Eski tou bann religion zot bon?

NOU vive dan enn le monde kot ena beaucoup religion. Dapré enn sondage ki’nn fek faire, inn trouvé ki ena 19 grand religion ek environ 10,000 lezot religion. Tou sa varieté religion-la donne bann dimoune bann choix ki jamais zot finn ena avant. Alors, eski religion ki ou choisir li important?

Certain dimoune dire ki different religion zot couma different chemin ki amenn vers enn sel montagne. Pou zot, sa pa faire okenn difference ki chemin zot choisir, parski tou sa bann chemin-la amenn dan enn sel place. Dapré zot si ena enn sel Bondié Tout-Puissant, alors finalement, tou bann religion bizin amenn vers Li.

Eski tou chemin amenn vers Bondié?

Ki Jésus Christ, enn parmi bann enseignant religieux ki pli respecté dan l’Histoire, ti dire lor sa sujet-la? Li ti dire so bann disciple: “Rente par la porte ki tipti.” Kifer? Jésus ti expliké: “La porte ki amenn vers la mort li large, ek chemin ki conduire la-bas li facile. Beaucoup dimoune passe par la. Mais la porte ki amenn vers la vie li serré, ek chemin ki amenn la-bas li difficile. Bien tigit dimoune ki trouve sa.”—Matthieu 7:13, 14, Parole de Vie.

Eski Jésus vrai-mem ti pé dire ki certain religion amenn “vers destruction”? Ou-soit eski li ti pé enseigné ki bann ki pena enn religion zot lor chemin ki grand, alors ki bann ki croire dan Bondié, n’importe ki religion zot été, zot lor chemin ki serré ki amenn vers la vie?

Desuite apré ki li ti dire ki ena zis deux chemin, Jésus ti dire: “Faire attention ar bann fausse prophete. Letan zot koz ar ou, zot prend l’apparence bann mouton, mais en realité, zot bann loulou bien dangereux.” (Matthieu 7:15, Bible du Semeur) Plitar li ti dire: “Pa tou dimoune ki dire moi: Seigneur, Seigneur, ki pou rente dan Royaume ki dan le ciel, mais zis bann ki faire volonté mo Papa ki dan le ciel.” (Matthieu 7:21, Bible en français courant) Enn kikenn ki nou appel enn prophete ou-soit ki dire ki Jésus so “Seigneur,” li raisonnable pou dire ki sa dimoune-la li croire dan Bondié ou-soit ki li ena enn religion. Alors, li clair, ki Jésus ti pé averti nou ki pa tou religion ki bon ek pa tou enseignant religieux ki nou kapav faire confiance.

Eski li possible pou reconette sa chemin ki serré-la?

Si tou religion pa amenn vers Bondié, couma ou kapav trouve chemin ki serré ki amenn vers la vie parmi sa bann millier choix ki ena-la? Anou guette enn l’exemple: Maziné ki ou finn perdi dan enn grand la ville. Ou decide pou demann l’aide. Enn dimoune avek assurance dire ou al dan direction l’est. Enn lot dimoune insisté pou ki ou al dan direction l’ouest. Enn lot dire ou choisir n’importe ki direction ou envie. Finalement, enn lot dimoune prend enn map ki ou kapav faire confiance ek montré ou chemin ki bon. Apré sa li donne ou sa map-la pou ki ou kapav examine li lor ou chemin. Eski ou pa pou ena plus confiance ki ou pou reussi arrive dan place kot ou pé allé?

Alors, li pareil, kan nou bizin choisir ki bon chemin pou prend kan sa concerne religion. Nou bizin enn map spirituel lor ki nou kapav compté. Eski enn map coumsa existé? Oui, li existé. Sa map-la c’est la Bible, ek li dire: “Tou l’Ecriture li inspiré par Bondié ek li utile pou enseigné, pou montré ki enn kitsoz li fausse, pou corrigé ek pou aprann pou amenn enn la vie ki en accord avek volonté Bondié.”—2 Timothée 3:16, Bible du Semeur.

Kitfois ou ena dan ou langue enn traduction la Bible ki ou kapav servi couma enn map spirituel. Bann Témoins de Jéhovah ki publié sa magazine-la, publié enn traduction la Bible ki ou kapav faire confiance ki appel Les Saintes Écritures Traduction du monde nouveau. Mais, si ou pa enn Témoin de Jéhovah, kitfois ou pou prefere servi lezot traduction la Bible pou examine sujet ki identifié vrai ek fausse religion. Ala kifer, bann verset ki’nn servi dan sa bann lartik-la, sorti dan plusieurs traduction la Bible ki bien respecté par lezot religion.

A mesure ki ou lire bann prochain lartik, compare seki ou koné avek seki la Bible dire. Rappel bann parole Jésus concernant couma nou pou faire difference entre vrai ek fausse religion. Li ti dire: “Tou bon pié produire bann bon fruit mais enn mauvais pié li produire bann mauvais fruit. Enn bon pié pa kapav produire mauvais fruit, ni enn mauvais pié pa kapav produire bon fruit.” (Matthieu 7:17, 18, Bible Segond) Anou guette zis trois parmi bann bon fruit ki la Bible mentionné pou identifié sa ‘bon pié-la.’

[L’encadré lor page 3]

La Bible li couma enn map lor ki nou kapav compté, ki kapav aide enn dimoune trouve bon religion