Repa Nu Senyer Ena enn Gran Sinifikasyon pu U

ESKI Repa Nu Senyer ena enn gran sinifikasyon pu u? Pu nu konn sa, anu gete ki sinifikasyon sa levennman spesyal la ti ena pu Zezi.

Dan sware le 14 Nizan, lane 33 N.L., Zezi ti rasanble ansam avek so 12 zapot dan Zerizalem, dan enn lasam lao lor letaz, pu selebre fet Pak. Apre ki zot finn fini manz repa Pak, Zida, sa tret la, finn kit lasam ek finn ale pu livre Zezi. (Zan 13:21, 26-30) Zezi ti etabli “repa diswar nu Senyer” ar sa 11 zapot ki ti reste la. (1 Korintyin 11:20) Kapav usi apel sa levennman la Memoryal, parski Zezi ti donn so bann disip sa lord la: “Kontiyn fer sa an mo memwar.” Se sel levennman ki bann Kretyin finn gayn lord pu selebre.—1 Korintyin 11:24, La Bible de Jérusalem.

Dapre diksyoner Webster’s, enn memoryal se enn levennman ki ed nu “pu gard an memwar enn kitsoz ki finn pase” uswa pu “gard enn suvenir vivan.” Dan buku landrwa, bann dimunn fer enn moniman pu rapel enn dimunn uswa zot swazir enn zur spesyal pu rapel enn dimunn uswa enn kitsoz ki ena linportans pu zot. Dan sa ka la, Zezi ti etabli enn repa ki ti pu ed lezot pu rapel enn kitsoz. Sa ti pu ed so bann disip pu rapel sinifikasyon bann levennman byin inportan ki ti arive sa gran zur la. Bann zenerasyon dan lavenir ki ti pu selebre sa levennman la ti pu rapel seki Zezi ti fer sa lanwit la, ek so gran sinifikasyon. Zot pu rapel sirtu bann sinbol ki li ti servi. Me ki sa bann sinbol la sa, ek ki zot reprezante? Anu gete kuma Labib rakont seki ti pase sa lanwit la an lane 33 N.L.

Sinifikasyon Bann Sinbol

“Li finn pran usi enn dipin, li finn remersye Bondye, li finn kas dipin la, ek li finn donn zot li ek li finn dir: ‘Sa reprezant mo lekor ki pu bizin done pu zot. Kontiyn fer sa an mo memwar.’ ”—Lik 22:19.

Kan Zezi ti pran sa dipin la ek ti dir, “sa reprezant mo lekor,” li ti pe montre ki sa dipin san levin la ti enn sinbol ki ti reprezant so lekor parfe, ki li finn done “pu lavi tu bann dimunn.” (Zan 6:51) Mem si sertin tradiksyon Labib dir “sa se [Grek, es tin’] mo lekor,” dan so Dictionnaire grec-français, Bailly dir ki sa verb la suvan vedir “sinifi mem kitsoz, reprezante.” Sa verb la donn lide ‘reprezante uswa ena mem sinifikasyon ki’.—Matye 26:26, get not anba paz dan Labib referans an Franse.

Li parey pu kup divin la. Zezi ti dir: “Sa kup la reprezant nuvo lalyans grasa mo disan ki pu verse pu zot.”—Lik 22:20.

Dan Levanzil Matye, Zezi ti dir sa konsernan sa kup la: “Sa reprezant mo ‘disan, disan nuvo lalyans,’ ki pu bizin kule pu buku, pu gayn pardon bann pese.” (Matye 26:28) Zezi ti pe servi divin ki ti dan kup la kuma enn sinbol ki reprezant so prop disan. Pu so bann disip ki ti ena lespwar pu viv dan lesyel, ek reyne kuma bann lerwa ek bann pret ansam avek li, disan ki Zezi ti’nn verse ti fondasyon “enn nuvo lalyans.”—Zeremi 31:31-33; Zan 14:2, 3; 2 Korintyin 5:5; Revelasyon 1:5, 6; 5:9, 10; 20:4, 6.

Divin dan sa kup la, rapel usi ki disan ki Zezi ti verse, permet bann dimunn gayn “pardon zot pese.” Grasa so disan, bann ki bwar sa divin la kapav al viv dan lesyel kuma bann zeritye ansam avek Kris. Donk, nu konpran ki bann ki ena sa lesperans la zot zis enn ti grup, zot bann sel dimunn ki pran dipin ek divin pandan Memoryal.—Lik 12:32; Efezyin 1:13, 14; Ebre 9:22; 1 Pyer 1:3, 4.

