“Amenn enn bon nouvel lor enn kitsoz ki pli bon”

“Ala zot joli lor montagne, lipié sa dimoune ki . . . pé amenn enn bon nouvel lor enn kitsoz ki pli bon.”—ISAÏE 52:7.

1, 2. (a) Ki bann kitsoz terrible pé arrivé toulé-jour? (b) Ki beaucoup dimoune ressenti kan touletan zot tann bann mauvais nouvel?

ZORDI, partout dan le monde, bann dimoune inn fatigué tann bann mauvais nouvel. Zot allume zot radio, zot tann koz lor bann maladie mortel ki pé menace bann dimoune lor la terre. Zot guette l’information dan television, zot trouve bann zimage lor bann zenfant ki pé mort de faim ek ki pé crié au secours, ek sa bann zimage-la reste dan zot la-tête. Zot prend enn la-gazette, zot lire ki bann bombe finn detruire bann batiment ek finn touye beaucoup dimoune innocent.

² Oui, toulé-jour bann kitsoz terrible pé arrivé lor la terre. Scene sa lé-monde-la pé vrai-mem changé ek pé vinn pli pire. (1 Corinthiens 7:31) Enn magazine en Europe de l’Ouest ti faire remarké ki parfois, coumadir le monde entier “pré pou fini.” Li pa etonnant ki beaucoup dimoune bien tracassé! Enn l’enquete ti cite seki enn dimoune ti dire concernant bann l’information ki passé dan television en Amérique: ‘Kan mo’nn fini guette l’information, mo bien deprimé. Ena zis bann mauvais nouvel. Sa bien decourage moi.’ Plusieurs million dimoune ena mem sentiment.

Enn nouvel ki tou dimoune bizin tendé

 3. (a) Ki bon nouvel la Bible annoncé? (b) Kifer bon nouvel lor Royaume Bondié ena valeur pou ou?

³ Dan sa lé-monde en detresse-la, eski nou kapav tann bann pli bon nouvel? Oui, nou kapav! Li encourageant pou koné ki la Bible annonce enn bon nouvel: maladie, la faim, crime, la guerre, ek tou sorte qualité malheur, pou disparette grace a Royaume Bondié. (Psaume 46:9; 72:12) Eski c’est pa enn nouvel ki tou dimoune bizin tendé? Sans okenn doute bann Témoins de Jéhovah pense sa. C’est pou sa ki partout, dimoune konn zot couma bann ki touletan pé partage la bonne nouvelle lor Royaume Bondié avek bann dimoune dan le monde entier.—Matthieu 24:14.

 4. Ki kitsoz ki concerne nou ministere nou pou examiné dan sa lartik-la ek dan prochain lartik?

⁴ Seulement, couma eski nou kapav contigne preche sa bon nouvel-la dan enn fason pou gagne bann bon resultat, ek ki donne nou satisfaction, mem dan bann territoire kot bann dimoune pa content ecouté? (Luc 8:15) Sa pou surement aide nou si nou ré-guette trois kitsoz ki concerne nou predication. Nou pou examine (1) nou bann mobile, setadir kifer nou preché; (2) nou message, setadir ki kitsoz nou preché; ek (3) nou bann method, setadir couma nou preché. Kan nou ena bann bon mobile, enn message clair, ek bann method efficace, nou pou donne tou sorte qualité dimoune, l’occasion pou tann pli bon nouvel ki ena—la bonne nouvelle lor Royaume Bondié.a

Kifer nou preche la bonne nouvelle

 5. (a) Avant tou, ki pousse nou pou preché? (b) Kifer nou kapav dire ki, kan nou obeir l’ordre biblik pou preché, nou pé montré nou l’amour pou Bondié?

