“Kisannla Ki Vrai-mem l’Esclave Fidele et Avisé?”

1, 2. Par ki moyen Jésus pé nourri nou zordi, ek kifer li bien important ki nou koné ki sa moyen-la sa?

“FRERE, mo pa kapav compté comié fois zot finn mette dan mo la main bann lartik kot ti ena zis seki mo ti bizin ek dan ler ki mo ti plis bizin sa.” C’est seki enn soeur ti ecrire pou montré so l’appreciation, dan enn lettre ki li ti envoye bann frere ki travail dan centre mondial bann Témoins de Jéhovah. Eski ou aussi ou ena mem sentiment? Beaucoup parmi nou surement pou reponn oui. Eski sa bizin etonne nou? Non.

² La nourriture spirituel ki nou gagné dan ler ki bizin, c’est enn preuve ki Jésus, Chef congregation, pé tini so promesse pou nourri nou. A travers kisannla li pé faire sa? Kan li ti donne signe lor so presence, Jésus ti dire ki li ti pou servi “l’esclave fidele et avisé” pou donne so bann domestik “nourriture dan ler ki bizin.”a (Lire Matthieu 24:45-47.) L’esclave fidele c’est moyen ki Jésus servi pou nourri so bann vrai disciple dan lepok lafin. Li bien important ki nou koné kisannla sa l’esclave fidele-la. Nou la santé spirituel ek nou bann relation avek Bondié depann lor sa moyen-la.​—Mat. 4:4; Jean 17:3.

 3. Ki nou bann publication ti dire lor l’exemple l’esclave fidele?

³ Alors, couma eski nou bizin comprend l’exemple ki Jésus ti donné lor l’esclave fidele? Dan le passé, nou bann publication ti donne sa l’explication-la: Jour la Pentecôte l’an 33 Nou Lepok, Jésus ti etabli l’esclave fidele lor so bann domestik. Sa esclave-la represente tou bann Chretien oint lor later en tant ki enn groupe dan n’importe ki lepok depuis la Pentecôte. Bann domestik represente sa bann mem Chretien oint-la mais lor plan individuel. En 1919, Jésus ti etabli sa esclave fidele-la “lor tou so bann di-bien”​—tou bann l’interet Royaume Bondié lor later. Selman, kan nou finn etudié plis en profondeur, nou finn prié ek medité, nou finn trouvé ki nou bizin ré-examine fason ki nou comprend seki Jésus ti dire lor l’esclave fidele et avisé. (Prov. 4:18) Anou examine sa l’exemple-la ek guetté couma sa concerne nou, ki nou ena l’esperance pou al dan le ciel ou-soit pou vive lor later.

4-6. Kifer nou kapav tire conclusion ki l’exemple Jésus lor l’esclave fidele et avisé ti commence realisé selman apré 1914?

⁴ Contexte sa l’exemple lor l’esclave fidele et avisé-la montré ki sa inn commence realisé dan lepok lafin, pa jour la Pentecôte l’an 33 Nou Lepok. Anou guetté couma la Bible faire nou comprend sa.

⁵ L’exemple l’esclave fidele forme partie dan prophetie ki Jésus ti donné lor “signe pou montré [so] presence ek conclusion sa systeme-la.” (Mat. 24:3) Premier partie sa prophetie-la mentionné dan Matthieu 24:4-22, ek li ena deux realisation​—premierement, depuis l’an 33 Nou Lepok ziska l’an 70 Nou Lepok, ek deuxiemement, dan enn periode beaucoup pli longue, dan nou lepok. Eski sa vedir ki bann parole Jésus lor l’esclave fidele ti pou ena aussi deux realisation? Non.

⁶ A partir Matthieu 24:29, Jésus ti mette l’accent surtout lor bann l’evenement ki ti pou arrivé dan nou lepok. (Lire Matthieu 24:30, 42, 44.) Kan li ti koz lor seki pou arrivé pendant la grande tribulation, li ti dire ki bann dimoune “pou trouve Fils de l’homme pé vinn lor bann nuage dan le ciel.” Apré, avek bann parole ki ti pou concerne bann ki ti pou vive dan dernier jour, li ti encourage zot pou reste lor zot garde. Li ti dire: “Zot pa koné ki jour zot Seigneur pé vini” ek, “Dan enn ler ki zot pa attann, ki Fils de l’homme pé vini.”b C’est dan sa contexte-la​—kan li ti koz lor bann l’evenement ki ti pou ena dan bann dernier jour​—ki Jésus ti donne l’exemple l’esclave fidele et avisé. Alors, nou comprend ki seki Jésus ti dire lor l’esclave fidele, ti commence realisé selman apré ki bann dernier jour ti commencé en 1914. Sa conclusion-la logik. Kifer nou dire sa?

