Couma reste separé ar le monde

 1. Lor ki kitsoz Jésus ti mette l’accent pendant so dernier la nuit lor la terre en tant ki enn humain?

PENDANT so dernier la nuit lor la terre en tant ki enn humain, Jésus ti montré ki li ti bien concerné par seki ti pou arrive so bann disciple dan l’avenir. Li ti mem prié pou sa kan li ti dire so Papa: “Mo pa pé demann toi pou tire zot dan le monde, mais pou veille lor zot a cause sa kikenn ki mauvais-la. Zot pa faire partie dan le monde, pareil couma moi mo pa faire partie dan le monde.” (Jean 17:15, 16) Dan sa la priere sincere-la, Jésus ti montré so grand l’amour pou so bann disciple ek li ti aussi montré l’importance bann parole ki li ti dire certain parmi zot pli boner sa soir-la: “Zot pa faire partie dan le monde.” (Jean 15:19) Li clair ki pou Jésus, li ti bien important ki so bann disciple reste separé ar le monde!

 2. Ki été “le monde” ki Jésus ti mentionné?

² “Le monde” ki Jésus ti mentionné vedir tou bann dimoune ki eloigné ar Bondié, ki dirigé par Satan, ek ki esclave so l’attitude egoïste ek orgueilleux. (Jean 14:30; Éphésiens 2:2; 1 Jean 5:19) Oui, ‘enn kikenn ki camarade ar sa le monde-la, li l’ennemi ar Bondié.’ (Jacques 4:4) Mais alors couma tou bann ki envie reste dan l’amour Bondié kapav en mem temps dan le monde ek pourtant reste separé ar li? Nou pou guette cinq moyen ki permette nou faire sa: kan nou reste fidele envers Royaume Bondié ki dirigé par Christ ek nou pa prend part dan bann zaffaire politik, kan nou resisté kont l’esprit le monde, kan nou modeste dan nou l’habillement ek nou l’apparence, kan nou garde nou lizié simple, ek kan nou mette nou l’equipement la guerre spirituel lor nou.

 3. (a) Couma Jésus ti considere politik dan so lepok? (b) Kifer nou kapav dire ki bann disciple oint Jésus Christ servi couma bann ambassadeur? (Guette aussi note.)

³ Jésus pa ti participe dan politik so lepok. Li ti plutot consacré-li net pou preche Royaume Bondié, gouvernement celeste ki ti pou vini ek kot li ti pou le Roi. (Daniel 7:13, 14; Luc 4:43; 17:20, 21) A cause sa ki Jésus ti kapav dire devant gouverneur romain Ponce Pilate: “Mo royaume pa faire partie dan sa le monde-la.” (Jean 18:36) So bann disciple fidele imite so l’exemple kan zot montré zot fidelité envers Christ ek so Royaume ek kan zot annonce tou dimoune sa Royaume-la. (Matthieu 24:14) L’apotre Paul ti ecrire: “Alors nou bann ambassadeur dan place Christ, coumadir Bondié suppliyé a travers nou. Dan place Christ nou suppliyé: ‘Reconcilié-zot avek Bondié.’”a—2 Corinthiens 5:20.

 4. Couma tou bann vrai chretien finn montré zot fidelité envers Royaume Bondié? (Guette l’encadré “Bann premier chretien ti neutre.”)

⁴ Parski bann ambassadeur represente enn dirigeant ou-soit enn pays etranger, zot pa mele-zot dan bann zaffaire ki passé dan sa pays kot zot servi-la; zot reste neutre. Parkont, bann ambassadeur favorise bann l’interet gouvernement pays ki zot representé. Li pareil pou bann disciple oint Jésus Christ. ‘Place kot zot ena droit pou resté, li dan le ciel.’ (Philippiens 3:20) Avredir, grace a zot predication zelé lor Royaume Bondié, zot finn aide bann million “lezot brebis” Jésus Christ pou ‘reconcilié avek Bondié.’ (Jean 10:16; Matthieu 25:31-40) “Bann lezot brebis” zot, zot servi couma bann envoyé Christ, setadir couma so bann representant ki soutenir so bann frere oint. Toulé-deux groupe forme enn sel troupeau ki soutenir Royaume messianik ek zot pa prend part ditou dan bann zaffaire politik sa le monde-la.—Isaïe 2:2-4.

