Komie Nom Bondie Ena?

Seki Labib dir

Bondie ena zis enn sel nom. An Ebre ekrir nom Bondie koumsa יהוה ek normalman an Kreol se “Zeova.”a Atraver so profet Izai, Bondie ti dir: “Mwa mo Zeova. Samem mo nom.” (Izai 42:8) Sa nom-la aparet anviron 7,000 fwa dan bann ansien maniskri Labib, ek sa li bien plis ki bann lezot tit ki Bondie ena ouswa ki lezot nom dan Labib.b

Eski Zeova ena lezot nom?

Mem si Labib dir ki Bondie ena enn sel nom, li servi boukou tit ek lezot deskripsion pou koz lor Li. Dan lalis ki ena apre ena de-trwa sa bann tit ek deskripsion la, ek zot ansegn nou enn kitsoz lor Zeova.

Tit	Referans Biblik	Sinifikasion
Alfa ek Omega	Revelasion 1:8, NTKM; 21:6, NTKM; 22:13, NTKM	“Premie ek dernie,” ouswa “koumansman ek lafin,” ki vedir ki pa ti ena okenn Bondie Tou-Pwisan avan Zeova, ni pa pou ena okenn apre Li. (Izai 43:10) Alfa ek omega se premie ek dernie let dan alfabet Grek.
Allah	(Okenn)	Mo “Allah” sorti dan lang Arab, ek li pa enn nom personel me se enn tit ki vedir “Bondie.” Dan bann tradiksion Labib an lang Arab ek lezot lang servi mo “Allah” pou fer referans ar “Bondie.”
Ansien Bann Zour	Daniel 7:9, 13, 22	Pena koumansman. Finn existe depi touletan avan ninport kisannla ouswa ninport ki kitsoz ki finn kree.—Psom 90:2, PKM.
Berze	Psom 23:1, PKM	Pran swin so bann adorater.
Bondie	Zenez 1:1	Nou bizin ador Li; enn Kikenn ki for. Mo Ebre ʼÈlohim li enn mo pliryel, ki fer referans ar grander, siperyorite, ouswa dignite Zeova.
Bondie Ere	1 Timote 1:11	Li ena lazwa ek Li ere.—Psom 104:31, PKM.
Bondie tou bann bondie	Deteronom 10:17	Bondie siprem, Li lekontrer bann “bondie ki pena valer” ki sertin dimounn adore.—Izai 2:8.
Gran Instrikter	Izai 30:20, 21	Li ansegn nou ek gid nou pou nou profi.—Izai 48:17, 18.
Kreater	Izai 40:28	Li’nn kree tou kitsoz ki existe.
Lerwa Leternite	Revelasion 15:3	So regn pena ni koumansman ni lafin.
(Li) ekout lapriyer	Psom 65:2	Limem personelman ekout sak lapriyer ki enn dimounn fer avek lafwa.
Mo Pou Vinn Seki Mo Swazir pou Vini	Exod 3:14	Li vinn tou seki bizin pou akonpli so volonte. Sa deskripsion-la ed pou explik nom personel, Zeova, ki trouv dan verse zis apre.—Exod 3:15.
Papa	Matie 6:9, NTKM	Lasours lavi.
Potie	Izai 64:8	Ena lotorite lor bann dimounn ek bann nasion, parey kouma enn potie ena lotorite lor larzil.—Romin 9:20, 21, NTKM.
Ros	Psom 18:2, 46	Enn refiz ki sir ek enn lasours delivrans.
Sa Kikenn ki Pli Sin la	Proverb 9:10	Pena personn ki pli sin ki Li (moralman prop).
Sa Kikenn ki re-aste twa la	Izai 41:14, Bible de Darby	Gras-a sakrifis Zezi Kris finn re-aste limanite ar pese ek lamor.—Zan 3:16, NTKM.
Sef bann Larme	Izai 1:9	Sef enn gran larme anz.
Segner	Psom 135:5	Proprieter ouswa met; an Ebre se ʼAdhôn ek ʼAdhonim.
Souverin Segner	Zenez 15:2	Limem ki ena pli gran lotorite ki existe; an Ebre ʼAdhonay.
Sover	Izai 45:21	Sov nou ar danze ouswa destriksion.
Tou-Pwisan	Zenez 17:1	Ena enn pouvwar san limit. Expresion an lang Ebre ʼÉl Shadday, ki vedir “Bondie Tou-Pwisan,” paret set fwa dan Labib.
Treo	Psom 47:2	Limem ena pozision pli ot.
Zalou	Exod 34:14, Traduction du monde nouveau avec notes et références	Pa toler okenn rivalite dan ladorasion. Finn osi tradir sa expresion-la koumsa “demann enn latasman zis pou Li tousel.”

Nom bann landrwa dan bann Lekritir Ebre

Dan Labib ena sertin landrwa ki ena bann nom kot ena nom personel Bondie ladan, me sa, se pa bann lezot nom ki Bondie ena.

Nom landrwa	Referans Biblik	Sinifikasion
Zeova-nissi	Exod 17:15	Pep Zeova kapav vinn ver Li pou gagn proteksion ek led.—Exod 17:13-16.
Zeova-shalom	Ziz 6:23, 24	“Zeova Li Lape.”
Zeova-shammah	Ezekiel 48:35, not, Traduction du monde nouveau avec notes et références	“Zeova Li La.”
Zeova-Zire	Zenez 22:13, 14	“Zeova Pou Donn Seki Bizin.”

Bann rezon kifer nou bizin konn nom Bondie ek servi sa nom-la

Si Bondie finn fer ekrir so nom personel Zeova bann milye fwa dan Labib, savedir ki so nom ena enn gran linportans pou Li.—Malaki 1:11.
Zezi, Garson Bondie, finn boukou fwa met laksan lor nom Bondie. Par exanp, li ti priye Zeova ek li ti dir: “Ki to nom sanktifie.”—Matie 6:9, NTKM; Zan 17:6, NTKM.
Kan enn dimounn aprann konn nom Bondie ek servi sa nom-la, se premie pa ki li fer pou vinn kamarad ar Zeova. (Psom 9:10; Malaki 3:16) Bann kamarad Bondie kapav gagn bann bienfe ar sa promes ki Bondie inn fer zot la: “Parski li finn ena lafeksion pou mwa, mo pou sov li. Mo pou protez li parski li konn mo nom.”—Psom 91:14.
Labib rekonet sa: “Mem si swadizan ena bann bondie dan lesiel ou lor later - ofet, ena boukou bondie ek segner.” (1 Korintien 8:5, 6, NTKM) Me selman, li montre dan enn fason kler ki Zeova se nom sel vre Bondie.—Psom 83:18.

a Sertin biblis Ebre prefer servi “Yahweh” pou nom Bondie.

b Enn form kourt nom Bondie se “Jah,” ek li aparet apepre 50 fwa dan Labib, par exanp “Alelouya,” ki vedir “Loue Jah.”—Revelasion 19:1, NTKM.