“Bann habitant temporaire” uni dan vrai l’adoration

 1. Couma certain considere bann etranger, mais kifer li pa bon ki nou pense coumsa?

COUMA nou ti mentionné dan lartik avant, bann dimoune servi mot “etranger” dan enn fason negatif pou denigré bann dimoune ki sorti dan lezot pays, ek mem pou montré zot la haine pou sa bann dimoune-la. C’est enn mank respé si nou considere bann dimoune ki sorti dan enn lot pays, inferieur ar bann dimoune ki vive dan nou pays. En plus, sa montré ki nou pa konn tou bann fait. Enn livre ki appel Les races de l’humanité (en anglais) dire: “Pareil couma la Bible dire, bann dimoune different race, zot bann frere.” Souvent bann frere zot different, mais zot bann frere kan-mem.

2, 3. Ki Jéhovah pensé lor bann etranger?

² N’importe kot nou resté, ena bann etranger ki vive parmi nou. Dan le passé aussi ti ena bann etranger ki ti vive parmi bann Israélite. Mem si bann Israélite ti ena bann relation special avek Jéhovah grace a l’alliance la Loi, Jéhovah ti demann zot pou traite bann ki pa Israélite, avek respé ek dan enn fason juste. C’est enn bon l’exemple pou nou, pa vrai? Fodé pa ki bann vrai chretien faire preference ou-soit fini juge bann dimoune en avance. Kifer? L’apotre Pierre ti dire: “Vrai-mem, mo rann-moi compte ki Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”​—Actes 10:34, 35.

³ Bann etranger ki ti vive en Israël dan le passé ti gagne bann bienfait kan zot ti associé-zot avek bann Israélite. Sa faire nou konn fason pensé Jéhovah lor bann etranger. Plusieurs l’année apré, l’apotre Paul ti demandé lor Jéhovah: “Eski Li zis Bondié bann Juif? Eski Li pa aussi Bondié bann dimoune lezot nation? Oui, bann dimoune lezot nation aussi.”​—Rom. 3:29; Yoël 2:32.

 4. Kifer nou kapav dire ki pa ti ena okenn etranger dan “Israël Bondié”?

⁴ Apré ki Bondié ti faire enn nouveau l’alliance avek congregation bann chretien oint, zot ti remplace nation Israël ki ti nepli ena bann relation special avek Jéhovah. Alors, sa bann chretien oint-la ti vinn “Israël Bondié.” (Gal. 6:16) Paul ti expliké ki dan sa nouveau nation-la, “pena ni Grec ni Juif, ni enn dimoune ki circonci, ni enn dimoune ki pa circonci, ni etranger, ni Scythe, ni esclave, ni zom libre, mais Christ li tou kitsoz ek en tou.” (Col. 3:11) Alors, pa ti considere personne couma enn etranger dan congregation chretien.

5, 6. (a) Ki question kitfois certain dimoune kapav posé lor Isaïe 61:5, 6? (b) Kisannla “bann pretre Jéhovah” ek “bann etranger” ki mentionné par Isaïe? (c) Ki sa deux groupe-la faire ensam?

⁵ Ena enn prophetie ki trouve dan Isaïe chapitre 61 ki pé realisé dan congregation chretien zordi. Certain kapav demann-zot-mem ki signification sa prophetie-la ena. Verset 6 dan sa chapitre-la mentionne bann ki pou servi couma “bann pretre Jéhovah.” Mais verset 5 mentionne bann “etranger” ki ti pou coopere ek travail ensam avek sa “bann pretre[-la.]” Couma nou bizin comprend sa?

