“Gete! Sa Se Nu Bondye”

Bann ranseyman ki ena dan sa de lartik letid la, baze lor liv Approchez-vous de Jéhovah, ki ti paret dan lasanble distrik ki ti ena atraver lemond pandan lane 2002/03.—Get lartik “Sa Inn Ranpli enn Vid dan Mo Leker,” dan paz 29.

“Gete! Sa se nu Bondye. Nu finn met nu lespwar an Li, ek Li pu sov nu. Sa se Zeova.”—IZAI 25:9.

1, 2. (a) Kuma Zeova ti apel Abraam, ek ki sa kapav fer nu demann numem? (b) Kuma eski Labib donn nu lasirans ki li posib pu vinn bann kamarad intim avek Bondye?

“MO KAMARAD.” Se kumsa ki Zeova, Kreater lesyel ek later, ti apel Abraam. (Izai 41:8) U rann u kont—enn sinp dimunn ki ena lamitye avek Suverin Senyer liniver! Kitfwa u demann umem: ‘Eski li posib pu mo vinn pros kumsa avek Bondye?’

² Labib donn nu lasirans ki li posib pu ena enn relasyon personel avek Bondye. Abraam ti kapav ena sa relasyon personel la parski li “ti met so lafwa an Zeova.” (Zak 2:23) Zordi usi, Zeova Li “enn kamarad intim avek bann dimunn drwat.” (Proverb 3:32) Dan Zak 4:8, Labib donn nu sa lankurazman la: “Vinn pros ar Bondye, ek Li pu vinn pros ar zot.” Wi, li kler ki si nu fer bann pa neseser pu vinn pros ar Zeova, Li pu vinn pros ar nu. Me, eski sa bann parol inspire la vedir ki se nu, bann dimunn inparfe ek peser, ki fer premye pa? Non, paditu. Li posib pu vinn bann kamarad intim avek Zeova selman parski nu Bondye ki ena lamur pu nu, finn fer de pa inportan.—Psom 25:14.

 3. Ki de pa inportan Zeova inn fer pu permet nu vinn so bann kamarad?

³ Premyerman, Zeova inn fer laranzman pu ki Zezi “donn so lavi kuma enn ranson pu buku dimunn.” (Matye 20:28) Sa ranson la permet nu vinn pros avek Bondye. Labib dir : “Me nu, nu kapav manifeste lamur, parski Li, Li finn kontan nu an premye.”(1 Zan 4:19) Wi, parski Bondye finn “kontan nu an premye,” Li finn zet enn baz pu nu kapav ena lamitye avek Li. Dezyeman, Zeova finn fer nu konn Li. Pu nu kapav vinn kamarad ar enn dimunn, nu bizin vremem konn li, ek usi admir ek apresye so personalite. Anu gete ki sa vedir. Si Zeova ti enn Bondye ki ti kasyet Limem ek ki personn pa kapav kone, zame nu ti pu kapav vinn pros avek Li. Me, olye ki Li kasyet Limem, Zeova anvi ki nu aprann konn Li. (Izai 45:19) Dan so Parol, Labib, Li fer nu konn Li atraver bann mo sinp ki nu kapav konpran. Sa se enn prev ki Li pa zis kontan nu, me ki Li anvi nu konn Li ek ki nu kontan Li kuma nu Papa ki res dan lesyel.

 4. Ki santiman nu pu ena lor Zeova amezir ki nu konn so bann kalite pli byin?

⁴ Eski u finn deza truv enn ti zanfan ki fyer pu montre so bann kamarad so papa ek apre li dir avek lazwa: “E gete, mo papi sa”? Bann adorater Bondye usi resanti mem kitsoz pu Zeova. Labib anons enn lepok kot bann dimunn fidel pu dir: “Gete! Sa se nu Bondye.” (Izai 25:8, 9) Plis nu konpran bann kalite Zeova, plis nu pu santi ki nu ena pli bon Papa ek pli bon Kamarad ki nu ti pu kapav panse. Wi, kan nu konpran byin bann kalite Zeova, sa donn nu buku rezon pu vinn pli pros ar Li. Donk, anu egzaminn seki Labib fer nu kone lor bann kalite prinsipal ki Zeova ena—lapwisans, lazistis, lasazes ek lamur. Dan sa lartik la, nu pu diskit trwa premye parmi sa bann kalite la.

