Jeune, loué Jéhovah!

“Loué Jéhovah zot ki lor la terre, . . . bann jeune garson ek zot aussi, bann vierge.”—PSAUME 148:7, 12.

1, 2. (a) Ki limite beaucoup jeune koné ena devant zot? (b) Kifer fodé pa ki bann jeune plaigné ki zot parent fixé bann limite dan zot la-vie?

SOUVENT bann jeune bien koné ki kitsoz zot pankor gagne droit faire. Beaucoup kapav dire ou dé-suite, ki l’age zot pou bizin ena pou zot traverse chemin tousel, ou-soit pou zot kapav al dormi inpé pli tard a-soir, ou-soit pou conduire enn l’auto. Ena beaucoup kitsoz ki enn jeune envie faire avek impatience, mais parfois li kapav ena sentiment ki li tann toujours mem reponse: “Attann kan to vinn pli grand.”

² Ou jeune, ou koné ki ou parent trouve sa bon pou fixé bann limit, kitfois pou ou prop protection. Ou surement koné aussi ki Jéhovah content ki ou obeir ou bann parent. (Colossiens 3:20) Mais, eski ou ena sentiment ki avek tou sa bann limite-la, ou la-vie pankor vrai-mem commencé? Eski vrai-mem ou pa kapav faire tou bann kitsoz ki important ziska ki ou vinn pli grand? Non, jamais! Zordi ena enn travail ki pé faire, ki bien pli important ki n’importe ki privilege ou kapav pé attann. Eski ou, jeune, ou gagne droit faire sa travail-la? Oui, ou pa zis gagne droit—Bondié Tout-Puissant Li-mem, pé invite ou pou faire sa!

 3. Ki privilege Jéhovah invite bann jeune pou ena, ek ki question nou pou examiné asterla?

³ Ki travail nou pé kozé? Remark verset-clé sa lartik-la: “Loué Jéhovah zot ki lor la terre, . . . bann jeune garson, ek zot aussi, bann vierge, ek zot bann zom agé ensam avek bann garson.” (Psaume 148:7, 12) C’est sa grand privilege-la ki ou ena asterla-mem: Ou kapav loué Jéhovah. En tant ki jeune, eski sa faire ou enn grand plaisir pou prend part dan sa travail-la? Beaucoup jeune content pou faire sa. Anou examine trois question pou guetté kifer li vaut la peine ena sa sentiment-la. Premierement, kifer eski ou bizin loué Jéhovah? Deuxiemement, couma ou kapav loué Li dan enn fason efficace? Troisiemement, kan eski li enn bon moment pou commence loué Jéhovah?

Kifer bizin loué Jéhovah?

4, 5. (a) Dapré Psaume 148, dan ki situation extraordinaire nou été? (b) Couma la creation ki pa kapav ni kozé ni raisonné, pé kan-mem loué Jéhovah?

⁴ Enn raison principal kifer nou loué Jéhovah c’est parski Li nou Createur. Psaume 148 aide nou pou comprend l’importance sa point-la. Maziné ki ou pé kosté pré ar enn group dimoune ki pé chante ensam enn joli chanté ki bien touchant, couma ou pou senti-ou? En plus, ou koné ki bann parole sa chanté-la, zot vrai ek zot dire bann kitsoz ki ou koné important, ki joyeux, ek ki encourageant. Eski ou pa pou envie aprann bann parole sa chanté-la ek chante ensam avek sa group-la? Beaucoup parmi nou ti pou content faire sa. Eh bien, Psaume 148, montré ki ou dan enn situation pareil, mais ki encore pli extraordinaire. Sa psaume-la koz lor enn grand la-foule ki pé loué Jéhovah ensam dan l’unité. Mais a mesure ki ou lire sa psaume-la, ou kapav remark enn kitsoz ki pa normal. Ki kitsoz?

