Anou Soutenir Nou Gid​—Zezi

 1. Ki Zeova anvi azordi?

AZORDI, Zeova anvi ki bon nouvel lor Rwayom Bondie prese partou lor later. (Mark 13:10; 1 Tim. 2:3, 4) Se travay Zeova! Sa travay-la telman inportan, ki li’nn swazir so garson pou diriz sa travay-la. Parski Zezi pe gid nou, nou pou reisi fer travay-la ek terminn li avan ki lafin vini, parey kouma Zeova anvi.​—Mat. 24:14.

 2. Ki nou pou examine dan sa lartik-la?

² Dan sa lartik-la, nou pou gete kouma Zezi servi “lesklav fidel ek saz” pou donn nou bann instriksion ki sorti dan Labib ek pou organiz pli gran travay predikasion ki finn ena dan listwar. (Mat. 24:45, NW) Nou pou get osi kouma nou kapav soutenir Zezi ek lesklav fidel ek saz.

 3. Ki responsabilite Zezi ti gagne?

³ Zezi pe diriz travay predikasion. Kouma nou konn sa? Inpe avan ki li mont dan lesiel, Zezi ti zwenn ansam avek sertin parmi so bann disip lor enn montagn dan Galile. Li ti dir zot: “Finn donn mwa tou pouvwar dan lesiel ek lor later.” Apre sa, li ti dir zot: “Al dan tou bann pep ki ena e fer zot vinn mo bann disip.” (Mat. 28:18, 19) Alor, parmi bann responsabilite ki Zezi ti gagne, li ti gagn responsabilite pou diriz travay predikasion.

 4. Kouma nou kone ki Zezi ankor pe diriz travay predikasion?

⁴ Zezi ti dir ki travay predikasion ti pou fer dan “tou bann nasion,” ek ki li ti pou avek so bann disip “toulezour ziska lafin-dimonn.” (Mat. 28:20) Sa bann parol-la montre nou ki Zezi ti pou kontign diriz travay predikasion ziska nou lepok.

 5. Kouma nou kapav ede pou realiz Psom 110:3?

⁵ Zezi pa ti trakase tansion pena ase dimounn pou prese pandan bann dernie zour. Li ti kone ki profesi ki trouv dan Psom 110:3 (NW) ti pou realize: “To pep pou port li volonter, zour ki to rasanble to larme.” Si to pe pres bon nouvel, savedir ki to pe soutenir Zezi ek lesklav fidel ek saz, ek ki to pe ede pou ki sa profesi-la realize. Travay-la pe kontign fer, selman ena bann difikilte!

 6. Sit enn difikilte ki nou gagne kan nou prese.

⁶ Enn difikilte ki nou gagne kan nou prese, se lopozision. Bann aposta, bann sef relizie, ek bann politisien inn dir bann dimounn boukou fos kitsoz lor nou travay predikasion. Akoz sa bann mansonz-la, kitfwa nou fami, nou bann kamarad, ouswa nou bann koleg travay pou esey met presion lor nou pou ki nou aret servi Zeova ek pou ki nou aret prese. Dan sertin pei, nou bann lennmi kitfwa menas nou, atak nou, ouswa zot met nou bann frer ek ser dan prizon. Nou pa etone ki bann dimounn tret nou dan sa fason-la, parski Zezi ti dir: “Tou bann nasion pou air zot akoz mo nom.” (Mat. 24:9) Sa lopozision-la se enn prev ki nou ena faver Zeova. (Mat. 5:11, 12) Se Satan ki pe pous bann dimounn pou opoz ar nou. Me Zezi, boukou pli for ki Satan! Avek led Zezi, nou pe reisi pres bon nouvel dan lemond antie. Anou get enn prev ki montre sa.

 7. Ki prev nou ena ki Revelasion 14:6, 7 pe realize?

⁷ Enn lot difikilte ki nou gagne kan nou prese bon nouvel, se ki bann dimounn koz diferan lang. Selman, dan vizion ki lapot Zan ti gagne, Zezi ti predir ki nou ti pou reisi sirmont sa obstak-la dan nou lepok. (Lir Revelasion 14:6, 7.) Azordi, boukou dimounn dan lemond antie pe gagn lokazion pou tann koz lor bon nouvel gras-a nou sit jw.org. Lor sa sit-la, ena bann piblikasion Biblik dan plis ki 1,000 lang! Komite Santral inn donn so lakor pou tradir liv ki nou servi pou ansegn bann dimounn, liv Viv Ere pou Touletan!, dan plis ki 700 lang. Nou fer osi bann video pou bann sourd ek bann piblikasion an bray pou bann aveg. Azordi, nou pe trouv bann profesi Labib pe realize, parski bann dimounn “dan tou lang bann nasion” pe aprann pou koz “enn lang ki sin,” setadir zot pe aprann bann verite Biblik. (Zaka. 8:23; Sof. 3:9) Nou pe reisi fer tousala, parski Zezi pe gid nou.

