Esey Truv Lezot Parey Kuma Zeova Truv Zot

“Fason ki dimunn truve, se pa sa fason la ki Bondye truve.”—1 SAMYEL 16:7.

1, 2. Kuma eski lopinyon ki Zeova ti ena lor Elyab, ti diferan avek lopinyon Samyel ek ki sa montre nu?

DAN onzyem syek A.N.L., Zeova ti avoy profet Samyel lor enn misyon sekre. Li ti donn li lord pu al kot enn misye ki ti apel Zese ek pu swazir enn parmi so bann garson pu vinn fitir lerwa an Izrael. Kan Samyel ti truv Elyab, premye garson Zese, li ti sir ki se limem ki Zeova inn swazir. Me Zeova ti dir: “Pa get so laparans, ni so oter, parski mo finn rezet li. Parski fason ki enn dimunn truve, se pa sa fason la ki Bondye truve, parski enn dimunn li, li truv zis seki paret devan so lizye, alor ki Zeova Li, Li truv seki ena dan leker.” (1 Samyel 16:6, 7) Samyel pa ti reysi truv Elyab fason ki Zeova Li, Li ti truv Elyab.a

² Li byin fasil pu bann dimunn fer erer dan zot lopinyon lor lezot! Parfwa, nu kapav tronpe par bann dimunn ki andeor paret byin, me ki andan, pena okenn prinsip moral. De lot kote, li posib ki li difisil pu sanz nu manyer panse lor enn kikenn ek nu ena enn lopinyon byin sever lor zot. Sa bann dimunn la, zot sinser, me nu zot personalite agas nu.

3, 4. (a) Si ena enn problem ant de Kretyin, ki tulede bizin deside pu fer? (b) Ki kestyon nu bizin demann numem, si nu’nn gayn enn dezakor avek enn lot Kretyin?

³ Kan nu ziz lezot tro vit—mem bann dimunn ki nu kone depi lontan, sa kapav kre bann problem. Li posib ki u’nn gayn enn dezakor ar enn Kretyin ki avan, ti u bon kamarad. Eski u ti pu kontan retablir bann bon relasyon avek li? Ki pu ed u pu fer sa?

⁴ Kifer u pa pran letan pu konsider sa frer la uswa sa ser la dan enn fason pozitif. Ek kan u fer sa, mazinn seki Zezi ti dir: “Personn pa kapav vinn ver mwa si mo Papa, ki’nn avoy mwa pa atir li.” (Zan 6:44) Apre demann umem: ‘Kifer eski Zeova finn atir sa dimunn la ver So Garson? Ki bann bon kalite eski sa dimunn la ena? Eski mo pa finn pran kont sa bann kalite la, uswa zot pena valer pu mwa? Pu ki rezon nu ti fer kamarad avan? Ki ti atir mwa ver sa dimunn la pu vinn so kamarad?’ Okumansman, li posib ki u truv sa difisil pu pans lor so bann bon kalite, sirtu si u ankor pe resanti sa ditor ki li’nn fer u la, dan nu leker. Me purtan, sa se enn pa inportan pu ki u kapav retablir bann bon relasyon ant zot. Pu montre kuma u kapav fer sa, anu get legzanp de dimunn. Suvan, se sirtu zot defo ki abitye atir nu latansyon. Sa de la se profet Yona ek lapot Pyer.

Enn Regar Onet lor Yona

 5. Ki misyon Zeova ti donn Yona ek kuma li ti reazir?

⁵ Yona ti enn profet Zeova dan rwayom ki ti truv dan lenor Izrael, pandan reyn Lerwa Yarobam II, garson Yeoas. (2 Lerwa 14:23-25) Enn zur, Zeova ti donn lord Yona pu kit Izrael ek pu al Niniv, kapital Asiri, ki ti enn peyi byin pwisan. Ki misyon li ti ena? Li ti bizin averti bann abitan lavil Niniv ki zot gran lavil ti pu detrir. (Yona 1:1, 2) Olye li fer seki Bondye ti dir li, Yona ti sove! Li’nn mont lor enn bato ki ti pe al Tarsis, byin lwin avek Niniv.—Yona 1:3.

