Inn annonce seki pou arrive nou bientot

KAN l’apotre Pierre ti koz lor l’avenir bann zom ek l’avenir la terre, li ti ecrire: “Nou pé attann, couma [Bondié inn] promette, enn nouveau le ciel ek enn nouveau la terre, kot pou ena la justice.” (2 Pierre 3:13) C’est avek prophete Isaïe ki premier fois Bondié ti faire promesse “bann nouveau le ciel ek enn nouveau la terre.” (Isaïe 65:17; 66:22) Kan li ti cite sa prophetie-la, Pierre ti montré ki dan so lepok, sa prophetie-la pa ti’nn encore realisé net.

Plitar, vers l’année 96 n.l., livre Révélation ki ti transmette par l’apotre Jean, ti associé “nouveau la terre” avek bann benediction ki Royaume Bondié pou amené. (Révélation 21:1-4) Bann parole ki Jésus ek aussi l’apotre Paul ti dire concernant bann condition ki ti pou ena dan le monde zis avant ki Royaume Bondié vini, pé realisé asterla. Alors, nou kapav attann ki Royaume Bondié pou amenn enn nouveau le monde bientot. Couma sa nouveau le monde-la pou été? Livre Isaïe reponn sa question-la.

Bann benediction dan le monde nouveau

La paix partout dan le monde ek l’unité dan l’adoration Bondié. “Zot pou bizin forge zot bann l’epée ek faire sa vinn bann zouti pou travail la terre, ek zot pou faire zot bann lance vinn bann cisaille. Enn nation pa pou leve l’epée kont enn lot nation, ek zot nepli pou aprann la guerre.”—Isaïe 2:2-4.

La paix entre bann dimoune ek bann zanimo. “Enn loulou pou reste inpé le temps avek enn ti mouton, ek enn leopard pou dormi avek enn ti cabri, ek enn ti taureau, ek enn jeune lion ek bann zanimo ki bien nourri, zot tou ensam; ek enn ti garson pou conduire zot. Enn vache ek enn l’ours pou mange l’herbe ensam; zot bann tipti pou dormi ensam. Ek mem enn lion pou mange la paille pareil couma enn taureau. . . . Personne pa pou faire okenn di-tort ni okenn ravage dan tou mo montagne ki saint, parski la terre vrai-mem pou rempli avek connaissance Jéhovah, pareil couma de l’eau couvert la mer.”—Isaïe 11:6-9.

Mangé en abondance pou tou dimoune. “Jéhovah, Chef bann l’armée vrai-mem pou faire enn grand repas pou tou bann peuple, dan sa montagne-la, kot pou ena bann mangé bien gras, di-vin ki’nn deposé lor so la mare, bann mangé bien gras rempli ar la moelle, di-vin ki’nn reposé lor so la mare, ek ki’nn filtré.”—Isaïe 25:6.

Nepli pou ena la mort. “Oui, Li [Bondié] pou faire la mort disparette pou touletan, ek vrai-mem Souverain Seigneur Jéhovah pou souye larme lor tou bann figure. Ek lor la terre entier Li pou tire la honte ki so peuple finn koné, parski Jéhovah Li-mem finn dire sa.”—Isaïe 25:8.

Bann mort pou ressuscité. “To bann mort pou revive, zot pou remette-zot deboute. Bann ki’nn dormi dan la poussiere pou levé ek pou criyé ar la joie . . . La terre pou faire bann ki’nn mort revive.”—Isaïe 26:19, Parole de Vie.

Messie, enn juge ki juste. “Li pa pou juge zis dapré seki parette devant so lizié, ek li pa pou corrige zis dapré seki so zoreille tendé. Ek li pou juge bann ti dimoune avek la justice, ek li pou corrige avek la justice dan faveur bann humble ki lor la terre.”—Isaïe 11:3, 4.

Bann aveugle ek bann sourde pou gueri. “Sa lepok-la lizié bann aveugle pou ouvert, ek zoreille bann sourde pou debouché.”—Isaïe 35:5.

Bann desert pou transformé. “Desert ek l’endroit sec pou content, ek la plaine kot nanyin pa poussé, pou dan la joie ek pou bourgeonné couma safran. Oui, sans faute li pou bourgeonné, ek vrai-mem li pou dan la joie ek c’est dan la joie ki li pou criyé.”—Isaïe 35:1, 2.

Enn nouveau la terre. “Mo pé crée bann nouveau le ciel [enn nouveau gouvernement dan le ciel] ek enn nouveau la terre [enn nouveau societé humain]; ek personne pa pou rappel bann kitsoz avant, ek sa pa pou vinn dan zot leker. Mais zot bizin content ek reste dan la joie pou touletan dan seki mo pé crée. . . . Oui, zot [bann ki pou reste dan monde nouveau ki Bondié inn promette] pou ranz bann lakaz ek zot pou reste ladan; ek zot pou plante bann karo raisin ek zot pou mange zot bann fruit. Zot pa pou ranzé pou ki enn lot resté; zot pa pou planté pou ki enn lot mangé. Parski bann jour mo peuple pou pareil couma jour enn pié; ek bann ki mo finn choisir pou profite tou travail ki zot la main faire. Zot pa pou rinté pou nanyin, ni zot pou gagne bann zenfant pou ki arrive zot malheur; parski zot, zot descendance bann ki’nn beni par Jéhovah, ek zot bann descendant ensam avek zot. Ek vrai-mem pou arrivé ki avant ki zot criyé, mo pou reponn; pendant ki zot encore pé kozé, moi mo pou tendé.” “ ‘Pareil couma bann nouveau le ciel ek nouveau la terre ki mo pé faire, pé tini devant moi,’ c’est seki Jéhovah dire, ‘pareil coumsa-mem zot descendance ek zot nom pou contigne tini la.’ ”—Isaïe 65:17-25; 66:22.

La Bible annonce enn l’avenir extraordinaire

Isaïe pa sel livre la Bible ki annonce bann benediction pou l’avenir. Dan la Bible ena beaucoup prophetie ki decrire bann kitsoz extraordinaire ki Bondié pou realisé par moyen so Royaume dirigé par Christ.a Eski ou ti pou content vive dan sa bann condition-la? C’est enn kitsoz ki possible! Decouvert seki la Bible vrai-mem enseigné concernant bann joli promesse ki Bondié inn faire pou l’avenir, ek aprann couma ou kapav profite sa. Bann Témoins de Jéhovah pou content pou aide ou pou faire sa.

[Note]

[Zimage page 8]

Bann dimoune pou vive en paix entre zot ek avek bann zanimo

[Zimage page 9]

Bann mort pou revive

[Zimage page 10]

La terre entier pou vinn enn paradis