Zot ti pé attann le Messie

“Bann dimoune ti pé attann, ek zot tou ti pé demande zot-mem bann question concernant Jean: eski pa li-mem ki le Messie?”​—LUC 3:15, TRADUCTION OECUMÉNIQUE DE LA BIBLE.

 1. Ki nouvelle extraordinaire enn ange ti annonce certain berger?

TI’NN commence faire noir ek bann berger ti dehors, zot ti pé veille zot bann troupeau. Zot ti bien peur kan enn coute, ange Jéhovah ti deboute pré ar zot ek la gloire Bondié ti eclairé autour zot! Ange-la ti annonce zot sa nouvelle extraordinaire-la: “Pa peur, parski mo pé annonce zot enn bon nouvelle lor enn grand la joie ki tou le peuple pou gagné, parski zordi enn Sauveur inn né pou zot, li-mem Christ le Seigneur.” Sa ti-baba ki sa ange-la ti pé kozé, li-mem ki ti pou vinn le Messie. Bann berger-la ti kapav trouve sa ti-baba-la dan enn mangeoire, dan enn la ville ki pa ti trop loin kot zot ti été. Enn coute, “enn grand l’armée ange” ti commence loué Jéhovah ek ti dire: “La gloire pou Bondié la-haut dan bann hauteur, ek lor la terre, la paix parmi bann dimoune ki Bondié content!”​—Luc 2:8-14.

 2. En hébreu, ki “Messie” vedir, ek couma ti pou kapav koné kisannla li été?

² Bien sur, sa bann berger juif-la ti koné ki en hébreu, “Messie” ou-soit “Christ” ti faire reference ar “enn Kikenn ki oint” par Bondié. (Ex. 29:5-7) Mais couma zot ti pou kapav aprann plus ek convaink lezot ki ti-baba ki sa ange-la ti mentionné ti pou le Messie ki Jéhovah ti choisir? Kan zot ti pou examine bann prophetie ki ti trouve dan bann l’Écritures hébraïques ek compare sa bann prophetie-la avek bann l’activité ek la vie sa zenfant-la.

Kifer bann dimoune ti pé attann le Messie?

3, 4. Couma prophetie Daniel 9:24, 25 inn realisé?

³ Plusieurs l’année apré, kan Jean le Baptiste ti commence preché, so bann parole ek so bann action ti faire certain demann-zot si le Messie ti’nn arrivé. (Lire Luc 3:15.) Li possible ki certain ti bien comprend enn prophetie lor le Messie ki ti koz lor “soixante-dix semaine.” Alors, kitfois zot ti’nn kapav calculé kan le Messie ti pou apparette. Enn partie sa prophetie-la ti dire: “Depuis ler ki parole pou retabli ek reconstruire Jérusalem pou sorti, ziska Messie le Guide, pou ena sept semaine ek aussi soixante-deux semaine.” (Dan. 9:24, 25) Plusieurs specialiste lor la Bible d’accord ki sa bann semaine-la represente bann semaine l’année. Par exemple, Revised Standard Version dire: “Finn decidé ki pou ena soixante-dix semaine l’année.”

⁴ Dan nou lepok, bann serviteur Jéhovah comprend ki sa 69 semaine ki mentionné dan Daniel 9:25-la, egal ar 483 an, ek sa ti commencé en l’an 455 avant nou lepok. Sa l’année-la le roi perse Artaxerxès ti donne Nehémia l’autorisation pou al retabli ek reconstruire Jérusalem. (Neh. 2:1-8) Sa bann semaine-la ti fini 483 an plitar, en l’an 29 nou lepok, kan Jésus ki ti sorti Nazareth, ti prend bapteme ek ti oint avek l’esprit saint ek lerla li ti vinn le Messie.​—Mat. 3:13-17.a

 5. Ki bann prophetie nou pou examiné asterla?

⁵ Asterla, anou examine certain parmi bann prophetie ki concerne le Messie ki finn realisé en rapport avek so naissance, kan li ti encore tipti, ek pendant so ministere. Pena doute ki sa pou fortifié nou la foi dan parole prophetik Bondié. Sa pou aussi donne bann preuve bien clair ki Jésus ti vrai-mem le Messie, ki bann Juif ti pé attann depuis longtemps.

