La priere

7 Eski Bondié tendé ek reponn?

KAN bann dimoune tann sa question-la zot bien envie konn so reponse. La Bible montré ki Jéhovah vrai-mem ecoute la priere bann dimoune zordi. Eski Li pou ecoute nou ou-soit non, sa pou depann beaucoup lor nou.

Jésus ti denonce bann chef religieux dan so lepok ki ti prié dan enn fason hypocrite; zot ti zis envie parette juste devant bann dimoune. Li ti dire ki sa bann qualité dimoune-la ti pou gagne “tou zot recompense,” setadir zot ti pou gagne zis seki zot ti pé rodé, l’attention bann zom, mais pa seki zot ti bizin, setadir ki Bondié ecoute zot. (Matthieu 6:5) Azordi aussi pareil, beaucoup dimoune prié Bondié dapré zot volonté ek pa dapré volonté Bondié. Kan zot pa prend compte bann principe la Bible ki nou finn examiné, Bondié pa ecoute zot.

Mais ou, eski Bondié pou ecoute ou ek pou reponn ou bann la priere? Reponse sa question-la pa depann lor ou race, ou nationalité, ou-soit ou rang social. La Bible donne nou sa l’assurance-la: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.” (Actes 10:34, 35) Eski ou sa qualité dimoune-la? La crainte pou Bondié vedir ki ou ena beaucoup respé pou Li ek ou pa envie deplaire Li. Si ou pratik la justice, sa vedir ki ou pé faire zeffort pou faire bann kitsoz droite devant Bondié au lieu ki ou suive ou prop volonté ou-soit volonté bann lezot dimoune. Eski ou vrai-mem envie ki Bondié ecoute ou bann la priere? La Bible montré ou couma ou bizin prié pou ki Bondié ecoute ou.a

Bien sur, beaucoup envie ki Bondié reponn zot bann la priere par enn mirak. Mais, mem dan lepok biblik, pa souvent ki Bondié ti faire bann mirak coumsa. Parfois plusieurs siecle ti passé entre enn mirak ek prochain mirak ki la Bible mentionné. En plus, la Bible montré ki lepok bann mirak inn fini apré la mort bann zapotre. (1 Corinthiens 13:8-10) Mais, eski sa vedir ki Bondié pa reponn bann la priere zordi? Non, au contraire! Anou guette certain la priere ki Li reponn.

Bondié donne sagesse. Jéhovah pli grand Source tou vrai sagesse. Avek generosité Li donne so sagesse en abondance bann dimoune ki envie gagne so direction ek ki faire zeffort pou vive en accord avek sa sagesse-la.—Jacques 1:5.

Bondié donne so l’esprit saint ek tou bann bienfait ki sa amené. L’esprit saint c’est la force actif Bondié. Pena okenn la force ki pli fort ki sa. Li kapav aide nou pou endure bann l’epreuve. Li kapav faire nou ressenti la paix kan nou bouleversé. Li kapav aide nou pou developpe lezot qualité ki attirant. (Galates 5:22, 23) Jésus ti donne so bann disciple l’assurance ki Bondié donne sa don-la avek generosité.—Luc 11:13.

Bondié donne connaissance bann ki faire zeffort pou rod Li. (Actes 17:26, 27) Partout lor la terre, ena bann dimoune ki rod la verité avek enn leker sincere. Zot envie konn bann kitsoz lor Bondié—ki so nom, so projet pou la terre ek pou bann dimoune, ek couma zot kapav vinn proche ar Li. (Jacques 4:8) Bann Témoins de Jéhovah souvent joinde bann dimoune coumsa ek zot content pou partage bann reponse ki la Bible donné lor sa bann question-la.

Eski c’est pou sa raison-la ki ou finn gagne sa magazine-la? Eski ou pé envie konn plus lor Bondié? Kitfois c’est coumsa ki Li pé reponn ou la priere.

[Note]