 7. Ki question bien important ti posé kan lepok recolte ti commencé, ek kifer?

⁷ Pou enn ti moment, reflechi lor sa question-la: “Kisannla ki vrai-mem l’esclave fidele et avisé?” Dan premier siecle, pa ti ena okenn raison pou demann enn question coumsa. Pareil couma nou ti trouvé dan lartik avant, bann zapotre ti kapav faire bann mirak ek mem transmette bann don pou faire mirak, pou prouvé ki Bondié ti avek zot. (Actes 5:12) Alors, kifer enn kikenn ti pou demandé kisannla Christ ti’nn vrai-mem etabli pou prend la tête? Mais, en 1914, situation ti diferan. Lepok recolte ti commencé sa l’année-la. Finalement, ler ti’nn arrivé pou separe bann mauvais l’herbe ar di-blé. (Mat. 13:36-43) Kan lepok recolte ti commencé, enn question bien important ti posé: Avek sa quantité soi-disant Chretien ki ti pretann ki zot bann vrai disciple Jésus-la, couma ti pou koné kisannla di-blé, setadir bann Chretien oint? L’exemple lor l’esclave fidele ti reponn sa question-la. Bann disciple Christ ki ti oint ti pou bien nourri lor plan spirituel.

 8. Kifer li approprié ki bann ki forme sa esclave fidele-la zot bann Chretien oint?

⁸ Bann ki forme sa esclave fidele-la, zot bizin bann Chretien oint lor later. La Bible appel zot “enn groupe pretre ki pou vinn le roi” ek zot inn gagne mission pou “ ‘annonce bann grand qualité’ sa kikenn ki finn appel zot pou tire zot dan noirté-la ek finn faire zot vinn dan so la lumiere extraordinaire.” (1 Pierre 2:9) Alors, li approprié ki bann membre sa “groupe pretre ki pou vinn le roi[-la]” c’est zot-mem ki pou enseigne la verité zot bann frere.​—Mal. 2:7; Rév. 12:17.

 9. Eski tou bann Chretien oint forme l’esclave fidele? Expliké.

⁹ Eski tou bann Chretien oint lor later forme l’esclave fidele? Non. En realité, pa tou bann Chretien oint ki ena enn role pou donne nourriture spirituel zot bann frere ek soeur partout dan le monde. Parmi bann ki couma di-blé, ena bann frere oint ki kitfois servi couma assistant ministeriel ou-soit ancien dan zot congregation. Zot enseigne lakaz par lakaz ek dan zot congregation, ek zot soutenir avek fidelité direction ki centre mondial bann Témoins de Jéhovah donné. Mais zot pa participé pou donne nourriture spirituel bann frere ek soeur partout dan le monde. Ek aussi, parmi bann Chretien oint ena bann soeur humble, ki jamais pou essaye vinn bann enseignant dan congregation.​—1 Cor. 11:3; 14:34.

10. Kisannla ki l’esclave fidele et avisé?

¹⁰ Alors, kisannla ki l’esclave fidele et avisé? Pou suive modele ki Jésus ti servi kan li ti nourri beaucoup dimoune a travers enn tigit disciple, sa esclave-la c’est enn ti groupe frere oint ki impliké directement pou prepare ek pou donne nourriture spirituel pendant presence Christ. Toute longue bann dernier jour, bann frere oint ki forme l’esclave fidele travail ensam dan centre mondial bann Témoins de Jéhovah. Dan bann dernier dizaine l’année ki’nn passé, finn associé sa esclave-la ar College Central bann Témoins de Jéhovah. Mais remarké ki, mem si ena plusieurs dimoune ki forme sa esclave-la, dan so l’exemple, Jésus ti dire ki ti pou ena enn “esclave.” Alors, College Central prend bann decision ensam.

