Kontiyn Manifeste Bonte

“Dan frwi lalimyer ena tu sort kalite bonte, lazistis ek laverite.”—EFEZYIN 5:9.

 1. Kuma eski zordi bann milyon dimunn montre ki zot dakor avek seki ena dan Psom 31:19?

DONN Zeova laglwar, sa mem pli bon kitsoz ki enn dimunn kapav fer. Zordi, bann milyon dimunn pe fer sa kan zot donn Bondye laglwar pu so bonte. Nu, bann Temwin Zeova fidel, avek tu nu leker, nu dakor avek sa ekrivin Psom la, ki finn sante: “Wi, to bonte ki to finn prezerve avek swin pu bann ki ena lakrint pu twa, li buku!”—Psom 31:19.

2, 3. Ki kapav arive si nu travay pu fer bann disip pa akonpayne par enn bon kondwit?

² Enn lakrint ranpli avek respe pu Zeova pus nu pu donn Li laglwar pu so bonte. Sa pus nu’si pu ‘donn Zeova loner, pu beni Li, ek pu fer konn so laglwar antan ki lerwa.’ (Psom 145:10-13) Akoz sa mem nu byin devwe dan travay predikasyon Rwayom ek dan travay pu fer bann disip. (Matye 24:14; 28:19, 20) Me byinsir, an mem tan ki nu fer sa travay la, nu bizin ena usi enn bon kondwit. Sinon, nu kapav sali non sakre Zeova.

³ Zordi buku dimunn pretann ki zot ador Bondye, me zot kondwit pa an akor avek bann prinsip Bondye ki ena dan so Parol inspire. Konsernan bann ki swadizan ti pretann fer seki bon, me pa ti viv an akor avek seki zot ti pe dir, lapot Pol finn ekrir: “Me, twa ki pe anseyn enn lot dimunn, eski to pa anseyn to mem? Twa, ki pe pres: ‘Pa kokin,’ to mem to kokin? Twa ki dir: ‘Pa komet ladilter,’ to mem to komet ladilter? . . . ‘Akoz zot, [dimunn] pe koz an mal lor non Bondye parmi bann nasyon’; parey kuma finn ekrir.”—Romin 2:21, 22, 24.

 4. Ki lefe nu bon kondwit ena?

⁴ Olye sali non Zeova, nu fer tu seki nu kapav pu donn Li laglwar par nu bon kondwit, parski sa ena enn bon lefe lor bann ki andeor kongregasyon Kretyin. Dabor, sa permet nu ferm labus bann ki kont nu. (1 Pyer 2:15) Me pli inportan ankor, nu bon kondwit atir bann dimunn ver lorganizasyon Zeova, ek li uver semin pu ki zot usi, zot donn Zeova laglwar, ek zot gayn lavi pu tuletan.—Akt 13:48.

 5. Ki bann kestyon nu bizin egzamine asterla?

⁵ Pwiski nu inparfe, kuma eski nu kapav evit ena enn kondwit ki kapav sali repitasyon Zeova, ek dekuraz bann ki pe rod laverite? Wi, kuma eski nu kapav reysi manifeste bonte?

Enn Frwi Lalimyer

 6. Sit detrwa “bann travay nwarte ki steril.” Me ki frwi bizin byin remarke parmi bann Kretyin?

⁶ Nu, bann Kretyin ki angaze ar Bondye, nu ena enn kitsoz ki ed nu pu evit “bann travay nwarte ki steril.” Koz manti, kokin, zure, bann koze sal lor sex, enn kondwit ki fer onte, bann plezantri grosye ek bwar ziska su, tusala zot bann travay ki sali repitasyon Bondye. (Efezyin 4:25, 28, 31; 5:3, 4, 11, 12, 18) Olye ki nu fer sa bann kalite travay la, nu bizin “kontiyn mars kuma bann zanfan lalimyer.” Lapot Pol dir ki “dan frwi lalimyer ena tu sort kalite bonte, lazistis ek laverite.” (Efezyin 5:8, 9) Donk, nu pu kapav kontiyn manifeste bonte akondisyon ki nu mars dan lalimyer. Me ki kalite lalimyer sa?