Me ki nu kapav dir lor tu bann disip Zezi ki pa form parti dan sa nuvo lalyans la? Nu Senyer Zezi apel zot so bann “lezot muton,” ek zot pe atann avek inpasyans, pa pu al dirize ansam avek Zezi dan lesyel, me pu profit lavi pu tuletan lor later ki pu vinn enn paradi. (Zan 10:16; Lik 23:43; Revelasyon 21:3, 4) Zot form parti “enn gran laful” bann Kretyin fidel ki “pe rann [Bondye] enn servis sakre lanwit lizur.” Zot byin kontan privilez ki zot ena pu asiste Repa Nu Senyer kuma bann obzervater. Avredir, par zot parol ek zot aksyon, zot dir: “Nu delivrans, nu dwa li Bondye, ki finn asize lor tronn, ek usi l’Anyo.”—Revelasyon 7:9, 10, 14, 15.

Kan Eski Bizin Selebre Sa?

“Kontiyn fer sa an mo memwar.”—Lik 22:19.

Kan eski bizin selebre Memoryal pu rapel lamor Zezi? Zezi pa finn dir nanyin lor la. Me nu rapel ki li ti etabli Repa Diswar Nu Senyer le 14 Nizan, lanwit fet Pak ki bann Zwif ti selebre tulelane. Donk, akoz sa, li lozik ki Zezi ti atann ki selebre Memoryal dan mem fason. Alor ki bann Izraelit tulelane ti selebre zot delivrans dan Lezip, bann Kretyin zot, tulelane zot selebre zot delivrans ar pese ek lamor.—Egzod 12:11, 17; Romin 5:20, 21.

Selebre enn levennman spesyal tulelane, sa li enn kitsoz ki byin komin. Par egzanp, tulelane enn kup selebre zot laniverser maryaz uswa enn peyi selebre enn levennman inportan dan so listwar. Zot selebre sa tulelane, mem dat ki sa levennman la ti arive. Li interesan pu remarke ki, plizir syek apre Kris, bann dimunn ti apel bann Kretyin bann Quartodécimans uswa Katorzyem, parski zot ti selebre lamor Zezi enn fwa par an, setadir tule 14 Nizan.

Sinp, me Ki Ena enn Gran Sinifikasyon

Lapot Pol ti explike ki, kan bann disip Zezi selebre Repa Nu Senyer, sa ed zot pu “anons lamor Senyer.” (1 Korintyin 11:26) Donk, sa selebrasyon la, ti pu met laksan lor rol byin-byin inportan ki lamor Zezi finn ena pu realiz proze Bondye.

Zezi finn res fidel ziska li mor. Kumsa li finn kapav pruve ki Bondye Zeova Li enn Bondye ki ena sazes, enn Kreater ki kontan nu ek enn Lerwa ki drwat. Kontrerman ar seki Satan ti dir, Zezi ti pruve ki li posib ki enn imin res fidel ar Bondye mem dan bann sityasyon byin-byin difisil. Li pa finn azir kuma Adan.—Zob 2:4, 5.

Kan nu selebre Repa Nu Senyer, sa ed nu pu rapel avek buku rekonesans gran lamur ki Zezi finn ena pu nu. Malgre bann gran-gran leprev, Zezi finn obeir so Papa dan enn fason konple. Donk, li finn kapav donn so lavi imin parfe pu kuver pese Adan, ki ti kut buku. Kuma Zezi limem explike, li finn vini “pu donn so lavi kuma enn ranson pu buku dimunn.” (Matye 20:28) Akoz sa mem, tu bann dimunn ki ena lafwa an Zezi kapav gayn pardon zot pese ek gayn lavi pu tuletan, parey kuma okumansman Zeova ti ena lintansyon pu fer.—Romin 5:6, 8, 12, 18, 19; 6:23; 1 Timote 2:5, 6.a

Tusala montre klerman gran bonte Zeova ki nu pa merite, kan Li’nn fer bann laranzman pu delivre tu bann dimunn. Labib dir: “Ala kuma nu truv byin lamur Bondye; se kan Li’nn avoy dan lemond so sel Garson ki Li’nn kre direk, pu ki atraver li nu kapav gayn lavi. Donk, ala seki vedir lamur: se pa ki nu’nn kontan Bondye, me plito ki se Li ki’nn kontan nu ek Li’nn donn so Garson kuma enn sakrifis pu kuver nu bann pese.”—1 Zan 4:9, 10.

Wi, Memoryal se enn selebrasyon extraordiner! Li sinp ek fasil pu selebre li dan lemond antye ek dan diferan sityasyon. Me an mem tan, li ena telman enn gran sinifikasyon ki bann dimunn ankor rapel sa apre sa kantite letan la.

