mwa: ‘Zot inn fini akonpli! Momem Alfa ek Omega, koumansman ek lafin.’”—Rev. 21:​5, 6a.

 6. Kifer bann parol ki ena dan Revelasion 21:​5, 6 fer nou ena plis konfians dan promes Zeova?

⁶ Kifer sa bann verse-la ed nou pou ena plis konfians dan promes Zeova? Konsernan sa bann verse-la, liv La Révélation. Le grand dénouement est proche ! dir: “Se koumadir Zeova Limem pe donn enn garanti, ouswa pe sign enn kontra, ar bann dimounn ki fidel; Li promet zot ki Li pou donn zot bann benediksion dan lavenir.”b Nou trouv promes Zeova dan Revelasion 21:​3, 4, ek nou trouv garanti ki Li pou tini so promes dan verse 5 ek 6. Anou examinn bann parol ki Zeova servi dan sa bann verse-la.

 7. Kisann-la ki koze dan verse 5, ek kifer sa spesial?

⁷ Verse 5 koumans koumsa: “Sa Kikenn ki ti pe asize lor tronn la ti dir.” (Rev. 21:5a) Sa bann parol-la zot spesial parski dan liv Revelasion, Zeova koz zis trwa fwa, ek sa se enn parmi sa trwa fwa-la. Alor, se pa enn anz, ni Zezi ki donn nou sa garanti-la; se Zeova Limem! Sa montre ki nou kapav ena foul konfians dan seki Zeova pou dir apre. Kifer nou dir sa? Parski Zeova “pa kapav koz manti.” (Tit 1:2) Alor, bann parol ki ena dan Revelasion 21:​5, 6, zot pou vremem realize.

 8. Kouma Zeova montre ki Li sir ki so promes pou realize? (Izai 46:10)

⁸ Apre sa, Zeova dir: “Gete!” (Rev. 21:5) Dan liv Revelasion, souvan ena mo “gete!” Enn liv referans dir ki servi sa mo-la “pou fer lekter-la konpran ki li bizin res bien konsantre lor seki pou dir apre.” Ki sa verse-la dir apre? Bondie dir: “Mo pe fer tou kitsoz nouvo.” Li vre ki Zeova pe koz lor bann sanzman ki pou ena dan lavenir. Me Li telman sir ki Li pou realiz so promes, ki Li dir ki Li pe deza fer sa bann sanzman-la.—Lir Izai 46:10.

 9. (a) Kan Zeova dir ki Li “fer tou kitsoz nouvo,” ki Li pe rod dir? (b) Ki pou ariv “lesiel” ek “later” ki ena azordi?

⁹ Anou examinn enn lot lexpresion ki ena dan Revelasion 21:5: “Fer tou kitsoz nouvo.” Dan sa sapit-la, sa vedir ki Zeova pou fer de kitsoz. Premierman, Li pou detrir sa vie lemond-la, ek deziemman, Li pou etabli enn nouvo lemond. Revelasion 21:1 dir: “Ansien lesiel ek ansien later finn disparet.” “Ansien lesiel” se bann gouvernman ki inflianse par Satan ek so bann demon. (Mat. 4:​8, 9; 1 Zan 5:19) Labib souvan servi lexpresion “later” pou koz lor bann dimounn. (Zen. 11:1; Ps. 96:1) Alor, “ansien later” se bann move dimounn ki lor later azordi. Zeova pa dir ki Li pou repar, ouswa amelior, “lesiel” ek “later” ki ena azordi; Li dir ki Li pou ranplas zot net. Li pou ranplas zot par “enn nouvo lesiel ek enn nouvo later,” setadir enn nouvo gouvernman ki pou diriz lor bann dimounn ki ena respe pou Bondie.

10. Kan Zeova dir ki Li “pe fer tou kitsoz nouvo,” ki Li pe rod dir?

¹⁰ Ki kitsoz ankor Zeova pou fer kan Li pou “fer tou kitsoz nouvo”? (Rev. 21:5) Zeova pou geri later ek bann dimounn pou ki zot vinn parfe. Parey kouma Izai ti predir, Zeova pou fer later antie vinn enn zoli paradi, parey kouma zardin Eden. Ek Li pou fer nou vinn “nouvo” kan Li pou geri sakenn parmi nou. Bann dimounn ki bwate, ki aveg, ek ki sourd, pou geri, ek mem bann mor pou resisite.—Iza. 25:8; 35:​1-7.

