Sapit Sink

Liberte Ki Bann Adorater Zeova Profite

1, 2. (a) Ki kalite liberte Bondye ti donn premye zom ek premye fam? (b) Mansyonn detrwa bann lalwa ki ti diriz lavi Adan ek Ev.

KAN Zeova ti kre premye zom ek premye fam, zot ti profit enn liberte buku pli siperyer ki seki bann dimunn ena zordi. Zot ti viv dan Paradi, dan zoli Zardin Edenn. Okenn maladi pa ti rwinn zot lavi parski zot lespri ek zot lekor ti parfe. Zot pa ti atann lamor parey kuma nu zordi. Anplis, zot pa ti bann robo, me Bondye ti fer zot enn gran don: zot ti lib pu fer bann swa, pu pran zot prop desizyon. Me, pu kontiyn profit sa liberte extraordiner la, zot ti bizin respekte bann lalwa Bondye.

² Get par egzanp bann lalwa fizik ki Bondye finn etabli. Byinsir, zot pa bann lalwa ki ti finn ekrir mo pu mo. Adan ek Ev ti finn kre dan enn fason ki pu zot, li ti tu simpleman natirel pu obeir sa bann lalwa la. Kan zot ti fin, zot ti kone ki zot ti bizin manze; kan zot ti swaf, zot ti kone ki zot ti bizin bwar; kan soley ti kuse, zot ti kone ki zot ti bizin al dormi. Zeova finn donn zot enn travay usi. Avredir, sa travay la ti enn lalwa, parski li ti pu diriz zot fason viv. Zot ti pu bizin gayn zanfan, kontrol enn kantite form lavi ki ena lor later, ek fer later antye vinn enn Paradi. (Zenez 1:28; 2:15) Wi, sa lalwa la ti vremem enn bon lalwa pu zot profi! Zot ti pu fer enn travay ki zot kontan, ek sa ti pu permet zot servi tu zot kapasite dan bann bon fason. Anplis, zot ti lib pu deside kuma zot ti pu fer zot travay. Eski nu kapav dir ki zot ti mank kitsoz?

 3. Kuma eski Adan ek Ev ti pu kapav aprann servi zot liberte avek sazes pu pran bann desizyon?

³ Byinsir, kan Adan ek Ev ti gayn privilez pu pran bann desizyon, sa pa vedir ki tu desizyon ki zot ti pu pran ti pu ena bann bon rezilta. Zot ti lib pu pran bann desizyon dan bann limit fixe par bann lalwa ek prinsip Bondye. Kuma eski zot ti pu kapav aprann sa bann lalwa ek prinsip la? Kan zot ekut zot Kreater ek zot obzerv so bann travay. Bondye ti donn Adan ek Ev lintelizans ki zot ti bizin pu met an pratik seki zot ti aprann. Pwiski Bondye ti kre zot parfe, li ti pu natirel ki zot reflekte bann kalite Bondye kan zot ti pu pran bann desizyon. Si vremem zot ti apresye seki Bondye ti’nn fer pu zot ek si zot ti ule fer Li plezir, zot ti pu fer zefor pu reflekte so bann kalite.—Zenez 1:26, 27; Zan 8:29.

 4. (a) Eski komannman ki Bondye ti donn Adan ek Ev pu pa manz frwi sa pye la, ti priv zot zot liberte? (b) Kifer eski li ti normal ki Bondye donn sa komannman la?

⁴ Alor, Bondye ti ena drwa teste zot latasman ar Li, kuma sa Kikenn ki’nn donn zot lavi la ek gete si zot ti pu dispoze pu respekte limit ki Li ti’nn fixe pu zot. Zeova ti donn Adan sa komannman la: “To kapav manz frwi tu bann pye dan zardin komye to anvi. Me an seki konsern sa pye konesans bon ek move la, to bizin pa manz so frwi, parski zur ki to pu manz so frwi, pena bare, sa zur la mem to pu mor.” (Zenez 2:16, 17) Apre ki Bondye ti’nn kre Ev, li usi ti aprann sa lalwa la. (Zenez 3:2, 3) Eski sa restriksyon la ti pu priv zot, zot liberte? Non, byinsir. Apart frwi sa pye la, zot ti ena enn kantite lezot varyete bon manze an abondans. (Zenez 2:8, 9) Li ti normal ki zot ti bizin rekonet ki later pu Bondye, parski Li ki ti’nn kre sa. Alor, Li gayn drwa etabli bann lalwa ki an akor avek so volonte ek ki pu fer bann dimunn viv byin.—Psom 24:1, 10.

