La vie eternel lor la terre—Enn l’espoir ki’nn redecouvert

“Daniel, garde sa bann parole-la secret . . . ziska lepok la fin. Beaucoup pou rod par-ci par-la, ek vrai connaissance pou en abondance.”—DAN. 12:4.

1, 2. Ki bann question nou pou examiné dan sa lartik-la?

ZORDI plusieurs million dimoune comprend bien fondement biblik lor l’esperance la vie eternel dan enn paradis lor la terre. (Rév. 7:9, 17) Au commencement l’histoire l’humanité, Bondié ti faire koné ki bann dimoune inn faire pou vive pou touletan, pa pou vive zis deux-trois l’année ek apré sa mort.—Gen. 1:26-28.

² Bann Israélite ti croire ki enn jour bann dimoune ti pou regagne la vie parfait ki Adam ti perdi. Bann l’Écritures grecques chrétiennes expliké ki bann disposition Bondié inn prend pou bann dimoune kapav vive pou touletan dan Paradis lor la terre. Alors, kifer ti bizin redecouvert l’esperance bann dimoune? Couma bann dimoune inn redecouvert sa ek inn faire plusieurs lezot million dimoune konn sa l’esperance-la?

Enn l’esperance ki’nn cachiette

 3. Kifer li pa etonnant ki l’esperance bann dimoune concernant la vie eternel lor la terre ti bien cachiette?

³ Jésus ti annoncé ki bann fausse prophete ti pou gate so bann l’enseignement ek ki zot ti pou embete la plupart dimoune. (Mat. 24:11) L’apotre Pierre ti averti bann chretien kan li ti dire zot: “Pou ena aussi bann fausse enseignant parmi zot.” (2 Pierre 2:1) L’apotre Paul ti koz lor “enn lepok kot [bann dimoune ti] pou nepli supporte l’enseignement ki en accord avek la verité. Mais, a cause zot bann prop desir, zot [ti] pou entoure-zot avek enn quantité enseignant pou ki bannla faire zot tann seki zot zoreille envie tendé.” (2 Tim. 4:3, 4) Satan faire tou seki li kapav pou embete bann dimoune ek li finn servi la chretienté apostat pou cachiette la verité lor projet ki Bondié ena pou bann dimoune ek pou la terre.—Lire 2 Corinthiens 4:3, 4.

 4. Ki l’esperance en rapport avek bann dimoune, bann chef religieux apostat ti rejeté?

⁴ La Bible expliké ki Royaume Bondié c’est enn gouvernement dan le ciel ki pou crase tou bann gouvernement ki bann zom inn etabli ek pou faire zot disparette. (Dan. 2:44) Pendant regne mille an Christ, Jésus pou jette Satan dan enn l’abime, bann dimoune mort pou ressuscité, ek bann dimoune pou revinn parfait lor la terre. (Rév. 20:1-3, 6, 12; 21:1-4) Selman, bann chef religieux apostat la chretienté finn accepté ek finn enseigne lezot croyance. Par exemple, dan troisieme siecle, Origène ki sorti Alexandrie ek ki ti enn parmi bann “ Père de l’Église, ” ti condamne bann ki ti croire ki Regne mille an Christ ti pou amenn bann benediction lor la terre. L’Encyclopédie catholique (en anglais) dire ki Augustin, enn catholique ki ti specialiste dan domaine la religion ek ki sorti Hippone (354-430 nou lepok) “ti soutenir l’idée ki pa pou ena okenn regne mille an.”a

5, 6. Kifer Origène ek Augustin ti kont l’enseignement lor regne mille an lor la terre?

⁵ Kifer Origène ek Augustin ti opposé ar l’idée ki pou ena enn regne mille an lor la terre? Origène ti enn zeleve Clément ki ti sorti Alexandrie ek ki ti accepté l’idée ki bann Grec ti pé croire, setadir ki bann dimoune ena enn nâme immortel. Origène ti bien influencé par l’enseignement Platon lor nâme. Alors, dapré enn theologien—enn specialiste dan domaine la religion—ki appel Werner Jaeger, Origène “ti ajoute croyance ki Platon ti enseigné lor nâme ek destin, avek l’enseignement chretien.” Sa vedir ki Origène ti enseigné ki tou bann benediction ki regne mille an pou amené, ti pou nepli lor la terre mais dan le ciel.

