Bann Chrétien Bizin Fiere Seki Zot Été!

“Si enn kikenn glorifié li, li bizin glorifié li en Jéhovah.”—1 CORINTHIENS 1:31.

 1. Ki tendance nou trouvé dan l’attitude bann dimoune envers la religion?

“APATHÉISME.” C’est sa mot-la ki enn kikenn ki faire bann commentaire lor la religion, ti servi pou montré ki beaucoup dimoune nepli prend compte zot prop religion. Li ti donne sa l’explication-la: “Enn kitsoz nouveau ki finn ena dan la religion zordi, li pa enn religion en li-mem; mais plutot enn l’attitude, ki nou kapav appel ‘l’apathéisme.’” Li ti expliké ki bann dimoune ki manifesté sa l’attitude-la, zot “nepli trop prend compte zot prop religion.” Li ti dire aussi ki beaucoup dimoune “croire en Bondié . . . ; mais zot pa prend Li vrai-mem compte.”

 2. (a) Kifer li pa etonnant ki bann dimoune nepli prend la religion compte? (b) Ki danger sa l’attitude-la kapav ena pou bann vrai Chrétien?

² Bann ki etudié la Bible pa etonné kan zot trouve dimoune pa prend compte coumsa. (Luc 18:8) En plus, zot ti attann ki dimoune pou nepli interessé ar la religion. Fausse religion finn trompe bann dimoune ek finn decevoir zot depuis longtemps. (Révélation 17:15, 16) Seulement, li bien dangereux ki sa l’attitude-la, influence bann vrai Chrétien ek faire zot servi avek enn leker partagé ek mank zèle dan zot service pou Bondié. Nou pou konn beaucoup problem si nou pa prend nou la-foi compte ek si nou perdi nou zèle pou la verité ek dan nou service pou Bondié. Jésus ti mette en garde bann Chrétien kont sa l’attitude-la kan li ti corrige bann premier Chrétien ki ti vive dan la ville Laodicée, li ti dire la congregation: “To ni frais ni chaud. Mo ti pou prefere ki to frais ou-soit chaud. . . . To tiede.”—Révélation 3:15-18.

Nou Bizin Koné Ki Nou Été

 3. Dan ki domaine ki concerne zot l’identité, bann Chrétien kapav fiere?

³ Pou combatte “l’apathéisme” spirituel, bann Chrétien bizin ena enn l’idée bien clair lor seki zot été, ek zot bizin fiere a cause l’identité ki zot ena en tant ki Chrétien. La Bible faire nou comprend ki nou été en tant ki serviteur Jéhovah ek disciple Christ. Nou bann “temoin” Jéhovah, nou “travail ensam avek Bondié,” kan nou partage “la bonne nouvelle” avek lezot. (Isaïe 43:10; 1 Corinthiens 3:9; Matthieu 24:14) Nou bann dimoune ki ‘content nou camarade.’ (Jean 13:34) Bann vrai Chrétien, zot bann dimoune ki “grace a la pratik, developpe zot capacité mental pou faire difference entre seki bon ek seki mauvais.” (Hébreux 5:14) Nou “eclaire lezot dan le monde.” (Philippiens 2:15) Nou faire zeffort pou “garde enn bon conduite devant tou dimoune.”—1 Pierre 2:12; 2 Pierre 3:11, 14.

 4. Couma enn adorateur Jéhovah kapav koné ki li pa été?

⁴ Bann vrai adorateur Jéhovah koné aussi seki zot pa été. “Zot pa faire partie dan le monde,” pareil couma zot Chef, Jésus Christ pa ti faire partie dan le monde. (Jean 17:16) Zot reste separé ar “bann nation,” ki “dan noirté spirituel, ek ki bien loin ar la vie ki Bondié offert.” (Éphésiens 4:17, 18) C’est pou sa raison-la ki bann disciple Jésus “rejette enn la-vie ki Bondié pa content ek bann desir sa lé-monde-la, ek . . . [zot] vive avek bon jugement ek justice ek l’attachement ar Bondié, dan sa system-la.”—Tite 2:12.