 5. (a) Kuma eski Adan ek Ev finn perdi sa liberte extraordiner ki zot ti ena la? (b) Ki finn ranplas sa liberte ki Adan ek Ev ti pe profite la, ek kuma sa afekte nu?

⁵ Me ki finn arive? Puse par enn lanbisyon egois, enn anz ti mal servi so liberte pu swazir ek li ti’nn vinn Satan, ki vedir “Lennmi.” Li ti anbet Ev letan li ti fer li krwar enn kitsoz ki ti kont volonte Bondye. (Zenez 3:4, 5) Adan ti swiv Ev ek tulede ti’nn dezobeir lalwa Bondye. Zot finn perdi zot liberte extraordiner kan zot finn pran enn kitsoz ki pa ti pu zot. Pese ti vinn zot met, ek kuma Bondye ti averti zot, zot ti gayn lamor apre. Zot finn transmet zot bann desandan leritaz pese—ki nu truve dan tandans ki bann dimunn ena depi zot nesans pu fer seki pabon. Pese finn amenn usi bann febles ki koz maladi, vyeyes, ek lamor. Sa tandans pu fer seki move la ansam avek linflyans Satan finn donn nesans enn sosyete dimunn renome pu so bann laenn, krim, dominer ek lager ki finn tuy plizir milyon dimunn. Sa li vremem diferan ar liberte ki Bondye ti donn bann dimunn dan kumansman.—Deteronom 32:4, 5; Zob 14:1, 2; Romin 5:12; Revelasyon 12:9.

Kot Nu Kapav Truv Liberte

 6. (a) Ki kote nu kapav truv vre liberte? (b) Lor ki kalite liberte Zezi ti pe koze?

⁶ Akoz bann move kondisyon ki ena partu zordi, li pa drol ki bann dimunn pe rod plis liberte. Me, kot sa nu kapav truv vre liberte? Zezi ti dir: “Si zot res dan mo parol, vremem zot mo bann disip, ek zot pu konn laverite, ek laverite pu liber zot.” (Zan 8:31, 32) Sa liberte la li pa liberte ki bann dimunn rode kan zot rezet enn dirizan uswa enn form guvernman an faver enn lot. Sa liberte la al plito ziska rasinn bann problem ki limanite pe kone. Zezi ti koz lor liberte ar lesklavaz pese. (Zan 8:24, 34-36) Alor, si enn dimunn vinn enn vre disip Zezi Kris, li konn enn gran sanzman dan so lavi, li gayn enn liberasyon!

 7. (a) Dan ki fason eski nu kapav libere ar pese asterla? (b) Pu gayn sa liberte la, ki nu bizin fer?

⁷ Sa pa vedir ki zordi bann vre Kretyin nepli resanti bann lefe tandans pu fer pese, enn kitsoz ki zot finn erite depi zot nesans. Pwiski zot finn erit pese, zot tuzur bizin lit kont sa. (Romin 7:21-25) Me, si enn dimunn viv vremem an akor avek bann lanseynman Zezi, li pu nepli esklav pese. Pese pu nepli dominn li kuma enn diktater ki donn li lord ki li bizin obeir san poz kestyon. Li pa pu prizonye enn lavi ki pena okenn sans ek ki les li avek enn move konsyans. Li pu ena enn konsyans prop devan Bondye, parski grasa so lafwa dan sakrifis Zezi Kris, li gayn pardon pu bann pese ki li finn fer avan. So bann tandans pu fer pese pu rod inflyans li, me ler li pa pu obeir zot parski li pu rapel bann lanseynman pir ki Zezi Kris finn anseyne, li pu montre ki pese nepli so met.—Romin 6:12-17.

 8. (a) Ki liberte bann vre Kretyin ena? (b) Ki latitid nu bizin ena anver bann dirizan sa lemond la?