⁶ Nou comprend ki sa “bann pretre Jéhovah[-la]” c’est bann chretien oint ki ena enn part dan “premier resurrection” ek ki “pou vinn pretre Bondié ek Christ, ek zot pou regne couma bann le roi avek li pendant mille an.” (Rév. 20:6) Ena aussi beaucoup lezot chretien ki fidele ek ki ena l’esperance pou vive lor la terre. Sa bann chretien-la, mem si zot pé travail ek zot pé adore Jéhovah ensam avek bann ki pou al dan le ciel, zot bann etranger dan enn fason symbolik. Zot content pou soutenir ek pou travail ensam avek “bann pretre Jéhovah,” couma “bann planteur” ek “bann ki occupe zot plantation raisin.” Zot aide bann chretien oint pou donne la gloire Bondié kan zot preché ek enseigne bann dimoune la verité. Oui, bann chretien oint ek “bann lezot brebis” toulé-deux faire zeffort pou trouve ek pou enseigne la verité bann dimoune sincere ki envie servi Bondié touletan.​—Jean 10:16.

 7. Couma zordi, bann chretien pareil couma Abraham ek bann lezot serviteur fidele dan le passé?

⁷ Pareil couma nou finn examiné dan lartik avant, bann vrai chretien zot couma bann etranger ou-soit bann habitant temporaire, dan mauvais le monde Satan. Zot pareil couma bann serviteur fidele dan le passé, parmi ena Abraham. La Bible dire ki “zot ti bann etranger ek bann habitant temporaire dan sa pays-la.” (Héb. 11:13) N’importe ki l’esperance nou ena pou l’avenir, nou ena privilege pou ena mem qualité relation ki Abraham ti ena avek Jéhovah. Jacques expliké ki “‘Abraham ti mette so la foi en Jéhovah, ek Bondié ti mette sa lor so compte couma la justice,’ ek ti appel li ‘camarade Jéhovah.’”​—Jacq. 2:23.

 8. Ki promesse Bondié ti faire ar Abraham, ek couma Abraham ti considere realisation sa promesse-la?

⁸ Bondié ti promette ki par moyen Abraham ek so bann descendant, tou bann famille lor la terre​—pa zis enn nation​—ti pou attire benediction lor zot. (Lire Genèse 22:15-18.) Mem si sa promesse Bondié-la ti pou realisé dan l’avenir, Abraham ti contigne garde so confiance dan realisation sa promesse-la. Pendant plus ki la moitié so la vie, li ek so famille ti bizin souvent change l’endroit. Mais pendant tou sa le temps-la, Abraham ti contigne garde so l’amitié avek Jéhovah.

9, 10. (a) Couma nou kapav suive l’exemple Abraham? (b) Ki nou kapav aide bann dimoune pou faire?

⁹ Mem si li pa ti koné comié le temps li ti pou bizin attann pou trouve realisation so l’esperance, l’amour ek l’attachement ki Abraham ti ena pou Jéhovah, jamais pa ti diminué. Li pa ti ena l’objectif pou vinn enn habitant permanent dan enn certain pays. (Héb. 11:14, 15) Li bon ki nou suive l’exemple Abraham, nou amenn enn la vie simple ek nou pa laisse bann kitsoz materiel, enn grand position, ou-soit desir pou faire enn grand carriere vinn bann kitsoz ki pli important dan nou la vie. Eski li vaut la peine ki nou faire zeffort pou amenn enn la vie ki beaucoup considere couma normal dan sa systeme ki pré pou detruire-la? Ki serti nou attache-nou ar seki zis temporaire? Pareil couma Abraham, nou pé attann enn kitsoz ki pli bon. Nou disposé pou montré ki nou ena patience ek ki nou pé attann realisation nou l’esperance.​—Lire Romains 8:25.

¹⁰ Jéhovah pé encore invite bann dimoune ki sorti dan tou nation pou gagne bann benediction grace a descendance Abraham. “Bann pretre Jéhovah” ki oint ek bann lezot brebis, “bann etranger,” pé aide bann dimoune pou aprann ki zot bizin faire pou gagne sa bann benediction-la. Zot pé faire sa partout lor la terre dan plus ki 600 langue.