 5. Ki sa vedir ‘glorifié-nou en Jéhovah’?

⁵ Le fait ki nou comprend ki nou été, ek ki relation nou ena avek Jéhovah, ki tousel Chef dan l’univers, sa pousse nou pou ‘glorifié-nou en Jéhovah.’ (1 Corinthiens 1:31) Dan ki sens eski nou glorifié-nou? En tant ki vrai Chrétien, nou fiere ki Jéhovah nou Bondié. Nou suive sa conseil-la: “Si enn kikenn flatte-li-mem, li bizin flatte-li parski li trouve pli loin ki l’apparence, ek parski li konn moi, li koné ki moi mo Jéhovah, mo manifesté l’amour fidel ek la justice lor la terre.” (Jérémie 9:24) Nou ‘glorifié-nou parski nou ena privilege pou konn Bondié ek parski Li servi nou pou aide lezot dimoune.

Li Pa Facile pou Garde enn Bon l’Attitude

 6. Kifer certain trouve sa difficile pou garde enn l’idée bien clair lor zot l’identité en tant ki Chrétien?

⁶ Li vrai ki li pa toujours facile pou garde enn l’idée bien clair lor nou l’identité en tant ki Chrétien. Enn jeune homme ki finn elevé dan enn famille Chrétien rappel ki pendant enn temps li ti faible lor plan spirituel. Li dire: “Parfois mo ti ena l’impression ki mo pa ti koné kifer mo ti enn Témoin de Jéhovah. Depuis tipti mo parent inn enseigne moi la verité. Mais parfois mo ti ena l’impression ki sa religion-la ti zis couma tou lezot religion.” Ena lezot ki kitfois finn laisse bann film, la musique, radio, television, etc., ek aussi l’attitude bann dimoune ki pa croire dan Bondié, influence l’idée ki zot ena lor zot l’identité. (Éphésiens 2:2, 3) Li possible ki parfois certain Chrétien passe par bann moment kot zot nepli koné ki zot été, nepli koné ki pou croire ek nepli koné kot zot pé allé.

 7. (a) Dan ki sens bann Chrétien bizin examine zot-mem? (b) Kan eski ena enn danger?

⁷ Eski li mauvais ki de temps en temps, nou ré-examine nou-mem? Non. Kitfois ou rappel ki l’apotre Paul ti encourage bann Chrétien pou contigne examine zot-mem. Li ti dire: “Contigne testé zot-mem pou guetté si zot dan la foi, ek contigne prouvé ki zot été.” (2 Corinthiens 13:5) Ici, l’apotre Paul ti pé encourage bann Chrétien pou faire enn grand zeffort pou guetté si zot pa finn developpe okenn faiblesse spirituel, ek pou corrige sa si li necessaire. Enn Chrétien ki pé ‘testé si li dan la foi,’ bizin guetté si so bann parole ek so bann action, en accord avek so la-foi. Seulement, nou bizin faire bien attention. Par exemple, si enn Chrétien commence pose bann question couma: ‘Kisannla mo été?’ ou-soit si li commence rod bann reponse ki pena okenn rapport ar so relation avek Jéhovah, ou-soit ki en dehors congregation Chrétien, sa kapav mem faire li quitte la verité.a Nou pa oulé jamais ‘faire naufrage concernant nou la-foi’!—1 Timothée 1:19.

Bann Chrétien Aussi Konn Bann Problem

8, 9. (a) Couma Moïse ti montré ki li pa ti ena confiance en li-mem? (b) Couma Jéhovah ti rassure Moïse? (c) Ki l’effet l’assurance ki Jéhovah donné, ena lor ou?