 6. Kifer Zeova ti swazir Yona pu al Niniv?

⁶ Ki vinn dan u lespri kan u pans Yona? Eski u panse ki li ti enn profet dezobeisan? Nu kapav tir sa konklizyon la, si nu egzaminn so lavi anler-anler. Me eski Bondye ti swazir Yona pu vinn so profet parski li ti enn dimunn dezobeisan? Non byinsir! Yona sirman ti ena bann bon kalite. Anu gete kuma so lavi antan ki enn profet ti ete.

 7. Dan ki sityasyon eski Yona ti pe servi Zeova an Izrael, ek kan nu konn sa, kuma sa inflyans fason ki nu konsider li?

⁷ An realite, Yona ti montre li fidel kan li ti travay dir an Izrael, enn teritwar kot bann dimunn pa ti pe ekut li. Profet Amos ti viv apepre dan mem lepok ki Yona. Li ti dir ki bann Izraelit dan sa lepok la, ti materyalis ek ti byin kontan plezir.b Ti ena bann move kitsoz ki ti pe pase dan peyi. Me, bann Izraelit pa ti pe pran sa kont. (Amos 3:13-15; 4:4; 6:4-6) Purtan, zur apre zur, Yona, ti montre li fidel, kan li ti akonpli so misyon pu pres avek zot. Si u enn proklamater labonn nuvel, u kone kuma li difisil pu koz avek bann dimunn ki indiferan ek ki satisfe ar zotmem. Donk, mem si nu rekonet ki Yona ti ena bann defo, nu bizin pa bliye ki li ti ena usi bann bon kalite. Li ti fidel ek li ti ena landirans kan li ti pres avek bann Izraelit ki pa ti ena lafwa.

 8. Ki difikilte enn profet Izraelit ti pu kapav gayne dan Niniv?

⁸ Me, misyon pu al Niniv, ti enn misyon ankor pli difisil pu Yona. Wi, pli difisil ki pres avek bann Izraelit ki pa ti ena lafwa! Yona ti bizin mars 800 km pu ariv dan sa lavil la. Sa vwayaz la ti pu byin fatigan ek difisil ek sa ti pu pran li apepre enn mwa. Kan li ti pu ariv laba, Yona ti pu bizin pres avek bann Asiryin. Tu dimunn ti kone ki sa bann la ti bann dimunn byin kriyel. Kan zot ti fer lager, zot ti tortir bann dimunn enn fason sadik, ek zot ti mem fer vantar akoz sa. Li pa etonan ki ti apel Niniv “lavil ki vers buku disan”!—Naum 3:1, 7.

 9. Kan enn gran tanpet ti menas lavi bann marin, ki bann kalite Yona ti montre ki li ena?

⁹ Yona ti ezite pu obeir lord Zeova. Li ti mont lor enn bato ki ti amenn li deplizanpli lwin ar peyi kot li ti bizin ale. Me purtan, Zeova pa ti perdi konfyans an li. Li pa ti rod enn lot dimunn pu ranplas Yona usi. Okontrer, Zeova ti fer kitsoz pu ed Yona pu ki li realize ziska ki pwin so misyon ti inportan. Zeova ti fer enn gran tanpet vinn lor lamer. Bato ki Yona ti pran, ti pe balote dan tu kote, akoz bann gro vag. Bann zom inosan ti pu mor, ek tu sa akoz Yona! (Yona 1:4) Kuma Yona ti pu reazir? Li pa ti anvi ki bann marin lor sa bato la perdi zot lavi akoz li. Yona ti dir zot: “Lev mwa ek zet mwa dan lamer, ek lamer pu revinn kalm pu zot.” (Yona 1:12) Yona pa ti ena okenn rezon pu panse ki Zeova pu sov li, kan finalman bann marin ti zet li dan lamer. (Yona 1:15) Me purtan, Yona ti aksepte pu mor pu ki sa bann marin la, pa mor zot. Eski nu pa truve la, ki Yona ti ena bann kalite kuma kuraz, limilite ek lamur?

10. Ki ti arive apre ki Zeova ti redonn Yona mem misyon?

¹⁰ Finalman, Zeova ti sov Yona. Eski savedir ki Yona pa ti merite servi ankor kuma enn reprezantan Bondye, akoz bann aksyon ki li ti’nn fek fer? Non, Zeova ti ena pitye ek lamur pu li. Se akoz sa ki Li ti redonn li mem misyon pu al prese dan Niniv. Kan Yona ti ariv Niniv, avek kuraz li ti dir so bann abitan ki Bondye inn truv zot bann pese. Li ti dir zot ki zot lavil pu detrir dan 40 zur. (Yona 1:2; 3:4) Kan zot ti tann mesaz byin direk ki Yona ti prese, bann Ninivit ti repanti ek zot lavil pa’nn detrir.