⁶ Augustin ti vinn “chretien” kan li ti ena 33 an. Avant sa, li ti vinn enn néoplatonicien, setadir ki li ti accepté enn version l’enseignement philosophe Platon, l’enseignement ki Plotin ti’nn developpé dan troisieme siecle. Apré ki Augustin ti converti pou vinn “chretien,” li ti toujours garde so bann pensée néoplatonicien. Nouvelle Encyclopédie britannique (en anglais) dire ki ‘li’nn joué enn grand role pou melange bann l’enseignement Nouveau Testament ar bann l’enseignement Platon ki ti basé lor philosophie grec.’ L’Encyclopédie catholique dire ki Augustin ti expliké ki regne mille an ki Révélation chapitre 20 decrire, ti zis “enn symbol.” Sa encyclopedie-la ajouté: “Sa l’explication-la . . . ti accepté plitar par bann theologien chretien, ek bann dimoune ti nepli accepté croyance dan enn regne mille an couma croyance-la ti été avant.”

 7. Ki fausse croyance finn faire l’esperance la vie eternel lor la terre perdi so valeur, ek couma?

⁷ L’esperance pou vive pou touletan lor la terre ti’nn commence perdi so valeur a cause enn croyance ki ti sorti dan ancien Babylone ek ki ti fané partout dan le monde—c’est croyance ki enn dimoune ena enn nâme immortel ki reste dan lekor physik. Kan la chretienté ti accepté sa croyance-la, bann ki etudié la religion ti deforme bann texte la Bible ki koz lor la vie dan le ciel. Zot ti faire croire ki sa bann texte-la enseigné ki tou bann bon dimoune al dan le ciel. Dapré sa croyance-la, enn dimoune inn faire pou vive dan enn fason temporaire lor la terre—c’est enn test pou guetté si li merité pou al vive dan le ciel. Plusieurs siecle avant sa, ti arrive mem zaffaire avek l’esperance ki bann Juif ti ena au commencement concernant la vie eternel lor la terre. A mesure ki bann Juif ti accepté croyance grec ki nâme li immortel ek ki sa dan nature enn dimoune, l’esperance ki zot ti ena au commencement concernant la vie lor la terre, ti’nn commence disparette. Mais sa li bien different ar seki la Bible dire concernant enn dimoune! Dapré la Bible, enn dimoune li enn creature physik, pa enn l’esprit. Jéhovah ti dire premier zom: “To finn faire avek la poussiere.” (Gen. 3:19) C’est la terre, pa le ciel, ki l’endroit ki Bondié inn crée pou ki bann dimoune vive pou touletan.—Lire Psaume 104:5; 115:16.

La verité eclairé dan noirté

 8. Ki certain specialiste lor la Bible dan bann l’année 1600 ti dire lor l’esperance bann dimoune?

⁸ Mem si la plupart religion ki pretann zot chretien, pa enseigne l’esperance la vie eternel lor la terre, Satan pa’nn toujours reussi cachiette la verité. Toute longue l’Histoire, enn tigit dimoune ki ti lire la Bible en profondeur ti gagne bann l’eclaircissement a mesure ki zot ti comprend certain l’aspect lor fason ki Bondié pou refaire bann dimoune vinn parfait. (Ps. 97:11; Mat. 7:13, 14; 13:37-39) Dan bann l’année 1600, parski finn commence traduire ek imprime la Bible, beaucoup plus dimoune finn gagne la Bible pou lire. En 1651, enn specialiste lor la Bible ti ecrire ki depuis lepok Adam, dimoune “ti’nn perdi Paradis, ek la vie eternel lor la terre,” alors grace a Christ “tou dimoune pou kapav vive lor la terre; sinon sa comparaison-la pa ti pou ena okenn sens.” (Lire 1 Corinthiens 15:21, 22.) Enn parmi bann poete anglais bien populaire ki ti appel John Milton (1608-1674), ti ecrire poeme Le Paradis perdu ek so la suite, Le Paradis reconquis. Dan so bann livre, John Milton ti faire reference ar recompense ki enn dimoune fidele pou gagné dan enn paradis lor la terre. Mem si John Milton ti consacré la plupart so la vie pou etudié la Bible, li ti reconette ki bann dimoune pa ti pou comprend a fond la verité ki sorti dan la Bible, ziska presence Christ.

9, 10. (a) Ki Isaac Newton ti ecrire lor l’esperance bann dimoune? (b) Kifer presence Christ ti parette bien loin pou Isaac Newton?

⁹ Sir Isaac Newton (1642-1727), enn mathematicien bien populaire, ti aussi bien interessé ar la Bible. Li ti comprend ki bann saint pou ressuscité pou al vive dan le ciel ek ki dan enn fason invisible zot pou regne avek Christ. (Rév. 5:9, 10) Concernant bann ki pou dirigé par Royaume Bondié, li ti ecrire: “Bann dimoune mortel pou contigne vive lor la terre apré jour jugement ek pa zis pou 1000 an, mais pou touletan.”