 7. Ki nu bizin fer pu kontiyn manifeste bonte, sa frwi lalimyer la?

⁷ Malgre nu bann linperfeksyon, nu kapav manifeste bonte si nu mars dan lalimyer spirityel. Enn ekrivin psom finn sante: “To parol li enn lalanp pu mo lipye ek enn lalimyer pu mo larut.” (Psom 119:105) Si nu’le kontiyn manifeste “frwi lalimyer” atraver “tu sort kalite bonte,” nu bizin profit regilyerman lalimyer spirityel ki truv dan Parol Bondye, ki egzamine avek buku latansyon dan bann piblikasyon Kretyin, ek ki diskite regilyerman dan nu bann reynion kot nu ador Bondye. (Lik 12:42; Romin 15:4; Ebre 10:24, 25) Nu bizin usi byin reflesi lor legzanp ek bann lanseynman Zezi Kris, parski limem ki “lalimyer lemond” ek ki “reflekte laglwar [Zeova].”—Zan 8:12; Ebre 1:1-3.

Enn Frwi Lespri

 8. Kifer eski nu kapav manifeste bonte?

⁸ Pena dut ki lalimyer spirityel ki nu gayne, ed nu pu manifeste bonte. Anplis, nu kapav manifeste sa kalite la parski nu les nu gide par lespri sin Bondye, uswa so lafors aktif. Bonte fer parti dan “frwi lespri.” (Galat 5:22, 23) Si nu sumet ar direksyon lespri sin Zeova, li pu devlop an nu so bon frwi, setadir bonte.

 9. Kuma eski nu kapav azir an akor avek bann parol Zezi ki truv dan Lik 11:9-13?

⁹ Nu gran dezir pu fer Zeova plezir kan nu manifeste bonte, ki enn frwi lespri, bizin pus nu pu azir an akor avek sa bann parol Zezi la: “Kontiyn demande, ek zot pu gayne, kontiyn rode, ek zot pu truve, kontiyn tap laport, ek laport la pu uver pu zot. Parski tu seki demande, gayne, ek tu seki rode, truve, ek laport pu uver pu tu seki tape. Wi, ki papa parmi zot, si so garson demann enn pwason, pu donn li enn serpan dan so plas? Uswa si li demann usi enn dizef, li pu donn li enn skorpyon? Alor, si zot, [inparfe ek donk] move kuma zot ete, zot konn donn zot zanfan seki bon, abe [nu] Papa ki dan lesyel Li, komye plis Li pu donn lespri sin bann ki demann Li!” (Lik 11:9-13) Anu swiv sa konsey Zezi la; anu priye pu demann Zeova so lespri pu ki nu kapav kontiyn manifeste so frwi bonte.

“Kontiyn Fer Seki Bon”

10. Ki bann diferan laspe bonte Zeova mansyone dan Egzod 34:6, 7?

¹⁰ Grasa lalimyer spirityel ki sorti dan Parol Bondye ek avek led lespri sin Bondye, nu kapav “kontiyn fer seki bon.” (Romin 13:3) Grasa enn letid Labib regilye, nu aprann ankor plis kuma nu kapav imit bonte Zeova. Dan premye lartik nu ti egzaminn bann diferan laspe bonte Zeova ki site dan bann parol ki Bondye ti dir Moiz, ki truv dan Egzod 34:6, 7. Nu lir: “Zeova, Zeova, enn Bondye ki ena mizerikord ek konpasyon, ki pa ankoler vit, ek ki ena enn labondans lamur fidel ek laverite, ki prezerv lamur fidel pu bann milye, ki pardonn erer, fot ek pese, me par okenn fason Li pa pu retir so pinisyon.” Si nu egzaminn byin pre sa bann diferan fason ki Zeova manifeste bonte la, sa pu ed nu pu “kontiyn fer seki bon.”

