Bann prophetie concernant Messie

DEPUIS longtemps bann Juif ti pé attann ki Messie vini parski zot ti koné seki Isaïe ek lezot prophete ti’nn ecrire lor li. En realité, dan lepok ki Jésus ti lor la terre, beaucoup Juif “ti pé attann” ki Messie ti pou parette bientot. (Luc 3:15) Li interessant pou noté ki bann prophetie la Bible donne bann detail remarquable lor la vie Messie. Okenn humain pa ti pou kapav annonce sa bann l’evenement-la ou-soit faire ki tou sa bann detail-la arrivé dan la vie Jésus.

Bann detail lor naissance Messie. Isaïe ti annoncé ki c’est enn vierge ki ti pou donne naissance Messie, ou-soit Christ. Apré ki li ti raconte bann mirak ki ti arrivé par rapport ar naissance Jésus, l’apotre Matthieu ti ecrire: “Tousala ti arrivé vrai-mem pou realise seki Jéhovah ti annoncé par so prophete, kan Li ti dire: ‘Guetté! La vierge pou tombe enceinte ek li pou gagne enn garson.’ ” (Matthieu 1:22, 23; Isaïe 7:14) Isaïe ti annoncé aussi ki Christ ti pou enn descendant David. Li ti faire sa kan li ti mentionne surtout Jessé, papa David. Jésus ti vrai-mem enn descendant direct David. (Matthieu 1:6, 16; Luc 3:23, 31, 32) C’est a cause sa ki avant naissance Jésus, ange Gabriel ti dire Marie, mama Jésus: “[Bondié] pou donne li trone David, so papa.”—Luc 1:32, 33; Isaïe 11:1-5, 10; Romains 15:12.

Bann detail lor la vie Messie. Kan Jésus ti’nn vinn enn adulte, li ti lire fort prophetie Isaïe dan synagogue Nazareth. Dan sa prophetie-la ti ena sa bann parole-la: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre.” Jésus ti applik sa prophetie-la ar li-mem kan li ti dire: “Zordi sa parole l’Ecriture ki zot inn fek tendé-la li’nn realisé.” (Luc 4:17-21; Isaïe 61:1, 2) Isaïe ti annoncé aussi ki Jésus ti pou agir avek bonté, douceur, ek li pa ti pou faire vantard ar bann ki li ti pou gueri. Matthieu ecrire: “Beaucoup ti suive li, ek li ti gueri zot tou, mais li ti donne zot l’ordre dan enn fason severe pou pa faire koné kisannla li été; pou ki seki ti annoncé par moyen prophete Isaïe kapav realisé . . . ‘Li pa pou laguerre, ni li pou criyé fort . . . Li pa pou crase enn roseau ki deja pé versé.’ ”—Matthieu 8:16, 17; 12:10-21; Isaïe 42:1-4; 53:4, 5.

Bann detail lor bann souffrance Messie. Isaïe ti prophetisé ki majorité dimoune en Israël pa ti pou accepté Messie mais li ti pou vinn enn “roche ki kapav faire tombé” pou zot. (1 Pierre 2:6-8; Isaïe 8:14, 15) C’est seki ti arrivé vrai-mem. Malgré ki Jésus ti faire beaucoup mirak, bann dimoune “pa ti ena la foi en li, ek sa ti realise parole prophete Isaïe, ki ti dire: ‘Jéhovah, kisannla ki’nn ena la foi dan seki nou finn tendé?’ ” (Jean 12:37, 38; Isaïe 53:1) Bann Juif ti croire ki Messie ti pou libere zot nation desuite enba regne bann Romain ek ti pou retabli enn royaume davidik ki ti pou independant, lor la terre. Sa fausse croyance ki ti bien populaire-la, ti enn parmi bann raison kifer bann Juif pa ti ena la foi dan Jésus. Parski Jésus ti souffert ek ti mort, la plupart Juif pa ti kapav accepté li couma Messie. Mais en realité, Isaïe ti annoncé ki Messie ti pou passe par bann souffrance avant ki li vinn le Roi.