“Byin Gran an Pwisans”

 5. Kifer eski li apropriye ki se zis Zeova tusel ki apel “Tu-Pwisan,” ek dan ki fason eski Li servi so pwisans inpresyonan?

⁵ Zeova “byin gran an pwisans.” (Zob 37:23) Zeremi 10:6 dir: “Pena personn kuma twa, A Zeova. To gran, ek to non gran an pwisans.” Zeova ena enn pwisans san limit, pena okenn lot kreatir kuma Li. Se pu sa rezon la ki se zis Li tusel ki apel: “Tu-Pwisan.” (Revelasyon 15:3) Zeova servi so pwisans inpresyonan pu kre, pu detrir, pu proteze ek pu repare. Anu get zis de legzanp—so pwisans pu kre ek so pwisans pu proteze.

6, 7. Ki kantite pwisans soley ena ek ki verite inportan li anseyn nu?

⁶ An ete, kan u debute deor enn zur soley, ki u resanti lor u lapo? Saler soley. Avredir, u pe resanti rezilta pwisans Zeova ki manifeste dan kreasyon. Ki kantite pwisans soley ena? Dan so sant, ena enn tanperatir apepre 15 milyon degre Santigrad. Si u amenn enn morso soley groser latet enn zeping lor later, u pu bizin debut enn distans plis ki 140 km ar sa ti surs saler la, sinon u pu brile! Sak segonn, lenerzi ki sorti dan soley li parey ar explozyon bann santenn milyon bom nikleer. Malgre sa, later turn zis distans ki bizin otur sa gran surs saler la. Si soley ti tro pre ar later, tu delo ki ena lor later ti pu evapore; si li ti tro lwin, tu delo ti pu vinn glason. Dan okenn sa de kondisyon la, lavi pa ti pu posib lor nu planet.

⁷ Mem si zot lavi depann lor soley, buku dimunn pa pran kont kuma li fonksyone. Alor, zot rat seki soley kapav anseyn nu. Psom 74:16 dir lor Zeova: ‘To finn prepar sa lasurs lalimyer la, wi, mem soley.’ Wi, soley donn laglwar Zeova, “Kreater lesyel ek later.” (Psom 146:6) Purtan soley, li zis enn parmi bann kitsoz ki Bondye finn kre ek ki anseyn nu lor gran pwisans ki Zeova ena. Plis nu aprann lor pwisans Zeova ki manifeste dan so kreasyon, plis nu lakrint pu Li vinn pli profon.

8, 9. (a) Ki legzanp byin tusan montre nu ki Zeova anvi protez so bann adorater ek pran zot swin? (b) Dan letan biblik, ki swin enn berze ti bizin donn so muton, ek ki sa anseyn nu lor nu Gran Berze?

⁸ Zeova servi usi so gran pwisans pu protez so bann serviter ek pu pran zot swin. Labib servi bann legzanp byin vivan me ki tus nu, pu dekrir bann promes ki Zeova inn fer pu protez so bann serviter. Get par egzanp seki dir dan Izai 40:11. Dan sa verse la, Zeova konpar Limem avek enn Berze ek so bann serviter avek bann muton. Nu lir: “Parey kuma enn berze, Li pu pran swin so prop trupo. Li pu rasanble so bann ti muton avek so lebra; ek Li pu sarye zot lor so lestoma. Avek prekosyon, Li pu gid bann ki pe donn zot tipti dile.” Eski u kapav mazinn sa senn la dan u lespri?

⁹ Pena buku zanimo ki frazil kuma enn muton. Dan letan biblik, enn berze ti bizin ena buku kuraz pu protez so muton kont bann lulu, bann lurs ek bann lyon. (1 Samyel 17:34-36; Zan 10:10-13) Me, ti ena bann moman, kot berze la li ti bizin azir avek tandres pu protez so muton ek pran li swin. Par egzanp kan enn muton ti met ba, lwin ar park muton, kuma eski berze la ti pu kapav protez sa ti muton ki fek ne ek ki san defans la? Kitfwa pandan plizir zur li ti pu sarye li “lor so lestoma”—setadir dan bann pli ki ti ena dan so linz lao. Me kuma eski enn ti muton ti pu kapav ariv lor lestoma berze la? Li posib ki ti muton la ti koste kot berze la ek mem tap-tap lipye berze la, pu atir so latansyon. Me selman, se sa berze la ki ti pu bizin bese, avoy so lamin ek sulev ti muton la pu plas li an sekirite lor so lestoma. Eski se pa enn legzanp byin tusan ki montre nu ziska ki pwin nu Gran Berze anvi pran swin so bann serviter ek protez zot?