⁵ Anou examine premier aspect nou predication—nou mobile. Kifer nou preche la bonne nouvelle? Pou mem raison ki Jésus ti preché. Li ti dire: “Mo content [mo] Papa.” (Jean 14:31; Psaume 40:8) Oui, avant tou, c’est l’amour pou Bondié ki pousse nou pou preché. (Matthieu 22:37, 38) La Bible montré ki ena enn rapport entre l’amour pou Bondié ek nou ministere. Li dire: “Ala seki vedir l’amour pou Bondié: nou bizin suive so bann commandement.” (1 Jean 5:3; Jean 14:21) Eski commandement pou “allé ek faire bann disciple” faire partie dan bann commandement Bondié? (Matthieu 28:19) Oui. Li vrai ki c’est Jésus ki ti dire sa bann parole-la, mais en realité, zot sorti kot Jéhovah. Dan ki sens? Jésus ti donne sa l’explication-la: “Mo pa faire nanyin par mo-mem; mais pareil couma mo Papa finn enseigne moi, [coumsa-mem] mo dire sa bann kitsoz-la.” (Jean 8:28; Matthieu 17:5) Alors, kan nou suive commandement pou preché, nou montré Jéhovah ki nou content Li.

 6. Dan ki fason nou l’amour pou Bondié pousse nou pou preché?

⁶ En plus, nou l’amour pou Jéhovah pousse nou pou preché parski nou envie dementi bann mensonge ki Satan pé fané lor Li. (2 Corinthiens 4:4) Satan ti mette en doute la justice domination Bondié. (Genèse 3:1-5) En tant ki Témoins de Jéhovah, nou vrai-mem envie dementi bann accusation Satan, ek sanctifié nom Bondié devant tou dimoune. (Isaïe 43:10-12) En plus, nou preché parski nou finn aprann konn bann qualité ki Jéhovah ena, ek so fason agir. Nou senti-nou proche ar Li, ek nou ena enn grand desir pou koz nou Bondié avek lezot. En realité, la bonté Jéhovah ek so justice, touche nou tellement ki nou pa kapav arrete koz lor Li. (Psaume 145:7-12) Nou senti-nou obligé pou loué Li, ek pou koz lor so bann “bon qualité” avek bann ki disposé pou ecoute nou.—1 Pierre 2:9; Isaïe 43:21.

 7. A part nou l’amour pou Bondié, pou ki raison important nou preché?

⁷ Ena enn lot raison important ki pousse nou pou contigne preché: nou envie sincerement soulage bann dimoune ki’nn fatigué tann sa quantité mauvais nouvel ki ena-la, ek aussi bann ki pé souffert a cause bann different problem. Kan nou faire sa, nou essaye imite Jésus. Anou guette par exemple, enn evenement ki mentionné dan Marc chapitre 6.

 8. Ki Marc chapitre 6 montré nou lor sentiment ki Jésus ti ena pou bann dimoune?

⁸ Kan bann zapotre ti retourné apré zot tourné predication, zot ti raconte Jésus tou seki zot ti faire ek enseigné. Jésus ti remarké ki bannla ti fatigué, ek li ti dire zot vinn avek li pou “repose enn tipé.” Alors, zot ti monte dan enn bateau ek zot ti al dan enn place trankil. Bann dimoune ti suive zot, zot ti galopé lor la plage, ek bien vite, zot ti joinde Jésus. Ki Jésus ti faire? La Bible raconté: “Li finn trouve enn grand la-foule, mais li finn ena pitié pou zot, parski zot ti couma bann mouton ki pena berger. Ek li finn commence enseigne zot beaucoup kitsoz.” (Marc 6:31-34) Jésus ti ena pitié pou bann dimoune ek sa ti pousse li pou partage la bonne nouvelle avek zot malgré ki li ti fatigué. Li clair ki leker Jésus ti touché par sa bann dimoune-la.

 9. Kan nou lire Marc chapitre 6, ki nou aprann concernant bann mobile ki nou bizin ena kan nou preché?

⁹ Ki nou aprann dan sa recit-la? En tant ki chrétien, nou senti-nou obligé pou preche la bonne nouvelle ek pou faire bann disciple. Nou koné ki nou ena sa responsabilité-la, parski c’est volonté Bondié ki “tou sorte qualité dimoune sauvé.” (1 Timothée 2:4) Seulement, nou pa accompli nou ministere zis par devoir, mais aussi parski nou ena pitié pou bann dimoune. Si, couma Jésus, nou ena enn grand pitié pou bann dimoune, nou leker pou pousse nou pou faire tou seki nou kapav pou contigne partage la bonne nouvelle avek zot. (Matthieu 22:39) Sa bann bon mobile-la pou pousse nou pou preche la bonne nouvelle sans nou baisse le bras.

