Eski Ou Pe Gagn “Nouritir dan Ler ki Bizin”?

NOU pe viv lepok pli difisil dan listwar limanite. (2 Tim. 3:1-5) Sak zour, nou lamour pou Jéhovah ek nou determinasion pou viv an-akor avek so bann prinsip ki zis pas par bann test. Jésus ti trouv alavans sa lepok difisil la, ek li ti rasir so bann disip ki zot ti pou gagn lankourazman ki bizin pou zot andire ziska lafin. (Mat. 24:3, 13; 28:20) Pou fortifie zot lor plan spiritiel, li’nn etabli enn esklav fidel pou donn zot “nouritir dan ler ki bizin.”​—Mat. 24:45, 46.

Depi ki’nn etabli lesklav fidel an 1919, lorganizasion Bondie inn rasanble plizir milyon “domestik” ki sorti dan tou lang ek pe nouri zot lor plan spiritiel. (Mat. 24:14; Rév. 22:17) Selman, pa dan tou lang ki ena mem kantite piblikasion, ek pa tou dimounn ki gagn akse ar nou bann piblikasion ki ena lor Internet. Par exanp, boukou dimounn pa gagn akse ar bann video ek bann lartik ki ena zis lor jw.org. Me eski sa vedir ki sertin pa pe gagn ase manze pou res an bonn sante lor plan spiritiel? Pou gagn repons sa kestion-la, anou examinn kat kestion inportan.

Kan Satan ti tant Jésus pou fer bann ros vinn dipin, Jésus ti reponn: “Enn dimounn bizin viv, pa zis avek dipin, me avek tou parol ki sorti dan labous Jéhovah.” (Mat. 4:3, 4) Se dan Labib ki ena bann parol Jéhovah. (2 Pierre 1:20, 21) Alor, Labib se ingredian prinsipal ki ena dan nouritir spiritiel ki Jéhovah donn nou.​—2 Tim. 3:16, 17.

Gras-a lorganizasion Jéhovah, nou ena Les Saintes Écritures. Traduction du monde nouveau an-antie ouswa an parti dan plis ki 120 lang, ek sak lane pe tradir sa version Labib la dan lezot lang ankor. Apart sa tradiksion-la, ena osi plizir milyon kopi lezot version Labib an-antie ouswa an parti dan plizir milye lang. Seki’nn akonpli li extraordiner ek li an-akor avek volonte Jéhovah ki anvi ki “tou sort kalite dimounn gagn lavi sov ek gagn enn konesans exakt lor laverite.” (1 Tim. 2:3, 4) Parski “pena okenn kreasion ki pa vizib devan lizie” Jéhovah, nou sir ki Li pou atir bann ki “rekonet ki zot pov lor plan spiritiel” dan so lorganizasion ek donn zot nouritir spiritiel.​—Héb. 4:13; Mat. 5:3, 6; Jean 6:44; 10:14.

Pou ki enn dimounn devlop enn lafwa solid, li pa ase ki li zis lir Labib. Li bizin konpran seki li lir ek aplik seki li aprann. (Jacq. 1:22-25) Enn fonksioner Etiopien dan premie siek ti konpran sa. Li ti pe lir Parol Bondie kan Philippe, enn evanzelizater, ti demann li: “Eski to pe konpran seki to pe lir?” Fonksioner-la ti reponn: “Kouma mo pou konpran si personn pa gid mwa?” (Actes 8:26-31) Philippe ti ed li pou gagn enn konesans exakt lor Parol Bondie. Seki sa fonksioner-la ti aprann ti telman tous li ki li ti batize. (Actes 8:32-38) Li parey, nou bann piblikasion ki baze lor Labib inn ed nou pou gagn enn konesans exakt lor laverite. Zot inn tous nou leker ek inn pous nou pou aplik seki nou aprann.​—Col. 1:9, 10.

Atraver bann piblikasion, bann serviter Jéhovah gagn manze ek bwar lor plan spiritiel an-abondans. (Is. 65:13) Par exanp, Latour Degard, ki disponib dan plis ki 210 lang, explik bann profesi Labib, fer nou pli konpran bann verite bien profon, ek pous nou pou viv an-akor avek bann prinsip Labib. Réveillez-vous ! ki pibliye dan enn santenn lang, ogmant nou konesans lor kreasion Jéhovah ek montre nou kouma pou aplik bann konsey pratik ki ena dan Labib. (Prov. 3:21-23; Rom. 1:20) Lesklav fidel pe pibliye bann piblikasion ki baze lor Labib dan plis ki 680 lang! Eski ou rezerv letan sak zour pou lir Labib? Eski ou lir sak nouvo magazinn ki sorti ek tou bann nouvo piblikasion ki ou gagne dan ou lang sak lane?