10. Ki proteksyon Zeova done zordi, ek kifer sa kalite proteksyon la li sirtu inportan?

¹⁰ Zeova pa’nn zis promet so proteksyon. Dan letan biblik, Li ti montre par bann mirak, ki Li kapav “tir dan problem bann dimunn ki ena latasman avek Li.” (2 Pyer 2:9) Ki nu kapav dir zordi? Nu kone ki zordi, Zeova pa servi so pwisans pu protez nu kont tu bann maler. Kan mem, Li donn nu enn kitsoz ki pli inportan, se enn proteksyon spirityel. Nu Bondye ki ranpli ar lamur, protez nu spirityalite. Kuma? Ebyin Li ekip nu avek seki nu bizin pu nu kapav siport bann leprev ek prezerv nu relasyon avek Li. Par egzanp, dan Lik 11:13 nu lir sa bann parol la: “Si zot, mem si zot move, zot konn donn zot zanfan seki bon, komye plis ankor nu Papa ki dan lesyel pu donn lespri sin bann ki demann Li!” Sa gran lafors la kapav ed nu pu devlop bann kalite neseser pu fer fas ar ninport ki leprev uswa problem ki nu kapav gayne. (2 Korintyin 4:7) Dan sa fason la, Zeova fer tu pu protez nu lavi, pa zis pu detrwa lane ki byin kurt, me pu tuletan. Kan nu ena sa lespwar la, nu kapav lerla konsider ninport ki sufrans ki nu gayne dan sa lemond la, kuma bann kitsoz ki “tanporer ek ki nu kapav siporte.” (2 Korintyin 4:17) Eski nu pa atire par enn Bondye kumsa, ki servi so puvwar avek sa kantite lamur la, dan nu faver?

“Zeova Kontan Lazistis”

11, 12. (a) Kifer eski lazistis Zeova fer nu vinn pros avek Li? (b) Ki konklizyon David ti tire konsernan lazistis Zeova ek kuma eski sa bann parol inspire la rekonfort nu?

¹¹ Zeova azir avek lazistis ek Li azir kumsa tuletan, san fer preferans. Lazistis Bondye se pa enn kalite ki insansib ek dir, ki repus nu, me se enn kalite atiran ki fer nu vinn pros ar Zeova. Labib dekrir klerman kuma sa kalite la rekonfortan. Donk, anu get trwa fason kuma Zeova montre so lazistis.

¹² Premyerman, lazistis Zeova pus Li pu montre Li fidel anver so bann serviter. Lerwa David, ti arive konpran sa, par lexperyans personel ki li’nn fer dan so lavi ek parski li ti etidye bann fason azir Zeova. Ki konklizyon li ti tire? Dan enn so bann psom li ti dir: “Zeova kontan lazistis, ek Li pa pu kit so bann fidel. Li pu vey lor zot pu enn peryod letan indefini.” (Psom 37:28) Se enn lasirans ki byin rekonfortan! Zame, pa mem pu enn ti moman, Zeova pu abandonn bann dimunn ki fidel anver Li. Nu kapav alor, kont lor so lamitye ek ena konfyans ki Li pran nu swin. Se so lazistis ki donn nu sa garanti la!—Proverb 2:7, 8.

13. Kuma Lalwa ki Zeova ti donn nasyon Izrael montre nu ki Zeova pran kont bann dimunn defavorize?

¹³ Dezyeman, lazistis Bondye fer Li pran kont difikilte bann dimunn ki pe sufer. Kan nu egzaminn Lalwa ki Zeova ti donn nasyon Izrael, nu truve ki Li interes Li ar bann dimunn defavorize. Par egzanp, ti ena bann dispozisyon dan Lalwa pu vey lor byinet bann orfelin ek bann vev. (Deteronom 24:17-21) Zeova ti kone kuma lavi ti kapav difisil pu sa kalite fami la, alor kuma enn papa, Li ti vinn zot Ziz ek zot Protekter. (Deteronom 10:17, 18) Li ti donn enn warning bann Izraelit: si zot fer dominer ar bann fam ek bann zanfan ki san defans, Li pu tann bannla kan zot kriye. Dan Egzod 22:22-24, Zeova dir: “Wi, mo koler pu monte.” Lakoler pa fer parti parmi bann kalite prinsipal ki Zeova ena. Me kan Li truv enn kikenn fer linzistis par expre, sirtu kont bann dimunn feb, la sa provok Zeova ek zistifye so koler.—Psom 103:6.