⁸ Eski bann Chrétien ki parfois mank confiance en zot-mem, bizin senti-zot decouragé? Non, pa ditou! Au contraire, sa kapav reconfort zot pou koné ki pa zot tousel ki ena sa sentiment-la. Bann fidel serviteur Bondié ki ti vive dan le passé aussi finn passe par sa bann moment-la. Prend l’exemple Moïse ki ti ena enn la-foi extraordinaire, ki ti fidel ek ki ti bien devoué ar Jéhovah. Kan Jéhovah ti donne li enn travail ki pou li, ti parette impossible pou faire, li ti demandé: “Ki mo été, moi?” (Exode 3:11) Surement li ti pé pensé: ‘Mo enn nanyin ditou!’ ou-soit ‘Jamais, mo pa pou reussi!’ Ena beaucoup kitsoz dan la vie Moïse ki ti kapav inn faire-li pensé ki li enn incapable. Li ti sorti dan enn peuple ki ti en esclavage. Bann Israélite ti rejette li. Li pa ti ena la parole facile. (Exode 1:13, 14; 2:11-14; 4:10) Li ti enn berger, enn travail ki bann Égyptien ti meprisé. (Genèse 46:34) Li pa etonnant ki li ti senti-li incapable pou al delivré peuple Bondié ki ti en esclavage!

⁹ Jéhovah ti rassure Moïse par deux promesse. Li ti dire li: “Mo pou avek toi, ek mo donne toi enn signe ki mo finn envoye toi: Kan to pou fini delivré [mo] peuple en Égypte, zot pou vinn servi vrai Bondié dan sa montagne-la.” (Exode 3:12) Moïse ti mank confiance en li-mem, mais Bondié ti dire li ki Li pou avek li touletan. En plus, Jéhovah ti montré ki sans faute, li pou delivré So peuple. Pendant bann siecle apré aussi, Bondié finn faire promesse ki Li pou soutenir so bann serviteur. Par exemple, kan nation Israël ti pré pou rentre dan la Terre Promise, Jéhovah ti dire zot par l’intermediaire Moïse: “Prend courage ek reste fort. . . . Jéhovah to Bondié pé marche avek toi. Jamais Li pa pou quitte toi, ni pou abandonne toi.” (Deutéronome 31:6) Jéhovah ti donne Josué aussi sa l’assurance-la: “Personne pa pou tini devant toi pendant tou to la-vie. . . . Mo pou avek toi. Jamais mo pa pou quitte toi, ni mo pou abandonne toi.” (Josué 1:5) Ek Li faire sa promesse-la ar bann Chrétien: “Jamais mo pa pou quitte toi, ni mo pou abandonne toi.” (Hébreux 13:5) Kan nou ena enn soutien solide coumsa, eski sa pa faire nou fiere ki nou bann Chrétien?

10, 11. Ki ti aide Asaph pou garde enn bon l’attitude lor so service pou Jéhovah?

¹⁰ Environ 500 an apré Moïse, enn Lévite fidel ki ti appel Asaph ti dire bien franc ki li ti ena bann doute lor l’importance pou contigne reste fidel. Alors ki li ti pé lutté pou kapav servi Bondié malgré bann difficulté ek bann tentation, Asaph ti trouve certain dimoune ki ti meprise Bondié, ti vinn pli puissant ek zot ti pli prosperé. Couma sa ti affecté Asaph? Li ti dire: “Moi, mo lipié finn preské prend enn mauvais chemin, n’importe ki ti zaffaire ti kapav faire moi tombé. Mo ti pé envié bann ki ti pé faire vantard, kan mo ti trouve la paix bann mauvais dimoune.” Li ti commence demandé si vrai-mem li vaut la peine pou servi Jéhovah. Asaph ti commence ena sa pensé-la: “Oui, c’est pou nanyin ki mo finn purifié mo leker, ek ki mo pé lave mo la-main dan l’innocence. Mo ti pé souffert toute la-journée.”—Psaume 73:2, 3, 13, 14.

¹¹ Couma Asaph ti faire face ar sa bann sentiment ki ti pé troublé li-la? Eski li ti ignore zot? Non. Li ti dire Bondié tou seki li ressenti dan enn la-priere, ki nou trouve dan Psaume 73. Apré ki Asaph ti visite temple Jéhovah, li ti faire enn grand changement dan so l’attitude. Kan li ti la-bas, li ti commence realisé ki pena pli bon fason pou amenn nou la-vie, ki reste attaché ar Bondié. Apré ki li finn ré-commence apprecié so service pou Jéhovah, li ti comprend ki Jéhovah detesté le mal ek ki dan moment ki Jéhovah decidé, Li pou puni bann mauvais dimoune. (Psaume 73:17-19) Avek sa changement l’attitude-la, Asaph ti comprend pli bien seki li été: enn kikenn ki ena privilege pou servi Jéhovah. Li ti dire Bondié: “Mo avek toi touletan, to finn prend mo la-main droite. Par to conseil to pou guide moi, et apré sa, to pou amenn moi vers la gloire.” (Psaume 73:23, 24) Asaph ti ré-gagne fierté pou servi Jéhovah.—Psaume 34:2.