⁸ Get bann liberte ki nu profite antan ki Kretyin. Nu finn libere ar lefe bann fos lanseynman, ar lesklavaz siperstisyon, ek lesklavaz pese. Laverite extraordiner lor kondisyon bann dimunn mor ek lor rezireksyon finn liber nu ar laper lamor. Pwiski nu kone ki Rwayom Bondye, enn Rwayom zis pu ranplas bann guvernman inparfe, sa tir nu dan dezespwar. (Danyel 2:44; Matye 6:10) Me selman, mem ki nu ena sa liberte la, nu kontiyn respekte bann guvernman ek zot bann lalwa.—Tit 3:1, 2; 1 Pyer 2:16, 17.

 9. (a) Kuma eski dan so lamur, Zeova ed nu pu profit pli gran liberte ki bann dimunn kapav ena zordi? (b) Kuma eski nu kapav pran bann desizyon saz?

⁹ Zeova pa finn larg nu kumsa mem pu nu sey dekuver par numem ki meyer fason viv. Li kone kuma nu finn kre, ki kitsoz ki rann nu ere, ek ki kitsoz kapav fer nu viv byin pu tuletan. Li kone usi ki bann panse ek kondwit kapav gat relasyon ki enn dimunn ena avek Li, ek kitfwa mem anpes sa dimunn la gayn lemond nuvo. Alor, dan so lamur Zeova met nu an gard kont tu sa bann kitsoz la atraver Labib ek so lorganizasyon ki lor later. (Mark 13:10; Galat 5:19-23; 1 Timote 1:12, 13) Apre, li nu responsabilite pu servi nu liberte pu swazir, ki Bondye finn donn nu, pu deside ki kalite kondwit nu pu ena an retur. Si kontrerman ar Adan, nu pran kont seki Labib dir nu, nu pu pran bann desizyon saz. Nu pu montre ki enn bon relasyon avek Zeova, sa mem kitsoz ki kont plis dan nu lavi.

Bann Dimunn Pe Rod enn Lot Kalite Liberte

10. Ki kalite liberte sertin Temwin Zeova finn rod gayne?

¹⁰ Parfwa, sertin zenn Temwin Zeova—bann adilt usi—kapav santi ki zot bizin enn lot kalite liberte. Lemond paret atiran ek interesan, ek plis zot pans sa, plis zot anvi fer bann kitsoz ki pa kretyin, me ki popiler dan sa lemond la. Sirman, zot pa pe pans pu pran ladrog, ni pu abiz lalkol, uswa pu fer bann vis sexyel. Me, zot kumans frekant bann ki pa bann vre Kretyin, ek zot ule sa bannla aksepte zot. Zot mem kumans ena enn fason koze ek enn kondwit parey kuma bannla.—3 Zan 11.

11. Defwa, kot tantasyon pu fer seki pabon sorti?

¹¹ Defwa, enn kikenn ki pretann servi Zeova, kapav tant lezot pu ena enn kondwit ki pa Kretyin. Sa mem ki ti ariv bann premye Kretyin, ek sa kapav ariv nu’si. Suvan, sa bann kalite dimunn la rod fer bann kitsoz ki zot panse pu fer zot gayn plezir, me sa bann kitsoz la kont bann lalwa Bondye. Zot ankuraz lezot pu “amize” inpe. Zot ‘promet liberte, alor ki zotmem, zot esklav bann vis.’—2 Pyer 2:19.

12. Ki bann move konsekans enn kondwit ki kont bann lalwa ek bann prinsip Bondye?

¹² Sa swadizan liberte la ena bann move konsekans, parski li amenn enn kikenn pu dezobeir bann lalwa Bondye. Par egzanp, relasyon sexyel ki kont lalwa Bondye fer gayn enn konsyans ki pa trankil, maladi, lamor, groses ki pa ti dezire, ek li kapav kas mem enn maryaz. (1 Korintyin 6:18; 1 Tesalonisyin 4:3-8) Enn kikenn ki abiz ladrog kapav vinn enn kikenn ki ankoler vit; so lalang lur kan li koze, li pa truv byin, li gayn vertiz, li gayn difikilte pu respir byin, li fer bann vizyon; li kapav mem konn lamor. Li kapav vinn enn esklav ladrog, seki kapav amenn li fer krim pu gayn seki li bizin. Enn kikenn ki abiz lalkol konn bann mem konsekans. (Proverb 23:29-35) Bann ki ena sa bann kalite kondwit la kapav panse ki zot lib, me apre zot pran konsyans tro tar ki zot finn vinn bann esklav pese. Wi, pese li enn met ki san pitye! Si asterla mem nu reflesi lor la, nu pu kapav protez nu kont sa bann move lexperyans la.—Galat 6:7, 8.

