Laglwar Zeova Briye lor So Pep

“Zeova Limem pu vinn pu twa enn lalimyer ki dire pu tuletan.”—IZAI 60:20.

 1. Kuma eski Zeova beni so pep ki fidel?

“ZEOVA pran plezir ar so pep. Li fer bann ki sumet, vinn zoli, kan Li delivre zot.” (Psom 149:4) Se seki enn ekrivin psom ti dir, ek listwar finn konfirme ki so bann parol vre. Kan bann serviter Zeova montre zot fidel, Li pran zot swin, Li fer zot gayn lakrwasman, ek Li protez zot. Dan lepok lontan, Li ti fer zot gayn viktwar lor zot bann lennmi. Zordi, Li gard zot for lor plan spirityel ek Li donn zot lasirans ki Li pu delivre zot lor baz sakrifis Zezi. (Romin 5:9) Li fer sa parski pu Li, zot zoli.

 2. Mem si zot gayn lopozisyon, ki kitsoz bann serviter Bondye kapav sir?

² Byinsir, dan enn lemond ki konpletman dan nwarte, bann ki “viv dan latasman avek Bondye” pu gayn persekisyon. (2 Timote 3:12) Me, Zeova remark bann ki opoze, ek Li donn zot sa lavertisman la: “Ninport ki nasyon ek ninport ki rwayom ki pa pu servi twa pu mor, ek bann nasyon vremem pu detrir.” (Izai 60:12) Zordi lopozisyon manifeste dan diferan fason. Dan sertin peyi, bann dimunn ki opoze sey limit uswa interdi ladorasyon ki bann Kretyin sinser rann Zeova. Dan lezot peyi, bann fanatik atak bann serviter Zeova fizikman ek bril zot dibyin. Me rapel ki Zeova finn fini deside ki pu arive avek ninport ki lopozisyon ki fer kont realizasyon so volonte. Bann ki opoze pa pu reysi. Bann ki lager kont Syon, ki reprezante par so bann zanfan lor later, pa kapav reysi. Eski sa li pa enn lasirans ankurazan ki nu Gran Bondye Zeova donn nu?

Beni Plis Ki Seki Zot Pe Atann

 3. Kuma eski Izai dekrir bote ek lakrwasman bann adorater Zeova?

³ Li vre ki pandan sa bann dernye zur sa sistem ki egziste la, Zeova finn beni so pep plis ki seki zot ti pe atann. Dusma-dusma, Li finn fer sirtu landrwa kot ador Li vinn zoli, ek usi bann ki dan sa landrwa la ek ki port so non. Dapre profesi Izai, Li dir Syon: “Laglwar Liban pu vinn ver twa, bann pye kuma zenevriye, frenn ek sipre an mem tan, pu fer plas mo sanktyer vinn zoli, ek mo pu glorifye plas kot mo lipye ete.” (Izai 60:13) Li byin zoli pu get bann montayn ki kuver avek bann gran-gran lafore. Donk bann zoli pye ki raporte zot bann sinbol apropriye pu dekrir bote ek lakrwasman bann adorater Zeova.—Izai 41:19; 55:13.

 4. Ki ete “sanktyer” ek “plas kot lipye [Zeova] ete,” ek kuma eski zot finn vinn zoli?

⁴ Ki ete “sanktyer” ek “plas kot lipye [Zeova] ete” ki mansyone dan Izai 60:13? Sa bann expresyon la fer referans ar bann lakur gran tanp spirityel Zeova. Sa li enn dispozisyon pu kapav apros ar Zeova pu ador Li, atraver Zezi Kris. (Ebre 8:1-5; 9:2-10, 23) Zeova ti revel so lintansyon pu donn sa tanp spirityel la laglwar kan Li ti pu rasanble bann dimunn dan tu bann nasyon, pu zot vinn ador la. (Agai 2:7) Izai limem ti truv bann laful ki sorti dan tu bann nasyon pe mont ver ot montayn Zeova pu ador Li. (Izai 2:1-4) Plizir santenn lane plitar, dan enn vizyon, lapot Zan ti truv “enn gran laful, ki personn pa ti kapav konte, ki sorti dan tu nasyon, tribi, pep ek lang.” Zot pe debut “devan Bondye . . . , ek zot pe rann Li enn servis sakre lizur lanwit dan so tanp.” (Revelasyon 7:9, 15) Amezir ki sa bann profesi la finn realize dan nu lepok, nu’nn truve ar nu prop lizye kuma lakaz Zeova finn vinn zoli.