 5. Ki difference ena entre congregation chretien ek nation Israël, ek couma bann chretien montré ki ena sa difference-la?

⁵ C’est pa zis parski zot fidele envers Christ ki bann vrai chretien pa prend part dan bann zaffaire politik sa le monde-la. Dan le passé, bann Israélite ti reste dan enn sel pays ki Bondié ti donne zot, mais nou, nou forme partie dan enn famille international. (Matthieu 28:19; 1 Pierre 2:9) Si nou ti bizin soutenir bann partie politik dan nou pays, couma nou ti pou kapav presente gouvernement Bondié couma sel l’espoir pou l’humanité? Sa ti pou aussi enn menace pou nou l’unité. (1 Corinthiens 1:10) En plus, kan ti pou ena la guerre, nou ti pou laguerre kont nou bann compagnon chretien, alors ki la Bible donne nou l’ordre pou content zot. (Jean 13:34, 35; 1 Jean 3:10-12) A cause sa, Jésus ti ena bann bon raison pou demann so bann disciple pou remette zot l’epée dan so place. Ek li ti mem demann zot pou content zot bann l’ennemi.—Matthieu 5:44; 26:52; guette l’encadré “Eski mo reste neutre?”

 6. Parski ou finn voué ou la vie ar Bondié, ki l’effet sa ena lor ou relation avek César?

⁶ En tant ki bann vrai chretien, nou finn voué nou la vie ar Bondié, pa ar kit dimoune ou-soit l’organisation humain, ou-soit kit nation. Dan 1 Corinthiens 6:19, 20, li dire: “Zot pa pou zot-mem, parski finn acheté zot pou enn prix.” Alors, mem si zot rann “César” seki zot doit li, ki li l’honneur, taxe, ou-soit soumission dan limite ki Bondié inn fixé, bann disciple Jésus donne “Bondié bann kitsoz ki pou Bondié.” (Marc 12:17; Romains 13:1-7) Parmi sa bann kitsoz-la ena zot l’adoration, zot l’amour total, ek zot l’obeissance fidele. Si bizin, zot paré pou donne zot la vie pou Bondié.—Luc 4:8; 10:27; Actes 5:29; Romains 14:8.

7, 8. Ki été “l’esprit le monde,” ek couma sa l’esprit-la “agir” dan enn dimoune?

⁷ Enn lot fason ki bann chretien reste separé ar le monde, c’est kan zot resisté kont so mauvais l’esprit. L’apotre Paul ti ecrire: “Nou, nou pa finn recevoir l’esprit le monde, mais l’esprit ki sorti kot Bondié.” (1 Corinthiens 2:12) Li ti dire bann Éphésien: “Enn lepok, zot ti pé marche dapré sa le monde-la, dapré sa kikenn ki chef lor pouvoir ki l’air ena, sa l’esprit ki pé agir asterla dan bann garson desobeissance.”—Éphésiens 2:2, 3.

⁸ “L’air” le monde, ou-soit so l’esprit, li enn la force invisible puissant ki pousse bann dimoune pou desobeir Bondié ek li favorise ‘desir la chair ek desir lizié.’ (1 Jean 2:16; 1 Timothée 6:9, 10) Sa l’esprit-la exerce enn “pouvoir” parski li joué lor nou bann mauvais desir, li manifesté sans ki nou rann-nou compte, li la touletan, ek pareil couma l’air, li partout. En plus, li “agir” dan enn dimoune kan doucement-doucement li faire li developpe bann mentalité ki Bondié pa content. Par exemple, li faire dimoune-la vinn egoïste ek orgueilleux, li faire li toujours envie gagne plus, ek li faire li developpe tendance pou etabli so bann prop principe moral ek pou rebelle kont l’autorité.b Pou dire sa dan enn fason pli simple, doucement-doucement l’esprit le monde faire bann mentalité Satan le Diable developpé dan leker enn dimoune.—Jean 8:44; Actes 13:10; 1 Jean 3:8, 10.