14. Ki gran prev nu ena ki Zeova pa fer preferans?

¹⁴ Trwazyeman, dan Deteronom 10:17, Labib donn nu lasirans ki Zeova “pa fer preferans anver personn ek Li pa aksepte gus.” Zeova pa kuma buku dimunn ki ena puvwar ek linflyans, Li pa les Li inflyanse par larises ek laparans. Zame Zeova pa ziz enn dimunn davans ek zame Li pa fer preferans. Ena enn gran prev ki montre ki Zeova pa fer okenn preferans. Li pa rezerv posibilite pu ador Li ek pu gayn lavi pu tuletan, zis pu enn tigit dimunn ki siperyer. Okontrer Akt 10:34, 35 dir: “Bondye pa fer preferans, me dan ninport ki nasyon, dimunn ki ena lakrint pu Li ek ki pratik lazistis, Bondye aksepte li.” Tu dimunn ena sa posibilite la, ninport ki zot klas sosyal, zot kuler lapo, uswa peyi kot zot reste. Eski sa se pa meyer lazistis ki kapav ena? Wi, kan nu pli konpran lazistis Zeova, sa fer nu vinn pros ar Li!

‘Sazes Bondye . . . Byin-Byin Profon!’

15. Ki vedir lasazes ek kuma eski Zeova manifeste sa kalite la?

¹⁵ Dan Romin 11:33, lapot Pol ti santi li puse pu dir: ‘Sazes ek konesans Bondye byin-byin profon!’ Wi, kan nu reflesi byin lor diferan laspe gran sazes Zeova, sa ranpli nu leker avek enn gran respe. Me kuma eski nu kapav definir lasazes? Lasazes se enn kalite ki met konesans, bon zizman ek lintelizans ansam pu prodir enn bon rezilta. Grasa so gran konesans ek profonder so lintelizans, Zeova tuletan pran bann meyer desizyon ki ena ek Li realiz zot dan enn meyer fason posib.

16, 17. Kuma eski kreasyon Zeova montre so gran sazes? Donn enn legzanp.

¹⁶ Ki bann prev presi nu ena ki temwayn lor gran sazes Zeova? Psom 104:24 dir: “To bann travay, zot buku, A Zeova! To finn fer zot tu avek sazes. Later ranpli avek tu seki to finn fer.” Wi, plis nu aprann lor bann kitsoz ki Zeova inn fer, plis nu ranpli ar ladmirasyon pu so sazes. Mazinn inpe, bann syantifik inn aprann buku kan zot inn etidye bann kitsoz ki Zeova inn kre! Ena mem enn domenn dan lasyans ki apel byomimetik, ki esey imit bann prinsip ki ena dan lanatir.

¹⁷ Par egzanp, sirman u finn deza admir enn zoli lakaz zarenye. Anrealite, se enn mervey dan kreasyon. Si gard mem proporsyon, sa bann difil zarenye ki paret byin frazil la, zot pli solid ki lasye ek ki bann fib ki ena dan enn zile par-bal. Ki sa vedir egzakteman? Sey mazinn enn lakaz zarenye mem grander ki enn file ki servi pu lapes. Enn lakaz zarenye kumsa ti pu telman solid ki li ti pu kapav aret enn gro avyon anplin vol! Wi, Zeova inn fer tu sa bann kitsoz la “avek sazes.”