11. Ki kitsoz montre nu ki Yona ti tir enn gran leson lor seki ti ariv li?

¹¹ Me kanmem sa, Yona pa ti ena enn bon fason panse. Avek pasyans, Zeova ti servi enn legzanp byin pratik pu ed li. Sa ti montre Yona ki Zeova get plis ki laparans. Li egzaminn leker bann dimunn. (Yona 4:5-11) Nu kone ki Yona inn tir enn gran leson, par enn rapor onet ki limem li ti ekrir. Li ti dispoze pu rakont so bann febles, mem si li ti bizin ekrir bann detay ki ti anbarasan pu li. Sa montre ankor plis ki li ti ena limilite. Pu enn kikenn admet so erer, sa demann buku kuraz!

12. (a) Kuma eski nu kone ki Zezi ena mem fason panse ki Zeova, lor bann dimunn? (b) Ki lankurazman nu’nn gayne konsernan lopinyon ki nu bizin ena anver bann dimunn avek ki nu pres labonn nuvel? (Get lankadre dan paz 18.)

¹² Plis ki 800 an apre, Zezi Kris ti fer enn remark ankurazan lor enn levennman dan lavi Yona. Li ti dir: “Parey kuma Yona ti dan vant enn gro pwason trwa zur ek trwa nwit, Garson Bondye ki ti ne kuma enn zom, pu antere dan later, trwa zur ek trwa nwit.” (Matye 12:40) Kan Yona pu resisite, li pu aprann ki Zezi ti konpar letan ki Li ti pase dan tom avek sa peryod ki li, li ti pase dan vant sa pwason la. Eski nu pa kontan pu servi enn Bondye ki pa rezet so bann serviter kan zot fer erer? Enn ekrivin psom ti ekrir: “Parey kuma enn papa fer mizerikord anver so bann garson, Zeova finn fer mizerikord anver bann seki ena lakrint pu li. Parski Limem Li konn byin kuma nu finn forme, Li rapel ki nu finn fer ar lapusyer.” (Psom 103:13, 14) Bann dimunn inparfe ki pe viv zordi, zot form parti dan seki Labib apel “lapusyer.” Me sa bann dimunn la, zot kapav fer buku kitsoz avek led lespri sin Bondye!

Enn Bon Fason pu Konsider Pyer

13. Ki bann manyer ki Pyer ti ena, vinn dan nu lespri kan nu reflesi lor li? Me, kifer eski Zezi ti swazir li pu vinn so zapot?

¹³ Asterla, anu get pu enn ti moman, enn dezyem legzanp, se legzanp lapot Pyer. Si ti demann u pu dir kuma lapot Pyer ti ete, ki u ti pu dir lor li? Eski deswit u ti pu pans so manyer koze san reflesi uswa mem, ki li ti ena enn gran lopinyon lor limem? Li vre, parfwa Pyer ti manifeste sa bann manyer la. Me purtan, eski Zezi ti pu swazir Pyer pu vinn enn parmi so 12 zapot, si li ti koz san reflesi uswa si li ti ena enn gran lopinyon lor limem? (Lik 6:12-14) Non, byinsir! Zezi ti sirman pas lor sa bann defo la. Li ti truv bann bon kalite ki Pyer ti ena.

14. (a) Pyer ti paret enn dimunn ki tro prese pu koze, kuma nu kapav explik sa? (b) Kifer nu bizin rekonesan ki suvan Pyer ti poz kestyon?