 9. Couma l’esprit le monde kapav rente dan nou bann pensée ek nou leker?

⁹ Eski l’esprit le monde kapav prend racine dan ou pensée ek ou leker? Oui, mais zis si ou donne li sa l’occasion-la, parski ou’nn arrete faire attention. (Proverbes 4:23) Souvent sa l’influence-la commencé sans ki nou rann-nou compte, kitfois par bann dimoune ki nou frequenté, ki kapav parette bann bon dimoune, mais ki en realité pena okenn l’amour pou Jéhovah. (Proverbes 13:20; 1 Corinthiens 15:33) Ou kapav aussi absorbe sa l’esprit mauvais-la a travers bann livre ki pa bon pou lire, bann site Internet pornographik ou-soit apostat, bann divertissement immoral, ek bann sport kot ena enn grand l’esprit competition—avredir a travers n’importe kisannla ou-soit n’importe ki kitsoz ki reflete fason pensé Satan ou-soit fason pensé so systeme.

10. Couma nou kapav resisté kont l’esprit le monde?

¹⁰ Couma nou kapav resisté kont sa l’esprit le monde ki kapav contamine nou sans ki nou rann-nou compte ek nou contigne reste dan l’amour Bondié? C’est selman si nou profite bien tou bann disposition spirituel ki Jéhovah prend ek aussi si nou touletan prié pou gagne l’esprit saint. Jéhovah beaucoup pli grand ki Satan le Diable ou-soit so le monde mauvais. (1 Jean 4:4) Alors li vrai-mem bien important ki nou reste proche avek Jéhovah a travers la priere!

11. Couma l’esprit le monde inn influence fason ki bann dimoune habillé?

¹¹ Fason ki enn dimoune habillé, so l’apparence ek so l’hygiene personnel montré ki l’esprit ki pé agir lor li. Dan beaucoup pays, fason ki bann dimoune habillé inn tombe tellement bas ki dan enn commentaire ki enn animateur television inn faire, li’nn laisse comprend ki bientot bann prostitué pou nepli koné couma zot pou habillé pou ki kapav reconette zot. Mem bann tifi ki pankor arrive l’adolescence influencé par sa la mode-la—“plus lekor dehors, moins la honte,” pareil couma enn journal ti dire. Enn lot la mode c’est bann l’habillement debraillé ki reflete enn l’esprit rebellion ek ki pa montré dignité ek respé pou so prop lekor.

12, 13. Ki bann principe bizin aide nou dan domaine l’habillement ek l’apparence?

¹² En tant ki bann serviteur Jéhovah, li normal ki nou envie ena enn bon l’apparence, setadir habille bien, prop, avek bon gout, ek dan enn fason ki adapté ar bann circonstance. Nou l’apparence bizin reflete touletan “modestie ek bon sens.” Sa bann qualité-la associé avek “bann bon action,” ek zot approprié pou n’importe kisannla, ki li enn missié ou-soit enn madame, ‘ki dire ki li adore Bondié avek respé.’ Bien sur, seki pli important pou nou, c’est pa pou attire l’attention lor nou, mais pou “reste dan l’amour Bondié.” (1 Timothée 2:9, 10; Jude 21) Oui, nou envie ki seki faire nou pli joli, c’est ‘seki nou été endan dan nou leker, ek ki ena enn grand valeur dan lizié Bondié.’—1 Pierre 3:3, 4.

¹³ Pa blié aussi ki nou fason habillé ek nou l’apparence kapav influence fason ki lezot considere vrai l’adoration. Kan servi mot grec ki traduire par “modestie” dan enn sens moral, sa donne l’idée la crainte ek respé pou sentiment ek l’opinion lezot. Alors nou bizin disposé pou renonce ar nou bann droit pou respecté conscience lezot. Surtout, nou envie honore Jéhovah ek so peuple ek recommande nou-mem couma bann ministre Bondié kan nou faire “tou pou la gloire Bondié.”—1 Corinthiens 4:9; 10:31; 2 Corinthiens 6:3, 4; 7:1.

14. Ki bann question nou bizin pose-nou par rapport ar nou l’apparence ek nou l’hygiene personnel?

¹⁴ Nou l’habillement, nou l’apparence ek nou propté zot encore pli important kan nou pé participe dan predication ou-soit assisté reunion. Demann ou-mem: ‘Eski mo l’apparence ek mo l’hygiene personnel attire l’attention plus ki necessaire lor mo-mem? Eski sa embarrasse lezot? Eski bann droit ki mo ena dan sa bann domaine-la, zot pli important ki rempli bann condition pou gagne bann privilege dan congregation?’—Psaume 68:6; Philippiens 4:5; 1 Pierre 5:6.