11, 12. (a) Comié fois Jésus etabli l’esclave fidele et avisé, ek lor ki kitsoz? (b) Kan eski Jésus ti etabli l’esclave fidele lor so bann domestik, ek kisannla li ti choisir?

¹¹ Li bon nou remarké ki dan so l’exemple, deux fois Jésus etabli l’esclave fidele et avisé. Premierement, Jésus etabli li lor bann domestik; deuxiemement, lor tou so bann di-bien. Sa l’exemple-la realisé zis dan lepok lafin, alors, toulé-deux l’evenement arrivé apré ki presence Jésus inn commencé en tant ki le Roi en 1914.

¹² Kan eski Jésus ti etabli l’esclave fidele lor so bann domestik? Pou reponn sa question-la, nou bizin retourne en 1914​—commencement lepok recolte. Pareil couma nou ti aprann, dan sa lepok-la beaucoup groupe ti pretann ki zot Chretien. Ki groupe Jésus ti pou choisir ek ti pou etabli couma l’esclave fidele? Nou ti gagne reponse sa question-la apré ki Jésus ek so Papa ti vini ek ti inspecté temple spirituel​—disposition pou adore Bondié​—depuis 1914 ziska commencement 1919.c (Mal. 3:1) Sa ti faire zot plaisir pou trouve enn ti groupe Etudiant la Bible fidele ki ti ena enn grand lamour pou Jéhovah ek so Parole. Bien sur, ti bizin purifié zot, mais zot ti reagir avek humilité pendant enn ti periode l’epreuve kot ti affine zot. (Mal. 3:2-4) Sa bann Etudiant la Bible fidele-la ti bann vrai Chretien ki ti couma di-blé. En 1919, enn lepok kot ti ena enn nouveau depart lor plan spirituel, Jésus ti choisir bann frere oint ki capable parmi zot pou vinn l’esclave fidele et avisé ek ti etabli zot lor so bann domestik.

13. Kisannla ki forme partie parmi bann domestik, ek kifer?

¹³ Alors, kisannla ki bann domestik? En deux-trois mot, c’est bann ki gagne nourriture spirituel. Dan commencement bann dernier jour, tou bann domestik ti bann Chretien oint. Plitar, bann ki ti forme partie parmi bann domestik ti aussi bann membre la grande foule lezot brebis. Zordi, majorité Chretien ki forme partie dan “sel troupeau” ki dirigé par Christ, c’est bann lezot brebis. (Jean 10:16) Toulé-deux groupe profite mem nourriture spirituel ki l’esclave fidele donné dan ler ki bizin. Ki nou kapav dire lor bann membre College Central ki forme l’esclave fidele et avisé zordi? Sa bann frere-la aussi bizin gagne nourriture spirituel. Alors, avek humilité, zot reconette ki lor plan individuel, zot bann domestik pareil couma tou bann vrai disciple Jésus.

14. (a) Ki responsabilité l’esclave fidele inn gagné, ek ki sa impliké? (b) Ki l’avertissement Jésus ti donne l’esclave fidele et avisé? (Guette l’encadré “Si Jamais Sa Mauvais Esclave-La . . . ”)

¹⁴ Jésus inn confié l’esclave fidele et avisé enn grand responsabilité. Dan lepok Biblik, enn esclave ou-soit enn administrateur ti en charge enn lakaz, ek so maitre ti faire li confiance. (Luc 12:42) Alors, l’esclave fidele et avisé gagne responsabilité pou en charge tou bann kitsoz ki pou Christ lor later. Sa responsabilité-la implik supervise bann kitsoz materiel, l’activité predication, bann l’assemblée, ek production bann publication ki basé lor la Bible ki servi dan predication, dan letid personnel ek dan congregation. Bann domestik depann lor tou bann disposition spirituel ki sa esclave-la donné en tant ki enn groupe.

15, 16. Kan eski Jésus etabli l’esclave fidele lor tou so bann di-bien?

