Kifer dimoune faire mauvais kitsoz?

ENA enn kitsoz lor ki la plupart dimoune pa pou discuté: nou tou nou imparfait, alors nou commette erreur ek nou faire bann kitsoz ki apré nou regretté. Preské toulé-jour, soit personnellement soit dan journal, radio, television ek Internet nou trouve ou-soit tann bann mauvais kitsoz. Mais, mem si li vrai ki nou imparfait, eski sa vedir ki c’est a cause sa ki ena tou sa bann mauvais action-la, ki zot grave ou-soit moins grave?

Mem si bann humain zot imparfait, en general zot reconette ki ena bann limite lor plan moral ki fodé jamais zot depassé ek ki zot ena capacité pou evite faire seki mauvais. La plupart dimoune aussi d’accord ki ena enn difference entre dire enn kitsoz ki pa vrai sans faire par expré ek koz enn grand menti lor enn dimoune pou gate so reputation, ena enn difference aussi entre blesse enn dimoune par accident ek commette enn crime ki’nn planifié a l’avance. Malgré sa, c’est souvent bann dimoune ordinaire ki dan l’endroit ki commette sa bann action ki sok lezot-la. Kifer dimoune faire bann kitsoz mauvais?

La Bible eclaire nou lor sa sujet-la. Dan enn fason exact li donne bann raison principal kifer certain dimoune agir dan enn fason ki zot koné mauvais. Anou guette seki li dire.

▪ “Pression ki ena lor enn dimoune sage kapav faire li agir couma enn fou.”—ECCLÉSIASTE 7:7.

La Bible dire ki parfois a cause certain situation ki mette enn pression lor zot, bann dimoune faire bann kitsoz ki normalement zot pa ti pou faire. Certain al mem ziska commette bann kitsoz bien grave, parski zot considere sa couma enn solution pou arrete bann difficulté ek l’injustice. Livre Urban Terrorism dire: “Dan beaucoup cas, seki surtout pousse enn dimoune pou vinn enn terroriste c’est parski li amer avek bann systeme politik, social ek economik ki pa’lé changé.”

▪ “L’amour pou l’argent li enn racine tou sorte qualité mauvais kitsoz.”—1 TIMOTHÉE 6:10.

Certain dire ki mem bann bon dimoune pou accepté desobeir la loi par rapport avek bann bon maniere ek moralité si mette beaucoup kass devant zot. Certain ki parette gentil ek bon dan bann situation normal, changé net, zot vinn insupportable ek brite kan ena kass ki impliké. Pense lor tou sa bann mauvais kitsoz ki dimoune faire zis parski zot envie gagne toujours plus—zot faire bann chantage, faire fraude, enleve bann dimoune, ek mem faire crime.

▪ “Parski pa finn applik enn jugement vite kont enn mauvais action, a cause sa, dan zot leker bann dimoune finn plus decidé pou faire le mal.”—ECCLÉSIASTE 8:11.

Sa verset-la faire remarké ki bann dimoune ena tendance pensé ki zot pa pou gagne okenn punition si bann representant l’autorité pa trouve zot. Nou trouve sa par exemple kan bann dimoune depasse limit vitesse lor l’autoroute, zot goré dan l’examen, zot kokin bann fond publik, ek faire encore lezot mauvais kitsoz ki pli grave. Kan pa applik la loi couma bizin ou-soit kan bann dimoune pa peur pou gagne trapé, bann dimoune ki habitué respecté la loi kapav gagne courage pou faire seki normalement zot pa ti pou faire. Magazine Arguments and Facts faire sa commentaire-la: “Li parette ki bann dimoune ordinaire senti-zot poussé pou commette bann mauvais kitsoz ki pli grave kan zot trouvé couma li facile pou bann ki desobeir la loi reussi sapé sans gagne okenn punition.”

▪ “Sakenn passe par enn tentation kan li laisse so prop desir entraine li ek attire li. Apré, kan sa desir-la inn developpé, sa faire li faire peché.”—JACQUES 1:14, 15.

Tou dimoune kapav ena bann mauvais pensé. Toulé-jour nou bombardé avek bann suggestion ek tentation ki pousse nou pou faire seki mauvais. Dan lepok biblik, ti dire bann chretien: “Pena okenn tentation ki zot inn gagné ki lezot pa’nn gagné.” (1 Corinthiens 10:13) Malgré sa, resultat ki sa pou ena pou depann lor seki sakenn decidé pou faire—soit li arrete pense lor sa mauvais kitsoz-la desuite ou-soit li contigne pense lor la ek li laisse sa desir-la grandi. Dapré sa verset ki nou’nn guetté la-haut-la, Jacques averti nou ki si enn dimoune laisse enn mauvais desir “developpé,” pena doute ki bann mauvais action pou suive apré.

▪ “Enn kikenn ki marche avek bann dimoune ki ena la sagesse pou gagne la sagesse, mais enn kikenn ki gagne zaffaire avek bann dimoune bete, sa pou fini mal pou li.”—PROVERBES 13:20.

Nou bann camarade kapav ena enn grand l’influence lor nou—enn l’influence ki pousse nou pou faire seki bon ou-soit seki mauvais. Bien souvent, bann dimoune faire bann kitsoz ki zot pena l’intention faire ek sa amenn bann consequence bien grave—tousala a cause pression bann camarade ou-soit couma beaucoup dire, parski zot finn gagne mauvais frequentation. Dapré la Bible, “bann dimoune bete” c’est pa bann dimoune ki pena l’intelligence, mais plutot bann ki pa prend compte bann conseil sage ki ena dan Parole Bondié. Ki nou jeune ou-soit nou agé, si nou pa choisir bien nou bann camarade ek bann dimoune ki nou frequenté, setadir, dapré bann bon principe la Bible, nou kapav attann ki sa pou “fini mal” pou nou.

Sa bann verset-la ek encore beaucoup lezot verset la Bible explik dan enn fason clair kifer bann dimoune—kitfois bann dimoune ki parette ordinaire—faire bann mauvais kitsoz, ou-soit mem bann kitsoz ki sok lezot. Li bon nou comprend ki kitsoz ki pousse dimoune pou faire bann mauvais kitsoz. Mais, eski nou kapav attann ki ena enn amelioration? Oui, parski la Bible pa zis expliké kifer bann dimoune commette sa bann mauvais kitsoz-la, mais li promette aussi ki sa bann kitsoz-la pou nepli existé. Ki sa bann promesse-la sa? Eski tou bann mauvais kitsoz ki ena dan le monde vrai-mem pou fini? Prochain lartik reponn sa bann question-la.