15. Kifer Parole Bondié pa donne nou enn la liste la loi lor l’habillement, l’apparence, ek l’hygiene personnel?

¹⁵ La Bible pa donne bann chretien enn la liste la loi lor l’habillement, l’apparence ek l’hygiene personnel. Jéhovah pa envie empeche nou servi nou liberté pou choisir ou-soit nou capacité pou reflechi. Li plutot envie ki nou vinn bann dimoune mur ki raisonne lor bann principe la Bible ek ki “a force inn pratiké, ena bann capacité mental ki finn entrainé pou faire difference entre seki bon ek seki mauvais.” (Hébreux 5:14) Mais surtout, Li envie ki nou laisse l’amour dirige nou—l’amour pou Bondié ek pou nou prochain. (Marc 12:30, 31) Mem dan sa bann limite-la, nou kapav ena enn grand varieté choix dan domaine l’habillement ek l’apparence. Nou trouve sa bien kan nou guette bann la foule serviteur Jéhovah partout kot zot rassemblé lor la terre. Zot linge tou qualité couleur ek zot dan la joie.

16. Couma eski l’esprit le monde li contraire ar l’enseignement Jésus, ek ki bann question nou bizin pose-nou?

¹⁶ L’esprit le monde li embete dimoune ek li pousse bann million dimoune pou compte lor l’argent ek bann kitsoz materiel pou trouve bonheur. Mais Jésus ti dire: “Mem kan enn dimoune li dan l’abondance, so la vie pa depann lor bann kitsoz ki li ena.” (Luc 12:15) Jésus pa ti encourage bann dimoune pou amenn enn la vie sacrifice ziska dernier degré. Mais li ti enseigné ki bann ki “reconette ki zot pauvre lor plan spirituel” ek ki garde zot lizié “simple,” enn lizié ki pur ek ki concentré lor bann kitsoz spirituel, zot pou gagne la vie ek pou trouve vrai bonheur. (Matthieu 5:3; 6:22, 23) Pose ou-mem sa bann question-la: ‘Eski vrai-mem mo croire seki Jésus inn enseigné, ou-soit eski mo laisse-moi influencé par “papa mensonge”? (Jean 8:44) Ki mo bann parole, mo bann l’objectif, mo bann priorité, ek mo fason vive montré?’—Luc 6:45; 21:34-36; 2 Jean 6.

17. Cite certain bienfait ki bann ki garde enn lizié simple gagné.

¹⁷ Jésus ti dire: “La sagesse montré ki li juste par so bann action.” (Matthieu 11:19) Anou guette certain bienfait ki bann ki garde enn lizié simple, gagné. Zot service pou soutenir Royaume Bondié faire zot gagne vrai reconfort. (Matthieu 11:29, 30) Zot evite bann tracas inutile ek coumsa zot pa souffert lor plan mental ek affectif. (1 Timothée 6:9, 10) Parski zot contente-zot zis avek seki necessaire pou vive, zot ena plus le temps pou zot famille ek zot bann compagnon chretien. A cause sa, kitfois zot dormi pli bien. (Ecclésiaste 5:12) Zot disposé pou donné dan n’importe ki fason ki zot kapav, ek sa faire zot gagne enn grand la joie. (Actes 20:35) Zot “ena l’esperance en abondance” ek zot ena la paix dan zot-mem ek contentement. (Romains 15:13; Matthieu 6:31, 32) Sa bann benediction-la, zot vrai-mem ena enn grand valeur!

18. Couma eski la Bible decrire nou l’ennemi, so bann methode, ek qualité la lutte ki nou bizin amené?

¹⁸ Bann ki reste dan l’amour Bondié, zot gagne aussi enn protection spirituel kont Satan, ki pa zis envie faire bann chretien perdi zot la joie, mais aussi perdi la vie eternel. (1 Pierre 5:8) L’apotre Paul ti dire: “Nou bizin lutté, pa kont di-sang ek la chair, mais kont bann gouvernement, kont bann l’autorité, kont bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éphésiens 6:12) Mot “lutté” pa faire nou pense enn combat kot nou laguerre avek nou l’ennemi de loin, coumadir nou cachiette dan enn place souterrain ek nou pé attak zot. Mais li enn combat kot nou bizin laguerre face a face ar nou l’ennemi. En plus, bann mot couma “bann gouvernement,” “bann l’autorité,” ek “bann dirigeant le monde” montré ki sa bann l’attak ki sorti dan domaine spirituel-la, zot faire partie dan enn plan ek zot bien organisé.