¹⁴ Parfwa Pyer ti azir kuma port-parol pu bann lezot zapot. Pu sertin, sa montre ki Pyer pa ti rekonet so limit. Me eski se vre? Sertin inn dir ki li posib ki Pyer ti pli aze ki lezot zapot—kitfwa pli aze ki Zezi limem. Si sa vre, alor sa kapav ed nu pu konpran kifer Pyer ti suvan limem premye pu koze. (Matye 16:22) Purtan, ena enn lot kitsoz ki nu bizin pran an konsiderasyon. Pyer ti enn dimunn spirityel. So gran dezir pu gayn konesans, ti pus li pu poz kestyon. Sa inn profit nu. Zezi ti dir buku kitsoz byin inportan kan li ti reponn bann kestyon ki Pyer ti poze ek tu sa finn ekrir dan Labib. Par egzanp, se pu reponn seki Pyer ti dir, ki Zezi ti koz lor “serviter ansarz” (Lik 12:41-44) Ek pans sa kestyon ki Pyer ti poze la: “Nu finn kit tu kitsoz ek nu finn swiv twa, anrealite, ki pu ena pu nu?” Sa ti amenn Zezi pu fer enn promes ki fortifye nu: “Tu dimunn ki finn kit lakaz, frer, ser, papa, mama, zanfan uswa terin akoz mo non, pu gayn buku fwa plis ki sa ek li pu gayn lavi pu tuletan.”—Matye 15:15; 18:21, 22; 19:27-29.

15. Kifer nu kapav dir ki Pyer ti vremem fidel?

¹⁵ Pyer ti ena enn lot bon kalite—li ti enn dimunn fidel. Buku lezot disip ti aret swiv Zezi parski zot pa ti konpran enn so bann lanseynman. Me Pyer li, san ezite, li ti koz pu tule 12 zapot ek li ti dir: “Senyer, ar kisannla nu pu ale? To ena bann parol lavi pu tuletan.” (Zan 6:66-68) Sirman, sa bann parol la inn fer leker Zezi kontan! Plitar, kan enn laful ti vinn aret zot Met, laplipar bann disip ti sove. Me Pyer li, li ti swiv sa laful la lor enn distans. Li ti mem rant dan lakur gran pret. Fode ki li ti ena kuraz ek non laper, pu li al laba. Pandan ki lezot ti pe poz Zezi kestyon, Pyer ti al zwenn enn grup Zwif ki ti pe sof zot otur enn gran dife. Enn parmi bann esklav gran pret ti rekonet li ek ti akiz li parski li ti avek Zezi. Wi, Pyer ti trayir so Met. Me, fode pa nu bliye ki se parski li ti fidel ek li ti pe trakase pu Zezi, ki Pyer ti retruv li dan sa sityasyon danzere la. Laplipar lezot zapot pa ti ena kuraz pu met zot dan sa sityasyon la.—Zan 18:15-27.

16. Pu ki rezon nu finn get bann bon kalite ki Yona ek Pyer ti ena?

¹⁶ Bann bon kalite ki Pyer ti ena, sa ti kuver so bann defo. Li parey pu Yona usi. Parey kuma nu finn ena enn pli bon lopinyon, ki seki nu abitye ena lor Yona ek Pyer, nu bizin fer parey pu nu bann frer ek ser zordi. Nu bizin antrenn nu pu ena enn pli bon lopinyon lor zot. Si nu fer sa, nu pu ena bann pli bon relasyon avek zot. Kifer eski sa li inportan?

Met an Pratik Leson Ki Nu’nn Aprann

17, 18. (a) Kifer kapav ena bann dezakor ant bann Kretyin? (b) Ki konsey Labib, kapav ed nu pu regle bann difikilte avek lezot Kretyin?

¹⁷ Tu sort kalite dimunn—ki li misye, madam uswa zanfan, pe servi Zeova zordi dan linite, ninport ki so ledikasyon uswa so ras, ki li ris uswa ki li pov. (Revelasyon 7:9, 10) Dan kongregasyon Kretyin ena tu sort kalite personalite! Parski nu pe servi Bondye ansam, pa kapav evite ki parfwa pu ena problem ant nu.—Romin 12:10; Filipyin 2:3.

¹⁸ Mem si nu truv defo nu bann frer, nu pa get zis sa tusel. Nu fer tu pu imit Zeova. Dan enn kantik, enn ekrivin psom ti dir lor Zeova: “Si to bizin pran kont nu bann fot, O Ya, O Zeova, kisannla ti pu kapav tini?” (Psom 130:3) Nu pa pu get zis bann kitsoz dan personalite enn kikenn ki pu kapav kre divizyon ant nu. Okontrer, nu pu “rod bann kitsoz ki pu fer lape ek bann kitsoz ki pu ankuraz nu tu.” (Romin 14:19) Nu fer tu nu zefor pu truv bann dimunn, parey kuma Zeova truv zot. Avan tu, nu get zot bann bon kalite olye ki zot bann defo. Kan nu fer sa, sa pu ed nu pu ‘kontiyn siport nu kamarad.’—Kolosyin 3:13.

