La priere

5 Kot-sa ek kan? Eski sa ena l’importance?

PENA doute ki ou finn remarké ki la plupart bann grand religion mette en valeur bann batiment kot faire la priere pou ki sa attire l’attention bann dimoune ek zot fixé bann ler precis kot bann dimoune bizin prié. Eski la Bible precisé dan ki place ek ki ler nou bizin prié?

Li vrai ki la Bible montré ki ena bann moment approprié kot nou kapav prié. Par exemple, avant ki li ti prend enn repas avek so bann disciple, Jésus ti remercié Bondié. (Luc 22:17) Ek kan so bann disciple ti rassemblé pou adore Bondié, zot ti prié ensam. Kan zot ti faire sa, zot ti pé suive enn coutume ki ti existé depuis longtemps dan bann synagogue juif ek dan temple Jérusalem. Bondié ti envie ki temple vinn “enn lakaz kot tou bann nation faire la priere.”—Marc 11:17.

Kan bann serviteur Bondié rassemblé ek prié ensam, seki zot demandé kapav amenn bann bon resultat. Si sa groupe-la ena mem pensé ek si seki zot demandé dan la priere li en accord avek bann principe biblik, sa faire Bondié plaisir. Sa la priere-la kapav mem pousse Li pou faire enn kitsoz ki Li pa ti pou faire. (Hébreux 13:18, 19) Bann Témoins de Jéhovah prié dan chaque reunion ki organisé. Avek tou nou leker nou invite ou pou vinn dan enn Salle du Royaume ki pli pré ar ou ek pou ecoute sa bann la priere-la par ou-mem.

Mais selman, la Bible pa precisé dan ki place ek ki ler nou bizin prié. La Bible koz lor bann serviteur Bondié ki ti prié dan different ler ek different place. Jésus ti dire: “Kan to prié, rente dan to la chambre ek, apré ki to’nn ferme la porte, prié to Papa ki la dan secret; lerla to Papa ki guetté en secret, pou rann toi.”—Matthieu 6:6.

Eski sa pa encourage ou pou prié? Oui, ou kapav koz avek Souverain l’univers kan ou tousel, dan n’importe ki ler ek ou kapav sur ki Li pou ecoute ou. Alors, li pa etonnant ki Jésus souvent ti rod bann moment kot li ti tousel pou li kapav prié! Enn fois, li ti passe enn la nuit en entier pou prié Bondié pou rod So direction concernant enn decision important.—Luc 6:12, 13.

La Bible koz lor bann lezot zom ek femme ki ti prié kan zot ti ena pou prend bann decision important ek kan zot ti faire face avek bann l’epreuve difficile. Parfois zot ti prié dan zot leker ek parfois zot ti prié pou ki lezot tendé; zot ti prié kan zot ti en groupe ek kan zot ti tousel. L’importance c’est ki zot ti prié. En plus, Bondié invite so bann serviteur pou “prié touletan.” (1 Thessaloniciens 5:17) Li disposé pou ecoute pou touletan bann ki faire so volonté. Eski c’est pa enn invitation ki rempli ar l’amour?

Bien sur, dan le monde zordi, beaucoup demann-zot si vrai-mem la priere ena enn valeur pratik. Kitfois ou demann ou-mem: ‘Eski sa pou aide moi vrai-mem?’

[L’encadré page 9]

Nou kapav prié n’importe ki ler ek n’importe kot sa