 5. Ki gran amelyorasyon bann zanfan Syon ti kone?

⁵ Pu Syon, tusala ti vremem enn gran amelyorasyon! Zeova dir: “Olye ki to abandone net ek [ki lezot] deteste twa, san ki kikenn pase, vremem mo pu met twa kuma enn lobze fyerte pu tuletan, enn kitsoz ki fer kontan, zenerasyon apre zenerasyon.” (Izai 60:15) Ver lafin premye lager mondyal, “Izrael Bondye” ti vremem konn enn peryod dezolasyon. (Galat 6:16) Vremem li ti santi li “abandone net,” parski so bann zanfan lor later pa ti disern klerman volonte Bondye pu zot. Apre sa, an 1919, Zeova finn fer bann serviter win reviv lor plan spirityel, ek depi sa Li’nn beni zot par enn prosperite spirityel extraordiner. Anplis, eski sa promes ki dan sa verse la pa enn promes ki motiv nu? Zeova pu konsider Syon kuma “enn lobze fyerte.” Wi, bann zanfan Syon, ek Zeova Limem, pu fyer akoz Syon. Li pu enn “kitsoz ki fer kontan,” enn rezon pu ena gran lazwa. Ek sa pa zis pu enn tigit letan. Kondisyon favorab Syon, ki reprezante par so bann zanfan lor later, pu dire “zenerasyon apre zenerasyon.” Zame li pa pu arete.

 6. Kuma eski bann vre Kretyin servi dibyin bann nasyon?

⁶ Asterla, ekut enn lot promes Bondye. Zeova pe koz ar Syon ek Li dir: “To pu tet dile bann nasyon, ek to pu tet sin bann lerwa; ek vremem to pu kone ki mwa, Zeova, mo to Sover, ek ki sa Kikenn ki Pwisan pu Zakob la, Li sa Kikenn ki finn reaste zot la.” (Izai 60:16) Kuma eski Syon bwar “dile bann nasyon” ek tet “sin bann lerwa”? Se kan bann Kretyin win ek zot bann konpaynon “bann lezot muton” servi dibyin bann nasyon ki ena buku valer pu avans ladorasyon pir Bondye. (Zan 10:16) Bann kontribisyon volonter finansye ki zot done permet ki ena enn gran travay predikasyon ek lanseynman internasyonal. Enn Litilizasyon saz bann teknolozi modern permet pu pibliye bann Labib ek bann piblikasyon biblik dan plizir santenn lang avek plis fasilite. Zordi, laverite ki truv dan Labib li disponib pu plis dimunn ki zame avan dan listwar. Bann abitan buku-buku nasyon pe aprann ki Zeova, ki finn reaste bann serviter win ki ti an esklavaz spirityel, Li vremem zot Sover.

Progre dan Domenn Lorganizasyon

 7. Ki bann gran progre bann zanfan Syon finn kone?

⁷ Zeova finn fer so pep vinn zoli dan enn lot fason ankor. Li’nn beni zot kan Li’nn fer zot progrese dan domenn lorganizasyon. Dan Izai 60:17, nu lir: “Dan plas kwiv, mo pu amenn lor, ek dan plas feray mo pu amenn larzan, ek dan plas dibwa, kwiv, ek dan plas bann ros, feray; ek mo pu fer lape vinn zot sirveyan ek lazistis bann seki pu donn zot travay.” Ranplas kwiv par lor, sa li enn amelyorasyon; ek sa li aplik usi pu bann lezot materyel ki mansyone. An akor avek sa, Izrael Bondye finn konn bann amelyorasyon dan domenn lorganizasyon pandan sa bann dernye zur la. Anu egzaminn detrwa legzanp.

8-10. Dekrir sertin progre dan domenn lorganizasyon ki finn arive depi 1919.