¹⁵ Kan eski Jésus etabli sa esclave-la lor “tou so bann di-bien”? Jésus ti dire: “Heureux sa esclave-la si, kan so maitre arrivé [litteralement, “inn vini,” note.] li trouve li pé faire sa. Vrai-mem mo dire zot, li pou etabli li lor tou so bann di-bien.” (Mat. 24:46, 47) Remarké ki Jésus etabli l’esclave fidele “lor tou so bann di-bien” apré ki li arrivé ek trouve sa esclave-la “pé faire sa,” setadir, pé donne nourriture spirituel avek fidelité. Alors, ti pou ena enn periode le temps entre lepok ki Jésus ti pou etabli l’esclave fidele lor bann domestik ek lepok kot li ti pou etabli li lor so bann di-bien. Pou nou comprend couma ek kan Jésus etabli sa esclave-la lor tou so bann di-bien, nou bizin konn deux kitsoz: kan li arrivé ek ki so bann di-bien impliké.

¹⁶ Kan eski Jésus arrivé? Nou gagne reponse sa question-la dan contexte prophetie Jésus. Rappel ki, kan bann verset avant dire ki Jésus “pé vini,” sa l’expression-la faire reference ar lepok kan li pou vini pou prononce ek pou faire so jugement a lafin sa systeme-la.d (Mat. 24:30, 42, 44) Alors, kan l’exemple lor l’esclave fidele dire ki Jésus “pé arrivé,” ou-soit “pé vini,” sa pou realisé pendant la grande tribulation.

17. Ki bann di-bien Jésus impliké?

¹⁷ Ki “tou bann di-bien [Jésus]” impliké? Kan Jésus ti dire “tou,” li pa ti pé limite so bann di-bien ar bann kitsoz lor later. En realité, Jésus ena enn grand l’autorité dan le ciel. Li ti dire: “Mo’nn gagne tou pouvoir dan le ciel ek lor later.” (Mat. 28:18; Éph. 1:20-23) Dan nou lepok, so bann di-bien implik Royaume Messianik, ki li finn gagné depuis 1914 ek ki li pou dirigé avek so bann disciple ki oint.​—Rév. 11:15.

18. Kifer c’est avek plaisir ki Jésus pou etabli l’esclave fidele lor tou so bann di-bien?

¹⁸ Apré tou seki nou finn examiné, ki conclusion nou kapav tiré? Kan Jésus vinn faire so jugement pendant la grande tribulation, li pou trouvé ki, avek fidelité, sa esclave-la finn donne bann domestik nourriture spirituel dan ler ki bizin. Lerla, c’est avek plaisir ki Jésus pou etabli sa esclave-la lor tou so bann di-bien. Sa pou arrivé kan zot pou gagne zot recompense dan le ciel ek zot pou regne avek Jésus Christ.

19. Eski l’esclave fidele gagne enn pli grand recompense dan le ciel ki le reste bann Chretien oint? Expliké.

¹⁹ Eski l’esclave fidele gagne enn pli grand recompense dan le ciel ki le reste bann Chretien oint? Non. Dan certain cas, mem si finn promette enn ti groupe dimoune enn recompense, finalement lezot aussi kapav gagne sa recompense-la. Par exemple, guette seki Jésus ti dire so 11 zapotre ki ti fidele, la veille so lamor. (Lire Luc 22:28-30.) Jésus ti promette sa ti groupe zom-la ki zot pou gagne enn grand recompense pou zot fidelité. Zot ti pou vinn bann le roi ensam avek li. Mais plusieurs l’année apré, li ti dire ki tou bann 144,000 pou assize lor bann trone ek pou regné. (Rév. 1:1; 3:21) Pareil, dan Matthieu 24:47, li ti promette ki enn ti groupe zom​—bann frere oint ki forme l’esclave fidele​—pou etabli lor tou so bann di-bien. En realité, tou bann 144,000 pou ena enn part dan grand l’autorité ki Jésus ena dan le ciel.​—Rév. 20:4, 6.

20. Kifer Jésus ti etabli l’esclave fidele, ek ki determination ou ena?

²⁰ Par moyen l’esclave fidele et avisé, Jésus pé suive modele ki li ti etabli dan premier siecle​—nourri beaucoup a travers enn tigit. Jésus ti etabli l’esclave fidele pou faire sur ki so bann vrai disciple​—ki zot bann Chretien oint ou-soit bann lezot brebis​—gagne regulierement nourriture spirituel dan ler ki bizin pendant bann dernier jour. Anou bien determiné pou montré nou reconnaissance kan nou soutenir avek fidelité bann frere oint ki forme l’esclave fidele et avisé.​—Héb. 13:7, 17.