Zot Ti Konn Bien Seki Zot Été Vrai-Mem

12, 13. Donne l’exemple bann personnage Biblik ki ti fiere pou servi Jéhovah.

¹² Enn fason pou fortifié nou conviction lor seki nou ena vrai-mem en tant ki Chrétien, c’est kan nou examine la foi bann fidel adorateur Jéhovah ek imite zot. Malgré bann grand problem, sa bann dimoune-la ti vrai-mem fiere pou servi Bondié. Anou prend l’exemple Joseph, garson Jacob. Kan li ti encore bien jeune, so bann frere ti trahir li ek ti vann li couma enn esclave avek bann dimoune ki ti amenn li en Égypte. La-bas, li ti bien-bien loin ar so Papa, ki ti enn serviteur Bondié. Kot li, Joseph ti senti-li en securité ek li ti ena l’amour so famille, mais la-bas, li ti dan enn l’environnement bien different. Pendant ki li ti en Égypte, Joseph pa ti ena personne pou rappel li bann bon principe, ek li ti bizin faire face ar bann situation difficile ki ti testé so moralité ek so confiance en Jéhovah. Pourtant, li ti faire enn grand zeffort pou li kapav rappel toujours ki li enn serviteur Bondié, ek li ti reste fidel ar seki droite. Li ti fiere pou servi Jéhovah, mem si li ti vive dan enn l’environnement kot personne pa ti ena mem principe ki li, ek li pa ti hesité pou dire seki li ti pensé.—Genèse 39:7-10.

¹³ Environ 800 an plitar, enn tifi Israélite ti vinn esclave enn general Syrien ki ti appel Naamân. Sa tifi-la pa ti blié ki li ti enn adorateur Jéhovah. Kan enn l’occasion ti presenté, li ti donne enn bon temoignage lor Jéhovah ek li ti dire ki Élisha ti enn prophete vrai Bondié. (2 Rois 5:1-19) Plusieurs l’année apré, lé-roi Yoshiya ki ti encore jeune, ti faire bann grand changement dan la-loi ki concerne la religion, malgré corruption ki ti existé dan so lepok. Li ti repare temple Bondié, ek li ti ré-amenn la nation vers l’adoration Jéhovah. Li ti ena enn grand fierté pou so la-foi ek so l’adoration pou Jéhovah. (2 Chroniques, chapitre 34, 35) Kan Daniel ek so trois compagnon Hébreux ti dan Babylone, jamais zot pa ti blié ki zot ti bann serviteur Jéhovah. Zot ti garde zot fidelité malgré bann pression ek bann tentation. Oui, li clair ki zot ti fiere pou servi Jéhovah.—Daniel 1:8-20.

Reste Fiere Seki Ou Été

14, 15. Couma nou kapav montré ki nou fiere seki nou été?

¹⁴ Sa bann serviteur Jéhovah-la ti reussi zot la-vie, parski zot ti fiere seki zot ti été devant Bondié. Ki nou kapav dire lor nou zordi? Couma nou kapav montré ki nou fiere seki nou été?

¹⁵ D’abord, sa vedir ki nou bien content ki nou enn parmi bann dimoune ki porte nom Jéhovah, ki gagne so benediction ek so faveur. Bondié bien koné kisannla ki servi Li. Dan enn period kot ti ena enn grand confusion dan la religion, l’apotre Paul ti ecrire: “Jéhovah koné kisannla ki servi Li.” (2 Timothée 2:19; Nombres 16:5) Jéhovah fiere kan Li guette bann dimoune “ki servi Li.” Li dire: “Seki pé touche zot, pé touche mo la-grain lizié.” (Zekaria 2:8) Oui, nou sur ki Jéhovah content nou. En retour, nou l’adoration pou Jéhovah bizin basé lor enn grand l’amour pou Li. Paul ti dire: “Si enn dimoune content Bondié, Li konn sa dimoune-la.”—1 Corinthiens 8:3.