⁸ Avan 1919, bann kongregasyon lepep Bondye ti dirize par bann ansyin uswa bann ‘diacres,’ zot tu ti eli enn fason demokratik par bann manb kongregasyon. Apartir sa lane la, “esklav fidel ek avize” ti nom enn direkter servis dan sak kongregasyon pu siperviz bann laktivite predikasyon. (Matye 24:45-47) Me sa laranzman la pa’nn mars byin dan buku kongregasyon parski sa bann ansyin ki ti’nn eli la pa ti pe sutenir predikasyon labonn nuvel plin-plin. Donk, an 1932, bann kongregasyon ti gayn instriksyon pu aret elir par vot bann ansyin ek bann ‘diacres.’ Olye sa, zot ti pu elir bann zom ki pu servi dan enn komite servis ansam avek sa direkter servis la. Sa sanzman la ti kumadir “kwiv” olye “dibwa”—enn gran progre!

⁹ An 1938, bann kongregasyon partu dan lemond ti deside pu aksepte enn meyer dispozisyon, enn dispozisyon ki ti plis an akor avek bann dispozisyon biblik avan. Ladministrasyon kongregasyon ti konfye ar enn serviter grup ek lezot serviter. Tu sa bann frer la ti nome anba sirveyans esklav fidel ek avize. Ti pu nepli ena eleksyon! Kumsa bann nominasyon dan kongregasyon ti fer dan enn fason teokratik. Sa ti kumadir “feray” olye “bann ros,” uswa “lor” olye “kwiv.”

¹⁰ Depi sa, finn kontiyne ena progre. Par egzanp, an 1972, ti konpran ki kan bann kongregasyon dirize par enn kolez ansyin ki nome dan enn fason teokratik ek ki travay ansam, san ki ena enn ansyin ki egzers lotorite lor lezot, sa ti ankor pli pre ar fason ki bann kongregasyon Kretyin premye syek ti dirize. Pa fini, fek la, dezan desela, finn fer enn lot pa ankor an avan. Finn fer enn sanzman an seki konsern ladministrasyon sertin korperasyon legal. Sa permet Kolez Santral konsantre plis lor bann lintere spirityel pep Bondye olye ki zot res okipe avek bann zafer legal ki arive tulezur.

11. Kisannla ki ti deryer bann sanzman dan domenn lorganizasyon parmi lepep Zeova, ek ki ti rezilta sa bann sanzman la?

¹¹ Kisannla ki deryer sa bann sanzman ki’nn fer tigit par tigit la? Personn apart Bondye Zeova. Limem ki dir: “Mo pu amenn lor.” Ek Limem ki kontiyn dir: “Mo pu fer lape vinn zot bann sirveyan ek lazistis bann seki pu donn zot travay.” Wi, Zeova ki responsab pu siperviz so pep. Sa progre dan domenn lorganizasyon ki ti anonse la, ti enn lot fason pu fer so pep vinn zoli. Rezilta: Bann Temwin Zeova finn beni dan plizir fason. Dan Izai 60:18, nu lir: “Pu nepli tann koz vyolans dan to peyi, ni piyaz, ni kitsoz pe kraze, dan to bann frontyer. Ek vremem to pu apel to bann prop miray, Delivrans, ek to bann laport, Luanz.” Wi, sa bann parol la byin zoli! Me kuma eski zot finn realize?

12. Kuma eski lape finn arive reyne parmi bann vre Kretyin?

¹² Lizye bann vre Kretyin fixe lor Zeova pu zot gayn linstriksyon ek direksyon, ek so rezilta ti anonse par Izai: “Tu to bann garson pu bann dimunn ki finn anseyne par Zeova, ek to bann garson pu konn lape an abondans.” (Izai 54:13) Anplis, lespri Zeova azir lor so pep, ek lape li enn parti frwi sa lespri la. (Galat 5:22, 23) Lape ki lepep Zeova gayne, fer zot vinn kuma enn oazis dan sa lemond vyolan la. Sa kondisyon lape ki bann vre Kretyin pe kone la, ek ki baze lor lamur ki zot ena sakenn pu zot kamarad, li enn avangu lavi dan nuvo lemond. (Zan 15:17; Kolosyin 3:14) Sirman sakenn parmi nu ere pu zwir ek favoriz sa lape la, parski sa amenn luanz ek loner pu nu Bondye ek li enn eleman byin inportan dan nu paradi spirityel!—Izai 11:9.

