Mo Nepli Anvi Viv​—Eski Labib Kapav Ed Mwa Si Mo Pe Pans pou Swisid Mwa?

Wi, Labib kapav ed ou! Labib sorti kot “Bondie ki konsol bann ki abat.” (2 Korintien 7:6, Nouvo Testaman Dan Kreol Morisien, NTKM) Mem si Labib pa enn liv ki koz lor bann problem emosionel, li’nn rekonfort ek ankouraz boukou dimounn ki ti anvi mor. Li’nn mem ed zot pou sanz zot fason panse. Bann konsey ki ena dan Labib kapav ed ou osi.

• Ki bann konsey itil ena dan Labib?

• Eski Labib koz lor bann dimounn ki ti anvi mor?

• Ki bann verse Labib kapav ed ou si ou pe pans pou swisid ou?

• Ki ou kapav fer si enn kamarad dir ou: “Mo nepli anvi viv”?

• Me si mo’nn deza esey swisid mwa?

• ● Dir lezot seki ou resanti.

  Seki Labib dir: “Enn vre kamarad montre so lamour touletan, ek li enn frer ki’nn ne pou bann moman difisil.”​—Proverb 17:17.

  Ki savedir?: Nou bizin ki lezot ed nou kan nou ena bann panse negatif.

  Si ou pa dir lezot seki ou resanti, ou bann santiman negatif kapav vinn enn pwa ki difisil pou sarye. Me si ou dir lezot seki ou resanti, sa kapav ed ou pou santi ou inpe pli bien ek sa kapav ed ou pou trouv ou sitiasion dan enn lot fason.

  

  Esey sa: Koz ar enn kikenn azordi mem, kitfwa enn manb ou fami ouswa enn kamarad ki ou fer konfians.a Ou kapav osi ekrir seki ou resanti.

• ● Rod led enn dokter.

  Seki Labib dir: “Bann dimoun ki bien pa bizin dokter, zis bann seki malad.”​—Matie 9:12, NTKM.

  Ki savedir?: Nou bizin rod led enn dokter kan nou malad.

  Parfwa kan enn dimounn pe pans pou swisid li, se enn sign ki li ena enn maladi mantal ek emosionel. Parey kouma nou pa pou gagn onte si nou ena enn maladi fizik, fode pa ki nou gagn onte si nou ena enn maladi mantal ek emosionel. Ena bann tretman pou sa bann maladi-la.

  Esey sa: Rod led enn dokter pli vit posib.

• ● Rapel ki Bondie kontan ou.

  Seki Labib dir: “Eski pa vann sink mwano pou de sou? Pourtan, Bondie pa bliye enn sel ladan. . . . Pa per, zot ena plis valer ki tou mwano.”​—Lik 12:6, 7, NTKM.

  Ki savedir?: Ou inportan pou Bondie.

  Kitfwa ou santi ou tousel, me Bondie trouve par ki ou pe pase. Li gagn ou traka, mem si ou nepli anvi viv. Psom 51:17 dir: “Enn leker ki’nn kase ek ki dan lapenn, A Bondie, to pa pou rezet sa.” Bondie anvi ki ou viv parski Li kontan ou.

  Esey sa: Get bann prev ki ena dan Labib ki Bondie kontan ou. Par exanp, lir Latour Degard No.3 2018 lor jw.org/mfe.

• ● Priye Bondie.

  Seki Labib dir: “Met tou zot traka lor [Bondie], parski li pran zot swin.”​—1 Pier 5:7, NTKM.

  Ki savedir?: Bondie anvi ki ou dir Li seki ena lor ou leker, seki ou resanti, ek seki pe fatig ou.

  Bondie kapav donn ou lape ek lafors pou kontign avanse. (Filipien 4:6, 7, 13) Se koumsa ki Bondie soutenir bann ki priye Li pou gagn led.​—Psom 55:22, PKM.

  

  Esey sa: Priye Bondie zordi. Servi so nom, Zeova, ek dir Li seki ou resanti. (Psom 83:18) Demann Li pou ed ou kontign avanse.

• ● Reflesi lor bann promes ki Labib fer konsernan lavenir.

  Seki Labib dir: “Sa lesperans la, li kouma enn lank solid ek stab ki tini nou pou lavi.”​—Ebre 6:19, NTKM.

  Ki savedir?: Akoz ou bann lemosion, enn zour ou kapav santi ou bien, ek so landemin ou pa santi ou bien, parey kouma enn bato ki pe pas dan enn siklonn. Me lesperans ki ena dan Labib kapav ed ou pou res stab.

  Sa lesperans-la, li pa zis enn rev. Li baze lor promes ki Bondie inn fer pou tir tou bann kitsoz ki fer nou soufer.​—Revelasion 21:4, NTKM.

  Esey sa: Lir leson 5 dan brosir Enn Bon Nouvel Ki Sorti kot Bondie!, pou aprann plis lor lesperans ki ena dan Labib.

• ● Fer bann kitsoz ki ou kontan.