19. Decrire l’equipement la guerre spirituel ki enn chretien bizin mette lor li.

¹⁹ Mais malgré nou bann faiblesse ek nou bann limite, nou kapav gagne la victoire. Couma? Kan nou mette lor nou “l’equipement la guerre ki complet, ki Bondié donné.” (Éphésiens 6:13) Kan li decrire sa l’equipement-la, l’apotre Paul dire dan Éphésiens 6:14-18: “Alors, tini ferme, avek la verité ki serre zot le rein, ek avek cuirasse la justice lor zot ek l’equipement la bonne nouvelle lor la paix dan zot lipié. Surtout, prend grand bouclier la foi, ek avek sa zot pou kapav teigne tou bann fleche enflammé ki sa kikenn ki mauvais-la envoyé. Accepté aussi casque delivrance, ek l’epée l’esprit, setadir, parole Bondié, alors ki avek tou sorte qualité la priere ek supplication, zot contigne prié dan tou l’occasion, guidé par l’esprit.”

20. Ki difference ena entre nou situation ek situation enn soldat?

²⁰ Parski sa l’equipement la guerre-la li enn disposition ki Bondié inn prend, nou kapav touletan sur ki sa pou protege nou, pourvi ki touletan nou mette sa lor nou. Bann chretien pa couma bann soldat ki kapav gagne bann longue periode repos kot zot pa al laguerre. Zot, zot ena pou amenn enn la lutte kot touletan zot pé riské zot la vie, enn la lutte ki contigné ek ki pou arreté zis kan Bondié pou detruire le monde Satan ek jette tou bann mauvais l’esprit dan l’abime. (Révélation 12:17; 20:1-3) Alors pa abandonné si ou pé lutte kont bann faiblesse ou-soit bann mauvais desir, parski nou tou nou bizin ‘donne nou lekor bann coup’ pou ki nou kapav reste fidele ar Jéhovah. (1 Corinthiens 9:27) En realité, c’est kan nou pa pé lutté ki nou bizin tracassé!

21. Couma nou kapav gagne la victoire dan nou la guerre spirituel?

²¹ En plus, nou pa kapav gagne sa la guerre-la par nou prop la force. A cause sa, Paul rappel nou ki li necessaire ki nou prié Jéhovah “dan tou l’occasion, guidé par l’esprit.” En mem temps, nou bizin ecoute Jéhovah kan nou etudié so Parole ek frequente nou bann compagnon “soldat” dan tou l’occasion, parski nou pa tousel dan sa la guerre-la! (Philémon 2; Hébreux 10:24, 25) Bann ki fidele dan tou sa bann domaine-la pa pou zis gagne la victoire mais zot pou kapav aussi defann bien zot la foi kan bann dimoune critik zot.

22, 23. (a) Kifer nou bizin touletan paré pou defann nou la foi, ek ki bann question nou bizin demann nou-mem? (b) Ki sujet nou pou examiné dan prochain chapitre?

²² Jésus ti dire: “Parski zot pa faire partie dan le monde, . . . le monde ena la haine pou zot.” (Jean 15:19) Alors, bann chretien bizin touletan paré pou defann zot la foi ek pou faire sa avek respé ek douceur. (1 Pierre 3:15) Demann ou-mem: ‘Eski mo comprend kifer bann Témoins de Jéhovah prend parfois enn position ki contraire ar seki la majorité dimoune pensé? Si mo bizin trouve-moi dan sa qualité situation-la, eski mo cent pour cent sur ki seki la Bible ek seki l’esclave fidele et avisé dire li la verité? (Matthieu 24:45; Jean 17:17) Ek kan mo bizin faire seki bien devant lizié Jéhovah, eski mo paré, pa zis pou montré ki mo different, mais aussi ki mo fiere ki mo different?’—Psaume 34:2; Matthieu 10:32, 33.

²³ Mais souvent, Satan testé nou desir pou reste separé ar le monde dan bann fason bien sournois. Par exemple, pareil couma nou ti mentionné avant, Satan le Diable rod attire bann serviteur Jéhovah dan le monde par bann divertissement ki le monde offert. Couma nou kapav choisir bann bon divertissement ki pou permette nou detann-nou ek en mem temps garde enn conscience clair? Nou pou examine sa dan prochain chapitre.