⁵ Beaucoup parmi bann ki pé loué Jéhovah dan Psaume 148, pa kapav ni kozé, ni raisonné. Par exemple, nou lire ki soleil, la lune, bann zetoile, la neige, di-vent, bann montagne, ek bann colline pé loué Jéhovah. Couma sa bann creation ki pena la vie-la kapav faire sa? (Verset 3, 8, 9) En realité, zot faire sa dan mem fason ki bann pié, bann zanimo ki reste dan la mer, ek lezot zanimo. (Verset 7, 9, 10) Eski ou finn deja observe enn joli coucher soleil, ou-soit enn pleine-lune dan enn lé-ciel rempli ar zetoile? Eski ou finn deja observe bann zanimo pé joué ek sa finn faire ou gagne riyé? Ou-soit eski ou finn observe avek enn grand admiration enn joli paysage? Alors, sa vedir ki ou finn “tann” la creation pé chanté pou loué Jéhovah. Tou seki Jéhovah finn crée, rappel nou ki Li-mem nou Createur tout puissant, ki pena personne dan tou l’univers ki aussi grand, sage ek ki ena l’amour couma Li.—Romains 1:20; Révélation 4:11.

6, 7. (a) Dapré Psaume 148, ki bann creature intelligent pé loué Jéhovah? (b) Ki kapav pousse-nou pou loué Jéhovah? Donne enn l’exemple.

⁶ Psaume 148 decrire aussi bann creature intelligent ki pé loué Jéhovah. Dan verset 2, nou lire ki “l’armée” Jéhovah ki dan le ciel, setadir bann ange, pé loué Li. Dan verset 11, bann dimoune puissant ek ki ena enn grand l’influence, couma bann lé-roi ek bann juge, zot invité pou loué Jéhovah ensam avek sa l’armée-la. Si bann ange trouve plaisir pou loué Jéhovah, eski enn dimoune ordinaire pou kapav pretann ki li, li trop important pou faire sa? Apré, dan verset 12 ek 13, ou jeune, ou invité pou loué Jéhovah, ou aussi. Eski ou envie faire sa?

⁷ Anou prend enn l’exemple. Si ou ena enn bon camarade ki ena enn grand talent—kitfois dan sport, pou la musik, ou bien li enn grand artiste—eski ou pa pou koz li ar ou famille ek ou bann camarade? Surement. Eh bien, si nou aprann tou seki Jéhovah finn faire, sa kapav ena mem l’effet lor nou. Par exemple, Psaume 19:1, 2 dire ki enn lé-ciel rempli ar zetoile, “faire nou envie dire kitsoz.” Nou, kan nou reflechi lor tou sa bann kitsoz extraordinaire ki Jéhovah finn faire-la, nou pa kapav tini, nou bizin koz nou Bondié avek lezot.

8, 9. Pou ki raison Jéhovah envie ki nou loué Li?

⁸ Enn lot raison important kifer nou bizin loué Jéhovah, c’est parski Li oulé ki nou faire sa. Kifer? Eski Li bizin ki bann dimoune loué Li? Non. Nou, en tant ki humain, parfois nou bizin ki bann dimoune felicite nou, mais Jéhovah pli superieur ki nou. (Isaïe 55:8) Li pena doute lor Li, ek Li pena doute lor so bann qualité. (Isaïe 45:5) Pourtant, Li envie ki bann dimoune loué Li ek Li content kan nou faire sa. Kifer? Pou deux raison. Premierement, Li koné ki nou bizin loué Li, parski Li finn crée nou avek enn besoin spirituel, enn besoin pou adoré. (Matthieu 5:3) Jéhovah content kan Li trouve nou pé faire sa, pareil couma ou bann parent content kan zot trouve ou pé mange enn mangé ki pou faire ou di-bien.—Jean 4:34.

⁹ Deuxiemement, Jéhovah koné ki lezot dimoune bizin tann nou loué Li. Guette ki l’apotre Paul ti ecrire Timothée, ki ti encore jeune: “Contigne veille bien lor to-mem ek lor to l’enseignement. Persisté dan sa bann kitsoz-la, parski lerla, to pou sauve to-mem ek bann ki ecoute toi.” (1 Timothée 4:16) Oui, kan ou enseigne lezot lor Jéhovah, ek ou loué Li, sa kapav faire lezot aussi konn Li. Sa connaissance-la kapav faire zot gagne la vie eternel!—Jean 17:3.

10. Kifer nou senti-nou poussé pou loué Bondié?

¹⁰ Mais ena encore enn lot raison kifer nou bizin loué Jéhovah. Eski ou rappel sa l’exemple lor sa camarade ki ena enn grand talent-la? Si ou tann bann dimoune pé koz menti lor li, pé gate so reputation, eski sa pa pou pousse ou plus pou koz en bien lor li? Dan le monde, beaucoup dimoune pé koz en mal lor Jéhovah. (Jean 8:44; Révélation 12:9) Alors, bann ki content Li, zot senti-zot poussé pou dire la verité lor Li, pou corrige sa bann mauvais kitsoz ki dimoune dire-la. Eski ou pa ti pou content exprime ou l’amour ek ou reconnaissance envers Jéhovah, ek montré ki ou envie ki c’est Li ki gouverne ou la-vie plutot ki so pli grand l’ennemi, Satan? Ou kapav faire tousala kan ou loué Jéhovah. Mais couma nou kapav loué Li?