Bann prophetie ki’nn realisé kan li ti tipti

 6. Expliké couma Genèse 49:10 ti realisé.

⁶ Le Messie ti pou bizin né dan tribu Juda. Kan li ti pré pou mort, Jacob ti beni so bann garson ek li ti annoncé: “Baton royal pa pou quitte Juda, ni baton commandant pa pou quitte so lipié, ziska ki Shilo vini; ek c’est li ki pou gagne l’obeissance bann peuple.” (Gen. 49:10) Beaucoup specialiste juif dan le passé ti associé sa bann parole-la avek le Messie. A partir regne le roi David, ki ti sorti dan tribu Juda, baton royal (domination royal) ek baton commandant (pouvoir pou commandé) ti dan tribu Juda. “Shilo” vedir “Kikenn pou ki sa été.” Bondié ti dire Tsidqiya, ki ti dernier le roi dan tribu Juda, ki Li ti pou donne domination royal enn kikenn ki ena droit legal, ek sa kikenn-la li-mem ti pou “Shilo” ek li ti pou regné couma enn heritier permanent. (Ézék. 21:26, 27) Apré Tsidqiya, Jésus ti sel descendant David ar ki Bondié ti promette pou donne enn royaume. Avant naissance Jésus, ange Gabriel ti dire Marie: “Jéhovah pou donne li trone David, so papa, ek li pou regne lor lakaz Jacob pou touletan, ek so royaume pa pou fini jamais.” (Luc 1:32, 33) Alors, Shilo bizin Jésus Christ, ki ti enn descendant Juda ek David.​—Mat. 1:1-3, 6; Luc 3:23, 31-34.

 7. Ki coté le Messie ti né, ek kifer c’est enn kitsoz important?

⁷ Le Messie ti pou né dan Bethléhem. Prophete Mika ti ecrire: “Toi, o Bethléhem Éphratha, toi ki trop tipti pou ki to parmi bann millier dan Juda, ar toi pou sorti pou moi, sa kikenn ki pou bizin vinn chef en Israël-la, ki ti existé depuis bien-bien longtemps, depuis touletan.” (Mika 5:2) Le Messie ti pou bizin né dan Bethléhem, enn la ville Juda, ki ti appel Éphratha. Mem si Marie, mama Jésus, ek so papa adoptif Joseph ti vive dan Nazareth, a cause enn l’enregistrement ki enn dirigeant Romain ti donne l’ordre pou faire, zot ti bizin al Bethléhem, kot Jésus ti né en l’an 2 avant nou lepok. (Mat. 2:1, 5, 6) Sa prophetie-la finn realisé dan enn fason vrai-mem extraordinaire, pa vrai?

8, 9. Ki ti annoncé concernant naissance le Messie ek bann l’evenement ki ti arrivé apré?

⁸ Enn vierge ti pou donne naissance le Messie. (Lire Isaïe 7:14.) Mot hébreu bethoulah vedir “vierge,” mais dan Isaïe 7:14, nou trouve enn lot mot (’almah). Sa verset-la ti annoncé ki enn “jeune fille [ha’almah]” ti pou donne naissance enn garson. La Bible applik mot ’almah ar Rébecca, ki ti enn jeune fille vierge, avant so mariage. (Gen. 24:16, 43) Kan Matthieu ti montré ki Isaïe 7:14 ti realisé en rapport avek naissance Jésus, l’esprit saint ti inspire li pou servi mot grec (parthénos) ki vedir “vierge” au lieu ki enn lot mot grec ki vedir “jeune fille.” Dan zot l’Evangile, Matthieu ek Luc ti ecrire ki Marie ti enn vierge ki ti’nn tombe enceinte grace a l’esprit saint.​—Mat. 1:18-25; Luc 1:26-35.

⁹ Ti pou touye bann ti zenfant apré naissance le Messie. Mem l’evenement ti arrivé plusieurs siecle avant kan pharaon l’Égypte ti passe enn la loi kot ti bizin jette tou bann ti-garson hébreu, ki ti encore bann ti-baba, dan la riviere Nil. (Ex. 1:22) Enn prophetie dan Jérémie 31:15, 16 koz lor Rachel ki ti plore lor so bann garson ki ti’nn al couma prisonnier dan “pays zot l’ennemi.” Bann dimoune ti kapav tann li ploré ziska Rama, enn la ville bien loin ki ti dan territoire Benjamin, dan nord Jérusalem. Matthieu ti montré ki bann parole Jérémie ti realisé kan le roi Hérode ti donne l’ordre pou touye tou bann ti garson dan Bethléhem ek dan bann territoire ki ti tout autour. (Lire Matthieu 2:16-18.) Maziné ki quantité bann dimoune dan sa l’endroit-la ti dan enn grand chagrin!