Nou message —La bonne nouvelle lor Royaume Bondié

10, 11. (a) Ki description Isaïe ti donné lor message ki nou preché? (b) Couma Jésus ti amenn enn bon nouvel lor enn kitsoz ki pli bon, ek couma bann serviteur Bondié dan lepok modern suive so l’exemple?

¹⁰ Ki nou kapav dire lor deuxieme kitsoz ki concerne nou travail predication—nou message? Ki kitsoz nou preché? Prophete Isaïe ti donne enn joli description lor message ki nou preché. Li ti dire: “Ala zot joli lor montagne, lipié sa dimoune ki amenn enn bon nouvel, enn kikenn ki annonce la paix, enn kikenn ki amenn enn bon nouvel lor enn kitsoz ki pli bon, ki annonce la delivrance, ki dire Sion: ‘To Bondié finn vinn lé-roi!’ ”—Isaïe 52:7.

¹¹ Dan sa verset-la, l’expression pli important c’est: “To Bondié finn vinn lé-roi.” Sa rappel nou message ki nou bizin annoncé, setadir la bonne nouvelle lor Royaume Bondié. (Marc 13:10) Remarké aussi ki sa verset-la montré ki nou pé amenn enn message positif. Isaïe servi bann expression couma “delivrance,” “bon nouvel,” “la paix,” ek “enn kitsoz ki pli bon.” Plusieurs siecle apré Isaïe, dan premier siecle nou lepok, Jésus Christ ti realise sa prophetie-la dan enn fason extraordinaire kan, avek zèle, li ti annonce enn bon nouvel lor enn kitsoz ki pli bon, setadir ki Royaume Bondié pé vini. (Luc 4:43) Dan lepok modern, surtout depuis 1919, bann Témoins de Jéhovah suive l’exemple Jésus, ek zot annonce avek zèle la bonne nouvelle lor Royaume Bondié ki finn deja etabli dan le ciel, ek lor bann benediction ki li pou amené.

12. Ki l’effet la bonne nouvelle lor Royaume Bondié ena lor bann ki accepté li?

¹² Ki l’effet la bonne nouvelle lor Royaume Bondié ena lor bann ki accepté li? Zordi, pareil couma dan lepok Jésus, la bonne nouvelle donne bann dimoune l’espoir ek l’encouragement. (Romains 12:12; 15:4) Premierement, li donne bann dimoune sincere l’espoir, parski zot aprann ki ena bann bon raison pou attann enn pli bon l’avenir. (Matthieu 6:9, 10; 2 Pierre 3:13) Sa l’espoir-la aide bann dimoune ki ena la crainte pou Bondié pou garde enn l’attitude positif lor la vie. Enn psalmiste dire ki zot “pa pou peur bann mauvais nouvel.”—Psaume 112:1, 7.

Enn message ki pou “soulage bann ki ena enn grand chagrin dan zot leker”

13. Couma prophete Isaïe ti decrire bann bienfait ki bann dimoune ki accepté la bonne nouvelle, pou gagné asterla-mem?

¹³ Deuxiemement, la bonne nouvelle ki nou preché soulage bann dimoune ki ecouté, ek faire zot gagne bann bienfait asterla-mem. Couma? Prophete Isaïe ti predire certain parmi sa bann bienfait-la, li ti dire: “L’esprit Souverain Seigneur Jéhovah, li lor moi, parski Jéhovah finn choisir moi pou annonce bann bon nouvel ar bann dimoune ki ena l’humilité. Li finn envoye moi pou soulage bann dimoune ki ena enn grand chagrin dan zot leker, pou annonce la liberté pou bann prisonnier, pou annoncé ki zot lizié pou ouvert net; pou annonce l’année kot nou pou gagne faveur Jéhovah, ek jour vengeance nou Bondié; ek pou console tou bann ki en deuil.”—Isaïe 61:1, 2; Luc 4:16-21.

14. (a) Ki l’expression ‘soulage bann ki ena enn grand chagrin dan zot leker,’ montré concernant message lor Royaume Bondié? (b) Couma nou imite l’interet ki Jéhovah ena pou bann dimoune ki ena chagrin dan zot leker?

