Soutenir Bann Frer Kris Avek Fidelite

1, 2. (a) Ki bann parabol Zezi inn rakont so bann bon kamarad? (Get zimaz koumansman lartik.) (b) Ki nou bizin kone konsernan parabol brebi ek kabri?

ZEZI pe rakont so bann bon kamarad Pier, Andre, Zak, ek Zan, enn kitsoz bien interesan! Apre ki li’nn sit parabol esklav fidel ek saz, dis zennfi, ek bann talan, Zezi termine avek enn lot parabol. Li koz lor enn lepok kan “Garson Limanite” pou ziz “tou bann nasion.” Dan sa parabol-la, Zezi atir latansion lor de group: Enn ki li dekrir kouma bann brebi ek lot la kouma bann kabri. Li atir latansion osi lor enn trwaziem group bien inportan: Bann frer “Lerwa.”​—Lir Matie 25:31-46.

² Parey kouma bann zapot, bann serviter Zeova finn touletan bien interese ar sa parabol-la ek zot ena rezon. Kifer? Se parski lavi bann dimounn inplike. Dan sa parabol-la, Zezi explike ki sertin pou gagn lavi eternel alor ki lezot pou detrir pou touletan. Ala kifer li bien inportan nou konpran sinifikasion parabol brebi ek kabri ek fer bann aksion. Dan sa lartik-la nou pou reponn kat kestion: Kouma eski tigit par tigit Zeova inn ed nou konpran pli bien parabol brebi ek kabri? Kouma nou kone ki sa parabol-la met laksan lor predikasion? Kisannla ki’nn gagn responsabilite pou prese? Ek kifer asterla mem nou bizin montre nou fidelite anver “Lerwa” ek so “bann frer”?

3, 4. (a) Ki kitsoz inportan nou bizin kone pou konpran parabol brebi ek kabri? (b) An 1881, kouma Le Phare de la Tour de Sion ti explik sa parabol-la?

³ Pou konpran parabol brebi ek kabri kouma bizin, li inportan ki nou konn trwa kitsoz: Kisannla bann personaz-la, kan pou ena zizman, ek kifer konsider sertin kouma brebi ek lezot kouma kabri.

⁴ An 1881, Le Phare de la Tour de Sion ti dir ki “Garson Limanite,” ouswa “Lerwa,” se Zezi. Sa magazinn-la ti explike osi ki lexpresion “mo bann frer” ki trouv dan King James Version, se pa zis bann ki pou regne avek Kris. Me li inplik osi tou bann ki pou viv lor later, apre ki zot pou vinn parfe. Li ti dir osi ki separasion bann brebi ek bann kabri pou arive pandan Regn Mil An. Bann brebi se bann dimounn ki obeir lalwa Bondie parski zot kontan Li.

 5. Dan bann lane 1920, kouma pep Bondie ti konpran sa parabol-la?

⁵ Koumansman bann lane 1920, Zeova inn ed so pep konpran pli bien sa parabol-la. Le Phare de la Tour de Sion 15 Oktob 1923, ti dir ki “Garson Limanite” se Zezi. Me apre, li ti servi bann verse Labib pou montre kisannla bann frer Kris. Li ti explike ki se zis bann ki pou dirize avek Zezi dan lesiel. Bann brebi, se bann ki ena lesperans pou viv lor later kan Rwayom Bondie pou regne. Kan pou ena separasion bann brebi ek bann kabri? Sa lartik-la ti dir ki parski bann frer Kris pou dan lesiel pandan Regn Mil An, okenn group lor later pa pou kapav ni ed zot, ni mem negliz zot. Alor sa separasion-la pou bizin arive avan ki Regn Mil An koumanse. Sa lartik-la ti explike osi kifer konpar enn dimounn ar enn brebi. Se parski li aksepte Zezi kouma so Segner ek li atann ki Rwayom Bondie amenn bann pli bon kondision lor later.

 6. An 1995, ki lot leklersisman nou’nn gagne?

⁶ Apre sa nouvo eklersisman-la, nou ti panse ki se atraver nou predikasion pandan lepok lafin ki bann dimounn pou zize. Ek fason ki zot reazir se samem ki determine si zot enn brebi ouswa enn kabri. Me, an 1995, finn ena enn eklersisman. De lartik dan Latour Degard 15 Oktob 1995, ti koz lor bann pwin komin ki ena ant seki Zezi finn dir dan Matie 24:29-31 (lir) ek Matie 25:31, 32. (Lir.)a Lartik prinsipal ti dir: “Zizman bann brebi ek bann kabri pou arive dan lavenir.” Kan exakteman? “Sa pou arive apre ki ‘gran detres’ mansione dan Matie 24:29, 30 eklate, ek ki Garson Limanite ‘vini dan so laglwar.’ . . . Se lerla, ki Zezi pou ziz bann dimounn.”