11. Ki kitsoz Zeova dir Zan fer, ek kifer?

¹¹ Ki lot garanti ankor Zeova donn nou? Li ti dir Zan: “Ekrir, parski sa bann parol-la zot fidel ek vre.” (Rev. 21:5) Kan Zeova dir “ekrir,” Li pa zis donn enn lord, me Li donn osi rezon kifer bizin fer sa. Li dir: “Parski sa bann parol-la zot fidel ek vre.” Sa montre ki nou kapav ena konfians dan bann parol Bondie parski zot exakt. Nou bien rekonesan ki Zan inn obeir Zeova kan Li’nn donn li lord pou “ekrir.” Kifer? Parski gras-a sa, nou kapav konn promes Zeova konsernan Paradi, ek reflesi lor bann zoli benediksion ki nou pou gagne dan lavenir.

12. Kifer Zeova kapav dir: “Zot inn fini akonpli!”

¹² Apre sa, Zeova dir: “Zot inn fini akonpli!” (Rev. 21:6) Kifer Zeova dir ki sa bann promes-la inn fini akonpli? Parski nanye pa kapav anpes Zeova realiz so proze. Aster-la, anou get enn lot kitsoz ki Zeova dir, ki montre nou ki Li pou tini so promes.

13. Kan Zeova dir: “Momem Alfa ek Omega,” ki Li pe rod dir?

¹³ Kouma nou’nn trouve taler-la, Zeova koz zis trwa fwa dan liv Revelasion. (Rev. 1:8; 21:​5, 6; 22:13) Ek sak fwa, Li’nn dir mem kitsoz: “Momem Alfa ek Omega.” Alfabe Grek koumans par alfa ek li terminn par omega. Alor, kan Li dir ki Li “Alfa ek Omega,” Zeova pe rod dir ki kan Li koumans enn kitsoz, Li terminn li.

14. (a) Donn enn lexanp pou montre kouma Zeova Li “Alfa ek Omega.” (b) Ki garanti Zenez 2:​1-3 donn nou?

¹⁴ Apre ki Li ti kree Adan ek Ev, Zeova ti dir zot ki proze Li ena pou later ek pou bann dimounn. Labib dir: “Bondie ti beni zot ek Li ti dir zot: ‘Gagn zanfan, vinn boukou, ranpli later ek ena kontrol lor li.’” (Zen. 1:28) Kan Zeova ti explik so proze pou later ek pou bann dimounn, sa ti enn koumansman, koumadir Zeova ti dir “Alfa.” Ek kan so proze pou akonpli, setadir kan later ki’nn vinn enn paradi, pou ranpli ar bann desandan Adan ek Ev ki’nn vinn parfe, se koumadir Li pou dir “Omega.” Apre ki Zeova ti fini “kree lesiel ek later, ek tou seki ena ladan,” Li ti dir enn kitsoz pou montre ki so proze ti pou realize. Nou trouv sa dan Zenez 2:​1-3. (Lir.) Zeova ti fer setiem zour vinn sakre. Se enn garanti ki so proze pou later ek pou bann dimounn pou realize lafin sa setiem zour-la.

15. Kifer Satan kitfwa ti panse ki li ti reisi anpes Zeova realiz So proze?

¹⁵ Apre ki Adan ek Ev ti rebel kont Zeova, zot ti vinn inparfe ek zot ti transmet pese ek lamor ar tou zot bann desandan. (Rom. 5:12) Akoz sa, kitfwa Satan ti panse ki li ti reisi anpes Zeova realiz So proze pou later ek pou bann dimounn. Kitfwa li ti panse ki Zeova pa ti pou reisi dir “Omega.” Kitfwa li ti panse ki Zeova pa ti ena boukou opsion. Kitfwa li ti panse ki Zeova ti pou touy Adan ek Ev, ek kree enn lot koup ki parfe. Me si Zeova ti fer sa, Satan ti pou dir ki Li enn manter. Kifer? Parski, kouma nou trouve dan Zenez 1:​28, Zeova ti dir Adan ek Ev ki zot desandan ti pou ranpli later.