¹⁴ Dapré sa prophetie-la, kan Jésus ti pou preche la bonne nouvelle, li ti pou “soulage bann dimoune ki ena enn grand chagrin dan zot leker.” Isaïe ti servi enn zimage bien touchant! Dapré enn dictionnaire biblik, “souvent servi mot hébreu ki traduire par ‘soulagé’ pou koz lor enn bandage ki servi pou ‘faire enn pansement,’ setadir pou soigne enn dimoune ki’nn blessé.” Enn bon infirmiere kapav entoure enn bandage ou-soit mette enn pansement lor blessure enn dimoune ki’nn blessé, pou soulage li. Dan mem fason, kan bann proclamateur ki preche la bonne nouvelle lor Royaume Bondié, prend compte lezot, zot pé soulage bann dimoune ki ecouté ek ki pé souffert dan bann different fason. Ek kan zot soutenir bann dimoune ki dan le besoin, zot pé imite l’interet ki Jéhovah ena pou bann dimoune. (Ézékiel 34:15, 16) Enn psalmiste ti dire lor Bondié: “Li gueri bann dimoune ki ena enn grand chagrin dan zot leker, ek Li soulage bann place kot zot ena douleur.”—Psaume 147:3.

Ki changement message lor Royaume Bondié amené?

15, 16. Cite bann l’experience ki montré couma message lor Royaume Bondié soutenir ek fortifié bann dimoune ki ena problem.

¹⁵ Ena beaucoup l’experience ki montré couma message lor Royaume Bondié finn vrai-mem soutenir ek fortifié bann dimoune ki ena enn grand chagrin dan zot leker. Prend l’exemple Oreanna, enn madame agé ki reste en Amérique du Sud ek ki ti nepli ena gout pou vive. Enn Témoin de Jéhovah ti commence visite Oreanna, ek ti lire la Bible ek livre Mo Liv Zistwar Labib avek li.b Au commencement, letan sa madame deprimé-la ti ecouté, li ti reste allongé dan so lili, li ti garde so lizié fermé ek de temps en temps li ti pousse enn soupir. Mais li pa finn tardé pou commence faire enn zeffort pou li assize dan so lili pendant ki soeur-la ti pé lire. Plitar, li ti assize lor enn chaise dan salon, li ti attann kan so professeur la Bible pou vini. Apré, madame-la ti commence assisté reunion bann Témoins de Jéhovah dan la Salle du Royaume. Seki li ti aprann dan sa bann reunion-la ti encourage li, ek li ti commence donne bann publication ki basé lor la Bible ar tou dimoune ki ti passe devant so lakaz. Oreanna ti prend bapteme l’age 93 an, pou vinn enn Témoin de Jéhovah. Message lor Royaume Bondié ti redonne li la joie pou vive.—Proverbes 15:30; 16:24.

¹⁶ Message lor Royaume Bondié amenn enn grand soutien mem pou bann dimoune ki koné ki zot pré pou mort a cause enn maladie. Prend par exemple, Maria, ki ti vive en Europe de l’Ouest. Li ti ena enn maladie ki pa kapav gueri, ek li pa ti ena okenn l’espoir pou l’avenir. Kan bann Témoins de Jéhovah ti contacté li, li ti bien deprimé. Seulement kan li ti aprann bann projet ki Bondié ena, so la-vie finn regagne enn sens. Li ti prend bapteme ek li ti vinn bien actif dan predication. Pendant deux an ki li ti resté pou vive, li ti toujours ena l’espoir ek la joie dan so regard. Maria ti mort avek enn l’espoir solid dan la resurrection.—Romains 8:38, 39.

17. (a) Couma message lor Royaume Bondié kapav amenn enn grand changement dan la vie bann dimoune ki accepté li? (b) Dan ki fason ou finn personnellement trouvé ki Jéhovah pé “releve tou bann ki courbé”?

