LESON 03

Eski Ou Kapav Vremem Krwar Seki Labib Dir?

Version Inprime

Dan Labib ena boukou promes ek boukou konsey. Sirman ou bien anvi kone seki Labib ansegne, me kitfwa ou gagn difikilte pou krwar seki Labib dir. Eski ou kapav ena konfians dan bann promes ek dan bann konsey ki sorti dan enn vie liv koumsa? Eski seki Labib dir li ankor touzour itil pou nou azordi? Ek eski nou kapav krwar seki li dir konsernan lavenir? Ena boukou dimounn ki krwar seki ena dan Labib. Kifer ou pa fer bann resers pou gete si ou osi ou kapav krwar seki Labib dir!

1. Eski tou seki Labib dir li vre?

Labib dir ki li ena “bann parol laverite ki exakt.” (Ekleziast 12:10) Li koz lor bann levennman ki finn vremem arive ek lor bann dimounn ki’nn vremem existe. (Lir Lik 1:3; 3:1, 2.) Boukou istorien ek arkeolog finn konfirme ki sertin linformasion, kouma par exanp bann dat, bann dimounn, bann plas, ek bann levennman ki mansione dan Labib zot exakt.

2. Eski nou kapav fer Labib konfians, mem si se enn vie liv?

Labib ti fini koz lor sertin kitsoz bien avan ki bann dimounn dekouver sa bann kitsoz-la. Par exanp, kan Labib koz lor bann kitsoz ki konsern lasians li exakt. Pourtan, laplipar bann dimounn sa lepok-la pa ti krwar seki Labib dir. Me azordi, lasians montre ki seki Labib dir li exakt. Alor nou ‘touletan kapav fer Labib konfians, asterla ek pou touzour.’—Psom 111:8, NW.

3. Kifer nou kapav krwar seki Labib dir konsernan lavenir?

Dan Labib, ena bann profesia ki predir ‘bann kitsoz ki pankor arive.’ (Izai 46:10) Labib inn predir boukou levennman avan mem ki zot arive. Li’nn osi donn boukou detay konsernan lepok ki nou pe viv. Dan sa leson-la, nou pou get sertin profesi ki ena dan Labib. Kitfwa ou pou etone, kan ou pou trouve ki kantite sa bann profesi-la zot exakt!

ANOU GET INPE PLIS

Anou gete kouma lasians konfirm seki Labib dir, ek sertin profesi Labib ki extraordiner.

4. Lasians konfirm seki Labib dir

Lontan, bann dimounn ti panse ki later ti tini lor enn kitsoz. Zwe VIDEO-la.

VIDEO: Later Tini dan Vid (1:13)

Anou gete seki liv Zob ti dir inn gagn 3,500 an. Lir Zob 26:7, ek apre sa, get sa kestion-la ansam:

Kifer li extraordiner ki Labib ti fini dir ki later tini “dan vid”?

Se dan bann lane 1800 ki bann dimounn inn konpran ki, kan soley sof delo lamer, li vinn lavaper. Lerla, sa lavaper-la form bann niaz, ek apre sa, lapli tonbe pou retourn dan lamer. Se samem ki bann siantis apel water cycle (sik delo). Me remarke seki Labib ti dir inn gagn 3,500 an. Lir Zob 36:27, 28, ek apre sa, get sa bann kestion-la ansam:

Ki ou panse lor seki Labib dir konsernan water cycle?
Eski sa bann verse ki ou fek lir la finn fer ou ena plis konfians dan Labib?

Labib dekrir water cycle. Bann fles montre bann diferan letap water cycle lor later ek dan latmosfer.

5. Labib ti predir bann levennman inportan

Lir Izai 44:27–45:2, ek apre sa, get sa kestion-la ansam:

Ki bann detay Labib ti done 200 an avan latak ki ti ena kont Babilonn?

Zwe VIDEO-la.

VIDEO: Labib Ti Predir Latak ki Ti Pou Ena Kont Babilonn (0:58)

Listwar konfirme ki Siris, lerwa Pers, ek so larme ti gagn laviktwar lor Babilonn an lan 539 Avan Nou Lepok.b Zot ti detourn larivier ki ti pe protez sa lavil-la. Parski bann laport sa lavil-la ti res ouver, zot ti kapav rantre ek gagn laviktwar lor sa lavil-la san ki zot bizin lager. Azordi, plis ki 2,500 an plitar Babilonn ankor touzour enn rwinn. Anou get seki Labib ti predir konsernan sa levennman-la.

Lir Izai 13:19, 20, ek apre sa, get sa kestion-la ansam:

Kouma sa profesi-la ti realize?

Zimaz: Bann zimaz ki montre seki Labib ti predir konsernan ‘bann dernie tan.’ 1. Bann batiman pe pran dife. 2. Enn solda ki pe servi enn mitrayet. 3. Bann dimounn pe lager kont lapolis pandan enn manifestasion. 4. De zom pe kokin dan magazin. 5. Enn masinn lager dan enn lavil. 6. Bann dimounn ki pe fin ek ki ena bann mask, pe fer lake pou gagn manze. 7. Later telman sek ki li krake lor plizir kilomet 8. Enn lakaz inn kraze apre enn tranbleman-de-ter.

6. Labib ti fini predir seki pe arive dan nou lepok

Labib dir ki nou pe viv dan “bann dernie tan.” (2 Timote 3:1) Remarke seki Labib ti predir konsernan lepok ki nou pe viv.

Lir Matie 24:6, 7, NW, ek apre sa, get sa kestion-la ansam:

Dapre Labib, ki ti pou arive pandan bann dernie tan?

Lir 2 Timote 3:1-5, ek apre sa, get sa bann kestion-la ansam:

Dapre Labib, ki kalite konportman bann dimounn ti pou ena pandan bann dernie tan?
Lekel parmi sa bann konportman-la ou trouve otour ou?

SERTIN DIMOUNN DIR: “Dan Labib ena bann zistwar ki’nn invante.”

Ki kitsoz plis konvink ou ki nou kapav fer Labib konfians?

SEKI NOU’NN APRANN

Listwar, lasians, ek bann profesi montre ki nou kapav fer Labib konfians.

Eski Ou Rapel?

Eski tou seki Labib dir li vre?
Dan ki domenn lasians konfirm seki Labib dir?
Eski ou panse ki Labib kapav dir seki pou arive dan lavenir? Kifer ou pans koumsa?

Dat ki’nn fini sa leson-la:

Mo Lobzektif

Pou ogmant mo konfians dan Labib, lir enn lartik ouswa get enn video dan parti “Dekouver.”

Lezot lobzektif:

Mo bann lezot lobzektif