Lalimyer Zeova Pu Kontiyn Briye

13. Kifer eski nu kapav sir ki lalimyer Zeova zame pa pu aret briye lor so pep?

¹³ Eski lalimyer Zeova pu kontiyn briye lor so pep? Wi! An Izai 60:19, 20, nu lir: “Pu twa soley pu nepli enn lalimyer lizur, ek pu klarte, lalinn pu nepli ekler twa. Ek vremem Zeova pu vinn pu twa enn lalimyer ki pu dir pu tuletan, ek to Bondye, to bote. To soley pu nepli al kuse, ni to lalinn pu diminye; parski Zeova Limem pu vinn enn lalimyer ki dire pu tuletan ek bann zur to dey pu fini.” Enn fwa ki “dey” bann ki ti dan kaptivite spirityel ti fini an 1919, lalimyer Zeova ti kumans briye lor zot. Zordi, plis ki 80 an plitar, zot ankor pe zwir faver Zeova amezir ki so lalimyer kontiyn briye. Ek sa pa pu arete. An seki konsern bann ki ador Li, nu Bondye pa pu “al kuse” parey kuma soley, ni Li pu “diminye” parey kuma lalinn. Okontrer, Li pu fann lalimyer lor zot pu leternite. Wi, vremem pu nu ki pe viv pandan sa bann dernye zur sa lemond ki dan nwarte la, sa li enn lasirans extraordiner!

14, 15. (a) Dan ki fason eski tu lepep Bondye, zot “drwat”? (b) Dapre Izai 60:21, ki realizasyon inportan bann lezot muton pe atann avek inpasyans?

¹⁴ Asterla, ekut enn lot promes ankor ki Zeova prononse konsernan bann ki reprezant Syon lor later, setadir Izrael Bondye. Izai 60:21 dir: “An seki konsern to pep, zot tu pu bann dimunn drwat; zot pu posed peyi pu tuletan, ti burzon mo plantasyon, travay mo lamin, pu fer mwa vinn zoli.” An 1919, kan bann Kretyin win ti repran zot aktivite, zot ti enn grup diferan ar lezot. Dan enn lemond ki vremem dan pese, finn ‘deklar zot drwat’ grasa lafwa ferm ki zot ena dan sakrifis ranson Zezi Kris. (Romin 3:24; 5:1) Apre sa, parey kuma bann Izraelit ki ti kaptif dan Babilonn ek apre ti libere, zot finn gayn enn “peyi,” enn peyi spirityel, uswa enn teritwar pu fer zot laktivite, kot zot pu kapav zwir enn paradi spirityel. (Izai 66:8) Bote sa peyi la, ki kuma enn paradi, zame pa pu fane parski, kontrerman avek ansyin Izrael, Izrael Bondye antan ki enn nasyon, pa pu montre li infidel. Zot lafwa, zot landirans, ek zot zel zame pa pu aret fer non Bondye gayn luanz.

¹⁵ Tu bann manb sa nasyon spirityel la finn rant dan nuvo lalyans. Zot tu zot ena lalwa Zeova ekrir lor zot leker, ek Zeova pardonn zot pese atraver sakrifis Zezi, ki li’nn done an ranson. (Zeremi 31:31-34) Li konsider zot kuma so bann “garson,” Li deklar zot drwat, ek Li tret zot kuma bann dimunn parfe. (Romin 8:15, 16, 29, 30) Zot bann konpaynon, bann lezot muton, zot usi zot gayn pardon pu zot bann pese atraver sakrifis Zezi, ek parey kuma Abraam, Bondye deklar zot drwat kuma so bann kamarad grasa zot lafwa. “Zot finn lav zot rob ek finn fer zot vinn blan dan disan Lanyo.” Ek sa bann konpaynon la, bann lezot muton, pe atann avek inpasyans enn lot benediksyon extraordiner. Apre ki zot pu sape dan “gran detres,” uswa apre ki zot pu resisite, zot pu truv bann parol Izai 60:21 realize enn fason literal, kan later antye pu vinn enn paradi. (Revelasyon 7:14; Romin 4:1-3) Lerla, “bann ki sumet pu gayn later, ek vremem zot pu gayn buku plezir dan labondans lape.”—Psom 37:11, 29.