¹⁰ Dapré Isaac Newton, presence Christ ti pou arrivé plusieurs siecle apré. Stephen Snobelen, enn historien ti dire: “Enn raison kifer Isaac Newton ti pensé ki Royaume Bondié ti bien loin dan l’avenir c’est parski li ti bien decouragé kan li ti trouve grand l’apostasie concernant la Trinité, tout autour li.” Ti encore ena enn voile lor la bonne nouvelle. Ek Isaac Newton pa ti trouve okenn groupe chretien ki ti kapav preche la bonne nouvelle. Li ti ecrire: “Pa avant lepok la fin ki bann dimoune ti pou arrivé comprend bann prophetie Daniel ek Jean [prophetie Jean trouve dan livre Révélation].” Isaac Newton ti expliké: “Daniel ti dire: ‘Lerla, beaucoup pou galope par-ci par-la, ek connaissance pou augmenté.’ Oui, pou bizin preche l’Evangile dan tou nation avant ki la grande tribulation ek la fin du monde, vini. La foule ki sarié bann branche palmier, ki sorti dan sa grande tribulation-la, pa kapav vinn enn quantité ki pa kapav compté ek ki sorti dan tou nation, sans ki ena predication l’Evangile avant ki sa [grande tribulation-la] vini.”—Dan. 12:4; Mat. 24:14; Rév. 7:9, 10.

11. Kifer l’esperance bann dimoune ti reste cachiette pou la plupart dimoune, dan lepok John Milton ek Isaac Newton?

¹¹ Dan lepok John Milton ek Isaac Newton, li ti bien dangereux pou dire bann l’idée ki contraire ar doctrine officiel ki l’Eglise ti enseigné. A cause sa, pendant ki zot ti encore vivant, pa ti kapav imprime la plupart livre ki zot ti ecrire lor bann recherche ki zot ti faire lor la Bible. La Réforme ki ti ena dan 16^eme siecle, kan certain ti quitte religion catholique ek so bann l’enseignement pou vinn protestant, pa ti reussi corrige l’enseignement lor l’immortalité, ek bann religion protestant ki ti ena pli grand l’influence, ti contigne enseigne croyance ki Augustin ti enseigné, setadir ki regne mille an ti’nn fini arrivé dan le passé, ek pa pou arrivé dan l’avenir. Eski vrai connaissance vrai-mem inn augmenté dan lepok la fin?

“Vrai connaissance pou en abondance”

12. Kan eski vrai connaissance ti bizin vinn en abondance?

¹² Concernant “lepok la fin,” Daniel ti annoncé ki ti pou tire sa voile ki ti cachiette la verité-la. (Lire Daniel 12:3, 4, 9, 10.) Pareil couma li, Jésus aussi ti donne bann prophetie lor lepok la fin kan li ti dire: “Dan sa lepok-la, bann juste pou brillé bien fort pareil couma soleil.” (Mat. 13:43) Couma vrai connaissance ti vinn en abondance dan lepok la fin? Anou examine seki’nn arrivé dan l’Histoire, dan bann l’année avant 1914, l’année kan lepok la fin ti commencé.

13. Ki Charles Taze Russell ti ecrire apré ki li ti etudié sujet concernant fason ki bann dimoune pou regagne perfection?

¹³ Vers la fin bann l’année 1800, certain dimoune sincere ti pé rod comprend “modele bann bon parole.” (2 Tim. 1:13) Enn parmi sa bann dimoune-la ti Charles Taze Russell. En 1870, li ek deux-trois lezot dimoune ki ti pé rod la verité, ti forme enn groupe pou etudié la Bible. En 1872, zot ti examine sujet lor perfection ki Adam ti perdi ki bann dimoune pou regagné. Plitar, Charles Russell ti ecrire: “Ziska ler nou pa ti’nn reussi trouve sa grand difference ki ena entre recompense ki l’Eglise (congregation bann chretien oint) ki pé passe par bann test asterla, pou gagné, ek recompense ki bann dimoune fidele en general pou gagné.” Recompense bann dimoune en general c’est “regagne perfection ki Adam, zot ancetre, ti ena pendant enn temps en Éden.” Charles Russell ti reconette ki lezot ti aide li dan so l’etude la Bible. Kisannla ki ti aide li?

14. (a) Couma Henry Dunn ti comprend Actes 3:21? (b) Kisannla Henry Dunn ti dire pou vive pou touletan lor la terre?

¹⁴ Henry Dunn ti enn parmi zot. Li ti ecrire lor “[fason ki tou kitsoz pou] retabli . . . ki Bondié ti annoncé par la bouche so bann saint prophete ki’nn vive dan le temps passé.” (Actes 3:21) Henry Dunn ti koné ki sa ti implik aussi ki bann dimoune pou regagne perfection lor la terre pendant regne mille an Christ. Henry Dunn ti examine aussi enn question ki ti troublé beaucoup dimoune: Kisannla pou vive pou touletan lor la terre? Li ti expliké ki plusieurs million dimoune pou ressuscité, pou gagne l’enseignement lor la verité, ek pou ena possibilité pou ena la foi en Christ.