 8. Ki lefe nou travay predikasion finn ena?

⁸ Zordi, ena plis ki 8,000,000 dimounn dan 240 pei ki form parti dan lorganizasion Zeova. Ek sak lane, plizir dizenn milye dimounn pe pran batem! Sa bann dimounn-la pe fer bann gran zefor pou devlop bann kalite Kretien, ek zot pe met “nouvo personalite” lor zot. (Kol. 3:8-10, NW) Zot inn rezet limoralite ek laviolans, zot nepli ena bann prezize, ek zot nepli patriotik. Profesi ki trouv dan Izai 2:4 pe realize, parski sa bann dimounn-la pe “nepli aprann lager.” Kan nou pe fer zefor pou met nouvo personalite lor nou, nou pe atir bann dimounn ver lorganizasion Zeova, ek nou montre ki nou pe les Zezi diriz nou. (Zan 13:35; 1 Pier 2:12) Nou pe reisi fer tousala parski Zezi pe ed nou.

 9. Dapre Matie 24:45-47, ki Zezi ti predir konsernan bann dernie zour?

⁹ Lir Matie 24:45-47, NW.b Zezi ti predir ki dan bann dernie zour, li ti pou etabli enn “lesklav fidel ek saz” ki ti pou donn nou bann instriksion ki sorti dan Labib. Ek vremem sa esklav-la pe travay bien dir dan nou lepok. Zezi inn swazir enn ti group Kretien ki ena lesperans pou al viv dan lesiel, pou donn bann serviter Zeova ek bann ki interese ar laverite, “zot nouritir dan ler ki bizin.” Sa bann zom-la pa dominn lor lafwa lezot. (2 Kor. 1:24) Okontrer, zot rekonet ki Zezi li nou ‘gid ek nou komandan.’​—Iza. 55:4.

10. Parmi bann piblikasion ki mansione lor zimaz, lekel finn ed twa pou vinn dan laverite?

¹⁰ Depi 1919, lesklav fidel ek saz inn pibliye enn kantite piblikasion pou ed bann dimounn ki interese ar laverite pou aprann konn bann verite ki ena dan Parol Bondie. An 1921, zot inn pibliye liv La Harpe de Dieu pou ed bann dimounn pou konn bann lansegnman inportan ki ena dan Labib. Avek letan, zot finn pibliye lezot piblikasion. Ki piblikasion inn ed twa pou aprann konn Zeova ek pou kontan Li? Eski se liv « Que Dieu soit reconnu pour vrai ! », liv La vérité qui conduit à la vie éternelle, liv Vous pouvez vivre éternellement sur une terre qui deviendra un paradis, liv Konesans Ki Amenn ver Lavi pu Tuletan, liv Ki la Bible enseigné vrai-mem?, liv Ki Labib Ansegn Nou?, ouswa liv Viv Ere pou Touletan!, nouvo liv ki nou servi pou etidie avek bann dimounn? Lesklav fidel ek saz inn fer tou sa bann liv-la pou ed nou pou fer bann disip, ek se samem nouritir spiritiel ki ti bizin dan sa ler-la!

11. Kifer nou tou nou bizin aprann plis lor Zeova ek Labib?

¹¹ Pa zis bann dimounn ki interese ar laverite ki bizin ena enn bon konesans lor Zeova ek Labib. Nou tou nou bizin sa! Lapot Pol ti ekrir: “Manze solid li pou bann adilt.” Ek Pol ti dir ki bann dimounn ki met an pratik seki zot aprann dan Labib, zot pou “konn disern seki bien ek seki mal.” (Ebre 5:14) Azordi, ena telman boukou dimounn imoral, ki nou kapav trouv sa difisil pou obeir bann lalwa Zeova. Me Zezi fer an-sort ki nou gagn seki nou bizin pou ki nou kapav gard nou lafwa for. Nou gagn sa bann instriksion-la dan Parol Bondie, Labib. Anplis, Zezi gid lesklav fidel ek saz pou prepar ek distribie sa nouritir-la.