Couma certain jeune ti loué Jéhovah

11. Ki bann l’exemple ki cité dan la Bible, montré ki bann jeune kapav gagne bann bon resultat kan zot loué Jéhovah?

¹¹ La Bible montré ki souvent bann jeune, zot gagne bann bon resultat kan zot loué Jéhovah. Par exemple, ena cas enn jeune tifi israélite ki bann Syrien ti faire vinn enn esclave. Avek zèle, li ti koz lor prophete Jéhovah, ki ti appel Élisha, avek so maitresse. Grace a seki li ti dire, ti arrive enn mirak, ek sa ti rann enn grand temoignage. (2 Rois 5:1-17) Kan Jésus ti encore zenfant, li aussi li ti rann temoignage avek zèle. Parmi tou seki ti pou kapav ecrire dan la Bible lor la vie Jésus kan li ti jeune, Jéhovah finn choisir pou faire ecrire enn evenement ki ti arrivé kan li ti ena 12 an. C’est kan li ti questionne bann enseignant religieux dan temple Jérusalem ek bannla ti etonné parski li ti bien comprend la loi Jéhovah.—Luc 2:46-49.

12, 13. (a) Ki Jésus ti faire dan temple, zis avant li mort, ek ki l’effet sa ti ena lor bann dimoune? (b) Ki Jésus ti pensé kan li ti tann bann jeune garson pé loué li?

¹² Kan Jésus ti vinn enn adulte, li ti aussi pousse bann zenfant pou loué Jéhovah. Par exemple, zis dé-trois jour avant li mort, Jésus ti al dan temple Jérusalem. La-bas, la Bible dire ki li ti faire bann “kitsoz extraordinaire.” Li ti mette dehors tou bann dimoune ki ti pé faire sa place sacré-la vinn couma enn caverne voleur. Li ti aussi gueri bann dimoune aveugle ek handicapé. Sa ti bizin pousse tou bann ki ti present, surtout bann chef religieux, pou loué Jéhovah ek so Garson, le Messie. Mais malheureusement, beaucoup dimoune dan sa lepok-la, pa ti faire sa. Zot ti koné ki Jésus ti envoyé par Bondié, mais zot ti peur bann chef religieux. Mais, ti ena enn group dimoune ki ti ena courage pou kozé. Eski ou koné kisannla? La Bible dire: “Kan bann chef pretre ek bann scribe ti trouve bann kitsoz extraordinaire ki [Jésus] ti’nn faire, ek bann jeune garson ki ti pé crié dan temple ek ti pé dire: ‘Sauve nou, nou supplie toi, Garson David!’, zot ti commence en colere ek zot ti dire [Jésus]: ‘Eski to tendé seki sa bannla pé dire?’ ”—Matthieu 21:15, 16; Jean 12:42.

¹³ Bann pretre ti attann ki Jésus faire sa bann garson ki ti pé loué li-la, arrete kozé. Eski Jésus ti faire sa? Au contraire! Jésus ti reponn zot: “Oui, eski jamais zot pa finn lire sa: ‘Dan la bouche bann ti zenfant, ek bann ti-baba, to finn faire louange sorti’?” Li clair ki Jésus ek so Papa ti content ki sa bann jeune garson-la ti pé loué li. Sa bann zenfant-la ti pé faire seki tou bann adulte ki ti present, ti’nn bizin faire. Dan zot jeune l’esprit, zot ti trouve sa normal pou agir coumsa. Zot ti trouve sa missié-la pé faire bann kitsoz extraordinaire, pé koz avek courage ek la foi, ek pé montré enn grand l’amour pou Bondié ek pou so peuple. Li ti vrai-mem sa kikenn ki li ti pretann li été-la—“Garson David,” le Messie ki Bondié ti promette. Sa bann jeune garson-la ti gagne benediction a cause zot la-foi, zot finn mem gagne privilege pou realise enn prophetie.—Psaume 8:2.

