Gard Linite dan Lasanble

Kan nou ansam avek nou bann frer ek ser, nou ena mem santiman ki Lerwa David, ki ti dir: “Sa ki enn plezir sa! Lepep Bondie viv dan larmoni ek lakorite!” (Psom 133:1) Linite ki ena parmi nou, li pa’nn arive enn kout koumsa. Sakenn parmi nou bizin fer zefor pou ki ena linite.

1. Ki kitsoz ki extraordiner parmi pep Bondie?

Si enn zour ou asiste renion dan enn lot pei, kitfwa ou pa pou konpran lang ki zot pe koze, me kanmem sa ou pou santi ou alez. Kifer? Parski partou dan lemond, nou servi bann mem piblikasion pou etidie Labib. Ek nou tou nou fer zefor pou montre ki nou kontan nou kamarad. Ninport kotsa nou reste, nou tou nou “loue nom Zeova, pou ador Li dan linite.”​—Sofoni 3:9, not.

2. Ki ou kapav fer pou ki ena linite?

“Kontan touzour zot kamarad ar enn leker kler.” (1 Pier 1:22) Kouma ou kapav swiv sa konsey-la? Olie ki ou res konsantre lor defo ki lezot ena, rod zot bann zoli kalite. Olie ki ou frekant zis bann dimounn ki parey kouma ou ek ki kontan bann mem kitsoz ki ou, esey aprann konn bann frer ek ser ki diferan avek ou. Ou kapav osi fer zefor pou tir tou tras prezize ki kitfwa ou ena.​—Lir 1 Pier 2:17.a

3. Ki ou kapav fer si ou’nn gagn enn problem avek enn frer ouswa enn ser?

Li vre ki nou viv dan linite, me fode pa nou bliye ki nou inparfe. Alor, li kapav arive ki nou desevwar ouswa bles sakenn nou kamarad. Akoz sa, Labib ankouraz nou pou kontign “donn zot pardon; kouma Lesegner finn pardonn zot, zot ousi pardone.” (Lir Kolosien 3:13.) Nou pa kapav konte ki kantite fwa nou’nn bles Zeova, ek pourtan Li finn pardonn nou. Alor, Li atann ki nou pardonn nou bann frer ek ser. Si ou realize ki ou finn bles enn kikenn, fer premie pa pou fer lape.​—Lir Matie 5:23, 24.b

ANOU GET INPE PLIS

4. Sirmont bann prezize

Nou anvi kontan tou nou bann frer ek ser. Me kitfwa, nou gagn difikilte pou kontan bann dimounn ki diferan ar nou. Ki kitsoz kapav ed nou? Lir Zistwar Bann Apot 10:34, 35, ek apre sa, get sa bann kestion-la ansam:

• Zeova aksepte ki bann dimounn ki sorti dan diferan nasion vinn so bann Temwin. Kouma ou kapav imit Li dan fason ki ou konsider bann dimounn ki diferan ar ou?

• Ki prezize ena parti kot ou reste ek kifer ou anvi rezet zot?

Lir 2 Korintien 6:11-13, ek apre sa, get sa kestion-la ansam:

• Dapre ou, kouma ou kapav vinn pli pros avek bann frer ek ser ki diferan ar ou?

5. Pardonn avek tou ou leker ek fer lape

Zeova pre pou pardonn nou, mem si zame nou pa pou bizin pardonn Li. Lir Psom 86:5, ek apre sa, get sa bann kestion-la ansam:

• Ki sa verse-la aprann nou lor pardon Zeova?

• Kifer ou rekonesan ki Zeova dispoze pou pardone?

• Dan ki sitiasion li kapav difisil pou gard lape avek lezot?

Kouma nou kapav imit Zeova ek kontign viv dan linite avek nou bann frer ek ser? Lir Proverb 19:11, ek apre sa, get sa kestion-la ansam:

• Kan enn kikenn agas ou ouswa bles ou, ki ou kapav fer pou amelior bann kitsoz?

Parfwa, nou bles lezot. Kan sa arive, ki nou bizin fer? Zwe VIDEO-la, ek apre sa, get sa kestion-la ansam:

VIDEO: Nou Gagn Bann Bienfe kan Nou Fer Lape (6:01)

• Dan sa video-la, ki sa ser-la ti fer pou fer lape?

6. Rod bann zoli kalite ki to bann frer ek ser ena

Plis nou vinn pros avek nou bann frer ek ser, plis nou trouv zot bann zoli kalite ek zot bann defo. Kouma nou kapav konsantre nou lor zot bann zoli kalite? Zwe VIDEO-la, ek apre sa, get sa kestion-la ansam:

VIDEO: Vinn Pli Zoli! (5:10)

• Ki kitsoz kapav ed ou pou trouv bann zoli kalite ki ou bann frer ek ser ena?

Zeova konsantre Li lor nou bann zoli kalite. Lir 2 Kronik 16:9a, ek apre sa, get sa kestion-la ansam:

• Ki ou resanti kan ou kone ki Zeova konsantre Li lor ou bann zoli kalite?

SEKI NOU’NN APRANN

Ou kapav ede pou ki ena linite dan lasanble kan ou pardonn lezot, ek montre tou bann frer ek ser ki ou kontan zot.

Eski Ou Rapel?

• Kouma ou kapav sirmont bann prezize?

• Ki ou pou fer si ou gagn enn problem avek enn frer ouswa enn ser?

• Kifer ou anvi pardonn lezot parey kouma Zeova pardonn nou tou?

DEKOUVER

Aprann kouma enn lexanp ki Zezi ti servi kapav ed nou pou evit ziz lezot.

Tir Poto ki dan To Lizie (6:56)

Eski mo bizin demann pardon mem si mo panse mo pa’nn fer nanye demal?

“Demann Exkiz​—Solisyon pu Fer Lape” (Latour Degard, 1^e Novam 2002)

Gete kouma sertin finn aprann pou pa fer preferans dan fason ki zot tret bann dimounn.

Pa Ziz Lezot par Zot Laparans (5:06)

Gete kouma ou kapav regle bann problem personel avek lezot avan ki sa kree problem dan lasanble.

“Regle Bann Dezakor Avek Amour” (Latour Degard, Me 2016)