19. Sit bann kitsoz pratik ki enn Kretyin kapav fer pu regle bann dezakor ase grav.

¹⁹ Me, ki nu pu fer kan nu gayn bann dezakor ki kontiyn truble nu? (Psom 4:4) Eski finn ariv enn dezakor kumsa ki pankor regle ant u ek enn lot Kretyin? Kifer eski u pa esey regle sa sityasyon la? (Zenez 32:13-15) Dabor, priye Zeova, ek demann li so direksyon. Answit, pans bann bon kalite ki sa dimunn la ena ek lerla, apros li avek “enn duser ki lasazes prodir.” (Zak 3:13) Dir li ki u anvi fer lape avek li. Rapel sa konsey Labib la: ‘U bizin pre pu tande, pa prese pu koze ek pa ankoler vit.’ (Zak 1:19) Sa konsey ki u bizin “pa ankoler vit” la, montre enn fason indirek, ki dimunn la kapav dir uswa fer kitsoz ki pu kapav fer u ankoler. Si sa arive, demann Zeova led pu ki u kapav kontrol umem. (Galat 5:22, 23) Les u frer dir seki li ena pu dir ek ekut li avek atansyon. Pa interonp li, mem si u pa dakor avek tu seki li pe dir. Li posib ki so fason panse pa bon, me sa, se so fason panse ki u bizin aksepte. Esey truv problem la kuma li, li truve. Kitfwa u pu bizin truv umem dan fason ki u frer truv u.—Proverb 18:17.

20. Kan u regle bann dezakor, ki bann lezot kitsoz ankor u bizin fer pu retablir lape avek sa dimunn la?

²⁰ Kan se u tur pu koze, koz byin avek u frer. (Kolosyin 4:6) Dir li seki u apresye ar li. Demann li exkiz pu ninport ki kitsoz ki u’nn fer ek ki’nn kre sa dezakor la. Si u bann zefor ki u’nn fer avek limilite, amenn bann bon rezilta, remersye Zeova. Me si sa pa’nn marse, kontiyn demann Zeova so led ek kontiyn rod bann lezot lokazyon pu fer lape.—Romin 12:18.

21. Kuma eski sa lartik la finn ed u pu truv lezot parey kuma Zeova truv zot?

²¹ Zeova kontan tu so bann serviter. Li kontan pu servi nu tu dan so servis, mem si nu inparfe. Amezir ki nu aprann plis lor fason ki Li konsider lezot, nu lamur pu nu bann frer ek ser pu ogmante. Si nu lamur pu enn Kretyin inn diminye, nu kapav fer kitsoz pu ogmant li. Nu pu gayn enn gran benediksyon si nu byin deside pu fer zefor pu ena enn bon lopinyon lor lezot—wi, truv zot parey kuma Zeova truv zot!

[Not anba paz]

Kuma U Pu Reponn?

• Kuma Zeova konsider defo so bann serviter ki fidel?

• Sit bann bon kalite ki Yona ek Pyer ti ena.

• Ki lopinyon lor u bann frer Kretyin u bizin byin deside pu ena?

[Lankadre lor paz 9]

Mazine Kuma Zeova Truv Lezot

Kan u reflesi lor seki Labib dir lor Yona, eski u truve ki li neseser pu u koriz fason ki u konsider bann dimunn avek ki u pres labonn nuvel? Zot kapav parey kuma bann Izraelit. Zot paret byin satisfe ar zotmem ek indiferan, uswa zot kont mesaz ki u pe prese. Malgre sa, ki Zeova Li, Li panse lor zot? Mem sertin dimunn ki ena enn gran pozisyon dan sa lemond la, kapav enn zur turn ver Zeova. Zot pu parey kuma lerwa Niniv, ki ti repanti apre predikasyon Yona.—Yona 3:6, 7.

[Zimaz lor paz 8]

Eski u truv lezot parey kuma Zeova truv zot?

[Zimaz lor paz 10]

Zezi ti truv enn bon kitsoz pu dir lor seki ti ariv Yona