Eski jardin Éden vrai-mem ti existé?

ESKI ou konn zistoire Adam ek Ève ek jardin Éden? Bann dimoune dan le monde entier konn sa. Kifer ou pa lire sa recit-la par ou-mem? Ou pou trouve sa dan Genèse 1:26–3:24. Ala enn resumé sa zistoire-la:

Bondié, Jéhovah,a ti forme zom avek la poussiere ek Li ti appel li Adam. Li ti mette li dan enn jardin ki ti trouve dan enn region ki ti appel Éden. Bondié Li-mem ti faire sa jardin ki ti gagne bien de l’eau-la. Dan sa jardin-la ti ena enn quantité joli pié ki ti rapporte bann fruit ek au millieu ti ena “pié connaissance bon ek mauvais.” Bondié ti defann Adam pou mange fruit sa pié-la. Li ti dire li ki si li desobeir, li pou mort. Plitar, Jéhovah ti faire enn madame pou Adam, ek ti appel li Ève. Li ti forme li avek enn cote Adam. Bondié ti donne zot responsabilité pou occupe sa jardin-la, ek Li ti dire zot multiplié ek rempli la terre.

Enn jour ki Ève ti tousel, enn serpent ti koz ar li ek ti tente li pou mange fruit ki Bondié ti defann zot mangé. Sa serpent-la ti pretann ki Bondié ti’nn koz menti ar li ek ki Li ti pé prive li enn kitsoz ki bon, ki ti pou faire li vinn couma Bondié. Ève ti laisse-li tenté ek ti mange sa fruit-la. Plitar, Adam aussi ti faire pareil ek li ti desobeir Bondié. Jéhovah ti prononce enn condamnation kont Adam, Ève, ek sa serpent-la. Apré ki Li ti pousse zot en dehors sa paradis-la, bann ange ti blok so l’entrée.

Ti ena enn lepok kot bann bibliste, bann intellectuel ek bann historien ti accepté ki bann l’evenement ki nou trouvé dan livre Genèse ti vrai-mem arrivé dan l’Histoire. Azordi, pli allé bann dimoune ena bann doute lor sa sujet-la. Mais lor ki kitsoz sa bann doute concernant Adam, Ève, ek jardin Éden-la, zot basé? Anou examine quatre objection ki bien populaire.

 1. Eski jardin Éden li enn place ki ti vrai-mem existé?

Kifer eski ena doute lor sa sujet-la? Enn kitsoz ki kitfois ti’nn joué enn grand role ladan c’est bann philosophie. Pendant plusieurs siecle, bann dimoune ki etudié la religion ti pensé ki sa jardin ki Bondié ti faire-la ti encore existé kit part. Mais, l’Eglise finn influencé par bann philosophe grec couma Platon ek Aristote, ki ti soutenir l’idée ki pena nanyin lor la terre ki kapav parfait. Zis dan le ciel ki kapav ena perfection. A cause sa, bann ki etudié la religion finn tire sa conclusion-la: paradis ki ti existé au commencement ti bizin bien pré ar le ciel.b Certain ti dire ki jardin-la ti trouve dan boute enn montagne tellement haute ki li pa ti pou kapav affecté par la terre ki pé degradé. Certain ti dire ki li ti trouve dan pole Nord ou-soit pole Sud, ek lezot ti dire ki li ti lor la lune ou-soit pré ar la lune. Nou pa etonné ki l’idée concernant Éden inn commence parette couma enn kitsoz ki pa réel. Certain bibliste moderne pensé ki li bete ki nou rod deviné kot sa jardin-la ti trouvé, parski zot dire ki enn place coumsa jamais inn existé.