12. Parey kouma Zezi, kouma nou’nn donn laglwar nom Bondie?

¹² Parey kouma Zezi, nou donn Bondie so nom laglwar ki li merite. (Zan 17:6, 26) Par exanp, an 1931, nou ti pran enn nom ki sorti dan Labib: Temwin Zeova. Kan nou’nn fer sa, nou’nn montre ki nom Bondie li bien inportan pou nou, ek ki nou anvi ki bann dimounn konn nou par sa nom-la. (Iza. 43:10-12) Depi Oktob sa lane-la, nom Zeova ti aparet lor kouvertir sak nimero Latour Degard. Anplis, nou ti remet nom Bondie dan bann plas ki bizin dan La Bible. Traduction du monde nouveau. Nou bien diferan ar bann relizion swadizan Kretien, ki ti fer tir nom Zeova dan boukou tradiksion Labib!

13. Ki prev nou ena ki Zezi pe servi “lesklav fidel ek saz” azordi? (Zan 6:68)

¹³ Gras-a “lesklav fidel ek saz,” Zezi inn devlop enn lorganizasion extraordiner lor later, ek sa lorganizasion-la pe soutenir vre ladorasion. Ki to panse lor sa lorganizasion-la? Kitfwa to ena mem santiman ki lapot Pier, ki ti dir Zezi: “Kot nou pou ale? Tomem ki ena parol lavi eternel.” (Zan 6:68) Kot nou ti pou ete azordi, si nou pa ti konn lorganizasion Zeova? Gras-a sa lorganizasion-la, Zezi fer sir ki nou gagn tou seki nou bizin, pou ki nou kapav res fidel anver Bondie. Li osi form nou pou ki nou vinn efikas dan predikasion. Anplis, li ed nou pou ki nou met “nouvo personalite” lor nou, pou ki nou kapav fer Zeova plezir.​—Efe. 4:24, NW.

14. Depi koumansman pandemi COVID-19, ki bienfe to’nn gagne parski to form parti dan lorganizasion Zeova?

¹⁴ Pandan bann moman difisil, Zezi donn bann instriksion ki bien saz. Par exanp, kan pandemi COVID-19 ti koumanse, nou’nn gagn bann bienfe kan nou’nn swiv sa bann instriksion-la. Dan sa ler-la, boukou dimounn dan lemond antie pa ti kone seki zot ti bizin fer, me Zezi ti donn nou bann instriksion ki bien kler, pou ki nou kapav res an sekirite. Nou lorganizasion ti ankouraz nou pou met enn mask lor nou figir kan nou sorti an piblik, ek pou gard nou distans sosial. Bann ansien ti gagn bann instriksion pou ki zot res an kontak avek tou bann frer ek ser dan lasanble, pou ki bann-la kapav res an sekirite, res an bonn sante, ek res pros avek Zeova. (Iza. 32:1, 2) Anplis, nou gagn bann linstriksion ek bann lankourazman, gras-a bann rapor Komite Santral.

15. Pandan pandemi, ki bann instriksion nou ti gagne pou bann renion ek pou predikasion, ek ki rezilta sa finn ena?

¹⁵ Pandan pandemi COVID-19, nou’nn gagn bann instriksion bien kler lor kouma pou fer bann renion ek lor kouma pou prese. Bien vit, nou ti koumans asiste bann renion ek bann lasanble par video-konferans. Nou ti osi koumans prese par let ek par telefonn. Zeova inn beni nou bann zefor. Dan bann rapor, boukou Betel dir ki kantite bann proklamater inn bien ogmante. An realite, boukou frer ek ser inn fer bann zoli lexperyans pandan pandemi.​—Get lankadre “Zeova Beni Nou Predikasion.”

16. Ki kitsoz nou kapav sir?

¹⁶ Pandan sa pandemi-la, sertin kitfwa inn panse ki nou lorganizasion ti pe pran tro boukou prekosion. Selman, plis letan inn pase, plis nou’nn trouve ki bann instriksion ki nou ti pe gagne ti bien saz. (Mat. 11:19) Kan nou reflesi lor kouma Zezi pe gid bann serviter Zeova azordi, nou kapav sir ki ninport ki kitsoz ki pou arive dan lavenir, Zeova ek so Garson pou kontign soutenir nou.​—Lir Ebre 13:5, 6.

17. Kan to mazine ki Zezi li to gid, ki santiman sa fer twa ena?

¹⁷ Nou bien kontan ki Zezi pe gid nou! Nou form parti enn lorganizasion kot pena okenn divizion akoz kiltir, ras, ek langaz. Nou bien nouri lor plan spiritiel, ek nou bien ekipe pou prese. Sakenn parmi nou pe aprann pou kontan so kamarad, ek pe aprann kouma pou met nouvo personalite lor li. Wi, nou kapav fier ki nou ena enn gid kouma Zezi!