11. Ki Salomon ti dire dan so la priere concernant bann dimoune lezot nation?

¹¹ Pendant l’inauguration temple en 1026 avant nou lepok, dan so la priere, Salomon ti demann Jéhovah pou ecoute bann dimoune dan tou nation ki ti pou vinn prié Li dan So temple. Coumsa, sa bann dimoune-la ti pou kapav gagne bann benediction grace a promesse ki Jéhovah ti faire ar Abraham. Dan enn la priere sincere, Salomon ti dire: “Ek aussi sa etranger-la, ki pou forme partie dan to peuple Israël, ek ki pou sorti vrai-mem dan enn pays ki loin, a cause to nom, (parski bann dimoune pou tann koz lor to grand nom, lor to la main puissant ek pouvoir to lé-bras), si vrai-mem li vinn prié vers sa lakaz-la, toi, ecoute li depuis le ciel, depuis l’endroit kot to resté, ek to bizin faire tou seki sa etranger-la demann toi dan so la priere; pou ki tou bann peuple lor la terre konn to nom, pou ki zot ena la crainte pou toi pareil couma to peuple Israël.”​—1 Rois 8:41-43.

12. Kifer bann Témoins de Jéhovah zot couma bann etranger dan pays kot zot resté?

¹² Enn etranger c’est enn dimoune ki pé visite enn pays ou-soit ki reste dan enn pays ki pa so pays. Dan enn certain sens, bann Témoins de Jéhovah zot couma bann etranger. Mem si zot vive dan plusieurs pays, zot soutenir zis Royaume Bondié, enn gouvernement ki dan le ciel ek ki dirigé par Jésus Christ. A cause sa, zot pa prend okenn part dan politik, mem si certain dimoune pensé ki zot bizin faire sa.

13. (a) Couma nou kapav aprann pou nou pa considere enn dimoune couma enn etranger? (b) Eski au commencement, Jéhovah ti envie ki bann dimoune considere zot prochain couma bann etranger? Expliké.

¹³ Souvent nou reconette bann etranger par zot fason kozé, zot coutume, zot l’apparence physik, ou-soit par zot l’habillement. Mais bann kitsoz ki bann etranger ena en commun avek tou lezot dimoune, n’importe ki pays zot sorti, sa bann kitsoz-la pli important ki bann kitsoz ki faire zot different. Alors, en general bann dimoune considere enn kikenn couma enn etranger, zis parski li different dan certaine fason. Mais kan nou aprann pou pa prend compte sa bann difference-la, lerla, nou nepli pou considere sa dimoune-la couma enn etranger. Si tou dimoune lor la terre ti dirigé par enn sel gouvernement, personne pa ti pou enn etranger. Au commencement, Jéhovah ti envie ki tou dimoune uni couma enn sel famille, dirigé par enn sel gouvernement​—so gouvernement. Eski li possible zordi ki bann dimoune dan tou nation arrete considere lezot couma bann etranger?

14, 15. Ki bann Témoins de Jéhovah en tant ki enn groupe finn kapav faire?

¹⁴ Nou pé vive dan enn le monde egoïste ek nationaliste. Mais sa encourage nou kan nou trouve certain content bann dimoune n’importe ki pays zot sorti. Li vrai ki li pa toujours facile pou faire sa. Ted Turner, ki ti crée chaine television CNN, ti travail avek bann dimoune ki ti ena bann grand capacité ek ki ti sorti dan different pays. Li ti faire sa commentaire-la lor zot: “Sa ti enn grand l’experience pou moi pou travail avek sa bann dimoune-la. Mo ti aprann pou considere bann ki sorti dan lezot pays, pa couma bann ‘etranger’ mais couma bann citoyen nou planete. Mo ti commence trouve sa mot ‘etranger-la’ meprisant, alors mo ti crée enn regle dan CNN ki fodé pa servi sa mot-la, ni lor television, ni dan nou conversation dan bureau. Nou ti bizin servi plutot mot ‘international.’”