Kot Bann Problem Kumanse

13. (a) Kuma eski suvan bann dezir ki amenn problem, zot ne? (b) Pu konpran ki ete “bann move frekantasyon,” lopinyon kisannla nu bizin? (c) Kan u reponn bann kestyon ki ena dan paragraf 13, montre byin seki Zeova panse.

¹³ Reflesi ki kote suvan bann problem kumanse. Labib explike: “Sakenn li teste kan li les so dezir amenn li ek tant li. Apre, kan dezir la finn vinn fertil, li donn nesans pese; ek lerla kan pese la finn fini fer, li amenn lamor.” (Zak 1:14, 15) Kuma eski dezir la ne? Par seki rant dan lespri. Suvan, sa arive parski nu frekant bann dimunn ki pa aplik bann prinsip Labib. Byinsir, nu tu kone ki nu bizin rezet bann “move frekantasyon.” (1 Korintyin 15:33) Me ki frekantasyon ki pa bon? Ki Zeova panse lor la? Si nu rezonn lor sa bann kestyon ki ena anba la, ek nu get bann verse ki finn site, sa pu ed nu pu tir bann bon konklizyon.

Si ena dimunn paret respektab, eski sa vedir ki zot bann bon frekantasyon? (Zenez 34:1, 2, 18, 19)

Eski zot konversasyon, kitfwa zot bann joke, montre si nu bizin vinn zot bann kamarad intim uswa non? (Efezyin 5:3, 4)

Ki Zeova resanti si nu frekant byin pre bann dimunn ki pa kontan Li? (2 Kronik 19:1, 2)

Mem si nu kapav travay, uswa al lekol avek bann dimunn ki pa partaz nu bann krwayans, kifer eski nu bizin fer byin atansyon? (1 Pyer 4:3, 4)

Nu kapav frekant lezot atraver televizyon ek fim, Internet, liv, magazinn, ek lagazet. Kan nu servi sa bann surs linformasyon la, kont ki kalite kitsoz nu bizin fer byin atansyon? (Proverb 3:31; Izai 8:19; Efezyin 4:17-19)

Kan Zeova get swa nu frekantasyon, ki kalite dimunn nu ete devan so lizye? (Psom 26:1, 4, 5; 97:10)

14. Ki gran liberte pe atann bann ki pe kontiyn met an pratik konsey Parol Bondye zordi?

¹⁴ Zis devan nu ena nuvo lemond Bondye ki pe atann nu. Par mwayin guvernman Bondye ki dan lesyel, bann dimunn pu libere ar linflyans Satan, ek tu so move sistem ki egziste. Dusma-dusma pese pu perdi so lefe lor bann dimunn ki obeir Bondye; zot lespri ek zot lekor pu vinn parfe, lerla nu pu kapav zwir lavi pu tuletan dan Paradi. Tu kreasyon Bondye pu kapav profit liberte ki an akor net avek “lespri Zeova.” (2 Korintyin 3:17) Eski li pu saz pu riske tu sa bann kitsoz ki nu kapav gayne la parski nu pe rezet konsey Parol Bondye asterla? Anu servi nu liberte Kretyin avek sazes ek montre klerman ki nu vremem anvi gayn “liberte extraordiner kuma bann zanfan Bondye.”—Romin 8:21.

Kestyon Revizyon

• Ki kalite liberte premye zom ek fam ti ena? Ki diferans ena ant sa liberte la ek liberte ki bann dimunn ena zordi?

• Ki liberte bann vre Kretyin ena? Ki diferans ena ant sa liberte la ek seki lemond li, li apel liberte?

• Kifer eski li vremem byin inportan ki nu evit bann move frekantasyon? Olye ki nu fer parey kuma Adan, desizyon kisannla nu aksepte an rapor avek seki pabon?

[Bann zimaz paz 46]

Parol Bondye averti nu: “Pa les zot anbete. Bann move frekantasyon gat bann bon labitid”