16. Ki lot kitsoz Satan ti kapav dir lor Zeova? Explike.

¹⁶ Ki lot opsion Satan kitfwa ti panse Zeova ena? Kitfwa li ti panse ki Zeova ti pou les Adan ek Ev gagn bann zanfan, me ki zame zot ti pou reisi vinn parfe. (Ekle. 7:20; Rom. 3:23) Si sa ti arive, Satan ti pou dir ki Zeova pa’nn reisi fer seki Li’nn promet. Sa opsion-la pa ti pou realiz proze Zeova, parski later pa ti pou ranpli ar bann dimounn ki parfe.

17. Mem si Satan, Adan, ek Ev inn rebel kont Li, ki opsion Zeova inn trouve pou realiz so proze, ek ki pou arive alafin? (Get zimaz osi.)

¹⁷ Satan inn res bet kan li’nn trouv seki Zeova inn fer! Zeova inn trouv pli bon opsion pou realiz so proze, mem si Satan, Adan, ek Ev inn rebel kont Li. (Ps. 92:5) Zeova inn tini so parol ek Li’nn les Adan ek Ev gagn bann zanfan. Sa montre ki Li pa enn manter. Sa montre osi ki kan Li dir enn kitsoz, pena nanye ki kapav anpes sa arive. Zeova inn fer an-sort ki so proze realize gras-a enn “desandans” ki ti pou sov bann desandan Adan ek Ev ki obeisan. (Zen. 3:15; 22:18) Sa desandans-la ti pou donn so lavi kouma enn ranson pou sov bann dimounn. Sirman Satan ti etone ki Zeova ti pran sa dispozision-la! Kifer? Parski laranson se enn dispozision ki ranpli ar lamour. (Mat. 20:28; Zan 3:16) Ek Satan pena sa kalite-la! Okontrer, li bien egois. Ki pou arive gras-a laranson? Alafin Regn Mil An Zezi Kris, bann desandan Adan ek Ev ki parfe ek obeisan, pou viv lor later ki’nn vinn enn paradi, parey kouma Zeova ti prevwar o-koumansman. Sa lepok-la, Zeova pou kapav dir, “Omega.”

18. Sit trwa rezon ki montre ki nou kapav ena konfians dan promes Zeova? (Get lankadre “Trwa Rezon ki Nou Kapav Ena Konfians dan Promes Zeova.”)

¹⁸ Dan sa lartik-la, nou’nn trouv bann rezon kifer nou sir ki later pou vinn enn paradi. Ki nou kapav dir bann dimounn pou fer zot konpran ki sa pou vremem arive? Premierman, se Zeova Limem ki fer sa promes-la. Liv Revelasion dir: “Sa Kikenn ki ti pe asize lor tronn la ti dir: “Gete! Mo pe fer tou kitsoz nouvo.’” Zeova Li ena sazes, pwisans, ek dezir pou tini sa promes-la. Deziemman, Zeova telman sir ki so promes pou realize, ki pou Li se koumadir li’nn fini realize. Se akoz sa ki Li dir: “Sa bann parol-la zot fidel ek vre. . . . Zot inn fini akonpli!” Ek trwaziemman, kan Zeova koumans enn kitsoz, Li terminn li. Se pou sa rezon-la ki Li dir: “Momem Alfa ek Omega.” Alafin, Zeova pou montre ki Satan enn manter ek ki li pa kapav anpes Li realiz So proze.

19. Kan bann dimounn pa krwar ki Bondie pou fer later vinn enn paradi, ki to kapav fer?

¹⁹ Sak fwa ki to ed bann dimounn pou konpran ki bann promes Zeova pou realize, sa ogmant to konfians dan so bann promes. Alor, prosenn fwa ki to lir Revelasion 21:4 avek enn dimounn, ek ki li dir twa, “Se enn zoli promes, me mo pa krwar ki sa pou arive,” ki to kapav fer? Lir ek explik li verse 5 ek 6, ek montre li ki se Zeova Limem ki donn enn garanti ki So promes pou realize.—Iza. 65:16.