10. Kifer nou kapav dire ki le reste bann chretien oint zot ‘lor bann nation ek bann royaume’?

¹⁰ En tant ki “le Roi bann nation,” Jéhovah ti donne Jérémie l’ordre pou annonce enn message condamnation, bann nation ek bann royaume. (Jér. 10:6, 7) Mais dan ki sens le reste bann chretien oint zot “lor bann nation ek lor bann royaume”? (Jér. 1:10) Pareil couma Jérémie dan le passé, Jéhovah, Souverain l’univers, inn donne bann chretien oint enn mission. Sa vedir ki zot ena tou droit pou annonce bann jugement Jéhovah kont bann nation ek bann royaume, dan le monde entier. Bann chretien oint inn gagne zot l’autorité ar Bondié Tout-Puissant. Zot servi langage clair ki sorti dan Parole inspiré Bondié, pou dire ki bann nation ek bann royaume zordi pou deraciné ek pou detruire dan ler ki Bondié inn fixé ek par moyen ki Li’nn choisir. (Jér. 18:7-10; Rév. 11:18) Bann chretien oint bien decidé pou pa ralenti dan zot mission ki Bondié inn donne zot pou annonce bann message jugement Jéhovah partout lor la terre.

14, 15. (a) Ki resultat Jérémie ti gagné parski li ti accompli so mission avek fidelité? (b) Ki bann serviteur Bondié comprend concernant la predication?

¹⁴ Jérémie pa ti arreté annonce bann avertissement ek bann jugement Jéhovah, selman, so mission “pou construire ek pou planté” ti ena aussi enn grand l’importance pou li. (Jér. 1:10) Li ti aide bann dimoune sincere pou ena enn l’esperance ek sa travail-la ti produire bann resultat. Certain Juif ek aussi certain ki pa ti bann Israélite ti gagne la vie sauve kan Jérusalem ti detruire en 607 avant nou lepok. Par exemple, ti ena bann Rékabite, Ébed-Mélek ek Barouk. (Jér. 35:19; 39:15-18; 43:5-7) Sa bann camarade Jérémie ki ti fidele ek ki ti ena la crainte pou Bondié-la, represente bien bann dimoune ki zordi, ena l’esperance pou vive lor la terre ek ki soutenir bann chretien oint. Sa bann chretien oint-la ena enn grand la joie pou fortifié sa “grand la foule[-la]” lor plan spirituel. (Rév. 7:9) Sa bann compagnon fidele bann chretien oint-la, zot aussi zot gagne enn grand satisfaction pou aide bann dimoune sincere pou gagne enn connaissance lor la verité.