10. Expliké couma Hoshéa 11:1 ti realisé en rapport avek Jésus.

¹⁰ Pareil couma bann Israélite, le Messie ti pou sorti l’Égypte. (Hosh. 11:1) Avant ki Hérode ti donne l’ordre pou touye bann ti-baba, enn ange ti demann Joseph ek Marie, pou prend Jésus ek al l’Égypte. Zot ti reste la-bas “ziska la mort Hérode, pou realise seki Jéhovah ti dire par so prophete [Hoshéa], kan Li ti dire: ’Depuis l’Égypte mo ti appel mo garson.’” (Mat. 2:13-15) Bien sur, Jésus li-mem pa ti pou kapav ena okenn controle lor bann l’evenement ki ti’nn annoncé concernant so naissance ek kan li ti tipti.

Le Messie commence so ministere!

11. Dan ki fason ti prepare chemin devant Oint Bondié?

¹¹ Enn messager ti pou prepare chemin devant Oint Bondié. Malaki ti annoncé ki c’est “prophete Éliya” ki ti pou faire sa travail-la. Li ti pou prepare leker bann dimoune pou ki zot accepté le Messie ki ti pou vini. (Lire Malaki 4:5, 6.) Jésus li-mem ti dire ki sa “Éliya” ki Malaki ti mentionné-la ti Jean le Baptiste. (Mat. 11:12-14) Ek Marc ti dire ki ministere Jean ti realise enn prophetie Isaïe. (Is. 40:3; Marc 1:1-4) Jésus pa ti demann Jean pou faire enn travail pareil couma Éliya, setadir ki Jean prepare chemin devant li. L’activité sa ’Éliya-la’ ti en accord avek volonté Bondié pou ki bann dimoune kapav koné kisannla le Messie.

12. Ki travail special ti pou aide bann dimoune reconette le Messie?

¹² Bondié ti pou donne le Messie enn travail special ki ti pou aide bann dimoune pou reconette li. Dan synagogue Nazareth, la ville kot li ti grandi, Jésus ti lire sa bann parole-la dan rouleau Isaïe ek ti applik sa ar li-mem: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre, Li’nn envoye moi pou preche avek bann prisonnier ki zot pou liberé ek bann aveugle ki zot pou retrouve clair, pou libere bann ki souffert, pou preche l’année ki Jéhovah approuvé.” Parski Jésus ti vrai-mem le Messie, li ti ena droit pou dire: “Zordi, sa parole l’Ecriture ki zot finn fek tendé-la, finn realisé.”​—Luc 4:16-21.

13. Couma enn prophetie ti annonce ministere Jésus dan Galilée?

¹³ Enn prophetie ti annoncé ki le Messie ti pou accompli so ministere dan Galilée. Concernant “pays Zéboulôn ek pays Naphtali . . . Galilée bann nation,” Isaïe ti ecrire: “Le peuple ki ti pé marche dan noirté finn trouve enn grand la lumiere. Bann ki ti reste dan pays kot ena enn grand l’ombrage, la lumiere finn brillé lor zot.” (Is. 9:1, 2) Jésus ti commence so ministere dan Galilée; li ti reste dan Capernaüm kot beaucoup habitant Zéboulôn ek Naphtali ti kapav gagne bann bienfait grace a la lumiere spirituel ki li ti donne zot. (Mat. 4:12-16) Dan Galilée, Jésus ti faire so Sermon lor montagne, li ti choisir so bann zapotre, li ti faire so premier mirak, ek li ti apparette ar plus ki 500 disciple apré so resurrection. (Mat. 5:1–7:27; 28:16-20; Marc 3:13, 14; Jean 2:8-11; 1 Cor. 15:6) C’est coumsa ki li ti realise prophetie Isaïe, kan li ti preche dan “pays Zéboulôn ek pays Naphtali.” Bien sur, Jésus ti aussi al preche message lor Royaume Bondié dan lezot l’endroit en Israël.

Lezot prophetie lor le Messie

14. Dan ki fason Jésus ti realise Psaume 78:2?

¹⁴ Le Messie ti pou koz en parabole, ou-soit par bann l’exemple. Psalmiste Asaph ti chanté: “C’est par enn proverbe ki mo pou ouvert mo la bouche.” (Ps. 78:2) Couma nou koné ki sa prophetie-la ti applik ar Jésus? Parski c’est seki Matthieu ti dire. Apré ki Matthieu ti koz lor bann l’exemple kot Jésus ti compare Royaume Bondié ar enn la grain moutarde ek ar levain, li ti dire: “[Jésus] pa ti koz ar zot sans ki li ti servi enn l’exemple; pou ki sa realise seki sa prophete-la ti annoncé, kan li ti dire: ’Mo pou ouvert mo la bouche avek bann l’exemple, mo pou annonce bann kitsoz ki’nn reste cachiette depuis fondation le monde.’” (Mat. 13:31-35) Bann proverbe, ou-soit bann parabole ti forme partie dan methode l’enseignement Jésus, enn methode ki ti bien efficace.