14. Couma bann don ki bann jeune ena, permette zot loué Jéhovah dan enn fason efficace?

¹⁴ Ki nou kapav aprann par sa bann l’exemple-la? Ki bann jeune kapav loué Jéhovah dan enn fason efficace. Souvent, zot ena enn don pou trouve la verité dan enn fason clair ek simple, ek zot exprime zot la-foi avek sincerité ek zèle. Zot ena aussi sa lot l’avantage ki mentionné dan Proverbes 20:29: “Beauté bann jeune, c’est zot la-force.” Oui, ou jeune, ou ena la force ek l’energie—sa c’est enn grand l’avantage kan ou pé servi Jéhovah. Couma eski ou kapav servi sa bann don-la?

Couma ou kapav loué Jéhovah?

15. Pou loué Jéhovah dan enn fason efficace, ki qualité mobile ou bizin ena?

¹⁵ Pou servi Jéhovah dan enn fason efficace, sa commence dan ou leker. Ou pa pou kapav loué Jéhovah dan enn fason efficace, si ou faire sa zis pou faire plaisir lezot. Rappel ki pli grand commandement c’est: “To bizin content Jéhovah to Bondié avek tou to leker, ek avek tou to nâme ek avek tou to l’esprit.” (Matthieu 22:37) Eski ou finn aprann pou konn Jéhovah personnellement a travers ou prop l’etude la Bible? Si oui, ou pou ressenti l’amour pou Jéhovah. Enn fason naturel pou exprime sa l’amour-la, c’est loué Li. Enn fois ki ou ena bann mobile clair ek solid, ou pou pré pou loué Jéhovah avek enthousiasme.

16, 17. Ki l’importance ou conduite ena dan ou service pou Jéhovah? Donne enn l’exemple.

¹⁶ Asterla, avant mem ou reflechi lor seki ou pou dire, maziné couma ou pou agir. Si sa tifi israélite ki ti vive dan lepok Élisha-la, ti habitué koz brite, sans respé, ek ti malhonnete, eski ou pensé ki bann Syrien ti pou ecoute seki li ti dire lor prophete Jéhovah? Surement pas. Li pareil, ena plus chance ki bann dimoune ecoute ou, si zot trouvé ki ou ena respé, ou honnete, ek ki ou ena bon maniere. (Romains 2:21) Anou prend enn l’exemple.

¹⁷ Enn jeune tifi 11 an, ki reste Portugal, ti gagne problem dan lekol parski so conscience pa ti permette li pou participe dan bann fête ki pa ti en accord avek la Bible. Avek respé, li ti explik so miss kifer li pa ti kapav faire sa bann fête-la, mais miss-la ti bouffonne li. Plusieurs fois miss-la ti essaye faire li gagne honté, ek ti bouffonne so religion. Mais tifi-la ti toujours ena respé. Plusieurs l’année apré, sa jeune soeur-la ti vinn enn pionnier permanent, setadir enn proclamateur a plein temps. Pendant enn l’assemblée, li ti pé guette bann dimoune prend bapteme, ek parmi zot, kisannla li ti trouvé? So ancien miss! Zot finn maye zot camarade, zot finn pleuré. Apré sa, miss-la ti dire li ki jamais li pa finn blié respé ki li ti ena dan lekol. Kan enn Témoin ti passe kot li, miss-la ti koz lor bon maniere ki sa zeleve-la ti ena. A cause sa, li’nn commence etudié la Bible ek li finn accepté la verité. Oui jeune, par ou conduite, ou kapav donne enn grand temoignage pou loué Jéhovah!

18. Ki enn jeune kapav faire si li hesité pou commence koz lor la Bible ek lor Jéhovah?

¹⁸ Eski parfois, ou trouve sa difficile pou commence koz lor ou bann croyance dan lekol? Pa ou tousel ki ena sa sentiment-la. Seulement, ou kapav faire en sorte ki lezot vinn pose ou question. Par exemple, si ou gagne droit faire sa, kifer ou pa amenn bann publication avek ou, ek lire zot pendant pause, ou-soit dan bann lezot moment ki ou libre? Kitfois ou bann camarade kapav demann ou ki ou pé lire. Lerla, kan ou reponn zot, ek ou dire zot seki ou finn trouve interessant dan sa lartik ki ou pé lire-la, sans mem ki ou rann ou compte, ou’nn fini commence enn bon conversation avek zot. Pa blié pose bann question pou ou koné ki ou bann camarade croire. Ecoute zot bien ek partage seki ou finn aprann dan la Bible, avek zot. Beaucoup jeune pé loué Jéhovah dan lekol. Sa donne zot enn grand la-joie, ek aussi sa aide beaucoup lezot jeune pou konn Jéhovah.