11. Kan nu aprann ki Zeova ena mizerikord ek konpasyon, ki lefe sa bizin ena lor nu?

¹¹ Sa bann parol Bondye la fer nu pran konsyans ki li neseser ki nu ena mizerikord ek konpasyon parey kuma Zeova. Zezi ti dir: “Ere bann ki ena mizerikord, parski pu fer zot usi mizerikord.” (Matye 5:7; Lik 6:36) Parski nu kone ki Zeova ena konpasyon, sa pus nu pu ena konpasyon ek montre nu bon anver lezot, avek bann dimunn ar ki nu prese usi. Sa li an akor avek konsey ki Lapot Pol finn done: “Les zot parol ena tuzur sarm, asezone avek disel, pu ki zot kone kuma zot bizin reponn sakenn.”—Kolosyin 4:6.

12. (a) Pwiski Bondye pa ankoler vit, kuma eski nu bizin azir anver lezot? (b) Lamur fidel Zeova pus nu pu fer ki kitsoz?

¹² Pwiski Bondye pa ankoler vit, nu dezir pu “kontiyn fer seki bon” pus nu pu pas lor bann ti fot nu bann frer ek ser ek pu aret nu lor zot bann bon kalite. (Matye 7:5; Zak 1:19) Lamur fidel Zeova pus nu pu manifeste sa kalite la nu’si, mem dan bann sityasyon byin-byin difisil. Sa li vremem enn kalite ki dezirab.—Proverb 19:22.

13. Kuma eski nu bizin azir pu montre ki Zeova ‘ena labondans laverite’?

¹³ Pwiski nu Papa ki dan lesyel ‘ena labondans laverite,’ nu fer zefor pu ‘rekomann nu mem kuma so bann minis par bann parol ki vre.’ (2 Korintyin 6:3-7) Parmi set kitsoz ki Zeova deteste, ena “enn lalang ki koz manti” ek “enn fos temwin ki nek larg bann foste.” (Proverb 6:16-19) Alor nu dezir pu fer Bondye plezir pus nu pu ‘rezet bann kitsoz ki manti ek pu koz laverite.’ (Efezyin 4:25) Fode zame nu pa manke pu manifeste bonte dan sa fason byin inportan la.

14. Kifer eski nu bizin pardone?

¹⁴ Bann parol ki Bondye ti dir Moiz bizin usi pus nu pu pardone, parski Zeova pre pu pardone. (Matye 6:14, 15) Byinsir, Zeova pini bann peser ki pa’le repanti. Alor, nu bizin respekte so bann prinsip bonte an seki konsern gard propte spirityel kongregasyon.—Levitik 5:1; 1 Korintyin 5:11, 12; 1 Timote 5:22.

“Fer Byin Atansyon”

15, 16. Kuma eski konsey Pol ki truv dan Efezyin 5:15-19 ed nu pu kontiyn manifeste bonte?

¹⁵ Pu kontiyn manifeste bonte malgre mesanste ki antur nu, nu bizin ranpli nu avek lespri Bondye ek fer atansyon kuma nu marse. Zisteman, Pol ti ankuraz bann Kretyin dan Efez: “Fer byin atansyon ki zot manyer marse pa kuma bann dimunn ki pena sazes me kuma bann [dimunn] saz, reaste letan ki bizin pu zot mem, parski sa bann zur la byin move. Akoz sa mem aret vinn kuma bann ki pa rezone, me kontiyn konpran ki vedir volonte Zeova. Anplis, pa sule ar divin parski ladan ena kondwit imoral, me kontiyn ranpli avek lespri; koz ar zot mem avek bann psom, bann luanz pu Bondye ek bann sante spirityel, sant avek lamizik dan zot leker pu Zeova.” (Efezyin 5:15-19) Sa konsey la byin adapte pu nu dan sa bann letan kritik la.—2 Timote 3:1.

¹⁶ Si nu anvi kontiyn fer seki bon, nu bizin vey byin pu mars kuma bann ki manifeste sazes Bondye. (Zak 3:17) Nu bizin evit fer bann pese grav ek nu bizin ranpli avek lespri sin, ek les li gid nu. (Galat 5:19-25) Nu kapav kontiyn fer seki bon si nu aplik bann instriksyon spirityel ki nu gayne dan bann reynion Kretyin, ek dan tu bann lasanble. Bann parol ki Pol finn dir bann Efezyin kapav fer nu rapel usi ki dan preske tu nu bann rasanbleman kot nu ador Bondye, nu profit bann “sante spirityel” ki nu sante avek tu nu leker. Enn kantite sa bann kantik la koz lor bann kalite spirityel, parey kuma bonte.