So Sinifikasyon pu U

Sakrifis nu Senyer Zezi Kris, ti kut buku pu li ek pu so Papa, Zeova. Antan ki enn imin parfe, Zezi pa ti erit lamor parey kuma nu. (Romin 5:12; Ebre 7:26) Li ti kapav kontiyn viv pu tuletan. San ki li ule, personn pa ti pu kapav pran so lavi. Limem li dir: “Personn pa finn pran [mo lavi] ar mwa, me mo pe livre li volonterman.”—Zan 10:18.

Wi, Zezi finn donn so lavi imin parfe volonterman kuma enn sakrifis pu ki “grasa so lamor, li kapav detrir Dyab, sa kikenn ki ena puvwar pu donn lamor la, ek pu li kapav liber tu bann ki, parski zot per lamor, zot vinn esklav tutlong zot lavi.” (Ebre 2:14, 15) Gran lamur ki Zezi finn ena pu nu, li ankor pli kler dan fason ki li finn aksepte pu mor. Li ti byin kone kuma li pu sufer ek kuma li pu mor.—Matye 17:22; 20:17-19.

Memoryal rapel nu pli gran fason pu montre lamur ki Zeova, nu Papa dan lesyel, finn fer. Sirman, Li, sa kikenn ki “ena buku lafeksyon ek mizerikord” la, finn byin sufer kan Li’nn tann ek truv Zezi pas dan bann sityasyon byin-byin dir. Sirman Li’nn byin sagrin kan Li’nn tann Zezi ‘sipliy Li avek larm’ dan zardin Zetsemane, kan li ti gayn kut fwet, kan bann solda ti atas li lor poto dan enn fason kriyel, ek kan dusma-dusma li’nn rann so lavi. (Zak 5:11, not anba paz, an Franse; Ebre 5:7; Zan 3:16; 1 Zan 4:7, 8) Ena buku dimunn zordi ki, zis zot mazinn sa, zot byin-byin sagrin.

Sey mazinn enn kut. Bondye Zeova ek Zezi Kris finn pey sa gran pri la pu nu, bann peser! (Romin 3:23) Sak zur, nu realize ki nu bann peser ek nu fer bann erer. Me, grasa lafwa dan sakrifis Zezi, nu kapav turn nu ver Bondye pu gayn so pardon. (1 Zan 2:1, 2) Grasa sa nu kapav koz avek Bondye kan nu anvi, ek nu ena enn konsyans kler. (Ebre 4:14-16; 9:13, 14) Anplis, nu kapav gard lespwar pu viv pu tuletan lor later dan enn paradi. (Zan 17:3; Revelasyon 21:3, 4) Tu sa bann benediksyon la, nu gayn sa grasa gran sakrifis ki Zezi finn fer.

Montre ki Nu Apresye Repa Nu Senyer

Wi, pena dut ki Repa Nu Senyer, se enn gran prev “faver extraordiner Bondye.” Ek ranson, sa dispozisyon ki Bondye Zeova ti pran la, finn vinn posib grasa gran lamur ki Zezi ena. Sa li enn “don ki nu pa kapav dekrir.” (2 Korintyin 9:14, 15) Eski sa bann expresyon bonte Bondye par Zezi Kris la pa pus nu pu ena enn gran rekonesans?

Nu sir ki sa pus nu tu pu ena enn gran rekonesans pu zot. Donk, nu invit u pu rasanble ansam avek bann Temwin Zeova pu selebre Memoryal lamor Zezi. Sa lane la, Memoryal pu selebre Merkredi le 16 Avril, apre kuse soley. Bann Temwin Zeova dan u landrwa pu byin kontan pu fer u kone ki ler ek kot sa pu fer sa gran levennman la.

[Not anba paz]

[Lankadre/Zimaz lor paz 6]

“SA SE MO LEKOR” USWA ”SA REPREZANT MO LEKOR” KI BIZIN DIR?

Kan Zezi ti dir: “Momem laport” ek “Momem vre pye rezin,” personn pa ti panse ki Zezi li enn laport uswa enn pye rezin. (Zan 10:7; 15:1) Pareyman, kan La Bible de Jérusalem sit seki Zezi ti dir: “Sa kup la se nuvo lalyans,” nu pa tir konklizyon ki sa kup la limem li nuvo lalyans. Li parey avek dipin. Kan Zezi ti dir ki dipin ‘ti’ so lekor, li ti kler ki sa dipin la ti reprezant so lekor. Akoz sa, tradiksyon Charles B. Williams, dir: “Sa reprezant mo lekor.”—Lik 22:19, 20.

[Zimaz lor paz 5]

Dipin san levin ek divin zot bann sinbol apropriye pu reprezant lekor parfe Zezi ek so disan

[Zimaz lor paz 7]

Memoryal rapel nu gran lamur ki Bondye Zeova ek Zezi Kris finn montre