Mais la Bible pa decrire sa jardin-la coumsa. Dan Genèse 2:8-14, nou trouve plusieurs detail lor sa l’endroit-la. Li ti trouve dan coté l’est enn region ki ti appel Éden. Sa jardin-la ti gagne de l’eau avek enn la riviere ki ti vinn la source quatre lezot la riviere. La Bible donne nou nom chaque la riviere ek li dire nou kot sa zot ti passé. Pendant longtemps, sa bann detail-la finn interesse bann bibliste ek finn faire zot envie konn plus. Beaucoup finn rod bann indication dan sa passage-la pou koné kot sa l’endroit-la trouvé zordi. Mais, sakenn finn gagne bann conclusion different. Eski sa vedir ki bann detail lor Éden, so jardin ek so bann la riviere zot bann zistoire ki finn inventé?

Pense lor la: bann evenement ki mentionné dan recit lor jardin Éden ti arrivé inn gagne preské 6,000 an. C’est surement Moïse ki ti ecrire sa ek kitfois li ti base li lor tradition oral ou-soit bann document ki ti deja existé. Mais c’est apepré 2,500 an apré ki sa bann l’evenement-la finn arrivé ki Moïse finn ecrire sa. Éden ti deja enn vié zistoire. Eski li possible ki zordi bann repere, couma par exemple sa bann la riviere-la, finn changé apré plusieurs douzaine siecle? Enba la terre ena bann plaque roche ki touletan pé bougé. Region kot surement Éden ti trouvé li enn l’endroit kot touletan ena bann tremblement de terre. Azordi, c’est enn region kot enregistré environ 17 pour cent bann pli grand tremblement de terre. Dan bann region coumsa, bann changement li enn kitsoz normal. En plus, deluge dan lepok Noé surement finn provok bann changement lor la terre ki zordi nou pa kapav koné.c

Mais, ala certain renseignement ki nou ena: recit Genèse koz lor sa jardin-la couma enn place ki’nn existé vrai-mem. Deux parmi sa quatre la riviere ki mentionné dan sa recit-la—Euphrate ek Tigre (ou-soit Hiddéqel)—encore toujours existé, ek certain parmi zot bann la source, zot pré-pré. Sa recit-la mem cite nom bann l’endroit kot sa bann la riviere-la passé ek zot bann ressource naturel ki bien renommé. C’est en premier pou bann Israélite ki Moïse ti ecrire sa recit-la ek bann detail ki ti ena ladan, ti aprann zot beaucoup kitsoz.

Eski bann zistoire ki’nn inventé ou-soit bann zistoire pou zenfant donne bann detail coumsa? Ou-soit eski souvent zot donne bann renseignement ki pa facile pou verifié ou-soit pou confirmé? “Enn jour dan enn pays bien-bien loin,” c’est coumsa ki souvent bann zistoire pou zenfant commencé. Mais c’est dan bann recit historik ki souvent nou trouve bann detail bien clair, pareil couma dan recit lor Éden.

 2. Eski vrai-mem nou kapav dire ki Bondié ti forme Adam avek la poussiere ek Ève avek enn cote Adam?

La science moderne inn confirmé ki dan lekor enn dimoune ena plusieurs element couma par exemple hydrogène, oxygène, ek carbone, ek nou kapav trouve tou sa bann element-la dan la terre. Mais couma eski sa bann element-la finn retrouve-zot ensam pou forme enn creature vivant?

Pou beaucoup scientifik, la vie finn apparette par li-mem. Zot dire ki li finn commencé dan bann forme bien-bien simple ek tigit par tigit, lor plusieurs million l’année, li finn vinn de plus en plus complexe. Mais, sa mot “simple[-la]” kapav mette nou dan l’erreur. Kifer? Parski tou bann creature vivant, mem pli tipti creature ki existé, li’nn faire dan enn fason bien compliké. Pena okenn preuve ki n’importe ki forme la vie finn apparette par hasard ou-soit ki enn jour sa kapav arrivé. Au contraire, tou creature vivant ena en zot-mem enn preuve bien solide ki zot finn crée par enn l’intelligence bien pli grand ki nou.d—Romains 1:20.