17. Mem si zot sityasyon anpes zot pu asiste regilyerman bann reynion, ki lasirans bann Kretyin ki byin malad kapav ena?

¹⁷ Ki nu kapav dir lor nu bann frer ek ser ki tuletan pe bizin viv avek enn maladi grav ek ki pa kapav asiste bann reynion Kretyin regilyerman? Devet zot dekuraze ek zot perdi zot lazwa parski zot pa kapav tuletan ador Zeova ansam avek zot bann frer ek ser spirityel. Me, zot kapav sir ki Zeova konpran zot sityasyon. Li pu gard zot dan lalimyer, Li pu donn zot so lespri sin, ek Li pu ed zot pu kontiyn fer seki bon.—Izai 57:15.

18. Ki pu ed nu pu kontiyn manifeste bonte?

¹⁸ Pu nu kontiyn manifeste bonte, nu bizin vey lor nu bann frekantasyon ek nu bizin turn ledo ar bann ki “pa kontan seki bon.” (2 Timote 3:2-5; 1 Korintyin 15:33) Si nu aplik sa konsey la, sa pu anpes nu “fer lespri sin Bondye lapenn,” kan nu azir kont so direksyon. (Efezyin 4:30) Anplis, nu gayn led pu fer seki bon si nu vinn byin pros avek bann ki montre par zot fason viv ki zot bann dimunn ki kontan bonte ek ki les zot dirize par lespri sin Zeova.—Amos 5:15; Romin 8:14; Galat 5:18.

Bonte Amenn Bann Bon Rezilta

19-21. Sit bann lexperyans ki montre ki lefe sa kapav ena kan nu manifeste bonte.

¹⁹ Kan nu mars dan lalimyer sprityel, kan nu sumet ar direksyon lespri Bondye, ek nu fer atansyon kuma nu marse, sa pu ed nu pu evit fer seki move ek pu “kontiyn fer seki bon.” Anretur sa kapav donn bann bon rezilta. Get seki ti ariv Zongezile, enn Temwin Zeova dan Afrque du Sud. Enn gramatin, letan li pe al lekol, li tyeke komye kas li ena dan so ti kont labank. Resi ki sorti dan gise otomatik la indike par erer ki li ena 42,000 rann (apepre Rs 126,000). Enn gard sekirite labank ek lezot dimunn ankor ankuraz li pu tir kas la ek depoz li dan enn lot labank. Me, zis sa kup Temwin avek ki li reste la ki finn konsey li pa tir enn su dan sa kas la.

²⁰ Landemin, ti enn zur lasemenn, Zongezile al labank pu raport sa erer la. Lerla, zot finn dekuver ki so nimero kont parey ar nimero kont enn biznesmenn byin ris ki par erer finn depoz larzan lor move kont. Kan li finn aprann ki Zongezile pa finn depans enn su dan sa kas la, biznesmenn la finn demann li: “Ki relizyon to ete?” Zongezile finn fer li kone ki li enn Temwin Zeova. Bann ofisye labank finn byin felisit li ek zot finn dir li: “Nu swete ki tu dimunn ti onet kuma bann Temwin Zeova.” Wi, bann bon aksyon ki reflekte bonte ek lonete kapav amenn bann dimunn donn Zeova laglwar.—Ebre 13:18.

²¹ Li pa neseser fer bann bel-bel bon aksyon pu ki sa ena enn bon lefe lor lezot. Enn lot legzanp: Enn zenn Temwin ki ti enn predikater aplintan dan enn bann zil Samoa, ti bizin al lopital. Bann dimunn ti pe atann pu pas ar dokter, ek sa Temwin la finn remark enn madam aze pre kot li ki ti byin malad. L’inn fer demars pu ki madam la pas dan so tur pu ki li kapav gayn bann swin medikal pli vit. Plitar, sa temwin la finn zwenn madam aze la dan bazar. Madam la finn rapel li ek finn rapel usi so bon aksyon dan lopital. Li finn dir: “Aster mo kone ki bann Temwin Zeova vremem kontan zot prosin.” Alor ki avan li pa ti interese ar mesaz laverite, bonte ki sa Temwin la finn manifeste anver li finn ena enn bon lefe lor li. Li finn aksepte enn letid Labib kot li ek li finn kumans aprann lor Parol Bondye.