Anplis ki lorganizasion Jéhovah prodir bann piblikasion, li osi prepar bann plan diskour ki baze lor Labib ek ki fer dan bann renion, ek dan bann lasanble. Eski ou profit bann diskour, pies teat, demonstrasion ek interview ki ena dan sa bann rasanbleman-la? Vremem, Jéhovah prepar enn festin spiritiel pou nou!​—Is. 25:6.

Non. Ek sa pa bizin etonn nou ki parfwa, sertin serviter Jéhovah ena plis nouritir spiritiel ki lezot. Kifer? Anou get lexanp bann zapot. Zot ti gagn plis linstriksion ki boukou lezot disip dan premie siek. (Marc 4:10; 9:35-37) Mem sa, sa bann lezot disip-la pa ti mank nouritir spiritiel; zot ti gagn seki zot ti bizin.​—Éph. 4:20-24; 1 Pierre 1:8.

Li bon nou remarke osi ki boukou kitsoz ki Jésus inn dir ek fer kan li ti lor later pa finn ekrir dan bann Levanzil. Lapot Jean ti ekrir: “An realite, ena ankor boukou lezot kitsoz ki Jésus inn fer, si ti bizin ekrir zot an detay, mo panse ki lemond limem pa ti pou kapav gard tou sa bann roulo-la.” (Jean 21:25) Mem si bann disip Jésus dan premie siek ti ena plis ransegnman ki nou lor Jésus ki ti parfe, sa pa vedir ki Jéhovah pe priv nou lor plan spiritiel. Jéhovah inn fer an-sort ki nou konn ase kitsoz lor Jésus pou ki nou kapav swiv so tras.​—1 Pierre 2:21.

Anou reflesi osi lor bann let ki bann zapot ti avoy bann kongregasion dan premie siek. Ena omwin enn let ki Paul ti ekrir ki pena dan Labib. (Col. 4:16) Eski sa vedir ki nou mank nouritir spiritiel parski pena sa let-la? Non. Jéhovah kone ki nou bizin ek Li’nn donn nou ase kitsoz pou gard nou for lor plan spiritiel.​—Mat. 6:8.

Zordi, sertin serviter Jéhovah gagn plis nouritir spiritiel ki lezot. Eski ou koz enn lang dan ki zis enn tigit piblikasion mem inn pibliye? Si wi, ou kapav sir ki Jéhovah interese ar ou. Etidie bann piblikasion ki ou ena, ek si posib, asiste renion dan enn lang ki ou konpran. Ek rasir ou ki Jéhovah pou gard ou for lor plan spiritiel.​—Ps. 1:2; Héb. 10:24, 25.

Lor nou sit ena bann magazinn ek lezot piblikasion ki’nn fer pou etidie Labib. Ena osi bann piblikasion ki kapav ed bann koup, bann adolesan ek bann paran ki ena bann tipti zanfan. Bann fami gagn bann bienfe kan zot examinn sa bann piblikasion-la dan zot Ladorasion an Fami. Anplis, nou sit koz lor bann levennman spesial, kouma seremoni kot remet diplom bann zelev lekol Guiléad ek renion aniel, ek li inform bann frer dan lemond antie konsernan bann katastrof natirel ek bann desizion ki lakour pran ek ki afekte pep Jéhovah. (1 Pierre 5:8, 9) Nou sit li osi enn zouti efikas pou fer bann dimounn ki res dan bann pei kot nou laktivite interdi tann bonn nouvel.

Selman, ki ou gagn akse ar jw.org ouswa non, ou kapav res for lor plan spiritiel. Lesklav fidel travay dir pou pibliye ase piblikasion pou ki sak domestik bien nouri lor plan spiritiel. Alor, fode pa ou santi ou oblize pou aste enn laparey zis pou gagn akse ar jw.org. Sertin kapav pran bann dispozision par zotmem pou inprim sertin piblikasion ki ena lor nou sit ek donn sa personelman bann ki pena akse Internet. Me, bann kongregasion pa oblize fer sa.

Nou ena rekonesans anver Jésus ki pe tini so promes ek pe pran nou swin lor plan spiritiel. Amezir ki sa bann dernie zour difisil la pe al fini, nou ena konfians ki Jéhovah pou kontign donn nou “nouritir [spiritiel] dan ler ki bizin.”