¹⁷ Sa bann experience-la montré changement ki message lor Royaume Bondié kapav amené dan la vie bann dimoune ki soif la verité ki trouve dan la Bible. Bann dimoune ki finn perdi bann ki zot content dan la mort, regagne courage kan zot aprann ki pou ena enn resurrection. (1 Thessaloniciens 4:13) Bann dimoune ki vive dan la misere, ek ki bizin lutté pou nourri zot famille, regagne zot dignité ek zot courage kan zot aprann ki jamais Jéhovah pa pou abandonne zot si zot reste fidel envers Li. (Psaume 37:28) Avek l’aide Jéhovah, beaucoup ki accablé par depression kapav tigit par tigit, regagne la force pou faire face ar sa maladie-la, ek dan certain cas, zot kapav mem gueri. (Psaume 40:1, 2) Oui, par la force ki Jéhovah donné a travers so Parole, asterla-mem, Li pé “releve tou bann ki courbé.” (Psaume 145:14) Kan nou trouvé couma bann dimoune ki reste dan nou territoire, ek bann ki dan la congregation, pé gagne enn grand l’encouragement grace a la bonne nouvelle lor Royaume Bondié, sa ré-rappel nou encore, ki nou ena pli bon nouvel ki existé lor la terre zordi!—Psaume 51:17.

‘La-priere ki mo faire pou zot’

18. Couma Paul ti affecté kan bann Juif ti rejette la bonne nouvelle, ek kifer?

¹⁸ Mem si nou pé preche pli bon nouvel ki ena, beaucoup dimoune rejette nou message. Couma sa kapav affecté nou? Dan mem fason ki sa ti affecté l’apotre Paul. Souvent li ti preche avek bann Juif, mais la plupart ti rejette message delivrance ki li ti pé preché. Sa ti bien affecté Paul. Li ti reconette: “Dan mo leker, mo ena enn grand tristesse ek enn douleur ki pa’lé allé.” (Romains 9:2) Paul ti ena pitié pou bann Juif avek ki li ti preché, sa ti faire li chagrin ki bannla ti rejette la bonne nouvelle.

19. (a) Kifer li normal ki parfois nou senti-nou decouragé? (b) Ki ti aide Paul pou contigne preché?

¹⁹ Nou aussi, nou preche la bonne nouvelle parski nou ena pitié pou bann dimoune. Alors, li normal ki nou senti-nou decouragé kan beaucoup dimoune rejette message lor Royaume Bondié. Sa sentiment-la montré ki nou vrai-mem interessé ar bien-etre spirituel bann dimoune avek ki nou preché. Seulement, li bon ki nou rappel l’exemple l’apotre Paul. Ki ti aide li pou contigne preché? Mem si li ti bien chagrin kan nation juif ti rejette la bonne nouvelle, Paul pa ti abandonne tou bann Juif. Li pa ti pensé ki personne parmi zot pa ti merite l’aide. Li ti ena l’espoir ki ti ena kan-mem certain Juif ki ti pou accepté Christ. Alors, concernant bann Juif lor plan individuel, Paul ti dire: “Sa bon volonté ki ena dan mo leker-la, ek la priere ki mo faire pou zot, oui li vrai-mem pou zot delivrance.”—Romains 10:1.

20, 21. (a) Concernant nou ministere, couma eski nou kapav suive l’exemple Paul? (b) Ki kitsoz en rapport avek nou ministere, nou pou examiné dan prochain lartik?

²⁰ Remark sa deux kitsoz ki Paul ti mentionné-la. Premierement, li ti ena enn grand desir ki certain dimoune trouve delivrance, ek deuxiemement, li ti supplié Jéhovah lor sa sujet-la. Zordi, nou suive l’exemple Paul. Nou faire tou pou trouve bann dimoune ki encore ena enn bon disposition envers la bonne nouvelle. Nou contigne prié Jéhovah pou nou kapav trouve sa qualité dimoune-la, ek pou aide zot suive enn chemin ki pou faire zot gagne la vie sauve.—Proverbes 11:30; Ézékiel 33:11; Jean 6:44.

²¹ Mais, pou nou kapav preche Royaume Bondié avek pli beaucoup dimoune possible, fodé pa ki nou zis guetté kifer ek ki kitsoz nou preché, mais aussi couma nou preché. Nou pou examine sa sujet-la dan prochain lartik.

[Note]

Ki ou finn aprann?

• Pou ki raison eski nou participe dan predication?

• Ki message principal nou preché?

• Ki bienfait bann dimoune ki accepté message lor Royaume Bondié gagné?

• Ki kitsoz pou aide nou contigne preché?

[Zimage, page 26]

La priere aide nou pou enduré dan nou ministere