22. Sit enn fason inportan pu “kontiyn fer seki bon.”

²² Sirman u’si u kapav sit bann lexperyans pu montre kan manifeste bonte, ki valer sa ena. Kan nu partisip regilyerman dan predikasyon labonn nuvel lor Rwayom Bondye, sa li enn fason inportan pu “kontiyn fer seki bon.” (Matye 24:14) Anu kontiyn partisip enn fason byin aktif dan sa laktivite ki ena buku valer la, san ki nu bliye ki sa li enn fason pu fer seki bon, sirtu anver bann ki montre lintere. Me pli inportan ankor, nu minister ek nu bon kondwit donn laglwar Zeova, lasurs bonte.—Matye 19:16, 17.

Kontiyn “Pratik Seki Bon”

23. Kifer eski minister Kretyin li enn bon travay?

²³ Pena dut ki nu minister li enn bon travay. Grasa sa travay la, nu ek bann ki ekut mesaz Labib kapav gayn delivrans, ek pran semin ki al ver lavi pu tuletan. (Matye 7:13, 14; 1 Timote 4:16) Kan nu bizin pran bann desizyon, lerla, nu dezir pu fer seki bon kapav amenn nu demann nu mem: ‘Ki lefe sa desizyon la pu ena lor laktivite predikasyon Rwayom? Eski seki mo pe rod fer la li vremem saz? Eski sa pu fer lezot aksepte “labonn nuvel eternel” ek ena enn relasyon byin pros avek Bondye Zeova?’ (Revelasyon 14:6) Nu pu konn buku boner si nu pran enn desizyon ki favoriz bann lintere Rwayom.—Matye 6:33; Akt 20:35.

24, 25. Kuma eski nu kapav fer seki bon dan kongregasyon, ek ki lasirans nu kapav ena si nu kontiyn manifeste bonte?

²⁴ Fode zame nu suzestim bann bon lefe ki kapav ena kan nu manifeste bonte. Nu kapav kontiyn manifeste sa kalite la kan nu sutenir kongregasyon Kretyin ek nu fer tu seki nu kapav pu favoriz so lintere ek so byinet. Wi, nu fer seki bon si nu asiste ek partisip regilyerman dan bann reynion Kretyin. Zis nu prezans mem kapav ankuraz nu bann frer ek ser; ek nu bann komanter byin prepare kapav fortifye zot lor plan spirityel. Nu fer usi seki bon kan nu servi nu bann resurs pu lantretyin Lasal DiRwayom ek kan nu donn enn kudmin pu gard li prop. (2 Lerwa 22:3-7; 2 Korintyin 9:6, 7) Wi, “tank ki nu ena lokazyon, anu pratik seki bon anver tu dimunn, me sirtu anver nu bann fami dan lafwa.”—Galat 6:10.

²⁵ Li vre ki nu pa kapav prevwar sak sityasyon kot nu pu bizin manifeste bonte. Me, amezir ki nu fer fas ar bann nuvo sityasyon difisil, anu rod lalimyer ki sorti dan Labib, anu priye pu gayn lespri sin Zeova, ek anu fer tu nu posib pu fer so volonte ki bon ek ki parfe. (Romin 2:9, 10; 12:2) Nu kapav sir ki si nu kontiyn manifeste bonte, Zeova pu donn nu buku benediksyon.

Kuma U Pu Reponn?

• Kuma eski nu kapav akonpli pli bon kitsoz ki kapav ena?

• Kifer eski bonte li enn ‘frwi lalimyer’?

• Kifer apel bonte enn ‘frwi lespri’?

• Ki lefe nu bon kondwit ena?

[Zimaz lor paz 15]

Parol Bondye ek so lespri sin ed nu pu manifeste bonte

[Zimaz lor paz 16]

Manifeste bonte amenn bann bon rezilta