¹⁵ Dan beaucoup pays lor la terre, zis bann Témoins de Jéhovah, en tant ki enn groupe ki finn aprann pou pense pareil couma Jéhovah. Zot finn aprann pou considere bann dimoune pareil couma Li, ek lerla zot finn change zot fason pensé ek seki zot ressenti pou bann etranger. Au lieu ki zot meprise sa bann dimoune-la, mefié zot, ou-soit mem ena la haine pou zot, bann Témoins de Jéhovah finn aprann pou content zot. Zot finn aprann pou apprecié bann kitsoz ki faire sa bann dimoune-la different ek aussi zot capacité. Eski ou finn reflechi lor la, ek ou finn trouvé couma sa fason pensé-la finn faire ou personnellement gagne bann bienfait?

16, 17. Ki l’accomplissement Révélation 16:16 ek Daniel 2:44 kapav representé pou ou personnellement?

¹⁶ Bientot, tou bann nation pou laguerre kont Jésus Christ ek so bann l’armée ki dan le ciel, dan enn la guerre final kont domination Bondié. Sa la guerre-la “en hébreu, appel Har-Maguédôn.” (Rév. 16:14, 16; 19:11-16) Ena plus ki 2,500 an, Bondié ti inspire prophete Daniel pou annoncé ki pou arrive bann gouvernement humain ki kont projet Bondié. Daniel ti ecrire: “Dan lepok sa bann le roi-la, Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou okenn lot peuple. Li pou crase tou sa bann royaume-la ek li pou fini zot, ek li-mem li pou regné pou touletan.”​—Dan. 2:44.

¹⁷ Eski ou kapav maziné seki l’accomplissement sa prophetie-la pou representé pou ou personnellement? Zordi bann zom etabli bann frontiere dan bann pays, ek sa faire bann dimoune vinn bann etranger. Mais bientot, sa bann frontiere-la pou nepli existé. Mem si bann dimoune pou toujours different en seki concerne zot l’apparence physik, sa pou zis montré bann joli varieté ki ena dan creation Bondié. Enn promesse reconfortant coumsa bizin motive nou pou faire tou seki nou kapav pou contigne loué ek donne l’honneur nou Createur, Jéhovah.

18. Ki l’exemple montré ki bann Témoins de Jéhovah pa considere zot bann frere couma bann etranger?

¹⁸ Eski li impossible pou ena enn changement coumsa dan le monde entier? Non, li pa impossible. Au contraire, li raisonnable pou croire ki sa pou arrivé. Depuis asterla-mem, bann Témoins de Jéhovah pa considere lezot dimoune couma bann “etranger.” Zot pa donne okenn l’importance nationalité bann dimoune ki parmi zot. Par exemple, pa trop longtemps, plusieurs ti filiale ti fermé dan certain pays ek c’est bann filiale dan lezot pays ki’nn commence prend en charge travail ki ti pé faire dan sa bann ti filiale-la. Kifer? Pou simplifié bann responsabilité ek pou permette ki l’activité predication la bonne nouvelle faire dan enn fason pli efficace. (Mat. 24:14) Kan bann Témoins de Jéhovah ti faire sa bann changement-la, frontiere bann pays pa ti enn probleme pou zot, tant ki la loi ti permette sa. Sa c’est enn lot preuve ki Jésus Christ, en tant ki le Roi ki Jéhovah inn etabli, pé tire tou barriere ki bann dimoune inn metté ek bientot li pou “complete so victoire”!​—Rév. 6:2.

19. Ki la langue pur inn permette bann Témoins de Jéhovah pou faire?

¹⁹ Bann Témoins de Jéhovah sorti dan different nation ek zot koz different langue, mais zot faire zeffort pou soutenir la langue pur. Sa faire zot reste uni ek jamais zot pou divisé. (Lire Tsephania 3:9.) Zot enn famille international ki vive dan enn mauvais le monde mais ki reste separé ar li. Sa famille uni-la donne enn l’idée couma le monde nouveau pou été​—enn le monde kot pa pou ena bann etranger. Lerla, tou bann dimoune pou trouvé ki sa livre ki nou ti cité au commencement-la, dire la verité: “Bann dimoune different race, zot bann frere.”​—Les races de l’humanité (en anglais).