16, 17. Kifer bann Chrétien, jeune ek vieux toulé-deux, zot kapav fiere de zot l’heritage spirituel?

¹⁶ Bann jeune ki finn grandi couma bann Témoins de Jéhovah, bizin guetté si sentiment ki zot ena lor zot l’identité en tant ki Chrétien, pé vinn pli fort parski zot pé vinn pli proche avek Jéhovah. Zot pa kapav compte zis lor la foi zot parent. Concernant chaque serviteur Bondié, Paul ti ecrire: “C’est devant so prop chef ki enn kikenn pou tini deboute ou-soit pou tombé.” Apré, Paul dire: “Sakenn pou rann enn compte pou li-mem devant Bondié.” (Romains 14:4, 12) Li clair ki si ou pé accepté religion ou parent avek enn leker partagé, ou pa pou kapav ena enn relation intime ek durable avek Jéhovah.

¹⁷ Pendant l’histoire l’humanité, finn ena beaucoup Témoins de Jéhovah. Sa ti commence depuis Abel—environ 6,000 an de cela—ziska “la grande foule” bann Témoins de Jéhovah dan lepok modern, ek li pou contigné encore avek enn grand quantité adorateur Jéhovah ki pou gagne la vie eternel. (Révélation 7:9; Hébreux 11:4) Nou parmi bann ki finn fek joinde sa longue la-liste bann adorateur fidel-la. Nou finn gagne vrai-mem enn grand l’heritage lor plan spirituel!

18. Couma nou bann valeur moral ek nou bann principe faire nou different avek le monde?

¹⁸ Parmi bann kitsoz ki identifié nou en tant ki Chrétien, ena aussi bann valeur moral, bann qualité, bann principe, ek bann lezot kitsoz bien precis. C’est sa-mem ki la Bible appel “le Chemin,” sel chemin ki faire nou reussi nou la-vie ek faire Bondié plaisir. (Actes 9:2; Éphésiens 4:22-24) Bann Chrétien “verifié tou kitsoz” ek zot “tini ferme ar seki bon”! (1 Thessaloniciens 5:21) Nou comprend bien sa grand difference ki ena-la entre vrai religion Chrétien ek le monde ki eloigné ar Bondié. Jéhovah pa laisse okenn doute entre vrai l’adoration ek seki fausse. Par l’intermediaire so prophete Malaki, Li ti dire: “C’est sur ki zot pou trouve encore enn fois difference entre enn kikenn ki droite ek enn kikenn ki mauvais, entre enn kikenn ki servi Bondié ek enn kikenn ki pa finn servi Li.”—Malaki 3:18.

19. Ki jamais pa pou arrive bann vrai Chrétien?

¹⁹ Zordi dan sa lé-monde ki rempli ar confusion-la, ki kapav aide nou pou reste fiere ki nou pé servi Jéhovah, ek garde enn l’idée clair lor nou identité en tant ki Chrétien? Ena bann bon conseil dan prochain l’article. Letan ou reflechi lor sa bann conseil-la, ou pou kapav sur enn kitsoz: Jamais bann vrai Chrétien pou tombe dan l’apathéisme, ou l’indifference envers zot religion.

[Note]

Eski Ou Rappel?

• Couma bann Chrétien kapav ‘glorifié zot en Jéhovah’?

• Ki ou finn aprann dan l’exemple Moïse ek Asaph?

• Ki personnage Biblik ki ti fiere parski zot ti servi Jéhovah?

• Couma nou kapav montré ki nou fiere nou l’identité en tant ki Chrétien?

[Zimage, page 14]

Pendant enn certain temps, Moïse ti mank confiance en li-mem

[Zimage, page 15]

Beaucoup serviteur Jéhovah dan le passé ti fiere seki zot ti été