Lakrwasman Kontiyne

16. Ki promes extraordiner Zeova ti fer, ek kuma eski sa finn realize?

¹⁶ Dan dernye verse Izai 60, nu lir promes final ki Zeova fer dan sa sapit la. Li dir ar Syon: “Seki tigit pu vinn mil, ek sa ti grup la pu vinn enn nasyon pwisan. Mwa Zeova, mo pu akseler sa dan so ler.” (Izai 60:22) Dan nu lepok, Zeova finn tini so parol. Kan bann Kretyin win ti repran zot laktivite an 1919, zot ti enn ti grup—wi, enn “tigit.” Zot kantite finn ogmante amezir ki lezot Izraelit spirityel finn azute. Apre sa, bann lezot muton finn kumans vinn ver zot an enn kantite ki pe kontiyn ogmante. Lape lepep Bondye, paradi spirityel ki pe egziste lor zot “peyi,” finn atir telman enn kantite dimunn sinser, ki “sa ti grup la” finn vinn vremem “enn nasyon pwisan.” Zordi sa “nasyon” la—Izrael Bondye ek plis ki sis milyon “etranze” ki’nn angaz zot ar Bondye—li pli gran ki popilasyon buku peyi dan lemond. (Izai 60:10) Tu bann ki fer parti dan sa nasyon la pe fer zot par pu reflekte lalimyer Zeova ek sa fer zot paret zoli devan so lizye.

17. Ki lefe sa diskisyon lor Izai sapit 60 la ena lor u?

¹⁷ Wi, nu lafwa fortifye kan nu egzaminn sa bann pwin inportan ki dan Izai sapit 60 la. Li enn rekonfor pu truve ki depi tu sa letan la, Zeova ti kone an avans ki so pep ti pu al an kaptivite lor plan spirityel ek apre zot ti pu retabli. Li extraodiner ki depi sa kantite letan la, Zeova ti fini prevwar an avans ki kantite bann vre adorater pu ogmante dan nu lepok. Anplis, li enn rekonfor pu rapel ki Zeova pa pu kit nu! Wi, lasirans ki bann laport sa “lavil” la pu res tuletan uver pu resevwar avek lospitalite bann ki “dan dispozisyon ki bizin pu viv pu tuletan,” sa li vremem enn dispozisyon ranpli ar lamur! (Akt 13:48) Zeova pu kontiyn briye lor so pep. Syon pu kontiyn vinn enn lobze fyerte amezir ki so bann zanfan les zot lalimyer vinn deplizanpli briyan. (Matye 5:16) Sirman, nu pli determine ki zame pu res pros ar Izrael Bondye ek pu apresye privilez ki nu ena pu reflekte lalimyer Zeova!

Eski U Kapav Explike?

• An seki konsern lopozisyon, dan ki kitsoz nu ena konfyans?

• Kuma eski bann zanfan Syon finn ‘tet dile bann nasyon’?

• Dan ki bann fason eski Zeova ti ‘amenn kwiv olye dibwa’?

• Ki de kalite resorti byin dan Izai 60:17, 21?

• Kuma eski “sa ti grup la” finn vinn “enn nasyon pwisan”?

[Lankadre lor paz 28]

LA PROPHÉTIE D’ISAÏE, lumière pour tous les humains

Bann pwin prinsipal bann matyer ki ena dan sa bann lartik la, ti prezante dan enn diskur dan bann Lasanble Distrik 2001/02 “Bann Anseynan Parol Bondye.” Alafin sa diskur la, dan laplipar landrwa, orater la ti prezant enn nuvo piblikasyon ki ena tit La prophétie d’Isaïe, lumière pour tous les humains, Volim De. Lane avan, La prophétie d’Isaïe, lumière pour tous les humains, Volim Enn ti paret. Asterla, avek sa nuvo piblikasyon la, nu kapav gayn enn legzamin azur, lor preske tu verse dan liv Izai. Sa bann liv la zot bann bon led pu fer nu gayn enn konpreansyon ek lapresyasyon pli profon pu liv profetik Izai, ki ogmant nu lafwa.

[Zimaz lor paz 25]

Devan persekisyon vyolan, ‘Zeova fer so pep vinn zoli kan Li delivre zot’

[Zimaz lor paz 26]

Lepep Bondye servi dibyin bann nasyon ki ena buku valer pu fer ladorasyon pir Bondye progrese

[Zimaz lor paz 27]

Progre dan domenn lorganizasyon ek lape, ti bann benediksyon ki Zeova ti donn so pep