Dan livre Isaïe, Messie ti dire sa bann parole prophetik-la: “Mo ti offert mo ledo ar bann ki ti pé batte moi . . . Mo pa ti cachiette mo figure kan zot ti insulté moi ek crache lor moi.” Matthieu raconte seki ti arrivé kan Jésus ti passe la cour: “Zot ti crache lor so figure ek zot ti donne li coute poing. Lezot ti donne li calotte dan so figure.” (Isaïe 50:6; Matthieu 26:67) Isaïe ti ecrire: “Li ti pé laisse lezot maltraite li; pourtant li pa ti ouvert so la bouche.” Alors, kan Pilate ti questionne Jésus concernant bann accusation ki bann Juif ti’nn mette lor li, Jésus “pa ti reponn li, non, pa enn mot, ek sa ti faire gouverneur-la bien etonné.”—Isaïe 53:7; Matthieu 27:12-14; Actes 8:28, 32-35.

Bann detail lor la mort Messie. Prophetie Isaïe ti contigne realisé kan Jésus ti mort ek mem apré. Isaïe ti annoncé: “Li pou faire so tombe pré kot bann mauvais dimoune, ek pré kot bann dimoune riche kan li mort.” (Isaïe 53:9) Couma eski sa prophetie ki ti parette contradictoire-la ti kapav realisé? Kan Jésus ti mort, ti couloute li lor poteau entre deux bandit. (Matthieu 27:38) Mais plitar, Joseph d’Arimathée ki ti riche ti mette lekor Jésus dan enn tombe ki ti pou li ek ki ti fek fouillé. (Matthieu 27:57-60) Finalement, la mort Jésus ti realise enn kitsoz pli important dan prophetie ki Isaïe ti dire concernant Messie: “Sa kikenn ki juste-la, mo serviteur, pou faire ki beaucoup dimoune consideré couma juste; ek li-mem li pou sarié zot bann peché.” Oui, la mort Jésus finn paye la ranson pou ki tou bann ki ena la foi kapav liberé ar peché ki enn fardeau.—Isaïe 53:8, 11; Romains 4:25.

Bann prophetie ki nou sur finn realisé

Pou zot etabli l’identité Messie grace a bann l’Ecriture, bann zapotre ek Jésus li-mem ti cite pli souvent prophetie Isaïe ki lezot livre la Bible. Mais, livre Isaïe pa ti sel livre la Bible ki predire l’avenir. Beaucoup lezot prophetie bann l’Écritures hébraïques koz concernant Jésus, so Royaume, ek bann bon kitsoz ki so Royaume pou faire dan l’avenir.a (Actes 28:23; Révélation 19:10) Ziska ki point eski realisation sa bann prophetie-la ti sur? Jésus ti dire bann Juif ki ti pé ecoute li: “Pa pensé ki mo’nn vini pou detruire la Loi ou-soit bann Prophete [setadir, bann l’Écritures hébraïques]. Mo’nn vini, pa pou detruire, mais pou realisé; parski vrai-mem mo dire zot ki le ciel ek la terre pou passé avant ki enn sel ti lettre ou-soit enn sel ti boute dan la Loi passé dan kit fason, sans ki tou sa bann kitsoz-la arrivé.”—Matthieu 5:17, 18.

Jésus ti aussi attire l’attention lor realisation bann prophetie la Bible dan bann l’evenement ki ti arrivé kan li ti lor la terre, ek aussi dan bann l’evenement ki ti pou arrivé. (Daniel 9:27; Matthieu 15:7-9; 24:15) En plus, Jésus ek so bann disciple zot-mem zot ti predire bann l’evenement ki ti pou arrivé apré zot lepok, parmi ena beaucoup ki nou finn trouvé finn arrivé zordi. Prochain lartik pou koz lor la ek lezot prophetie la Bible encore ki pou realisé dan l’avenir.

[Note]

[Zimage page 4]

“La vierge pou . . . gagne enn garson”

[Zimage page 5]

“Mo pa ti cachiette mo figure kan zot ti insulté moi”