 7. Ki dernie eklersisman nou’nn gagne lor parabol brebi ek kabri?

⁷ Azordi, nou konpran pli bien parabol brebi ek kabri. Kisannla bann personaz ki mansione dan sa parabol-la? “Garson Limanite” ouswa Lerwa, se Zezi. “Bann frer” Kris se bann zom ek bann fam ki ena lesperans pou al dan lesiel ek ki pou regne ansam avek li. (Rom. 8:16, 17) ‘Bann brebi’ ek “bann kabri” reprezant bann dimounn dan tou nasion. Kan pou ena zizman? Sa pou arive ver lafin gran detres ki biento pou deklanse. Ek kifer sertin pou zize kouma bann brebi ek lezot kouma bann kabri? Sa pou depann lor fason ki zot inn tret bann frer Kris ki ankor vivan lor later. Alor ki lafin bien pre, tigit par tigit Zeova pe donn nou bann leklersisman lor sa parabol-la ek lor lezot parabol ki trouv dan Matie sapit 24 ek 25. Eski sa pa pous nou pou ena enn gran rekonesans anver Li?

8, 9. Kifer Zezi dir ki bann brebi zot “fidel”?

⁸ Dan parabol brebi ek kabri, Zezi pa servi bann mo kouma “prese” ouswa “predikasion.” Alor kifer nou dir ki parabol-la met laksan lor predikasion?

⁹ Premierman nou bizin rapel ki Zezi pe ansegn nou enn leson atraver enn parabol. Li kler ki separasion bann brebi ek bann kabri, li pa literal. Zezi pa ti pe dir ki sak dimounn ki pou zize kouma brebi bizin, dan enn fason literal, donn manze, linz, okip, ouswa vizit enn so bann frer dan prizon. Okontrer, li ti pe koz lor latitid ki bann brebi bizin ena anver so bann frer. Li dir ki bann brebi zot “fidel” parski zot rekonet ki Kris ena bann frer lor later, ek avek fidelite zot soutenir sa bann frer-la pandan bann dernie zour.​—Mat. 10:40-42; 25:40, 46; 2 Tim. 3:1-5.

10. Kouma bann brebi montre ki zot tret bann frer Kris bien?

¹⁰ Deziemman, anou gete dan ki kontex Zezi inn dir sa bann parol-la. Li ti pe koz lor sign so prezans ek konklizion sa sistem-la. (Mat. 24:3) Koumansman so diskour, li ti koz lor enn laspe inportan sign so prezans kan li ti dir: “Bonn nouvel Rwayom Bondie pou anonse partou dan lemond.” (Mat. 24:14) Ek zis avan ki li koz lor bann brebi ek bann kabri, li ti rakont parabol bann talan. Parey kouma nou ti examine dan lartik avan, Zezi ti donn sa parabol-la pou montre so “bann frer” linportans pou travay dir dan predikasion. Selman zordi, ena zis enn tigit sa bann Kretien-la lor later. Zot ena boukou travay pou fer. Avan ki lafin vini, zot bizin al prese dan “tou bann nasion.” Me kouma nou finn aprann dan parabol brebi ek kabri, bann frer Kris pou gagn led. Alor, meyer fason ki bann brebi kapav tret bien bann frer Zezi, se kan zot soutenir bannla dan travay predikasion. Me ki sa led-la inplike? Eski savedir ki zot bizin zis donn larzan ouswa zis ankouraz bannla dan sa travay-la?

11. Ki kestion sertin kapav poze, ek kifer?

¹¹ Azordi ena apepre wit milyon disip Zezi ek laplipar parmi zot pena lesperans pou al dan lesiel. Se pa ar zot ki Zezi inn konfie so bann talan, me se ar so bann frer. (Mat. 25:14-18) Alor, sertin kapav dir: “Si Zezi pa’nn donn nou bann talan, eski vremem nou bizin prese?” Wi. Anou gete pou ki rezon.

12. Kan nou lir seki Zezi dir dan Matie 28:19, 20, ki nou aprann?

¹² Zezi inn donn tou so bann disip lord pou prese. Apre so rezireksion, Zezi ti demann so bann disip pou fer bann disip, ek pou ansegn zot pou ‘met an pratik tou seki li’nn komann zot.’ Parmi sa bann komannman-la ena osi lord pou prese. (Lir Matie 28:19, 20.) Alor li kler ki tou bann disip Kris bizin prese, ki zot ena lesperans pou al dan lesiel ouswa pou viv lor later.​—Zist. 10:42.

