Jésus​—Kot-sa li ti sorti

“[Pilate] ti rente encore enn fois dan palais gouverneur ek ti dire Jésus: ‘Kot-sa to sorti?’ Mais Jésus pa ti donne li okenn reponse.”​—JEAN 19:9.

GOUVERNEUR romain Ponce Pilate ti pose sa question-la alors ki Jésus ti retrouve-li devant enn tribunal kot ti pou juge li.a Pilate ti koné dan ki partie Israël Jésus ti sorti. (Luc 23:6, 7) Li ti koné aussi ki Jésus pa ti enn simple zom. Eski Pilate ti pé demann-li-mem si Jésus ti deja ena enn la vie avant? Eski sa gouverneur païen-la ti disposé pou accepté ek pou applik la verité dan so la vie? Ki li ti pense sa ou-soit non, Jésus ti refuse reponn li, ek bien vite li ti vinn clair ki Pilate ti pli interessé ar so prop carriere ki ar la verité ek la justice.​—Matthieu 27:11-26.

Heureusement, bann ki ena enn leker sincere ek ki envie koné kot-sa Jésus ti sorti, kapav trouve sa sans okenn probleme. La Bible faire nou koné dan enn fason bien clair kot-sa Jésus Christ sorti. Anou examine sa bann point-la.

▪ Kot-sa li ti né Bann calcule ki’nn faire pa trop longtemps montré ki dan commencement l’automne l’an 2 avant nou lepok, dapré nou calendrier, Jésus ti né dan bann condition bien modeste dan Bethléhem, enn la ville dan Juda. César Auguste ti donne l’ordre pou faire enn l’enregistrement. A cause sa, Marie, mama Jésus, “ki ti pré pou gagne tibaba,” ek Joseph, so mari, ti obligé al Bethléhem, l’endroit kot so bann ancetre ti sorti. Parski ti ena enn quantité dimoune ki ti vinn dan sa village-la, Joseph ek Marie pa ti’nn reussi trouve enn place pou resté. Alors zot ti’nn bizin servi enn l’etable. C’est dan sa l’etable-la ki Jésus ti né ek zot ti mette li dan enn mangeoire.​—Luc 2:1-7.

Plusieurs siecle avant, enn prophetie la Bible ti predire place kot Jésus ti pou né: “Toi, o Bethléhem Éphratha, toi ki trop tipti pou ki to parmi bann millier dan Juda, ar toi pou sorti pou moi, sa kikenn ki pou bizin vinn chef en Israël-la.”b (Mika 5:2) Li parette ki Bethléhem ti enn trop tipti la ville pou ki mentionne li lor la liste tou bann la ville ki ti trouve dan territoire Juda. Pourtant, zis sa ti village-la ki ti pou gagne enn grand l’honneur. Messie ki ti promette ou-soit Christ, ti pou sorti dan Bethléhem.​—Matthieu 2:3-6; Jean 7:40-42.

▪ Kot-sa li ti grandi Apré ki zot ti reste inpé le temps dan l’Égypte, famille Jésus ti al dan Nazareth, enn la ville dan region Galilée, ki ti apepré 96 km dan nord Jérusalem. Dan sa lepok-la, Jésus ti ena moins ki trois an. Jésus ti grandi dan sa joli l’endroit-la kot ti ena bann planteur, bann berger, ek bann pecheur. Li ti grandi dan enn famille kot ti ena beaucoup zenfant ek kitfois zot ti vive dan bann condition modeste.​—Matthieu 13:55, 56.

Plusieurs siecle a l’avance, la Bible ti fini annoncé ki le Messie ti pou “enn Nazaréen.” Matthieu, ki ti ecrire enn l’Evangile, ti dire ki famille Jésus ti vinn reste dan “Nazareth, pou ki seki Bondié ti dire a travers bann prophete, realisé:‘Pou appel li enn Nazaréen.’” (Matthieu 2:19-23) Li parette ki sa nom Nazaréen-la ena enn lien avek mot hébreux ki’nn traduire par “bourgeon.” Li clair ki Matthieu ti pé faire reference ar prophetie Isaïe ki ti appel Messie “enn bourgeon” ki ti pou sorti dan siko Jessé, seki vedir ki Messie ti pou enn descendant Jessé, papa le roi David. (Isaïe 11:1) En realité Jésus ti enn descendant Jessé a travers David.​—Matthieu 1:6, 16; Luc 3:23, 31, 32.

▪ Kot-sa li ti sorti La Bible enseigne nou ki la vie Jésus ti commencé bien longtemps avant ki li ti né dan sa l’etable-la dan Bethléhem. Prophete Mika, ki nou ti cité avant, ajouté ki li “ti existé depuis bien-bien longtemps, depuis touletan.” (Mika 5:2) En tant ki Garson premier né Bondié, Jésus ti enn creature spirituel dan le ciel avant ki li ti né lor la terre couma enn humain. Jésus li-mem ti dire: “Mo finn sorti dan le ciel mo finn vinn lor la terre.” (Jean 6:38; 8:23) Couma sa ti possible?

Par moyen l’esprit saint, Bondié, Jéhovah, ti faire enn mirak.c Li ti transfere la vie so Garson, ki ti dan le ciel, dan ventre enn vierge, enn Juive ki ti appel Marie, pou ki li kapav né couma enn humain parfait. Bondié ki Tout-Puissant ena pouvoir pou realise enn mirak coumsa. C’est seki sa ange ki ti koz ar Marie-la ti dire: “Pou Bondié okenn kitsoz ki Li dire pa pou impossible.”​—Luc 1:30-35, 37.

La Bible pa zis dire nou kot-sa Jésus ti sorti. Quatre l’Evangile ki ena dan la Bible​—Matthieu, Marc, Luc ek Jean​—aprann nou beaucoup lor fason ki li ti vive.

[Notes]