15. Couma prophetie Isaïe 53:4 ti realisé?

¹⁵ Le Messie ti pou sarié nou bann maladie. Isaïe ti annoncé: “Vrai-mem, c’est nou bann maladie ki li ti mette lor li; ek concernant nou bann douleur, li ti sarié zot.” (Is. 53:4) Matthieu ti montré ki apré ki Jésus ti gueri belle-mere Pierre, li ti gueri lezot dimoune “pou ki sa realise seki prophete Isaïe ti annoncé, kan li ti dire: ’Li-mem li ti prend nou bann douleur ek li ti sarié nou bann maladie.’” (Mat. 8:14-17) Sa c’est zis enn parmi bann guerison ki Jésus ti faire. Mais dan la Bible, ena encore beaucoup lezot fois kot Jésus ti gueri bann dimoune.

16. Couma l’apotre Jean ti montré ki Jésus ti realise Isaïe 53:1?

¹⁶ Malgré tou bann bon kitsoz ki le Messie ti pou faire, beaucoup dimoune pa ti pou croire li. (Lire Isaïe 53:1.) Pou montré ki sa prophetie-la ti realisé, l’apotre Jean ti ecrire: “Mem si [Jésus] ti accompli sa quantité signe-la devant zot, zot pa ti ena la foi en li, pou ki sa realise parole prophete Isaïe, ki ti dire: ’Jéhovah, kisannla ki’nn ena la foi dan seki nou finn tendé? Ek concernant lé-bras Jéhovah, ar kisannla finn faire konn sa?’” (Jean 12:37, 38) Mem plusieurs l’année apré, kan l’apotre Paul ti preche la bonne nouvelle, bien tigit dimoune ti ena la foi ki Jésus ti le Messie.​—Rom. 10:16, 17.

17. Couma Jean ti applik Psaume 69:4?

¹⁷ Bann dimoune ti pou ena la haine pou le Messie sans okenn raison. (Ps. 69:4) L’apotre Jean ti cite seki Jésus ti dire: “Si mo pa ti faire parmi [le peuple] bann action ki personne pa finn faire, zot pa ti pou ena peché; mais asterla zot finn trouve nou ek zot finn aussi ena la haine pou nou, pou moi ek mo Papa toulé-deux. Tou sa c’est pou realise seki’nn ecrire dan zot la Loi: ’Zot inn ena la haine pou moi sans okenn raison.’” (Jean 15:24, 25) Souvent, la “Loi” vedir tou bann l’Écritures hébraïques. (Jean 10:34; 12:34) Seki nou lire lor Jésus dan bann l’Evangile prouvé ki bann dimoune, surtout bann chef religieux juif, ti ena la haine pou li. En plus, Jésus Christ ti dire: “Le monde pena okenn raison pou ena la haine pou zot, mais li ena la haine pou moi, parski mo rann temoignage lor li ki so bann action mauvais.”​—Jean 7:7.

18. Ki nou pou examiné encore ki pou faire nou ena plus l’assurance ki Jésus li vrai-mem le Messie?

¹⁸ Bann disciple Jésus dan premier siecle ti sur ki li ti le Messie, parski li ti vrai-mem realise bann prophetie ki ti trouve dan bann l’Écritures hébraïques, en rapport avek le Messie. (Mat. 16:16) Pareil couma nou finn trouvé, certain parmi sa bann prophetie-la ti realisé kan Jésus ti encore tipti ek aussi pendant so ministere. Dan prochain lartik, nou pou examine lezot prophetie lor le Messie. Si nou medite lor sa bann prophetie-la dan la priere, sa pou faire nou ena plus l’assurance ki Jésus Christ li vrai-mem le Messie ki Jéhovah, nou Papa ki dan le ciel, finn choisir.

[Note]

Couma ou pou reponn?

• Ki bann prophetie ki finn realisé en rapport avek naissance Jésus?

• Dan ki fason ti prepare chemin devant le Messie?

• Ki bann prophetie ki trouve dan Isaïe chapitre 53, Jésus finn realisé?