Createur donne dimoune enn paradis

“AU COMMENCEMENT Bondié ti crée le ciel ek la terre.” (Genèse 1:1) Jamais pa finn ena bann parole introduction populaire coumsa, ki finn ecrire dan l’Histoire. Avek sa phrase simple mais impressionnant-la, la Bible presente nou sa Kikenn ki pli important dan bann l’Ecriture sacré—Jéhovah, Bondié ki tout-puissant. Sa premier verset la Bible-la faire nou koné ki Bondié Li-mem Createur l’univers ki bien-bien grand, parmi ena sa planete kot nou vive-la. Bann verset ki vini apré expliké ki, pendant enn periode le temps assez longue, ki nou appel bann jour, Bondié inn prepare la terre pou nou resté, ek Li’nn crée tou bann kitsoz extraordinaire ki existé dan la nature.

Pli grand creation ki Bondié inn faire c’est enn zom. Bondié ti faire zom dan so ressemblance, setadir li ti kapav reflete bann qualité ki Jéhovah ena, bann qualité couma l’amour ek la sagesse. Bondié ti faire zom avek la poussiere, ek Li ti appel li Adam. Apré sa Li ti mette li dan enn paradis—jardin Éden. Bondié Li-mem ti faire sa jardin-la, ek ti rempli li avek bann joli pié ki donne bann fruit.

Bondié ti trouvé ki li ti necessaire ki Adam ena enn conjoint. Li ti servi enn cote Adam pou faire enn femme, ki plitar ti appel Ève. Apré sa, Li’nn amenn li vers Adam, ek Li’nn marié zot. Adam ti tellement content ki li ti dire sa poeme-la: “Enfin, sannla li lezo mo lezo ek la chair mo la chair.” Bondié ti expliké: “A cause sa-mem, enn zom pou quitte so papa ek so mama ek li pou bizin attaché avek so madame ek zot pou bizin vinn enn sel la chair.”—Genèse 2:22-24; 3:20.

Bondié ti donne Adam ek Ève deux l’ordre. D’abord, Li ti dire zot prend soin la terre, ek rempli li avek bann zenfant ki zot ti pou gagné. Deuxiemement, Li ti dire zot ki fodé pa zot mange fruit enn sel pié dan sa grand jardin-la, “pié connaissance bon ek mauvais.” (Genèse 2:17) Si zot ti desobeir, zot ti pou mort. Par sa bann l’ordre-la, Bondié ti donne premier zom ek premier femme l’occasion pou zot montré ki zot ti accepté Li couma zot Chef. Si zot ti obeir, zot ti pou aussi montré ki zot content Bondié ek ki zot ena reconnaissance envers Li. Zot ti ena beaucoup raison pou accepté so direction rempli ar l’amour. Sa bann humain parfait-la pa ti ena okenn defaut. La Bible dire nou: “Bondié ti trouve tou seki Li ti faire, ek guetté, tou ti bien bon.”—Genèse 1:31

—Basé lor Genèse chapitre 1 ek 2