18. Kuma nu truv sazes Zeova kan Li’nn servi bann dimunn pu ekrir so Parol, Labib?

¹⁸ Nu kapav truv pli gran prev ki temwayn lor sazes Zeova dan so Parol, Labib. Bann bon konsey ki ena dan sa liv la montre nu vremem meyer fason ki ena pu viv. (Izai 48:17) Me, nu truv usi sazes inkonparab ki Zeova ena, dan fason ki Labib finn ekrir. Kuma? Avek sazes, Zeova ti desid pu swazir bann dimunn pu ekrir so Parol. Si Li ti servi bann anz pu ekrir Labib, eski Labib ti pu atir nu otan? Byinsir, bann anz ti pu kapav dekrir Zeova dapre konesans siperyer ki zot ena lor Zeova, ek zot ti pu kapav exprim latasman ki zot ena pu Li. Me eski nu ti pu kapav vremem konpran kitsoz mem fason ki bann kreatir spirityel parfe, ki ena konesans, lexperyans ek lafors buku pli siperyer ki nu?—Ebre 2:6, 7.

19. Ki legzanp montre nu ki parski finn servi bann dimunn pu ekrir Labib, akoz sa li enn liv ki byin tusan ek atiran?

¹⁹ Se parski Zeova finn servi bann dimunn pu ekrir Labib, ki sa liv la byin tusan ek byin atiran. Sa bann ekrivin Labib la, ti bann dimunn ki ti ena mem santiman ki nu. Zot usi zot ti inparfe ek donk, zot ti bizin fer fas ar bann problem ek bann difikilte parey kuma nu. Dan sertin ka, zot ti ekrir personelman seki zotmem zot ti resanti ek kuma zot inn lite dan zot lavi. (2 Korintyin 12:7-10) Donk, zot inn ekrir bann parol ki okenn anz pa ti pu kapav exprime. Nu pran par egzanp seki David inn ekrir dan Psom 51. Dapre not ki ena lao dan sa psom la, David ti konpoz sa apre ki li ti’nn fer bann pese grav. Li ti uver so leker pu exprim so gran sagrin ek li ti sipliy Bondye pu pardonn li. Verse 2 ek 3 dir: “Lav mwa net, tir mo erer, ek netway mwa ar mo bann pese. Mwa, mo konn mo dezobeisans, ek mo pese tuletan devan mwa.” Remarke ki li dir dan verse 5: “Gete! Dan fot ek dan duler mo finn ne ek mo mama ti ansint mwa dan pese.” Verse 17 azute: “Bann sakrifis pu Bondye, se enn lespri ki dan lapenn ek enn leker ki’nn kase, O Bondye, to pa pu rezet sa.” Kan u lir sa, eski u pa resanti langwas sa ekrivin la? Kisannla, apar enn dimunn inparfe, ti pu kapav exprim bann santiman kumsa?

20, 21. (a) Kifer eski nu kapav dir ki mem si Zeova inn servi bann ekrivin imin, ena lasazes Zeova dan Labib? (b) Ki pu egzamine dan prosin lartik?

²⁰ Zeova inn servi bann dimunn inparfe pu ekrir Labib. Atraver zot, Li’nn donn nu seki nu bizin—enn liv ki “inspire par Bondye,” me ki purtan inn ekrir dan enn fason pu bann dimunn konpran fasilman. (2 Timote 3:16) Wi, sa bann ekrivin la ti gide par lespri sin. Alor, dan seki zot finn ekrir ena lasazes Zeova, pa zot prop sazes. Nu kapav ena ful konfyans dan sa sazes la. Se enn sazes ki telman pli siperyer ki nu prop sazes, ki avek lamur, Zeova konsey nu: “Fer Zeova konfyans avek tu to leker ek pa kont lor to prop lintelizans. Dan tu bann kitsoz ki to fer pran Li kont, ek Li, Li pu fer to bann semin vinn drwat.” (Proverb 3:5, 6) Kan nu pran kont sa konsey saz la, nu vinn pli pros avek nu Bondye ki ena enn gran sazes.

²¹ Kalite ki pli atiran ek ki pli zoli dan tu bann kalite ki Zeova ena se lamur. Prosin lartik pu egzamine kuma Zeova inn montre lamur.

Eski U Rapel?

• Ki bann pa Zeova finn fer pu permet nu vinn bann kamarad intim avek Li?

• Sit detrwa legzanp ki montre pwisans Zeova pu kre ek so pwisans pu proteze.

• Dan ki fason eski Zeova montre so lazistis?

• Kuma eski nu truv sazes Zeova dan kreasyon ek usi dan Labib?

[Zimage page 20]

Parey kuma enn berze sarye enn ti muton lor so lestoma, Zeova pran swin So bann muton avek tandres

[Zimage page 22]

Nu truv lasazes Zeova par fason ki Labib finn ekrir