  Seki Labib dir: “Enn leker ki dan lazwa li enn bon medsinn.”​—Proverb 17:22.

  Ki savedir?: Kan nou fer bann kitsoz ki nou kontan, sa kapav ede pou ki nou ena enn pli bon moral ek enn pli bon lasante.

  

  Esey sa: Fer bann kitsoz ki ou kontan. Par exanp, ekout bann lamizik ki fer ou dibien, lir enn kitsoz ki pou ankouraz ou, ouswa trouv enn pastan. Ou pou pli ere si ou fer bann kitsoz pou lezot, mem si se bann ti kitsoz.​—Zistwar Bann Apot 20:35, NTKM.

• ● Pran swin ou lasante.

  Seki Labib dir: “Lantrennman fizik li itil.”​—1 Timote 4:8.

  Ki savedir?: Sa fer nou dibien kan nou fer lexersis, kan nou dormi bien, ek kan nou manz bann kitsoz ki bon pou nou lasante.

  Esey sa: Al marse deor, mem si se zis pou 15 minit.

• ● Rapel ki ou sitiasion ek ou bann santiman kapav sanze.

  Seki Labib dir: “Zot pa mem kone ki dime rezerv zot.”​—Zak 4:14, NTKM.

  Ki savedir?: Li posib ki ou pe pas par enn sitiasion bien difisil lor ki ou pena okenn kontrol. Me kitfwa sa sitiasion-la li tanporer.

  Kitfwa azordi ou dan enn sitiasion ki paret pena okenn sime sorti, me demin sa sitiasion-la kapav sanze. Alor, esey rod bann kitsoz ki kapav ed ou pou fer fas ar sa sitiasion-la. (2 Korintien 4:8, NTKM) Avek letan li posib ki ou problem pou disparet. Me parkont si ou swisid ou, ou pa pou kapav retourn an aryer.

  Esey sa: Lir bann zistwar dan Labib kot bann dimounn ti telman dekouraze ki zot ti anvi mor. Gete kouma avek letan zot lavi inn sanze, ek souvan sa finn arive dan enn fason ki zot pa ti atann. Anou get de-trwa lexanp.

Wi. Dan Labib sertin ti dir: “Mo anvi mor.” Bondie pa ti ankoler ar zot ouswa repros zot, me okontrer Li ti ed zot. Li kapav fer parey pou ou.

Eli

• ● Kisann-la sa? Eli ti enn profet ki ti ena boukou kouraz. Me parfwa li osi li ti dekouraze. Zak 5:17 dir: “Eli ti enn zom ki ti ena bann santiman parey kouma nou.”

• ● Kifer li ti anvi mor? Ariv enn moman, Eli ti santi li tousel, li ti gagn per, ek li ti panse ki li pa vo nanye. Lerla li ti fer sa siplikasion-la: “Zeova, tir mo lavi.”​—1 Lerwa 19:4.

• ● Ki kitsoz ti ed li? Eli ti dir Bondie tou seki ti ena lor so leker. Kouma Bondie ti ankouraz li? Bondie ti montre Eli ki Li ti kontan li ek Li ti montre Eli ki Li bien pwisan. Bondie ti osi rasir Eli ki li ti ena valer ek Li ti donn li enn bon asistan ki ti pou okip li bien.

• ▸ Get seki ti ariv Eli: 1 Lerwa 19:2-18.

Zob

• ● Kisann-la sa? Zob ti ris, ti ena enn gran fami, ek ti ador vre Bondie.

• ● Kifer li ti anvi mor? Enn sel kout, Zob ti gagn bann maler enn deryer lot. Li ti perdi tou so bann dibien. Tou so bann zanfan ti mor akoz enn katastrof. Li ti gagn enn maladi ki ti fer li bien soufer. Ek alafin, so bann kamarad ti dir li ki se limem ki an-tor si li pe gagn tou sa bann problem-la. Zob ti dir: “Mo’nn degout mo lavi; mo pa anvi kontign viv.”​—Zob 7:16.

• ● Ki kitsoz ti ed li? Zob ti priye Bondie ek ti koz avek lezot. (Zob 10:1-3) Eliou ti konpran Zob ek ti ankouraz li. Eliou ti ed Zob pou trouv so sitiasion dan enn lot fason. Me seki pli inportan, Zob ti aksepte Bondie so bann konsey ek so led.

• ▸ Get seki ti ariv Zob: Zob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moiz

• ● Kisann-la sa? Moiz ti gid pep Izrael ek li ti enn profet fidel.

• ● Kifer li ti anvi mor? Moiz ti ena boukou responsabilite, souvan bann dimounn ti kritik li, ek li ti nepli ena lafors. Akoz sa li ti dir Bondie: “Silteple touy mwa aster-la mem.”​—Nonb 11:11, 15.

• ● Ki kitsoz ti ed li? Moiz ti dir Bondie seki li resanti. Pou ki li mwin strese, Bondie ti ed li kan Li ti swazir bann lezot dimounn pou ed li fer so travay.

• ▸ Get seki ti ariv Moiz: Nonb 11:4-6, 10-17.