13. Ki vizion Zan montre, ek kifer?

¹³ Liv Revelasion montre ki bann Kretien ki pou al dan lesiel ek bann ki pou viv lor later toulede, pou fer travay predikasion. Atraver enn vizion, Zezi ti fer lapot Zan trouv enn “nouvel marye” ki pe invit bann dimounn pou vinn “pran delo lavi . . . gratis.” Sa nouvel marye-la se bann 144,000 Kretien ki pou al regne avek Kris dan lesiel. (Rev. 14:1, 3; 22:17) Sa delo sinbolik la reprezant bann dispozision ki Zeova inn pran pou delivre limanite ar pese ek lamor, gras-a sakrifis Zezi. (Mat. 20:28; Zan 3:16; 1 Zan 4:9, 10) Laranson se enn laspe bien inportan mesaz ki nou prese. Ek avek zel, bann frer Kris ed bann dimounn pou konn sa lansegnman-la ek kone ki bann bienfe zot pou gagne gras-a sa. (1 Kor. 1:23) Me dan vizion ki Zan inn gagne, li trouv osi lezot pe invit bann dimounn pou vinn pran delo lavi gratis. Zot osi zot inn gagn lord pou dir: “Vini!,” ek zot pe obeir. Sa bann Kretien-la ena lesperans pou viv pou touletan lor later. Alor dapre sa vizion la, li kler ki tou bann ki aksepte linvitasion pou “vini,” ena responsabilite pou prese.

14. Kouma nou montre ki nou pe obeir “lalwa Lekris”?

¹⁴ Tou bann ki obeir “lalwa Lekris” bizin prese. (Gal. 6:2) Zeova pa get de lizie. Par exanp, li ti dir bann Izraelit: “Mem lalwa pou aplike pou zot, ki viv dan sa pei la, ek pou bann etranze ki viv parmi zot.” (Ex. 12:49; Lev. 24:22) Bann Kretien nepli anba Lalwa Moiz. Me nou tou nou anba “lalwa Lekris,” ki nou ena lesperans pou al dan lesiel ouswa pou viv lor later. Ek sa lalwa-la inplik tou seki Zezi ti ansegne. Montre lamour, se lansegnman pli inportan ki li’nn done. (Zan 13:35; Zak 2:8) Alor, meyer fason pou montre lamour pou Bondie, pou Zezi Kris, ek pou nou prosin, se kan nou pres bonn nouvel lor Rwayom Bondie.​—Zan 15:10; Zist. 1:8.

15. Kifer nou kapav dir ki lord ki Zezi inn done pou al prese, aplik ar tou so bann disip?

¹⁵ Seki Zezi ti dir enn ti group kapav aplik pou enn gran group. Par exanp, Zezi ti fer enn lalians pou enn Rwayom zis avek so 11 disip. Selman sa lalians-la aplik osi ar tou bann 144,000. (Lik 22:29, 30; Rev. 5:10; 7:4-8) Li parey pou predikasion. Se zis ar enn ti group disip​—avek ki li ti aparet apre so rezireksion​—ki Zezi ti donn lord pou prese. (Zist. 10:40-42; 1 Kor. 15:6) Selman, tou bann Kretien fidel dan premie siek ti konpran ki sa komannman-la aplik pou zot osi, mem si zame Zezi inn donn zot sa lord-la personelman. (Zist. 8:4; 1 Pier 1:8) Azordi osi parey. Zezi pa’nn koz personelman ar sakenn parmi sa wit milyon proklamater ki ena la, ek donn zot lord pou al prese. Me selman nou tou nou kone ki se par nou predikasion ki nou montre nou lafwa an Zezi.​—Zak 2:18.

16-18. Si nou anvi ki Kris konsider nou kouma enn brebi ki nou bizin fer, ek kifer?

¹⁶ Satan pe ogmant so bann latak kont bann frer Kris ki ankor lor later. Li pe kontigne amezir ki sa ‘kourt letan’ ki li reste la, pe al fini. (Rev. 12:9, 12, 17) Malgre sa bann latak-la, bann frer Kris pe diriz pli gran travay predikasion ki zame finn ena dan listwar. Nou pena okenn dout lor la: Zezi avek zot ek li pe gid zot!​—Mat. 28:20.

¹⁷ Nou ki pe atann ki Kris ziz nou kouma enn brebi, nou konsider sa kouma enn privilez pou soutenir so bann frer, pa zis dan predikasion, me dan lezot fason ankor. Par exanp, nou fer bann kontribision ek nou ede dan konstriksion bann Lasal Renion, Lasal Lasanble, ek bann biro nasional. Avek fidelite, nou obeir bann ki “lesklav fidel ek saz” inn etabli pou diriz kongregasion.​—Mat. 24:45-47, NW; Ebre 13:17.

¹⁸ Biento bann anz pou larg bann divan gran detres ki pou amenn enn gran destriksion. Sa pou arive apre ki tou bann frer Kris ki ankor lor later finn sele dan enn fason definitif. (Rev. 7:1-3) Avan ki Armagedonn eklate, sa bann Kretien-la pou gagn zot rekonpans. (Mat. 13:41-43) Alor si nou anvi ki Kris konsider nou kouma enn brebi, asterla mem nou bizin soutenir so bann frer avek fidelite.