Apré ki ou’nn ecoute enn joli la musik, ou-soit apré ki ou’nn admire enn joli tableau ou-soit enn invention dan domaine technologie, eski ou pou insisté ki pena personne ki finn faire sa bann kitsoz-la? Non, bien sur! Mais sa bann kitsoz extraordinaire-la zot nanyin ditou comparé ar lekor humain, ki finn faire dan enn fason bien compliké, intelligent, ek extra joli. Couma nou kapav pensé ki li pena okenn Createur? En plus, recit Genèse expliké ki parmi tou bann la vie ki ena lor la terre, zis bann humain ki finn faire dan ressemblance Bondié. (Genèse 1:26) Alors li normal ki pareil couma Bondié, c’est zis bann humain ki ena desir pou crée bann kitsoz. Ek c’est a cause sa ki parfois zot faire bann kitsoz extraordinaire dan domaine la musik, art ek technologie. Eski sa bizin etonne nou ki Bondié Li enn bien pli bon Createur ki nou?

En seki concerne creation premier femme avek enn cote Adam, ki kitsoz ki difficile ladan?e Bondié ti kapav servi enn lot moyen, mais fason ki Li’nn crée premier femme, ena enn grand signification. Li ti envie ki zom ek femme marié ek ki zot vinn bien proche, coumadir zot “enn sel la chair.” (Genèse 2:24) Fason ki zom ek femme sakenn complete zot camarade, zot ena enn relation stable kot sakenn fortifié so camarade, eski sa li pa enn preuve solide ki ena enn Createur ki ena la sagesse ek ki content nou?

En plus, bann scientifik ki etudié bann gene, reconette ki ena enn grand possibilité ki tou dimoune sorti ar enn sel zom ek enn sel femme. Alors, eski recit Genèse li zis enn zistoire ki’nn inventé?

 3. Pié connaissance ek pié la vie: bann zistoire ki’nn inventé.

En realité, recit Genèse pa enseigné ki sa bann pié-la ti ena kit pouvoir extraordinaire. Au contraire, zot ti bann simple pié, mais Jéhovah ti donne zot enn signification symbolik.

Eski parfois bann humain aussi pa faire sa? Par exemple, kan demann bann citoyen enn pays pou respecté pavillon national, zot tou comprend ki pé demann zot respecté gouvernement ki representé par sa pavillon-la, pa sa boute la toile-la. Plusieurs le roi finn servi zot couronne couma enn symbole ki represente zot l’autorité.

Alors, ki sa deux pié-la ti representé? Ena plusieurs theorie bien compliké lor la. Vrai reponse-la li simple-li, mais li profond. Pié connaissance bon ek mauvais ti represente privilege ki Bondié tousel ena, setadir droit pou decidé ki kitsoz ki bon ek ki kitsoz ki pa bon. (Jérémie 10:23) Pena doute ki si enn dimoune ti kokin enn fruit lor sa pié-la, li ti pou commette enn faute ki bien grave! Pié la vie li, li ti represente enn don ki zis Bondié tousel kapav donné, setadir la vie pou touletan.—Romains 6:23.

 4. C’est zis dan bann zistoire pou zenfant ki nou trouve enn serpent kozé.

Li vrai ki sa l’aspect dan recit Genèse-la kapav amenn bann dimoune pou pose bann question, surtout si nou pa prend en consideration lezot partie dan la Bible. Mais tigit par tigit, la Bible aide nou pou comprend sa mystere-la.

Kisannla ou-soit ki kitsoz ki finn faire sa serpent-la kozé? Bann Israélite dan le passé ti konn bann lezot kitsoz ki ti aide zot comprend role sa serpent-la. Par exemple, zot ti koné ki mem si bann zanimo pa kozé, enn l’esprit ti kapav faire croire ki c’est sa zanimo-la-mem ki pé kozé. Moïse ti aussi ecrire recit lor Balaam, ek dan sa recit-la nou kapav lire couma Bondié ti envoye enn ange pou faire bourrik Balaam kozé couma enn zom.—Nombres 22:26-31; 2 Pierre 2:15, 16.