15. Ki George Storrs ti comprend lor resurrection?

¹⁵ En 1870, George Storrs ti aussi tire conclusion ki bann injuste pou ressuscité avek possibilité pou gagne la vie eternel. Li ti comprend aussi a travers la Bible ki enn ressuscité ki pa reagir bien apré ki li’nn gagne sa possibilité-la, “pou fini dan la mort, mem si sa ‘dimoune ki’nn faire peché-la ena cent an.’ ” (Is. 65:20) George Storrs ti reste Brooklyn, New York, ek li ti publié enn magazine ki appel Scrutateur de la Bible.

16. Ki kitsoz ti faire bann Etudiant la Bible bien different ar la chretienté?

¹⁶ Russell ti comprend a travers la Bible ki lepok ti’nn arrivé pou faire konn la bonne nouvelle partout. Alors, en 1879, li ti commence imprime Phare de la Tour de Sion et Messager de la Présence de Christ, ki nou appel zordi La Tour de Garde pé annonce Royaume Jéhovah. Avant sa, c’est zis enn tigit dimoune-mem ki ti comprend la verité lor l’esperance bann dimoune, mais asterla plusieurs groupe etudiant la Bible dan beaucoup pays ti pé joinde ensam pou etudié La Tour de Garde. Bann Etudiant la Bible ti croire ki zis enn tigit dimoune ki pou al dan le ciel ek ki plusieurs million dimoune pou gagne enn la vie parfait lor la terre. Sa croyance-la ti faire zot bien different ar la plupart religion la chretienté.

17. Couma vrai connaissance inn vinn en abondance?

¹⁷ “Lepok la fin” ki bann prophete ti annoncé, ti commencé en 1914. Eski vrai connaissance concernant l’esperance bann dimoune ti vinn en abondance? (Dan. 12:4) Ziska 1913, bann discours Charles Russell ti imprimé dan 2,000 la gazette ek en tou 15,000,000 dimoune ti lire sa. Vers la fin 1914, plus ki 9,000,000 dimoune lor trois continent ti’nn guette “ Photo-Drame de la Création ”—enn programme kot ti passe enn film avek bann zimage fixe ki ti explik regne mille an Christ. Depuis 1918 ziska 1925, bann serviteur Jéhovah ti faire discours “ Des millions de personnes actuellement vivantes ne mourront jamais, ” dan plus ki 30 langue, dan le monde entier. Sa discours-la ti explik l’esperance la vie eternel lor la terre. En 1934, bann Témoins de Jéhovah ti realisé ki bann ki ena l’esperance pou vive pou touletan lor la terre zot aussi zot ti bizin prend bapteme. Kan zot ti comprend sa l’esperance-la, sa ti donne zot encore plus zele pou preche la bonne nouvelle lor Royaume Bondié. Zordi, l’esperance la vie eternel lor la terre faire plusieurs million dimoune ena enn grand reconnaissance pou Jéhovah.

Enn “liberté extraordinaire” pé attann nou devant!

18, 19. Ki qualité la vie Isaïe 65:21-25 annoncé?

¹⁸ Prophete Isaïe ti inspiré pou ecrire lor qualité la vie ki bann serviteur Bondié pou profité lor la terre. (Lire Isaïe 65:21-25.) Certain pié ki ti vivant ena 2,700 an kan Isaïe ti ecrire sa bann parole-la, kitfois encore vivant zordi. Eski ou kapav mazinn ou-mem pé vive sa quantité le temps-la, kot ou pou ena plein la force ek enn bon la santé?

¹⁹ Au lieu ki ou pou vive zis pou enn tigit le temps-mem sans ki ou kapav faire seki ou envie, ou pou ena l’eternité devant ou kot ou pou gagne possibilité pou construire, pou planté, ek pou aprann. Mazinn bann camarade ki ou pou kapav faire. Sa bann bon relation-la pou contigne grandi pou touletan. Oui, “bann zenfant Bondié” pou kapav vrai-mem profite enn “liberté extraordinaire” lor la terre!—Rom. 8:21.

[Note]

Eski ou kapav expliké?

• Couma l’esperance la vie eternel lor la terre, ti’nn cachiette?

• Ki certain dimoune ki ti lire la Bible, ti comprend dan bann l’année 1600?

• Couma vrai l’esperance ki reservé pou bann dimoune, ti vinn pli clair a mesure ki 1914 ti pé commence kosté?

• Couma connaissance lor l’esperance pou vive lor la terre ti vinn en abondance?