19. Couma bann jeune kapav vinn pli efficace dan predication?

¹⁹ Enn bon fason pou loué Jéhovah, c’est predication porte-en-porte. Si ou pankor commence faire sa, kifer ou pa fixé sa couma enn l’objectif? Si ou pé deja faire li, eski ena lezot l’objectif ki ou kapav fixé devant ou? Par exemple, au lieu ki ou dire toujours mem zaffaire devant chaque la-porte, ou kapav ameliore ou. Demann bann suggestion ar ou parent ek ar lezot chrétien ki ena l’experience. Aprann couma ou kapav servi plus la Bible pou faire bann bon visite, ek pou commence enn l’etude. (1 Timothée 4:15) Plus ou loué Jéhovah dan sa fason-la, plus ou pou vinn efficace, ek plus ou pou content predication.

Kan eski ou bizin commence loué Jéhovah?

20. Kifer fodé pa ki bann jeune pensé ki zot trop jeune pou loué Jéhovah?

²⁰ Parmi sa trois question ki ena dan sa lartik-la, sa dernier-la pli facile pou reponn. Guette reponse direct ki la Bible donné: “Rappel, to Grand Createur pendant to l’adolescence.” (Ecclésiaste 12:1) Oui, c’est asterla lé-temps pou loué Jéhovah. Li trop facile pou dire: “Mo trop jeune pou loué Jéhovah. Mo pena l’experience. Mo bizin attann kan mo vinn inpé pli grand.” Ou pa tousel pou pense coumsa. Par exemple, kan Jérémie ti encore jeune, li ti dire Jéhovah: “Ayo! Souverain Seigneur Jéhovah! Mo pa mem konn koz bien, parski mo encore enn jeune garson.” Jéhovah ti donne li l’assurance ki li pena okenn raison pou li peur. (Jérémie 1:6, 7) Li pareil pou nou, nou pa bizin peur nanyin kan nou loué Jéhovah. Pena okenn tort ki dimoune kapav faire nou, ki Jéhovah pa pou kapav reparé.—Psaume 118:6.

21, 22. Kifer bann jeune ki pé loué Jéhovah, zot couma bann goutte la-rosée, ek kifer sa comparaison-la encourageant?

²¹ Alors, nou encourage ou jeune: Pa hesité pou loué Jéhovah! C’est asterla, alors ki ou encore jeune, ki pli bon moment pou ou participe dan travail pli important ki pé faire lor la terre zordi. Kan ou faire sa, ou pou ena enn privilege extraordinaire—ou pou forme partie dan enn famille universel ki pé loué Jéhovah. Jéhovah content ki ou faire partie dan sa famille-la. Guette sa bann parole inspiré ki enn psalmiste ti dire Jéhovah-la: “To peuple pou porte-zot volontaire avek la joie, jour ki to rassemblé to l’armée. To ena to l’armée jeune gens ki couma bann goutte la-rosée; kan soleil levé, [zot parette] couma enn decoration sacré.”—Psaume 110:3.

²² Li bien joli pou guette bann goutte la-rosée ki brillé gramatin dan la lumiere soleil, pa vrai? Zot frais, zot brillé ek zot tellement beaucoup, ki pa kapav compte zot. C’est coumsa-mem ki Jéhovah trouve bann jeune ki pé loué Li avek fidelité dan sa lepok difficile-la. Oui, ou choix pou loué Jéhovah faire so leker content. (Proverbes 27:11) Alors jeune, faire tou seki ou kapav pou loué Jéhovah!

Couma ou pou reponn?

• Cite bann raison important kifer nou bizin loué Jéhovah.

• Ki bann l’exemple dan la Bible montré ki bann jeune kapav gagne bann bon resultat kan zot loué Jéhovah?

• Couma bann jeune kapav loué Jéhovah zordi?

• Kan eski bann jeune bizin commence loué Jéhovah, ek kifer?

[Zimage, page 18]

Si ou ena enn camarade ki ena enn grand talent, eski ou pa pou koz li avek lezot?

[Zimage, page 21]

Si ou envie amelioré dan ou service, demann bann suggestion ar enn Témoin ki ena plus l’experience