Eski bann lezot creature spirituel, parmi ena bann l’ennemi Bondié, kapav faire bann mirak? Moïse ti’nn trouve bann pretre en Égypte ki ti pratik magik faire certain mirak pareil couma bann mirak ki Bondié ti faire, couma par exemple faire enn baton vinn enn serpent. C’est zis bann l’ennemi Bondié dan le monde bann l’esprit ki ena pouvoir pou faire bann mirak coumsa.—Exode 7:8-12.

Pena doute ki Moïse ti inspiré aussi pou ecrire livre Job. Sa livre-la aprann nou beaucoup lor plus grand l’ennemi Bondié, Satan, ki ti koz menti kan li ti mette en doute l’integrité tou bann serviteur Bondié. (Job 1:6-11; 2:4, 5) Eski bann Israélite dan le passé ti tire conclusion ki c’est Satan ki ti faire sa serpent dan jardin Éden-la kozé ek coumsa pousse Ève pou desobeir Bondié? Oui, li possible.

Eski c’est Satan ki ti faire sa serpent-la kozé? Plitar, kan Jésus ti koz lor Satan li ti appel li ‘enn menteur ek papa mensonge.’ (Jean 8:44) Surement ki sa “papa mensonge[-la]” c’est li-mem ki ti dire premier mensonge ki finn ena, pa vrai? Nou trouve sa premier mensonge-la dan bann parole ki sa serpent-la ti dire Ève. Bondié ti donne l’avertissement ki si zot ti mange sa fruit-la zot ti pou mort. Mais sa serpent-la ti contredire Bondié kan li ti dire: “Non, zot pa pou mort zot.” (Genèse 3:4) Li clair ki Jésus ti koné ki Satan ti’nn manipule sa serpent-la. Révélation ki Jésus ti donne l’apotre Jean, reglé enn fois pou tou sa question-la: li appel Satan “sa serpent originel-la.”—Révélation 1:1; 12:9.

Eski li raisonnable pou croire ki enn creature spirituel puissant kapav manipule enn serpent, ek faire coumadir li pé kozé? Mem bann dimoune ki, pourtant, pena pouvoir pareil couma bann l’esprit, kapav faire bann numero ventriloque extraordinaire, setadir zot koz dan zot ventre ek faire croire ki c’est enn marionnette ki pé kozé. Zot kapav aussi faire bann trucage ki faire bann dimoune croire ki seki zot pé trouvé li vrai.

Pli grand temoignage

Eski ou pa d’accord ki bann doute ki ena lor recit Genèse zot pa solide ditou? Mais, de lot coté nou ena bann preuve bien solide ki c’est enn kitsoz ki vrai-mem inn arrivé dan l’Histoire.

Par exemple, la Bible appel Jésus Christ “temoin fidele ki dire la verité.” (Révélation 3:14) Jésus ti enn zom parfait, jamais li’nn koz menti, ni li’nn deforme la verité dan n’importe ki fason. En plus, li ti enseigné ki li ti existé bien avant ki li ti vinn lor la terre en tant ki enn humain. Li ti vive pré ar so Papa, Jéhovah, “avant ki le monde ti existé.” (Jean 17:5) Alors li ti la kan la vie lor la terre ti apparette. Ki temoignage, sa temoin en ki nou kapav ena plus confiance-la, finn donne nou?

Jésus ti koz lor Adam ek Ève couma bann dimoune réel. Li ti faire reference ar zot mariage kan li ti explik principe ki Jéhovah ti etabli, ki enn zom bizin ena enn sel femme. (Matthieu 19:3-6) Si jamais zot pa ti’nn existé ek ki jardin kot zot ti vive ti zis enn zistoire ki’nn inventé, alors surement ki enn kikenn inn embete Jésus, ou-soit ki li ti enn menteur. Okenn conclusion pa tini! Jésus ti dan le ciel kan tou sa bann evenement-la ti arrivé dan jardin Éden. Eski kapav ena enn temoignage ki pli grand ki sa?

En realité, kan enn dimoune pa croire dan recit Genèse, li pé affaibli so la foi en Jésus. Sa empeche li comprend certain theme important ek certain promesse extraordinaire ki ena dan la Bible. Anou guetté dan ki sens.

[Notes]